सी.पी. राधाकृष्णन भारत के पंद्रहवां उपराष्ट्रपति होही। राष्ट्रीय जनतांत्रिक गठबंधन के प्रत्यासी अउ महाराष्ट्र के राज्यपाल श्री राधाकृष्णन ह इंडी गठबंधन के प्रत्यासी अउ सर्वोच्च न्यायालय के पूर्व न्यायाधीश बी. सुदर्शन रेड्डी ल एक सौ बावन वोट ले हराइन। वोट के गनती के बाद राज्यसभा के महासचिव अउ रिटर्निंग ऑफिसर पी.सी. मोदी ह ए जानकारी दीन। राष्ट्रपति द्रौपदी मुर्मु अउ प्रधानमंत्री नरेंद्र मोदी अउ छत्तीसगढ़ के मुख्यमंत्री विष्णुदेव साय ह श्री राधाकृष्णन ल उपराष्ट्रपति चुने जाय म बधई दीन हे।
आदिवासी विकास-प्राधिकरण बैठक
मुख्यमंत्री विष्णुदेव साय के अगुवई म आज कोरबा म मध्य क्षेत्र आदिवासी विकास प्राधिकरण के बइठका होइस। बइठका म सामाजिक आर्थिक मुद्दा म बिसेस जनजाति, जनजाति मनके आर्थिक मूलक काम के समीक्षा करे के संगेसंग आने मुद्दा म गोठबात करे गीस। बइठका म उपमुख्यमंत्री अरूण साव अउ विजय शर्मा, कृषि मंत्री रामविचार नेताम, वन मंत्री केदार कश्यप अउ मुख्यमंत्री के प्रमुख सचिव सुबोध कुमार सिंह के संगेसंग पंद्रह जिला के कलेक्टर, सीईओ अउ प्राधिकरण के सदस्य सामिल होइन। बइठका के बाद पत्रकार मनले गोठबात करत श्री साय ह किहीन कि कोरबा म बालक-बालिका, क्रीडा परिसर, एक्वा पार्क समेत आने काम ल मंजूरी दे गेहे। ओमन बतइन कि मध्य क्षेत्र आदिवासी विकास प्राधिकरण के रकम ल पचास करोड़ ले बढ़ाके पचहत्तर करोड़ रूपिया कर दे गेहे।
आदि संस्कृति
केंद्रीय जनजातीय कार्य राज्यमंत्री दुर्गादास उइके ह आज नई दिल्ली म दुनिया के पहिली डिजीटल जनजातीय विश्वविद्यालय-आदि संस्कृति के सुभारंभ करीन। श्री उइके ह किहीन कि आदि संस्कृति एक डिजीटल अकादमी अउ ई-लर्निंग प्लेटफार्म हे, जउन राष्ट्रीय अउ वैश्विक दर्सक मन बर आदिवासी कला, संस्कृति सिल्प अउ जानकारी के एक ऑनलाइन बाजार हे।
मुख्यमंत्री-प्रेसवार्ता
मुख्यमंत्री विष्णुदेव साय ह आज रईपुर म पत्रकार मनले गोठबात करत किहीन कि एसो छत्तीसगढ़ अपन स्थापना के पचीस बछर पूरा होय म रजत जयंती मनावत हे। श्री साय ह बतइन कि एसो होवइया राज्योत्सव म सामिल होय बर प्रधानमंत्री नरेंद्र मोदी छत्तीसगढ़ आही। एखर बर श्री मोदी ह मंजूरी दे देहे। मुख्यमंत्री ह बतइन कि छत्तीसगढ़ के गठन पूर्व प्रधानमंत्री अटल बिहारी वाजपेयी करे रिहीन। एखर सेती एसो ल अटल निर्माण बछर घोसित करे गेहे। ए उत्सव अवइया पच्चीस हफ्ता तक आने-आने कारीकरम ले मनाय जाही। प्रधानमंत्री ल एमा संघरे बर नेवता दे गेहे अउ एखर बर चिट्ठी भेजे गेहे।
जीएसटी-फायदा
देस म वस्तु अउ सेवाकर जीएसटी सुधार के नवा दर ए महिना के बाईस तारीख ले लागू हो जही। केंद्र सरकार के ए फइसला ले कपड़ा व्यापारी मन ल एसो तिहार के मउका म बने व्यापार के उम्मीद हरय। केंद्र सरकार ह कपड़ा क्षेत्र म जीएसटी दर म बदलाव ले ढांचा म गड़बड़ी दूर करे, लागत कमती करे मांग बढ़ाय अउ अउ निर्यात ल मंजूरी दे के संग नौकरी कायम राखे बर राहत देके घोसना करे हे।
रईपुर के पंडरी के थोक कपड़ा व्यापारी संघ के पूर्व अध्यक्ष चंदर विधानी ह किहीन कि कपड़ा म जीएसटी के दर म बढ़वार नइ करे गेहे, जउन सुवागत लइक हे।
राहवीर योजना-पुरस्कार राशि
केंद्र सरकार के राहवीर योजना म रद्दा दुर्घटना म घायल मन ल अस्पताल पहुंचइया राहवीर मन ल पचीस हजार रूपिया इनाम दे जाही। ए इनाम एक राहवीर ल अधिकतम पांच घांव मिल सकही। छत्तीसगढ़ राज्य सड़क सुरक्षा परिषद के आज मंत्रालय म होय बइठका म राहवीर योजना के समीक्षा करत परिवहन मंत्री केदार कश्यप ह किहीन कि घायल मन ल अस्पताल पहुंचइया राहवीर मन ल स्वतंत्रता दिवस अउ गणतंत्र दिवस के मउका म सम्मानित करे जाही। बइठका म उपमुख्यमंत्री अरूण साव अउ विजय शर्मा ह किहीन कि ए योजना ल बने ढंग ले चलाय म स्वयं सेवी संगठन के मदद ले जाय अउ स्कूल कालेज म घलो पढ़इया लइका मन ल जागरूक करे जाय। वन अधिकारी मनले यातायात संबंधी नियम के कड़ाई ले पालन कराय के निरदेस दीन।
छत्तीसगढ़ इन्वेस्टर कनेक्ट
मुख्यमंत्री विष्णुदेव साय काली बस्तर म छत्तीसगढ़ इन्वेस्टर कनेक्ट के सुभारंभ करही। इन्वेस्टर कनेक्ट के उद्देस्य उद्योग अउ निवेस ल सिरिफ आर्थिक गतिविधि तक नइ रख के शिक्षा, स्वास्थ्य, रोजगार अउ सामाजिक सशक्तिकरण जइसन क्षेत्र ले जोड़ना हे। एखर ले बस्तर के विकास सिरिफ औद्योगिक प्रगति तक सीमित नइ रह के सामाजिक उन्नति के आधार बन सकही। ए आयोजन क्षेत्र म औद्योगिक गतिविधि ल नवा गति देके संगेसंग मउका के नवा दुवारी खोलइया साबित होही। इन्वेस्टर कनेक्ट न सिरिफ बस्तर म नवा उद्योग अउ रोजगार के मउका देखाही, भलुक ए यहू निश्चित करही कि विकास खातिर हरेक उपलब्धि के फायदा सोज्झे स्थानीय समुदाय तक पहुंचय।
अटल उत्कृष्ट शिक्षा योजना
मुख्यमंत्री विष्णुदेव साय ह काली रईपुर म श्रम विभाग कोति ले श्रमिक लइका मन बर चलाय जात अटल उत्कृष्ट शिक्षा योजना सुभारंभ करीन। ए मउका म मुख्यमंत्री ह किहीन कि ए योजना ले निर्माण श्रमिक मनके के लइका मन बर बने शिक्षा के रद्दा खुलही। श्री साय ह घोसना करीन, कि अवइया शैक्षणिक सत्र ले ए योजना के फायदा दू सौ लइका मन ल मिलही। ए योजना म श्रमिक मनके लइका मन ल कक्षा छठवीं ले बाहरवीं तक सबले पहिली आवासीय विद्यालय म मुफत म शिक्षा मिलही। एखर पूरा खर्चा श्रम विभाग उठाही।
कबीरधाम जिला के सहसपुर-लोहारा पुलिस ह मोबाइल चेकिंग के दउरान एक कार ले दू सौ बाईस किलो ले जादा के चांदी के सिल्ली अउ जेवर बरामद करे हे। जब्त चांदी के कीमत करीबन दू करोड़ छप्पन लाख रूपिया ले जादा बताय गेहे।
पुलिस ह बतइन कि दूरूग ले कवर्धा कोति आवत एक कार के जब पुलिस ह जांच करीस, त उंखर सीट अउ डिक्की ले सत्रह ठिन बैग, दू थैला अउ एक प्लास्टिक बैग म रखाय चांदी के आभूषण बरामद करे गीस। सुरूआती जांच म कार म मौजूद आभूषण संचालक ह संतोष जनक जुवाब अउ सही दस्तावेज नइ दे पाइस, जेखर बाद पुलिस ह कार्रवाई करीस हे। जब्त चांदी के जानकारी जीएसटी अउ आयकर विभाग ल भेजे गेहे।
वन्यजीव कल्याण बोर्ड बैठक
छत्तीसगढ़ म बाघ के संख्या पाछू तीन बछर म दुगुना हो गेहे। बछर दू हजार बाईस म बाघ के संख्या सत्रह रिहीस, जउन ह बड़के पैंतीस हो गेहे। ए जानकारी मुख्यमंत्री विष्णुदेव साय के अगुवई म होय छत्तीसगढ़ राज्य वन्यजीव कल्याण बोर्ड के पंद्रहवा बइठका म दे गीस। ए मउका म मुख्यमंत्री ह किहीन कि छत्तीसगढ़ म वन्यप्राणी के संरक्षण अउ बढ़वार राज्य सरकार के प्राथमिकता हरय। ओमन राज्य म बाघ के संख्या बाढ़े ले खुसी जतात किहीन कि अब हमला आने वन्यजीव के संरक्षण अउ संवर्धन के दिसा म परयास करे बर पड़ही।
अउ अब जानन मौसम के हाल…
मौसम विभाग के मुताबिक अवइया चौबीस घंटा के दउरान प्रदेस के कतकोन जिला म गरज-चमक के संग हल्का ले मध्यम बरसा होय के संभावना हरय। उहें, दक्षिण छत्तीसगढ़ म भारी ले अति भारी बरसा होय के चेतावनी दे गेहे। मौसम विभाग ह कुछेक जघा म गाज गिरे के आसंका जताय हे। इही बीच आज मंझनिया बाद राजधानी रईपुर म गरज-चमक संग तेज बरसा होइस। ए दउरान राजेन्द्र नगर क्षेत्र म गाज गिरे ले एक स्कूल पढ़इया लइका के मउत होगे।
अउ अब थोरकुन समाचार सार म –
– छत्तीसगढ़ राज्य स्थापना के पच्चीस बछर पूरा होय म बस्तर जिला म रजत महोत्सव राखे जात हे। आज लोहंडीगुड़ा के सामुदायिक स्वास्थ्य केंद्र म रक्तदान सिविर राखे गीस। सिविर म स्थानीय लोगन, स्वास्थ्य कर्मचारी अउ स्वयं-सेवक मन रक्तदान करीन।
– जिला रोजगार अउ स्व-रोजगार मार्गदर्शन केंद्र मुंगेली कोति ले जमकोर गांव के लाइवलीहुड कालेज परिसर म काली ग्यारा सितंबर के बिहनिया ग्यारा बजे ले प्लेसमेंट कैंप लगाय जाही।
– महासमुंद जिला प्रशासन कोति ले शासकीय महाप्रभु वल्लभाचार्य स्नात्कोत्तर महाविद्यालय म बारह सितंबर के रोजगार मेला लगाय जाही।