उत्कृष्ट शिक्षा योजना-शुभारंभ
मुख्यमंत्री विष्णुदेव साय काली रईपुर म श्रम विभाग कोति ले राखे गे अटल उत्कृष्ट शिक्षा योजना के सुरूआत करही। ए बेरा म योजना म राज्य के सबले बने आवासीय विद्यालय म कक्षा छठवीं ले बारहवीं तक मुफत म पढ़ई खातिर चुने गे लइका मन ल सम्मान पत्र दे जाही। कारीकरम म श्रम मंत्री लखनलाल देवांगन अउ छत्तीसगढ़ भवन, अन्य सन्निनिर्माण कर्मकार कल्याण मंडल के अध्यक्ष डॉक्टर रामप्रताप िंसंह बिसेस रूप ले मौजूद रइही।
प्रधानमंत्री-सूर्यघर योजना
प्रधानमंत्री सूर्यघर मुफ्त बिजली योजना म प्रदेस म स्वच्छ ऊर्जा के लक्ष्य पाय खातिर परयास सुरू कर दे गेहे। ए संबंध म राजधानी रईपुर म सौर ऊर्जा जागरूकता अउ प्रोत्साहन अभियान कारीकरम राखे गीस। कारीकरम म मुख्यमंत्री विष्णुदेव साय ह सौर ऊर्जा के क्षेत्र म बने काम करइया वेंडर मन ल सम्मानित करीन। कारीकरम म मुख्यमंत्री ह सौर ऊर्जा के फायदा अउ पीएम सूर्यघर मुफ्त बिजली योजना म मिलइया छूट के संबंध म लोगन ल जानकारी देबर चलइया सूर्य रथ ल हरियर झंडी दिखाके भेजिन। ए बेरा म मुख्यमंत्री ह योजना म छै सौ अट्ठारह उपभोक्ता मनके खाता म हरेक झन ल तीस हजार रूपिया के दर ले कुल एक करोड़ पचयासी लाख रूपिया के राज्यांस छूट ल ऑनलाइन भेजिन। कारीकरम म बोलत मुख्यमंत्री ह जलवायु परिवर्तन अउ सरलग बाढ़त प्रदूषण म संसो जतइन। ओमन बतइन कि प्रधानमंत्री कुसुम योजना म उपभोक्ता खुदे सौर ऊर्जा के उत्पादन करके बिजली बेचत हे, अतकेच नइ ए योजना के मदद ले सस्ता बिजली के फायदा घलो लेवत हे। कारीकरम म मुख्यमंत्री ह प्रधानमंत्री कुसुम योजना के लाभार्थी मन ल आवार्ड दीन।
जीएसटी-फायदें
देस म जीएसटी सुधार बर नवा दर इही महिना के बाईस तारीख ले लागू हो जही। छत्तीसगढ़ के व्यापारी मन ल उम्मीद हरय कि नवा दर लागू होय के बाद कीमत म कमी आय ले दसेरा-देवारी के परब म बाजार के रौनक बाढ़ही। तियार के मौसम म नवा कपड़ा लत्ता के बिसेस मांग रहिथे अउ केंद्र सरकार ह कपड़ा के क्षेत्र म जीएसटी दर म बदलाव ले लागत कम करे, मांग बढ़ाय, निर्यात ल समर्थन दे अउ नौकरी बनाय राखे बर राहत देके घोसना करे हे। एखर मुताबिक कृत्रिम रेशम जीएसटी अट्ठारा प्रतिसत ले घटाके पांच प्रतिसत कर देहे।
जीएसटी के नवा दर ले कपड़ा सस्ता होही, जेखर ले मध्यम वरग अउ निम्न आय वर्ग के लोगन ल फायदा मिलही। उम्मीद जताय जात हे कि ए सुधार छोटे सहर अउ गांव-गंवई के बाजार म मांग ल फेर ले बढ़ावा दिही। छत्तीसगढ़ म उद्योग जगत ह ए सुधार के सुवागत करीन हे।
राज्य औद्योगिक न्यायालय अध्यक्ष
पूर्व प्रधान जिला अउ सत्र न्यायाधीश राजेश कुमार श्रीवास्तव ल राज्य औद्योगिक न्यायालय के अध्यक्ष बनाय गेहे। ओमन अपन पदभार ले लेहे। उच्च न्यायालय के अनुसंसा म राज्य सरकार के विधि अउ विधायी कार्य विभाग कोति ले श्री श्रीवास्तव के नियुक्ति के आदेस जारी करे गेहे।
खबर के मुताबिक श्री श्रीवास्तव जांजगीर अउ दुरूग म प्रधान जिला अउ सत्र न्यायालय के रूप म पदस्थ रिही। ओमन ल राज्यपाल के विधिक सलाहकार के पद म काम करे के घलो अनुभव हे।
साय-गोवा आभार
बस्तर के कतकोन क्षेत्र म बाढ़ के हालात बने हे अउ भारी बरसा के सेति जनजीवन अस्त-व्यस्त हे। एला देखत मध्यप्रदेस के बाद अब गोवा सरकार ह पीड़ित मनके मदद खातिर मुख्यमंत्री राहत कोस म पांच करोड़ रूपिया के रकम जमा कराय हे। एमा मुख्यमंत्री विष्णुदेव साय ह गोवा के मुख्यमंत्री डॉक्टर प्रमोद सावंत के आभार जतइन हे।
मुख्यमंत्री-संस्कृत विद्वत-सम्मेलन
मुख्यमंत्री विष्णुदेव साय ह किहीन हे कि संस्कृत भारतीय संस्कृति के आत्मा हरय। एला सुरक्षित रखना सबके जिम्मेवारी हे। मुख्यमंत्री ह रईपुर म विराट संस्कृत विद्वत सम्मेलन म बोलत किहीन कि संस्कृत शिक्षा आधुनिक युग म प्रासंगिक अउ उपयोगी हे। ओमन उम्मीद जतइन कि देववाणी संस्कृत बर गोठबात खातिर राखे गे ए सम्मेलन भारतीय संस्कृति संस्कार अउ राष्ट्र ल मजबूत बनाय बर महत्ता के भूमिका निभाही। सम्मेलन म बोलत संस्कृत भारतीय के प्रांताध्यक्ष डॉक्टर दादू भाई त्रिपाठी ह किहीन कि इतिहास म अइसन कतकोन प्रमाण मिलथे, जउन ए सिध्द करथे कि एक समय संस्कृत जनभाषा के रूप म जाने जात रिहीस। कारीकरम म मुख्यमंत्री ह सरयूपारिक ब्राम्हण सभा के छत्तीसगढ़ प्रचार पत्र के विमोचन करीन अउ आने-आने क्षेत्र म अपन योगदान देवइया मनखे मन ल सम्मानित करीन।
गांजा-बरामद
दुरूग पुलिस ह अंतर्राज्यीय गांजा तस्कर गिरोह के पर्दाफास करे म सफलता पाय हे। ए गिरोह के तीन झिन सदस्य ल गिरफ्तार करे गेहे। एखर तीर ले तीन सौ अठासी किलो गांजा अउ आने जिनिस मिलाके करीबन डेढ़ करोड़ रूपिया के समान जब्त करे हे। जिला म नसा के कारोबार करइया मनके खिलाफ पुलिस कोति ले बिसेस अभियान चलाय जात हे। एमा मुखबिर ले मिले सूचना के आधार म टोल प्लाजा कुम्हारी म नाकाबंदी करके एक गाड़ी के कंटेनर ले ए गांजा बरामद करे गेहे।
उपसरपंच-हत्या
जांजगीर-चांपा जिला के बिर्रा क्षेत्र के करही गांव के उपसरपंच के लापता होय के मामला म बड़े जानकारी मिले हे। पुलिस के मुताबिक कुछेक लोगन मिलके उपसरपंच के हत्या करके ओखर शव नदी म फेंक देहे। ए मामला म गांव के सरपंच पति समेत आठ झिन आरोपी ल हिरासत म लेके पुलिस के पूछताछ म ए मामला आगू आइस। जिला के पुलिस अधीक्षक विजय पांडेय ह बतइन कि उपसरपंच के हत्या करे के बात आरोपी मन मंजूर कर लेहे। पुलिस के टीम नदी म गोताखोर मनके मदद ले उपसरपंच के शव के खोज करत हे।
खबर के मुताबिक करही गांव के उपसरपंच पाछू छै सितंबर ले लापता रिहीस। गांव के लोगन मन ह उपसरपंच के तालासी के मांग करत चक्काजाम करे रिहीन।
मुख्यमंत्री-उपासने श्रध्दांजलि
रईपुर के पहिली महिला विधायक अउ समाज सेवी स्वर्गीय रजनी ताई उपासने ल श्रध्दांजलि दे खातिर मुख्यमंत्री विष्णुदेव साय रईपुर स्थित उंखर निवास पहुंचिस। श्री साय ह श्रीमती उपासने के योगदान ल सुरता करीन अउ परिवार वाले मन ले भेंट करीन। ए बेरा म पूर्व राज्यसभा सांसद कैलाश सोनी, संतोष शर्मा अउ जगदीश उपासने मौजूद रिहीन। खबर के मुताबिक श्रीमती उपासने बछर उन्नीस सौ सतहत्तर म जनता पार्टी ले चुनाव जीत के रईपुर के पहिली महिला विधायक बने रिहीन।
अब जानन मौसम के हाल…
मौसम विभाग ह अवइया चौबीस घंटा के दउरान प्रदेस म एक-दू जघा गरज-चमक संग बरसा होय अउ गाज गिरे के चेतावनी देहे। उहें, राज्य के कतकोन क्षेत्र म तेरह सितंबर ले एक घांव फेर मानसून सक्रिय होय के संभावना हरय। उत्तर अउ पश्चिम मध्य बंगाल के खाड़ी ओडिसा तक अउ उत्तर आंध्र प्रदेस के तीर एक चक्रवात बने हे, जेखर प्रभाव ले काली राज्य म कतकोन जघा हल्का ले मध्यम बरसा होय या फेर गरज-चमक संग छींटा बौछार पड़े के संभावना हे। राजधानी रईपुर म आज मंझनिया बाद बादर छाइस अउ जोरदरहा बरसा होइस।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली नौ सितंबर के राज्यमंत्री परिषद के बइठका मंत्रालय म राखे जाही।
– मोहला-मानपुर जिला के अंबागढ़ चौकी थाना क्षेत्र के दू ठिन गांव म होय आने-आने घटना म काली भगवान गणेश के मूर्ति विजर्सन के बेरा दू झिन युवक के तरिया म बूड़े ले मउत होगे।
– राजधानी रईपुर म आज रतिहा कुन गणेश विसर्जन के झांकी निकाले जाही।
– कोंडागांव पुलिस ह लाखों रूपिया कीमत के सोन-चांदी के गहना संग एक झिन आरोपी ल गिरफ्तार करे हे।