राज्य विधिक सेवा प्राधिकरण कोति ले प्रदेस के सबो जिला अउ व्यवहार न्यायालय म आज राष्ट्रीय लोक अदालत के आयोजन करे गीस। लोक अदालत म मोटर गाड़ी दुर्घटना दावा ले जुड़े प्रकरण, चेक बाउंस, जल कर, संपत्ति कर, राजस्व प्रकरण, ट्रैफिक चालान, बैंक, बिजली के प्री-लिटिगेशन प्रकरण समेत आने-आने मामला के समाधान आपसी राजीनामा ले करे गीस।
डेंटल कॉन्फ्रेंस
मुख्यमंत्री विष्णुदेव साय ह किहीन हे कि प्रदेस के तीन करोड़ जनता के आरोग्य के संग विकसित छत्तीसगढ़ के सपना ल साकार करबो। राज्य सरकार ह पाछू बीस महिना म स्वास्थ्य अधोसंरचना ल मजबूत करत हुए दूरिहा जघा तक स्वास्थ्य सेवा ल पहुंचाय के काम करे हे। श्री साय ह आज रईपुर म राखे गे तीन दिनी डेंटल कॉन्फ्रेंस के सुरूआती कारीकरम म गोठियात हुए ए बात किहीन। मुख्यमंत्री ह किहीन कि राज्य सरकार ह स्वास्थ्य ल पहिली प्राथमिकता दे हे। प्रदेस म पांच ठन नवा मेडिकल कालेज के मंजूरी दे गेहे। संगेसंग फिजियोथेरेपी, नर्सिंग अउ मदर-चाइल्ड अस्पताल जइसन संस्था के स्थापना करे जावत हे।
खेल-वर्चुअल बैठक
केंद्रीय खेल मंत्री मनसुख मांडविया के अध्यक्षता म काली नई दिल्ली म ‘‘खेल और युवा विकास से संबंधित चुनौतियां और अवसर‘‘ बिसय उपर बइठका राखे गीस। ए बइठका म उपमुख्यमंत्री अरूण साव वर्चुअल रूप म भाग लीन। बइठका म युवा मन ल आने-आने खेल ले जोड़े अउ देस म खेल संस्कृति ल बिकसित करे बर खेलो इंडिया के अंदर नवा युवा कल्याण योजना सुरू करे उपर गोठबात होइस। संगेसंग राज्य मन म खेल विश्वविद्यालय के स्थापना, भारतीय खेल प्राधिकरण यानी साई के क्षेत्रीय केंद्र के संख्या म बढ़ोत्तरी करे, खेल अधोसंरचना के रखरखाव अउ मरम्मत बर बिसेस बजट के प्रावधान करे के संगेसंग एकीकृत डिजिटल स्पोर्ट्स प्लेटफॉर्म के विकास जइसन जरूरी काम म घलो बिचार करे गीस।
मुख्यमंत्री-जीएसटी
मुख्यमंत्री विष्णुदेव साय ह किहीन हे कि हाले म केंद्र सरकार कोति ले जीएसटी के स्लैब ल पांच अउ अट्ठारा प्रतिसत कर दे गेहे। एखर ले व्यापार अउ किसानी के क्षेत्र ल फायदा मिलही अउ व्यापार ह सरल होही। ओमन किहीन कि एहा प्रधानमंत्री नरेंद्र मोदी के दूरदृष्टि ल देखाथे, जेन ह भारत ल आर्थिक रूप ले अउ जादा मजबूत बनाही।
मुख्यमंत्री ह किहीन कि किसानी के उपकरण मन अब जीएसटी म पांच प्रतिसत के स्लैब म हवय, जेखर ले प्रदेस के किसान मन ल सीधा फायदा मिलही। संगेसंग जरूरत के समान के दाम कम होय ले प्रदेसवासी मन ल राहत मिलही।
समीक्षा-बैठक
उपमुख्यमंत्री अउ नगरीय प्रशासन मंत्री अरूण साव ह आज नवा रायपुर म विभागीय अधिकारी मनके बइठका लीन। ए मउका म श्री साव ह अधिकारी मन ल समय सीमा म योजना मनके क्रियान्वयन के निरदेस दीन। ओमन गोधाम योजना बर जल्दी कार्ययोजना तियार करे बर किहीन। संगेसंग नगरीय निकाय मन म बनत अटल परिसर अउ नालंदा परिसर के निर्माण म घलो तेजी लाय के निरदेस दीन। ओमन बतइन कि केंद्र सरकार के योजना ‘‘वीमेन फॉर ट्री‘‘ म नगरीय निकाय मन म एक लाख छियासठ हजार पउधा लगाय जाही।
स्वच्छता-पखवाड़ा
प्रदेस के सबो ग्राम पंचायत म अवइया सत्रह सितंबर ले स्वच्छता पखवाड़ा मनाय जाही। ए पखवाड़ा दू अक्टूबर तक चलही। छत्तीसगढ़ स्वच्छ भारत मिसन-ग्रामीण के संचालक डाक्टर अश्वनी देवांगन ह बतइन कि चौदह सितंबर तक अइसन, सबो ग्राम पंचायत ल चिन्हित करे जाही, जिंहा साफ-सफाई के जरूरत हे।
सीपीए-सम्मेलन
विधानसभा अध्यक्ष डाक्टर रमन सिंह बेंगलूरू म राखे गे राष्ट्र कुल संसदीय संघ-सीपीए के ग्यारहवां सम्मेलन म सामिल होइन। ए मउका म डाक्टर सिंह ह ‘‘संवाद और चर्चा-जन विश्वास का आधार, जन आकांक्षाओं की पूर्ति का माध्यम है‘‘ बिसय उपर अपन बिचार रखिन। ओमन किहीन कि संसद अउ विधानसभा कोनो भी लोकतांत्रिक प्रणाली के रीढ़ होथे। एमन बस कानून बनाय के मसीन नइ हे, फेर अइसने मंच हे, जिंहा जनता के बिस्वास अउ आकांक्षा ल आकार दे जाथे। विधानसभा अध्यक्ष ह किहीन कि विधायी संस्था मन म संवाद अउ चर्चा बस औपचारिक प्रक्रिया नइ हे, फेर लोकतंत्र के आत्मा हवय। लोकतंत्र तभे फलथे-फूलथे जब विधायी संस्था मन म खुला मन ले गोठबात अउ तर्क के संग चर्चा होथे।
स्वास्थ्य मंत्री-कॉन्फ्रेंस
स्वास्थ्य मंत्री श्यामबिहारी जायसवाल आज नवा रायपुर के श्री सत्य सांई अस्पताल म राखे गे इकतीसवां स्टूडेंट नर्सिंग एसोसिएसन ऑफ इंडिया के बायनिकल कॉन्फ्रेंस म सामिल होइन। ए मउका म श्री जायसवाल ह किहीन कि नर्सिंग बस एक काम नइ हे, फेर दुलार अउ समर्पण के परिचायक हे। ओमन नर्स मन ल स्वास्थ्य बेवस्था के रीढ़ बतात हुए किहीन कि नर्स मन अपन जान के परवाह करे बिना लोगन के सेवा करथे। ए मउका म स्वास्थ्य मंत्री ह श्री सत्य सांई अस्पताल म दिल के निसुल्क ऑपरेसन के बाद चार झन लइका ल ओमन के घर भेजिन।
माओवादी-आत्मसमर्पण
माओवादी मनके दक्षिण सब जोनल ब्यूरो के अगुआ सुजाता ह आज तेलंगाना के राजधानी हैदराबाद म राज्य के डीजीपी अउ पुलिस अधिकारी मनके आगू आत्म समर्पण कर देहे। सुजाता उपर एक करोड़ रूपिया के इनाम घोसित रिहीस। ओहा पश्चिम बंगाल म मारे गे नक्सली कमांडर किशन जी के गोसाइन हे।
ऐति, बीजापुर जिला म काली मारे गे दू माओवादी मनके पहिचान कर ल े गेहे। एमन उपर अठ-अठ लाख रूपिया के इनाम घोसित रिहीस। ए दूनों हिड़मा पोडियाम अउ मुन्ना मड़कम नक्सली संगठन पीपीसीएम के सदस्य रिहीन अउ इंद्रावती क्षेत्र म सक्रिय रिहीन।
अनुसूचित जनजाति आयोग अध्यक्ष-दौरा
राष्ट्रीय अनुसूचित जनजाति आयोग के अध्यक्ष अंतर िंसंह आर्य काली चौदह सितंबर ले तीन दिनी प्रवास म बिलासपुर आही। अपन प्रवास के पहिली ले श्री आर्य ह बिलासपुर म अनुसूचित जनजाति वर्ग के प्रतिनिधि, सामाजिक संगठन के प्रतिनिधि, सांसद अउ विधायक मन संग भेंट करही। उहें, श्री आर्य पंद्रह सितंबर के सिकलसेल एनीमिया स्वास्थ्य जांच सिविर अउ युवा संवाद कारीकरम म सामिल होही। ओमन एसईसीआर रेलवे जोन बिलासपुर के अनुसूचित जनजाति वर्ग के अधिकारी अउ कर्मचारी मन संग बइठका करही। सोलह सितंबर के ओमन नियमित हवाई जहाज ले नई दिल्ली लहुट जही।
आदि कर्मयोगी अभियान
दंतेवाड़ा जिला के सबो ग्राम पंचायत म अवइया सत्रह सितंबर ले आदि कर्मयोगी अभियान चलाय जाही। ए अभियान दू अक्टूबर तक चलही। ए बारे म कलेक्टर कुणाल दुदावत ह बड़का अधिकारी मन संग बइठका करीन। बइठका म कलेक्टर ह किहीन कि ए अभियान म जनजाति गांव ल आत्मनिर्भर, समतामूलक अउ बिकास योजना मन ल पूरा करे बर सशक्त बनाय जाही। संगेसंग दवई-पानी, पढ़ई-लिखई, सड़क, अवई-जवई, घर-कुरिया, पानी, बिजली जइसन सेवा के उपलब्धता ल पक्का करे उपर जोर दे जाही। बइठका म जिला स्तरीय नोडल अधिकारी मनके ड्यूटी लगाके ओमन ल काम सौंपे गीस।
अउ अब थोरकुन समाचार सार म –
– प्रदेस म नीट यूजी के तहत एमबीबीएस अउ बीडीएस म भर्ती बर दूसरइया चरण के काउंसलिंग आज ले सुरू हो गेहे। एमा पात्र अभ्यर्थी मन बर नवा पंजीयन के आखिरी तारीख सत्रह सितंबर होही।
– जांजगीर-चांपा जिला म पइसा डबल करे के झांसा देके ठगी करइया चिटफंड कंपनी के दू झन सेयर होल्डर ल सिटी कोतवाली पुलिस ह गिरफ्तार करे हे। ए मामला म छै झन आरोपी पहिली ही पुलिस हिरासत म हे।