राष्ट्रपति द्रौपदी मुर्मु ह किहीन कि विकास म महिला मन ल अग्रणी भूमिका देके सबले प्रभावी उपाय ए हे कि बेटी मन ल सर्वोत्तम शिक्षा दे जाय। आज नई दिल्ली म राष्ट्रीय शिक्षक पुरस्कार समारोह म ओमन किहीन कि बालिका शिक्षा ल सर्वोच्च प्राथमिकता दे जाना चाही। ओमन किहीन कि बालिका शिक्षा परिवार समाज अउ राष्ट्र के विकास म एक अमूल्य योगदान हरय। राष्ट्रपति ह खुसी जतइन कि हाल के बछर म उच्च शिक्षा के दाखिला म नोनी लइका मनके संख्या बाढे़ हे।
कारीकरम म राष्ट्रपति ह देसभर के पैंतालिस शिक्षक मन ल शिक्षा के क्षेत्र म ओमन के उत्कृष्ट योगदान बर राष्ट्रीय शिक्षक पुरस्कार ले सम्मानित करीन। एमा दुरूग जिला के डॉक्टर प्रज्ञा सिंह अउ कोरबा जिला के शिक्षक संतोष कुमार चौरसिया घलो सामिल हे।
शिक्षक दिवस-02
उहें, राजधानी रईपुर के राजभवन म आज शिक्षक दिवस के मउका म आयोजित कारीकरम म राज्यपाल रमेन डेका अउ मुख्यमंत्री विष्णुदेव साय ह बछर दू हजार चौबीस बर चौंसठ झन उत्कृष्ट शिक्षक मन ल राज्य स्तरीय सम्मान प्रदान करीन। ए मउका म स्कूल शिक्षा मंत्री गजेन्द्र यादव ह बछर दू हजार पच्चीस के राज्य शिक्षक सम्मान बर चुने गे चौंसठ शिक्षक मनके नाम के घलो घोसना करीन।
समारोह म राज्यपाल ह अपन संबोधन म प्राचीन भारत के गुरूकुल परंपरा ल श्रेष्ठ बतइन। ओमन किहीन कि शिक्षक मन अइसे पढ़ावय जेखर ले लइका मन स्कूल बर आकर्षित होवय।
समारोह के अध्यक्षता मुख्यमंत्री विष्णुदेव साय ह करीन।
समारोह म चार झिन उत्कृष्ट शिक्षक सूरजपुर जिला के अजय कुमार चतुर्वेदी ल डॉक्टर पदुमलाल पुन्नालाल बख्शी स्मृति पुरस्कार, कबीरधाम जिला के रमेश कुमार चंद्रवंशी ल गजानन माधव मुक्तिबोध स्मृति पुरस्कार, सारंगढ़-बिलाईगढ़ जिला के सुनीता यादव ल डॉक्टर मुकुटधर पाण्डेय स्मृति पुरस्कार अउ रायगढ़ जिला के भोजराम पटेल ल डॉक्टर बलदेव प्रसाद मिश्र स्मृति पुरस्कार ले सम्मानित करे गीस।
प्रधानमंत्री-जीएसटी
प्रधानमंत्री नरेंद्र मोदी ह किहीन कि ओखर सरकार ह जीएसटी म अगला पीढ़ी के सुधार करे हे। दिल्ली म राष्ट्रीय पुरस्कार विजेता शिक्षक मन संग गोठबात म ओमन किहीन कि जीएसटी के दुसरइया चरण राष्ट्र बर सहयोग अउ विकास के दोहरा खुराक हरय।
प्रधानमंत्री मोदी ह किहीन कि अब जीएसटी अउ सरल हो गेहे। ओमन किहीन कि जीएसटी सुधार ले मध्यम वर्ग, नव मध्यम वर्ग, गरीब, युवा अउ महिला सबो झन ल फायदा होही।
जीएसटी परिषद निर्णय स्वागत
मुख्यमंत्री विष्णुदेव साय ह केंद्र सरकार डहार ले करे गे जीएसटी सुधार के सुवागत करीन हे। ओमन किहीन कि जीएसटी म जउन बदलाव करे गेहे। ओहा आम आदमी के जीवन के संघरा उद्योग अउ व्यापार ल नवा गति दिही। स्लैब दर म करे गे कमी ले व्यापार आसान होही। ए ऐतिहासिक निर्णय बर मुख्यमंत्री ह प्रधानमंत्री नरेंद्र मोदी ल धन्यवाद दीन।
जीएसटी के करे गे सुधार के छत्तीसगढ़ के जनता ह घलो सुवागत करे हे। स्वावलंबी अभियान के प्रदेस प्रांत प्रभारी संजय चौबे ह किहीन कि ए सुधार ले सूक्ष्म, लघु अउ मध्यम उद्योग मन ल अच्छा फायदा मिलही।
बातों-बातों में
माओवादी-मुठभेड़
नारायणपुर, दंतेवाड़ा, बीजापुर सीमा म आज सुरक्षाबल अउ माओवादी मन संग होय मुठभेड़ म एक माओवादी मारे गेहे, जेखर शव बरामद कर लेहे। जिला के पुलिस अधीक्षक रॉबिन्सन गुरिया ह बतइन कि इलाका म माओवादी मनके होय के सूचना मिले म नारायणपुर अउ दंतेवाड़ा ले डिस्ट्रिक्ट रिजर्व गार्ड-डीआरजी अउ स्पेशल टॉस्क फोर्स-एसटीएफ के एक संयुक्त टीम मउका बर रवाना करे गे रिहीस। इही दउरान सुरक्षाबल के माओवादी मन संग मुठभेड़ होगिस।
नक्सल ऑपरेशन-बैठक
प्रदेस म नक्सल ऑपरेशन ल लेके राजधानी रईपुर म आज वरिष्ठ अधिकारी मनके अहम बइठका होत हे। एमा छत्तीसगढ़, मध्यप्रदेस, ओडिसा अउ तेलंगाना के पुलिस महानिदेशक, केंद्रीय सुरक्षा बल के अधिकारी, इंटेलिजेंस एजेंसी मनके प्रतिनिधि अउ नक्सल आपरेसन ले जुड़े वरिष्ठ अधिकारी सामिल होथे। बइठका के अगुवई केंद्रीय गृह सचिव गोविंद मोहन अउ आईबी प्रमुख तपन कुमार डेका करत हे। ए बइठका म ओ बिन्दु म खासतौर म मंथन करे जात हे, जेखर जरिया माओवादी मन उपर निर्णायक प्रहार करे जा सकय। खबर के अनुसार ए बइठका म नक्सल आपरेसन ल अउ अक्रामक बनाय, सीमावर्ती राज्य मन म माओवादी मनके घेराबंदी अउ खुफिया सूचना के आदान-प्रदान ल लेके ठोस निर्णय ले जाही।
सीएम-मिशन अंतरिक्ष अभियान
मुख्यमंत्री विष्णुदेव साय ह आज शिक्षक दिवस के मउका म मुख्यमंत्री निवास परिसर ले स्कूली लइका मन म अंतरिक्ष विज्ञान के प्रति जागरूकता बर मिशन अंतरिक्ष अउ प्रोजेक्ट जय विज्ञान अभियान के सुभारंभ करीन। ए कारीकरम ले अंतरिक्ष यात्री ग्रुप कैप्टन शुभांशु शुक्ला घलो वर्चुअल माध्यम ले जुड़िन। ए दउरान जिला प्रशासन रईपुर अउ इग्नाइटिंग ड्रीम्स ऑफ यंग माइंड फाउंडेशन अउ जिला प्रशासन रईपुर अउ विज्ञान भारती के बीच दू ठिन महत्वपूर्ण समझौता होइस, जेखर ले लइका मन ल अंतरिक्ष ले जुड़े बिसय मनके महत्वपूर्ण जानकारी मिलही।
ट्रिपल आईटी-गोंडी भाषा ऐप
ट्रिपल आईटी नवा रईपुर के निदेशक प्रोफेसर ओमप्रकाश व्यास ह आज रईपुर म मुख्यमंत्री विष्णुदेव साय ले सौजन्य भेंट करीन। ए मउका म मुख्यमंत्री ह ‘‘आदि वाणी‘‘ परियोजना के अंतर्गत गोंडी भाषा अनुवादक मोबाइल ऐप के सफल लॉन्च म प्रोफेसर व्यास अउ ओखर टीम ल बधई अउ सुभकामना दीन। ओमन किहीन कि ए ऐप के माध्यम ले गोंडी बोलइया जनजातीय, भाई-बहिनी के आवाज राष्ट्रीय ही नही बल्कि अंतर्राष्ट्रीय स्तर तक पहुंचही। ए तकनीक ओमन ल मुख्यधारा ले जोड़े शिक्षा अउ शासन प्रशासन म ओमन के भागीदारी सुनिश्चित करे के सशक्त माध्यम बनही।
प्रोफेसर व्यास ह मुख्यमंत्री ल बतइन कि ए परियोजना म गोंडी भाषा बर टेक्स्ट-टू-स्पीच अउ अनुवाद प्रणाली विकसित करे गेहे। एखर माध्यम ले गोंडी ले हिंदी अउ अंग्रेजी अनुवाद संभव होही।
ईद-मिलाद-उन-नबी
इस्लाम धर्म के प्रवर्तक पैगम्बर हजरत मोहम्मद के जन्मदिवस ईद-मिलाद-उन-नबी आज छत्तीसगढ़ समेत देसभर म पारंपरिक उछाह के संग मनाय जात हे। राष्ट्रपति द्रौपदी मुर्मु, प्रधानमंत्री नरेंद्र मोदी अउ छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह ईद-मिलाद-उन-नबी म देसवासी मन ल सुभकामना दीन हे। ए मउका म रईपुर समेत प्रदेस के बहुत अकन जघा म मुस्लिम समाज ह जुलूसे मोहम्मदी निकालिस।
शालेय क्रीडा प्रतियोगिता-समापन
गौरेला-पेण्ड्रा-मरवाही जिला के पेण्ड्रा म आयोजित पच्चीसवां राज्य स्तरीय शालेय क्रीडा प्रतियोगिता म ओवर ऑल चैंपियनशिप के खिताब बिलासपुर संभाग ह हासिल करीस। उहें, रईपुर दूसर अउ दुरूग संभाग तीसर जघा पाइस। ए चार दिन के स्पर्धा म जिमनास्टिक, ताईक्वाडो अउ क्रिकेट के मुकाबला होइस।
समापन समारोह म विधायक धर्मजीत सिंह अउ प्रणव कुमार मरपची ह विजेता मन ल पुरस्कार बांटिन।