केंद्रीय कृषि अउ किसान मंत्रालय ह केहे हे कि कोनो भी पात्र किसान परिवार ए योजना ले वंचित झन राहय एखर बर राज्य अउ जिला मन ल नियमित रूप ले पात्रता के जांच करके लाभार्थी मन ल जोड़े जावत हे।
खबर के मुताबिक छत्तीसगढ़ म ए योजना के अंतर्गत पाछू फरवरी महिना म बीसवां किस्त के रूप म पच्चीस लाख सैंतालीस हजार ले जादा किसान मन ल पांच सौ तिरपन करोड़ रूपिया के सम्मान निधि दे गे रिहीस।
सहायक प्राध्यापक-भर्ती
छत्तीसगढ़ के शासकीय महाविद्यालय म सात सौ रिक्त पद म भर्ती करे जाही। एमा छै सौ पच्चीस सहायक प्राध्यापक, पच्चीस क्रीड़ा अधिकारी अउ पचास गं्रथपाल के पद सामिल हे। उच्च शिक्षा विभाग के प्रस्ताव म ए पद म भर्ती बर वित्त विभाग ह मंजूरी दे देहे। मुख्यमंत्री विष्णुदेव साय ह किहीन कि राज्य सरकार ह पाछू बीस महिना म आने-आने विभाग के माध्यम ले दस हजार शासकीय नौकरी दे हवय। विभाग मन म सरलग भर्ती चलत हे। इही कड़ी म कालेज मन म प्राध्यापक के भर्ती के रद्दा खुले हे।
सुकमा-वार्तालाप
पत्र सूचना कार्यालय रईपुर डहार ले सुकमा म ‘‘नक्सल मुक्त भारतः समृध्दि और एकता की राह‘‘ बिसय म वार्तालाप कार्यसाला के आयोजन करे गीस। कारीकरम म केंद्रीय आवासन अउ सहरी कार्य राज्यमंत्री तोखन साहू ह किहीन कि बस्तर के धरती, जउन ह कभू नक्सल हिंसा के पहिचान रिहीस, ओहा अब विकास अउ समृध्दि के नवा कहानी लिखत हे। श्री साहू ह किहीन कि केंद्र सरकार के लक्ष्य मार्च दू हजार छब्बीस तक देस ल नक्सलवाद ले मुक्त कराय के हे। ओमन किहीन कि नक्सलवाद सिरिफ कानून व्यवस्था बर चुनौती नइ हे, फेर सामाजिक, आर्थिक, पिछ़ड़ापन अउ विकास के कमी ले जुड़े एक ठन बिसय घलो हे। राज्य सरकार ह पुर्नवास अउ आत्मसमर्पण के नीति लागू करे हे, जेमा हिंसा के रद्दा छोड़इया मन ल आर्थिक मदद, शिक्षा, रोजगार, स्वास्थ्य अउ सामाजिक सुरक्षा ले जोड़े जावत हे।
महिला सशक्तिकरण-सम्मेलन
आंध्रप्रदेश के तिरूपति म राखे गे दू दिन के प्रथम राष्ट्रीय महिला सशक्तिकरण सम्मेलन के आज समापन होगे। सम्मेलन के समापन सत्र म लोकसभा अध्यक्ष ओम बिरला अउ आंध्रप्रदेस के राज्यपाल अब्दुल नजीर सामिल होइन। छत्तीसगढ़ ले ए सम्मेलन म विधानसभा के महिला अउ लइका मनके कल्याण बर बने समिति के सभापति रेणुका सिंह, सदस्य अनिला भेड़िया, शेषराज हरवंश अउ संगीता सिन्हा ह घलो भाग लीन।
गंगरेल बांध-मछली पालन
गंगरेल बांध डुबान क्षेत्र के मछुआ सहकारी समिति मन ल फेर मछली पालन के अधिकार मिले हे। एखर बर प्रभावित समिति के सदस्य मन ह मुख्यमंत्री विष्णुदेव साय ले भेंट करके उंखर आभार जतइन। ए दउरान मुख्यमंत्री ह ग्रामीण मनके मांग म डुबान क्षेत्र म जन सुविधा बर एक ठन एम्बुलेंस देवाय के अउ राष्ट्रीय बैंक के साखा खोले जाय के घोसना करीन। ए मउका म गंगरेल डुबान क्षेत्र के धमतरी, कांकेर अउ बालोद के ग्यारा ठन मछुआ सहकारी समिति के सदस्य मन मौजूद रिहीन।
सेवा पर्व-विशेष कार्यक्रम
प्रधानमंत्री नरेंद्र मोदी के अगुवई म केंद्र के एनडीए सरकार ग्यारा बछर पूरा कर लेहे। ए मउका म पंद्रह सितंबर ले दू अक्टूबर तक सेवा पर्व मनाय जावत हे। ए दउरान जनहित म साहसिक सुधार के माध्यम ले गर्वनेंस ल बदले बर कतकोन क्रांतकारी पहल करे गे हवय। प्रादेशिक समाचार एकांश आकाशवाणी रईपुर डहार ले ए बिसय म काली बिहनिया नौ बजे ले विशेष कारीकरम के प्रसारण करे जाही। ए बिसेस श्रृंखला ‘‘सेवा पर्व‘‘ के पहिली कड़ी म छत्तीसगढ़ के पूर्व राज्य निर्वाचन आयुक्त अउ देस के जाने-माने सामाजिक विश्लेषक डॉक्टर सुशील त्रिवेदी ले लेगे भेंटवार्ता के प्रसारण करे जाही।
न्यायिक अधिकारी-सेमिनार
छत्तीसगढ़ राज्य न्यायिक अकादमी डहार ले बस्तर संभाग न्यायिक अधिकारी मन बर जगदलपुर म एक दिवसीय संभागीय न्यायिक सेमीनार के आयोजन करे गीस। छत्तीसगढ़ उच्च न्यायालय के मुख्य न्यायाधीश रमेश सिन्हा ह वर्चुअल माध्यम ले सेमिनार के उद्घाटन करीन। मुख्य न्यायाधीश ह न्यायिक अधिकारी मन ल किहीन कि आज के समय म न्याय पालिका ले लोगन ल बहुत जादा अपेक्षा हे। ए सेमिनार सिरिफ सीखे के मंच नइ हे, फेर न्याय, निष्पक्षता अउ विधि के शासन बर हमर सामूहिक प्रतिबध्दता के पुष्टि घलो हे।
ए सेमिनार म बस्तर संभाग के बस्तर, कांकेर, दंतेवाड़ा अउ कोंडागांव जिला के तिरालीस झन न्यायिक अधिकारी मन ह भाग लीन।
माओवादी-आत्मसमर्पण
गरियाबंद जिला म आज आठ लाख के एक झन इनामी महिला माओवादी ह आत्मसमर्पण करे हे। पुलिस अधीक्षक निखिल राखेचा ह बतइन कि महाराष्ट्र के गढ़चिरौली के रहइया आत्मसमर्पित माओवादी जानसी पाछू बीस बछर ले नक्सल संगठन म सक्रिय रिहीस अउ नगरी एरिया कमेटी के सचिव रिहीस, उंखर उपर कतकोन हिंसक वारदात म सामिल रहय के आरोप हे।
दूरदर्शन स्थापना दिवस
दुरदर्शन के स्थापना के छैंसठ बछर आज पूरा होगे। भारत म पंद्रह सितंबर उन्नीस सौ उनसठ म दूरदर्शन ले प्रसारण के युग सुरू होय रिहीस। पूर्व राष्ट्रपति राजेन्द्र प्रसाद ह आजेच के दिन पहिली प्रसारण के उद्घाटन करे रिहीन।
ए मउका म राजधानी रईपुर के दूरदर्शन केंद्र म स्थापना दिवस कारीकरम के आयोजन करे गीस, जेमा मुख्यमंत्री विष्णुदेव साय सामिल होइन। ओमन दूरदर्शन परिवार ल बधई अउ सुभकामना दीन। ओमन किहीन कि दूरदर्शन के छैंसठ बछर के ए यात्रा यादगार हवय।
मुख्यमंत्री ह किहीन कि दूरदर्शन ह मनोरंजन के संगेसंग हमन ल वैचारिक रूप म घलो समृध्द करे म बड़े भूमिका निभाय हे। ओमन किहीन कि समाचार अउ भाषा के गरिमा बनाय राखे म दूरदर्शन के सुघ्घर परंपरा रेहे हे। मुख्यमंत्री ह किहीन कि दूरदर्शन के प्रादेशिक केंद्र मन ह स्थानीय कलाकार मन ल राष्ट्रीय मंच दे हवय।
ए मउका म दूरदर्शन के कलाकार मन डहार ले छत्तीसगढ़ी लोकनृत्य, गीत, शास्त्रीय संगीत अउ नृत्य के मनमोहक प्रस्तुति दे गीस। कलाकार मन ह गौर नृत्य, बांस गीत, जंवारा नृत्य, सुआ नृत्य अउ गौरी-गौरा जइसन लोक नृत्य प्रस्तुत करीन। कारीकरम म संस्कृति मंत्री राजेश अग्रवाल अउ रईपुर दूरदर्शन केंद्र के उपमहानिदेशक संजय कुमार मिश्रा घलो मौजूद रिहीन।
दुर्घटना-मौत
उत्तर प्रदेस के जौनपुर जिला म वाराणसी-लखनऊ राजमार्ग म होय बस दुर्घटना म छत्तीसगढ़ के चार श्रध्दालु मनके मउत होगे। उहें, इही घटना म छै झन गंभीर रूप ले घायल घलो होय हे। मुख्यमंत्री विष्णुदेव साय ह ए घटना बर शोक जतइन हे। मुख्यमंत्री ह सोसल मीडिया म किहीन हे कि बस दुर्घटना म कांकेर अउ राजनांदगांव जिला के चार झन श्रध्दालु मनके मउत अउ छै झन यात्री मनके गंभीर रूप ले घायल होय के समाचार मिले हे। मुख्यमंत्री ह संबंधित जिला प्रशासन ल पीड़ित परिवार ल हर संभव मदद, घायल मनके इलाज अउ मृतक मनके पार्थिव सरीर ल उंखर घर तक पहुंचाय के बेवस्था करे के निरदेस दीन हे।
अउ अब पेस हे मौसम के हाल…
प्रदेस म अवइया चौबीस घंटा के दउरान कतकोन जघा म हल्का ले मध्यम बरसा होय के संभावना हे। उहें, एक-दू जघा म गरज-चमक के संग आकाशीय बिजली गिरे के चेतावनी घलो दे गे हवय। मौसम विभाग के अनुसार बरसा के क्षेत्र उत्तर अउ मध्य छत्तीसगढ़ रइही।