यूनिफाइड कमांड-बैठक
मुख्यमंत्री विष्णुदेव साय के अगुवई म आज नवा रायपुर म यूनिफाइड कमांड के बइठका होइस। बइठका म नक्सल विरोधी अभियान अउ विकास काम के विस्तार ले चर्चा होइस। ए बइठका म उपमुख्यमंत्री अउ गृहमंत्री विजय शर्मा, मुख्य सचिव अमिताभ जैन, पुलिस महानिदेशक अरूण देव गौतम, अपर मुख्य सचिव गृह मनोज कुमार पिंगुआ, सीआरपीएफ, आईटीबीपी, बीएसएफ, एसएसबी, सीआईएसएफ, भारतीय वायुसेना अउ छत्तीसगढ़ पुलिस के बड़का अधिकारी मन सामिल होइन।
केन्द्रीय राज्यमंत्री-रक्षा मंत्री मुलाकात
केन्द्रीय आवासन अउ सहरी कार्य राज्यमंत्री तोखन साहू ह हालेच म केन्द्रीय रक्षा मंत्री राजनाथ सिंह ले भेंट करीन। ए दउरान ओमन रक्षा मंत्री ले अनुरोध करीन कि बिलासपुर हवाई अड्डा के विकास बर रक्षा मंत्रालय के तीर रखे गे एक हजार बारह एकड़ भूईंया ल राज्य सरकार ल हस्तांतरित करे जाय। एखर बर छत्तीसगढ़ सरकार अउ रक्षा मंत्रालय के अधिकारी मनके एक सामलात बइठका बलाय जाय। ओमन कहिन कि एखर ले बिलासपुर म हवाई सेवा के विस्तार होही। श्री साहू ह किहीन कि बिलासपुर छत्तीसगढ़ के प्रमुख औद्योगिक केन्द्र हरय। इहां उच्च न्यायालय के संगेसंग एसईसीएल, एनटीपीसी अउ दक्षिण पूर्व मध्य रेलवे जइसन केन्द्रीय संस्था के मुख्यालय हवय।
स्कूल-युक्तियुक्तकरण
स्कूल शिक्षा विभाग डहार ले प्रदेस म दस हजार पांच सौ अड़तीस स्कूल मनके युक्तियुक्तकरण करे गेहे। एमा एके परिसर म चलत दस हजार ले जादा स्कूल अउ ग्रामीण क्षेत्र मन म एक किलोमीटर ले कम दूरिहा म अउ सहरी क्षेत्र म पांच सौ मीटर ले कम दूरिहा म चलत एक सौ छैसठ स्कूल सामिल हवय। युक्तियुक्तकरण म सोलह हजार एक सौ पैंसठ सिक्षक अउ प्राचार्य के समायोजन करे ले अब प्रदेस के कोनों भी स्कूल बिना सिक्षक के नइ हे।
खबर के मुताबिक पहिली जिहां पांच हजार नौ सौ छत्तीस विद्यालय मन म एकल-शिक्षकीय रिहीस। उहें, युक्तियुक्तकरण के बाद इंखर संख्या ह एक हजार दू सौ सात होगे हे।
बाढ़ प्रभावित-सहायता राशि
मध्यप्रदेश अउ गोवा के बाद अब गुजरात अउ ओडिशा के मुख्यमंत्री मन ह घलो बस्तर संभाग म बाढ़ प्रभावित मन बर पांच-पांच करोड़ रूपिया के राहत रासि उपलब्ध कराय हे। एमा मुख्यमंत्री विष्णुदेव साय ह गुजरात के मुख्यमंत्री भूपेन्द्र पटेल अउ ओडिशा के मुख्यमंत्री मोहन चरण मांझी के प्रति आभार जतईन हे।
जीएसटी-अरूण साव
वस्तु अउ सेवा कर-जीएसटी के दर म करे गे सुधार के छत्तीसगढ़ के उपमुख्यमंत्री अरूण साव ह स्वागत करे हे। ओमन कहिन कि प्रधानमंत्री नरेन्द्र मोदी ह जीएसटी के दर म सुधार करके देस के एक सौ चालीस करोड़ जनता ल देवारी तिहार के उपहार देहे। श्री साव ह कहिन कि एखर ले किसान, माईलोगिन, पढ़ईया लइका अउ युवा मन ल कतकोन फायदा होही।
लक्ष्मी राजवाड़े-निरीक्षण
महिला अउ बाल विकास मंत्री लक्ष्मी राजवाड़े ह आज सूरजपुर जिला के धरसेड़ी गांव म आंगनबाड़ी केन्द्र के जांच करीन। ए दउरान ओमन आंगनबाड़ी कार्यकर्ता अउ सहायिका मन ले लइका मन ल बेरा म पौष्टिक आहार देवाय के संग केन्द्र म साफ-सफाई बनाय के निरदेस घलो दीन। श्रीमती राजवाड़े ह कहिन कि आंगनबाड़ी केन्द्र मन म पंजीकृत लइका मनके बेरा म टीकाकरण करे जाय। संगेसंग गर्भवती माता मन ल योजना के फायदा बेरा म दे जाय उपर विशेष निगरानी राखे जाय।
मंत्रिमंडल-निर्णय
राज्य मंत्रिपरिषद ह प्रदेस के सौर ऊर्जा नीति म संशोधन के प्रस्ताव के अनुमोदन करे हे। आज नवा रायपुर स्थित मंत्रालय म मुख्यमंत्री विष्णुदेव साय के अगुवई म मंत्रिमंडल के बइठका होइस। नीति म होवइया संशोधन के मुताबिक सौर ऊर्जा परियोजना ल अब राज्य के औद्योगिक नीति के तहत प्राथमिकता उद्योग के दर्जा मिलही। एमा निवेसक मन ल ब्याज अनुदान, बिजली अउ स्टाम्प शुल्क म छूट जइसन कतकोन छूट अउ प्रोत्साहन मिलही। नवा व्यवस्था के मुताबिक ए संशोधित नीति अब बछर दू हजार तीस तक लागू रइही।
एखर संगेसंग मंत्रिमंडल ह सुकमा जिला म बम विस्फोट के घटना म सहीद होय अतिरिक्त पुलिस अधीक्षक आकाश राव गिरपुंजे के पत्नी ल राज्य पुलिस सेवा म उप पुलिस अधीक्षक के पद म अनुकंपा नियुक्ति देके फइसला लेहे।
उहें, वरिष्ठ मीडियाकर्मी सम्मान निधि के तहत रिटायर हो चुके मीडियाकर्मी मन ल देवइया सम्मान रासि ल दस हजार रूपिया ले बढ़ाके बीस हजार रूपिया हरेक महीना करे के फइसला ले गेहे।
संकल्प एचईडब्ल्यू
महिला अउ बाल विकास विभाग ह प्रदेस म मिशन शक्ति म ‘‘संकल्प एचईडब्ल्यू‘‘ नाव ले दस दिवसीय राज्यव्यापी जागरूकता अभियान के सुरूआत करे हे। ए अभियान के उद्देश्य माईलोगिन, किशोरी अउ लइका मन ल कानूनी अधिकार, स्वास्थ्य, पोषण, सुरक्षा अउ सरकारी योजना मनके जानकारी देके ओमन ल आत्मनिर्भर अउ जागरूक बनाना हे।
अभियान म जम्मों जिला के सहरी अउ ग्रामीण आंगनबाड़ी केन्द्र, स्कूल अउ समुदाय म जागरूकता कार्यक्रम आयोजित करे जावत हे। ए कार्यक्रम म पॉक्सो अधिनियम, माहवारी स्वच्छता, प्रजनन क्षमता विकास, भू्रण हत्या निषेध, समानता के अधिकार, पोषण अउ स्वास्थ्य जइसन विषय म जानकारी देके संगेसंग सखी वन स्टॉप सेंटर, सुकन्या समृद्धि योजना, प्रधानमंत्री मातृ वंदना योजना, महतारी वंदन योजना अउ नोनी सुरक्षा योजना के बारे म घलो बताय जावत हे।
केरोसिन-आवंटन
खाद्य अउ नगारिक आपूर्ति विभाग डहार ले सितंबर महीना बर एक हजार सात सौ चालीस किलोलीटर माटी तेल के आबंटन करे गेहे। विभाग ह राज्य के गैर अनुसूचित क्षेत्र के गैस कनेक्शनधारी रासनकार्ड म घलो सार्वजनिक वितरण प्रणाली-पीडीएस म माटी तेल देके निरदेस देहे।
सार्वजनिक वितरण प्रणाली म जम्मों अंत्योदय अउ प्राथमिकता वाले रासन कार्डधारी मन ल केरोसिन के पात्रता होही। नरगीय क्षेत्र के रासन कार्डधारी मन बर एक लीटर अउ ग्रामीण क्षेत्र म रासन कार्डधारी मन ल जादा ले जादा दू लीटर माटी तेल दे जाही। हितग्राही मन ल माटी तेल बांटे के काम उचित मूल्य के दुकान ले करे जाही।
कैश कलेक्शन एजेंट-गिरफ्तार
बीजापुर जिला के कोतवाली पुलिस ह एक प्राईवेट कंपनी म काम करत कैश कलेक्शन एजेंट ल इकचालीस लाख रूपिया ले जादा के रासि के गबन करे के मामला म गिरफ्तार करे हे। पूछताछ म आरोपी ह स्वीकार करे हे कि ओ ह जून अउ जुलाई महीना के पइसा ल कंपनी म जमा नइ करके अपन निजी काम म लगा देहे।
कूडो प्रतियोगिता-पदक
दुर्ग म आयोजित राज्य स्तरीय कूडो प्रतियोगिता म बलौदाबाजार के खिलाड़ी मन ह दू स्वर्ण अउ तीन रजत समेत सात पदक अपन नाम करे हे। ए खिलाड़ी मन म दिव्या महंत, तनिष्क, अतीक्षा महंत, टिकेश्वर पटेल, दामिनी, राहुल पटेल अउ ईशान महंत सामिल हे। ए खिलाड़ी मन अवइया महीना अक्टूबर म गुजरात के सूरत म राखे गे राष्ट्रीय अउ अंतर्राष्ट्रीय प्रतियोगिता म छत्तीसगढ़ के टीम के प्रतिनिधित्व करही।
रायपुर-झांकी
राजधानी रायपुर म पाछु रतिहा किसम-किसम के जुन्ना कथा अउ आधुनिक घटना उपर आधारित गणेश मूर्ति मनके झांकी निकाले गीस। ए जम्मों झांकी जयस्तंभ चौक होवत मालवीय रोड, सदर बाजार, कंकालीपारा, पुरानी बस्ती, लाखेनगर, अश्वनी नगर, सुंदर नगर अउ रायपुरा होके महादेवघाट पहुंचीस। ए बखत झांकी मन ल आने-आने बिसय म सुघ्घर ढंग ले सजाय गे रिहीस। ए झांकी म ऑपरेशन सिंदूर अउ राफेल विमान के झलक घलो देखे बर मिलीस। झांकी ल देखे बर काली संझा ले रायपुर के संगेसंग तीर-तखार के गांव वाले मन बड़ संख्या म राजधानी पहुंचे रिहीस।
मुख्यमंत्री विष्णुदेव साय ह जयस्तंभ चौक म बनाय गे स्वागत द्वार ले झांकी मनके अभिनंदन करीन। ए मउका म श्री साय ह कहिन कि रायपुर के गणेश विसर्जन झांकी ऐतिहासिक परंपरा के प्रतीक हरय।