उपराष्ट्रपति-शपथ ग्रहण
राष्ट्रपति द्रौपदी मुर्मु ह आज राष्ट्रपति भवन म आयोजित सपथ ग्रहण समारोह म सी.पी. राधाकृष्णन ल भारत के उपराष्ट्रपति पद के सपथ दिलाइन। ए मउका म प्रधानमंत्री नरेंद्र मोदी, पूर्व राष्ट्रपति रामनाथ कोविंद, पूर्व उपराष्ट्रपति जगदीप धनखड़ अउ अमित शाह, राजनाथ सिंह, जे.पी. नड्डा, पीयूष गोयल अउ नितिन गडकरी समेत कई झन केंद्रीय मंत्री मौजूद रिहीन।
सपथ ग्रहण के बाद उपराष्ट्रपति सी.पी.राधाकृष्णन ह राजघाट म महात्मा गांधी ल पुष्पांजलि अर्पित करीन। ओमन सदैव अटल म पूर्व प्रधानमंत्री अटल बिहारी वाजपेयी ल घलो श्रध्दांजलि दीन।
ए महिना के नौ तारीख के होय उपराष्ट्रपति चुनाव म श्री राधाकृष्णन ल चार सौ बावन मत मिले रिहीस। ओमन बी. सुदर्शन रेड्डी ल एक सौ बावन मत के अंतर ले हराय रिहीन।
माओवादी-मुठभेड़
बीजापुर जिला म सुरक्षाबल अउ माओवादी मनके बीच होय मुठभेड़ म दू झिन माओवादी मारे गेहे। पुलिस अधीक्षक जितेन्द्र कुमार यादव ह बतइन कि जिला के दक्षिण-पश्चिम इलाका म माओवादी मनके मौजूदगी के सूचना के आधार म सुरक्षाबल के जवान मन ल रवाना करे गे रिहीस। इही दउरान जवान मन उपर माओवादी मन फायरिंग सुरू कर दीस। जवान मन घलो जवाबी कार्रवाई करीन। मुठभेड़ के बाद सुरक्षाबल कोति ले घटना स्थल के तलासी के दउरान दू झिन माओवादी के शव बरामद करे गीस। संघरा थ्री नॉट थ्री रायफल समेत दूसर हथियार अउ बिस्फोटक सामग्री बरामद करे गेहे।
छात्रावास-कार्रवाई निर्देश
आदिमजाति विकास आयुक्त डॉक्टर सारांश मित्तर ह प्रदेस के जम्मों विभागीय सहायक आयुक्त मन ल पत्र लिखके आश्रम-छात्रावास मन म अनाधिकृत रूप ले राहत बाहरी मनखे मन उपर तत्काल निष्कासन के कार्रवाई करे के निरदेस दीन हे। संघरा आश्रम-छात्रावास मनके नियमित रूप ले निरीक्षण करे बर घलो कहे गेहे। पत्र म कहे गेहे कि छात्रावास ले बाहरी मनखे अउ पूर्व विद्यार्थी मन के निष्कासन करे बर स्थानीय प्रशासन अउ पुलिस के सहायता घलो ले जा सकत हे। भविष्य म अनाधिकृत मनखे मनके छात्रावास म पाय जाय म संबंधित अधिकारी मनके खिलाफ अनुशासनात्मक कार्रवाई करे जाही।
अनुसूचित जनजाति आयोग अध्यक्ष-दौरा
राष्ट्रीय अनुसूचित जनजाति आयोग के अध्यक्ष अंतर सिंह आर्या चौदह सितंबर ले तीन दिन के प्रवास म बिलासपुर आही। ओमन चौदह सितंबर के बिलासपुर म अनुसूचित जनजाति वर्ग के प्रतिनिधि, सामाजिक संगठन के प्रतिनिधि मंडल, सांसद अउ विधायक मनले भेंट करही। उहें, श्री आर्या पंद्रह सितंबर के सिकलसेल एनीमिया, स्वास्थ्य जांच सिविर अउ युवा संवाद कारीकरम म सामिल होही। ओमन एसईसीआर रेलवे जोन बिलासपुर के अनुसूचित जनजाति वर्ग के कर्मचारी अउ अधिकारी मन संग अलग-अलग बइठका करही। अगला दिन सोलह सितंबर के ओमन नियमित विमान ले नई दिल्ली लहुट जाही।
बालोद-बाल विवाह उन्मूलन
महिला अउ बाल विकास विभाग डहार ले बाल विवाह उन्मूलन के तहत बालोद जिला के जम्मों चार सौ छत्तीस ग्राम पंचायत अउ नौ ठिन नगरीय निकाय बाल विवाह मुक्त घोसित करे जाय के प्रक्रिया म सामिल करे गेहे। विभाग के जिला कारीकरम अधिकारी ह बतइन कि पाछू दू बछर म जिला म कोनो भी ग्राम पंचायत अउ नगरीय निकाय ले बाल विवाह के कोनो प्रकरण नइ मिले हे। प्रमाणिक दस्तावेज के समीक्षा के बाद ए ग्राम पंचायत अउ नगरीय निकाय मन ल बाल विवाह मुक्त घोसित करके प्रमाण पत्र जारी करे जाही।
लोक अदालत
राज्य विधिक सेवा प्राधिकरण डहार ले प्रदेस के जम्मों जिला अउ व्यवहार न्यायालय मन म काली तेरह सितंबर के राष्ट्रीय लोक अदालत के आयोजन करे जाही। एहा ए साल के तीसरा लोक अदालत होही। लोक अदालत म मोटर दुर्घटना दावा ले जुड़े प्रकरण, चेक बाउंस, जलकर, संपत्तिकर, राजस्व संबंधी प्रकरणा, ट्रैफिक चालान, बैंक, विद्युत संबंधी, प्री-लिटिगेशन प्रकरण समेत बहुत अकन मामला के निराकरण आपसी राजीनामा ले करे जाही।
संसदीय संघ भारत क्षेत्र-सम्मेलन
राष्ट्रकुल संसदीय संघ भारत क्षेत्र के सम्मेलन के आयोजन बेंगलूरू म करे जात हे। लोकसभा अध्यक्ष ओम बिरला ह काली ए तीन दिन के सम्मेलन के उद्घाटन करीन। ए मउका म लोकसभा अध्यक्ष ह विधायी निकाय म जनता के दृढ़विश्वास अउ सत्ता म बइठे लोगन मनके जवाबदेही के आवश्यकता उपर बल दीन।
ए सम्मेलन छत्तीसगढ़ विधानसभा के अध्यक्ष डॉक्टर रमन सिंह अउ विधानसभा सचिव दिनेश शर्मा समेत आने-आने राज्य अउ केंद्र शासित प्रदेस के विधान मंडल के पीठासीन अधिकारी अउ सचिव सामिल होत हे।
रजत महोत्सव कार्यक्रम
छत्तीसगढ़ रजत महोत्सव के तहत जिला स्तर म बहुत अकन कारीकरम के आयोजन के सिलसिला सुरू हो गेहे। दुरूग, जशपुर, बीजापुर, सूरजपुर, मनेन्द्रगढ़-चिरमिरी-भरतपुर अउ दंतेवाड़ा जिला प्रशासन के पहल म रंगोली प्रतियोगिता, दिव्यांगजन मन ल सहायक उपकरण, महिला सशक्तिकरण अउ पोषण आहार मेला जइसे कारीकरम के आयोजन करे गीस।
दुरूग म आयुष विभाग डहार ले ‘हर दिन हर घर आयुर्वेद‘ के थीम म मिलेट्स प्रदर्सनी अउ स्वास्थ्य परीक्षण सिविर के आयोजन करे गीस। उहें, मनेन्द्रगढ़-चिरमिरी-भरतपुर जिला म लइका मन ‘हर दिन हर घर आयुर्वेद‘ बिसय उपर अपन कल्पना ल चित्र के माध्यम ले प्रस्तुत करीन।
अइसने, बीजापुर जिला के गोटाईगुड़ा म दिव्यांगजन मन ल वॉकिंग स्टीक सहायक उपकरण बांटे गीस, जबकि सूरजपुर जिला म राष्ट्रीय सेवा योजना के माध्यम ले क्विज, भाषण अउ वाद-विवाद प्रतियोगिता अउ दंतेवाड़ा जिला के आईटीआई गीदम म रंगोली प्रतियोगिता के आयोजन करे गीस। एखर अलावा जशपुर जिला के आंगन बाड़ी केंद्र तपकरा म पोषण माह के आयोजन करे गीस।
आत्महत्या रोकथाम दिवस-जागरूकता
विश्व आत्महत्या रोकथाम दिवस के मउका म दस सितंबर के बिलासपुर के सेंदरी स्थित राज्य मानसिक चिकित्सालय म बिसेस जागरूकता कारीकरम के आयोजन करे गीस। कारीकरम म आत्महत्या के कारण, लक्षण अउ रोकथाम के उपाय ल साझा करे गीस। ए दउरान शासकीय नर्सिंग कालेज के छात्रा मन नाट्य प्रस्तुति के माध्यम ले मरीज अउ ओमन के परिजन ल आत्महत्या के परमुख कारण अउ ओखर ले बचाव के उपाय के जानकारी दीन। ए मउका म राज्य मानसिक चिकित्सालय के अधीक्षक डॉक्टर जे.पी. आर्या ह किहीन कि आत्महत्या ल रोके जा सकत हे, यदि समय राहत मानसिक स्वास्थ्य समस्या ल चिन्हे जाय अउ समाज म फैले भ्रांति ल खतम करे जाय।
वन शहीद दिवस
वन सहीद मन के सुरता म काली राजधानी रईपुर के राजीव स्मृति वन म इक्कीसवां राष्ट्रीय वन सहीद दिवस के आयोजन करे गीस। ए दउरान वन सहीद मनके याद म दू मिनट के मौन रखके ओमन ल श्रध्दांजलि दे गीस। ए मउका म वन मंत्री केदार कश्यप ह किहीन कि वन सहीद मनके सहादत हमन ल पर्यावरण संरक्षण के महत्ता अउ एला संरक्षित करे के हमन के जिम्मेदारी के सुरता देवाथे।
जीएसटी बिसेस कार्यक्रम/बातों-बातों में
जीएसटी म करे गे सुधार उपर प्रादेशिक समाचार एकांश आकाशवाणी रईपुर डहार ले काली बिसेस कारीकरम के प्रसारण करे जाही। ए कारीकरम काली बिहनिया नौ बजके पचपन मिनट म प्रसारित होही।
उहें, प्रादेशिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत केंद्र सरकार डहार ले सुरू करे गे स्प्री योजना के बारे म कर्मचारी राज्य बीमा निगम के क्षेत्रीय निदेशक भूपेन्द्र कुमार ले लेगे भेंटवार्ता के प्रसारण करे जाही। ए कारीकरम के प्रसारण काली तेरह सितंबर के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
अउ अब पेस के मौसम के हाल…
प्रदेस म अवइया चौबीस घंटा के दउरान आने-आने जघा म हल्का ले मध्यम बरसा होय के संभावना हे। उहें, बस्तर, रईपुर अउ दुरूग संभाग म एक-दू जघा म गरज-चमक के संग भारी बरसा होय अउ गाज गिरे के चेतावनी दे गेहे। मौसम विभाग के अनुसार एक ठिन निम्नदाब के क्षेत्र पश्चिम मध्य बंगाल के खाड़ी अउ ओखर ले लगे उत्तर-पश्चिम बंगाल के खाड़ी तक बने हे। एखर असर छत्तीसगढ़ म घलो देखे जात हे।