मुख्यमंत्री विष्णुदेव साय ह आज जगदलपुर म छत्तीसगढ़ इन्वेस्टर कनेक्ट कारीकरम के सुभारंभ करीन। कारीकरम म बोलत मुख्यमंत्री ह किहीन कि इन्वेस्टर कनेक्ट म बावन हजार करोड़ रूपिया के समझौता ज्ञापन म हस्ताक्षर करे गेहे। ओमन किहीन कि बस्तर म अभी तक नौ सौ सड़सठ करोड़ रूपिया ले जादा के निवेस प्रस्ताव आय हे, जेमा इक्कीस सौ ले जादा लोगन मन बर रोजगार के मउका पैदा होही।
मुख्यमंत्री ह किहीन कि विकसित छत्तीसगढ़ के निर्माण के बुनियाद तेजी ले विकसित होवत उद्योग के आधार म रखे जाही। एला धियान म राखत नवा औद्योगिक नीति म राज्य म निवेस बर अनुदान प्रावधान अउ प्रोत्साहन रासि देहे। श्री साय ह किहीन कि नवा औद्योगिक नीति लागू होय के बाद अभी तक करीबन छै लाख पैंसठ हजार करोड़ रूपिया के निवेस प्रस्ताव आय हे। ए नीति ले बस्तर के अठासी प्रतिसत ब्लाक गु्रप टीम म चिन्हारी करे गेहे। इंहा निवेस करइया उद्यमी मन ल सबले जादा फायदा मिलही। ओमन किहीन कि आत्मसमर्पित माओवादी मन ल रोजगार दे म उद्यमी मन ल पांच बछर तक चालीस प्रतिसत सैलरी सब्सिडी दे जाही, जेखर सीमा पांच लाख रूपिया सलाना होही।
मुख्यमंत्री ह किहीन कि पर्यटन ल उद्योग के दर्जा दे गेहे जउन उद्यमी बस्तर म पर्यटन क्षेत्र म निवेस करही, ओमन ल राज्य सरकार कोति ले पैंतालीस प्रतिसत छूट मिलही। जेखर ले होटल इंडस्ट्री, इको टूरिज्म, वेनलेस, एडवेंचर स्पोर्ट्स जइसन क्षेत्र म निवेस खातिर सुघ्घर मउका बनही।
इन्वेस्टर कनेक्ट ल उपमुख्यमंत्री विजय शर्मा वाणिज्य उद्योग मंत्री लखनलाल देवांगन ह घलो संबोधित करीन। कारीकरम म चौतीस ठिन उद्योग के स्थापना बर प्रोत्साहन प्रमाण पत्र बांटे गीस। कारीकरम म नक्सल पीड़ित परिवार बर बिसेस अनुदान के घोसना करे गीस। कहू ओमन उद्योग लगाना चाहत हे, त ओमन ल अलग ले प्रोत्साहन मिलही। पर्यटन, कृषि, बागवानी, इलेक्ट्रिनिक अउ फार्मास्युटिकल जइसन क्षेत्र म निवेस करे म बिसेस अनुदान अउ छै बछर तक वित्तीय सहायता दे जाही।
स्वस्थ्य नारी सशक्त परिवार अभियान
माईलोगन मनके स्वास्थ्य अउ सशक्तिकरण ल धियान म राखत केंद्रीय स्वास्थ्य अउ परिवार कल्याण मंत्रालय कोति सत्रह सितंबर ले देसभर म ‘‘स्वस्थ नारी सशक्त परिवार अभियान‘‘ सुरू करे जाही। प्रधानमंत्री नरेंद्र मोदी मध्यप्रदेस के इंदौर ले ए अभियान के सुभारंभ करही। दू अक्टूबर तक चलइया ए अभियान महिला अउ बाल विकास मंत्रालय कोति ले पोषण माह के संग चलाय जाही। ए अभियान म माईलोगिन मनके स्वास्थ्य जांच सिविर लगाके उच्च रक्तचाप, मधुमेह, मुख कैंसर, स्तन कैंसर, गर्भाशय ग्रीवा कैंसर, एनीमिया, टीबी अउ सिकलसेल रोग के जांच करे जाही। संगेसंग स्त्री रोग बिसेसज्ञ नेत्र, ईएनटी,
त्वचा, मानसिक स्वास्थ्य अउ दंत बिसेसज्ञ जइसन सेवा घलो मिलही। उंखर संगेसंग गर्भवती माईलोगिन मन के प्रसव पूर्व जांच परामर्स अउ लइका मनके टीकाकरण करे जाही। केंद्रीय स्वास्थ्य मंत्रालय ह सबो राज्य अउ केंद्र शासित प्रदेस ले ए अभियान ल जन आंदोलन के रूप म सफल बनाय के आह्वान करीन हे।
नड्डा-डेंगू मलेरिया
केंद्रीय स्वास्थ्य मंत्री जगत प्रकाश नड्डा ह देस म डेंगू अउ मलेरिया के मौजूदा स्थिति के संबंध म राज्य सरकार कोति ले करे जात रोकथाम के समीक्षा बइठका करीन। बइठका के दउरान श्री नड्डा ह सबो मुख्यमंत्री के सलाहकार मन ल डेंगू अउ मलेरिया के रोकथाम, उपाय अउ जागरूकता बढ़ाय बर किहीन। उहें, राज्य के स्वास्थ्य मंत्री मन ल स्थिति के समीक्षा करत बीस दिन के भीतरी कार्यकारी योजना तियार करे के सलाह दिन।
राज्यपाल संगोष्ठी
राज्यपाल रमेन डेका आज रईपुर म स्वामी विवेकानंद कन्या कुमारी केंद्र कोति ले विश्व बंधुत्व दिवस म राखे गे कारीकरम म संघरीन। स्वामी विवेकानंद कोति ले बछर अट्ठारा सौ तिरानवे म सिकागो के विश्व धर्म सम्मेलन म आज के दिन भारत के संस्कृति अउ परंपरा ल दुनिया के आगू रखे रिहीन। इही बिसेस दीन ल विश्व बंधुत्व दिवस के रूप म मनाय जात हे। ए मउका म राज्यपाल ह किहीन कि स्वामी विवेकानंद भारत के महान संस्कृति अउ अध्यात्म ल संसार के आगू लाइन अउ विश्व ल ए संदेस दिन के मानवता ले बड़के कुछू नइ हे।
जवान घायल-माओवादी आत्मसमर्पण
दंतेवाड़ा जिला म आज बिहनिया आईईडी के चपेट म आय ले केंद्रीय रिजर्व पुलिस बल सीआरपीएफ के दू जवान दीवान सिंह गुर्जर अउ आलम मुनेश घायल होगिन। ए जवान सुरक्षाबल संग मालेवाही थाना क्षेत्र के सातधार अउ मालेवाही के बीच तलासी अभियान म निकले रिहीन। इही दउरान सातधार पूल तीर माओवादी मन कोति ले लगाय गे आईईडी के चपेट म आगे। दंतेवाड़ा के जिला अस्पताल म प्राथमिक उपचार के बाद बने इलाज खातिर घायल जवान मन ल रईपुर लाय गेहे।
इही बीच, नारायणपुर जिला म सोलह झिन माओवादी मन ह आत्मसमर्पण करीन हे। एमा जनताना सरकार सदस्य, पंचायत मिलिसिया डिप्टी कमांडर, पंचायत सरकार सदस्य, पंचायत मिलिसिया सदस्य अउ न्याय शाखा अध्यक्ष सामिल हे। ए माओवादी मन ह जिला के पुलिस अधीक्षक के आगू आत्मसमर्पण करीन। ए माओवादी मन ल राज्य सरकार के पुनर्वास नीति म पचास-पचास हजार रूपिया के प्रोत्साहन रासि दे गीस।
रायगढ़-हत्या
रायगढ़ जिला म एके परिवार के चार झिन के हत्या के मामला आगू आय हे। ए घटना खरसिया तहसील तीर ठुसेकेला गांव के राजीव नगर के हवय। एक बंद घर ले बदबू आय ले तीर-तखार के लोगन मन एखर सूचना पुलिस ल दीन। एखर बाद पुलिस के टीम ह मउका म पहुंचके जांच सुरू कर दीन। पुलिस कोति ले करे गे पड़ताल म चार झन के शव घर के कमरा के भीतरी जमीन म दफ्नाय के बाद आगू आय हे। एमा पति-पत्नी अउ दू लइका सामिल हे। जिला मुख्यालय ले पुलिस बल अउ अधिकारी मनके टीम घटना के जघा म मौजूद हे। आगू के जांच खातिर फॉरेसिंक टीम ल बलाय गेहे।
लोक अदालत
राज्य विधिक सेवा प्राधिकरण कोति ले प्रदेस के सबो जिला अउ व्यवहार न्यायालय म अवइया तेरह सितंबर के राष्ट्रीय लोक अदालत राखे जाही। जउन ए बछर के तीसर लोक अदालत होही। लोक अदालत म मोटर दुर्घटना दावा ले जुड़े प्रकरण, चेक बाउंस, जलकर, संपत्ति कर, राजस्व सबंधी प्रकरण, ट्रैफिक चालान, बैंक समेत कतकोन मामला के निराकरण आपसी राजीनामा ले करे जाही।
पीएम सूर्यघर योजना
प्रधानमंत्री सूर्यघर मुफ्त बिजली योजना के प्रचार-प्रसार बर सूरजपुर जिला पंचायत के अध्यक्ष चंद्रमणि पैकरा अउ जनपद पंचायत अध्यक्ष स्वाति सिंह ह आज सूर्यरथ ल हरियर झंडी दिखाके रवाना करीन। ए रथ अवइया हफ्ता भर तक जिला के आने-आने ब्लाक, मुख्यालय अउ गांव-गंवई के क्षेत्र म जाके योजना ले जुड़े जानकारी दिही। एखर उद्देस्य जादा ले जादा लोगन ल योजना ले जोड़के सौर ऊर्जा म आधारित आत्मनिर्भरता बढ़ाना हे।
श्रीरामलला दर्शन योजना
श्रीरामलला अयोध्या दर्सन योजना म रईपुर संभाग ले आठ सौ पचास तीर्थ यात्री मनके जत्था बिसेस ट्रेन अयोध्या धाम बर रवाना होइन। ए ट्रेन ल रईपुर रेल स्टेसन ले खाद्य अउ नागरिक आपूर्ति निगम के अध्यक्ष संजय श्रीवास्तव ह हरियर झंडी दिखाके रवाना करीन। ए मउका म ओमन तीर्थ यात्री मनके जत्था ले भेंट करके ओमन ल बधई अउ सुभकामना दीन।
अउ अब जानन मौसम के हाल….
मौसम विभाग के मुताबिक अवइया तीन दिन तक प्रदेस के आने-आने जिला म हल्का ले मध्यम बरसा होय के संभावना हे। उहें, दक्षिण छत्तीसगढ़ म भारी बरसा होय के चेतावनी देहे। मौसम वैज्ञानी डॉक्टर गायत्री ह बतइन कि प्रदेस के कुछेक जिला म गाज गिर सकत हे। संगेसंग अवइया तीन दिन के बाद प्रदेस म बरसा के गतिविधि म कमी आही।
इही बीच, रईपुर के स्वामी विवेकानंद विमानतल म काली संझा रनवे डी.वी.ओ.आर. म गाज गिरे के सेति पांच ठिन उड़ान ल डायवर्ट करे गीस। ए उपकरण विमान ल दिसा बताय के संगेसंग सुरक्षित लैंड करे म मदद देथे।
उहें, काली संझा मुजगहन थाना क्षेत्र के सिवनी गांव म गाज गिरे ले एक युवती के मउत होगे।