केन्द्रीय जनजातीय कार्य मंत्रालय डहार ले जनजातीय भाषा बर भारत के पहिली एआई-संचालित अनुवादक ‘‘आदि वाणी‘‘ के बीटा संस्करण लांच करे गेहे। केन्द्रीय जनजातीय कार्य राज्यमंत्री दुर्गादास उइके ह काली नई दिल्ली म राखे गे जनजातीय गौरव बछर समारोह के तहत ए ऐप के सुभारंभ करीन। ए मउका म श्री उइके ह किहीन कि आदि वाणी ऐप जनजातीय क्षेत्र म भाषाई अउ सैक्षिक परिदृश्य ल बदले म सुघ्घर भूमिका निभाही। ए ऐप आदिवासी अउ गैर-आदिवासी समुदाय के बीच गोठबात के सुघ्घर माध्यम साबित होही।
शिक्षक सम्मान
बछर दू हजार चौबीस-पच्चीस म सुघ्घर शिक्षा के काम करइया प्रदेस के चौंसठ सिक्षक मनके चुनई राज्यपाल शिक्षक सम्मान पुरस्कार बर करे गेहे। ए सिक्षक मन ल राज्यपाल रमेन डेका ह अवइया पांच सितंबर के सिक्षक दिवस के मउका म सम्मानित करही। स्कूल सिक्षा विभाग ले मिले खबर के मुताबिक चयनित सिक्षक मन म प्राचार्य, प्राचार्य एल.बी., प्रधान पाठक, व्याख्याता, व्याख्याता एल.बी. अउ सहायक सिक्षक एल.बी. समेत आने-आने श्रेणी के सिक्षक मन सामिल हे।
रेलवे/एसबीआई-समझौता ज्ञापन
रेल मंत्री अश्विनी वैष्णव के मौजूदगी म भारतीय रेलवे अउ भारतीय स्टेट बैंक-एसबीआई के बीच एक ठिन समझौता म हस्ताक्षर करे गेहे। ए मउका म रेलवे बोर्ड के अध्यक्ष सतीश कुमार अउ एसबीआई के अध्यक्ष सी.एस. शेट्टी घलो मौजूद रिहीन। एमओयू के तहत एसबीआई म खाता रखइया रेलवे कर्मचारी बर बीमा कवरेज म बढ़ोतरी करे गेहे। आकस्मिक मउत होय के स्थिति म बीमा लाभ ल बढ़ाके एक करोड़ रूपिया कर दे गेहे। समझौता के तहत एसबीआई म खाता खोले रेलवे कर्मचारी अब बिना कोनो प्रीमियम के भुगतान करे या फेर मेडिकल जांच के दस लाख रूपए के प्राकृतिक मउत बीमा कवरेज के पात्र होही। एखर संगेसंग रेलवे कर्मचारी मन ल हवाई दुर्घटना म मउत होय म एक करोड़ छह लाख रूपिया अउ रूपे डेबिट कार्ड म एक करोड़ रूपिया तक के उपरहा लाभ मिलही। दुर्घटना के स्थिति म रेलवे कर्मचारी मन ल स्थायी पूर्ण विकलांगता म एक करोड़ रूपिया अउ आंशिक विकलांगता म अस्सी लाख रूपिया तक के व्यक्तिगत दुर्घटना बीमा के फायदा दे जाही।
नेता प्रतिपक्ष-मुख्यमंत्री पत्र
छत्तीसगढ़ विधानसभा म नेता प्रतिपक्ष डॉक्टर चरणदास महंत ह मुख्यमंत्री विष्णुदेव साय ल चिट्ठी लिखके कहिन कि एस.डी.आर.एफ. अउ एन.डी.आर.एफ. निधि ले प्रभावित परिवार ल मुआवजा अउ पुनर्वास सहायता जल्दी दे जाय। ओमन किहीन कि फसल हानि, मकान क्षति अउ जनहानि के सर्वें कराके आर्थिक मदद देके संगेसंग बाढ़ प्रभावित क्षेत्र मन म स्वास्थ्य सिविर अउ जरूरी दवई के व्यवस्था करे जाय। बाढ़ग्रस्त बस्तर संभाग म विशेष राहत दल भेजे जाय। डॉक्टर महंत ह किहीन कि राष्ट्रीय आपदा प्रबंधन अधिनियम अउ भारत सरकार के दिसा-निरदेस के मुताबिक अइसन मउका म प्रभावित परिवार मन ल तुरते राहत अउ उचित मुआवजा दे जाना चाही।
भाजपा महिला मोर्चा-घेराव
बिहार के दरभंगा म प्रधानमंत्री नरेन्द्र मोदी उपर कथित रूप ले करे गे आपत्तिजनक टिप्पणी के विरोध म छत्तीसगढ़ भाजपा महिला मोर्चा के कार्यकर्ता आज रायपुर स्थित कांग्रेस मुख्यालय राजीव भवन के घेराव करे बर निकलीन। फेर, पुलिस ह प्रदर्शनकारी मन ल राजीव भवन तक पहुंचे के पहलीच रोक दीस। ए दउरान पुलिस अउ कार्यकर्ता मनके बीच थोरबहुत झूमा-झटकी होइस।
एखर पहिली, भाजपा महिला मोर्चा डहार ले बीटीआई मैदान म आमसभा के आयोजन करे गीस। ए दउरान भारतीय जनता पार्टी के प्रदेस अध्यक्ष किरण सिंह देव, भाजपा के राष्ट्रीय उपाध्यक्ष सरोज पांडेय, सांसद रूपकुमारी चौधरी, कमलेश जांगड़े, महिला मोर्चा के अध्यक्ष विभा अवस्थी, रायपुर महापौर मीनल चौबे, अंबिकापुर महापौर मंजूषा भगत अउ हस्तशिल्प बोर्ड के अध्यक्ष शालिनी राजपूत समेत बड़ संख्या म महिला मोर्चा के कार्यकर्ता मौजूद रिहीस
सभा ल राष्ट्रीय उपाध्यक्ष सरोज पांडेय ह संबोधित करीन। उहें, सभा ल संबोधित करत हस्तशिल्प बोर्ड के अध्यक्ष शालिनी राजपूत ह कहिन कि महिला मनके सम्मान होना चाही।
हाईकोर्ट-जनहित याचिका
छत्तीसगढ़ सरकार म चौदह मंत्री बनाए ल लेके दायर करे गे जनहित याचिका म आज छत्तीसगढ़ उच्च न्यायालय म सुनवाई होइस। ए सुनवाई मुख्य न्यायाधीश रमेश सिन्हा के अगुवई वाले डिवीजन बेंच ह करीन। ए याचिका म मंत्रिमंडल म चौदह मंत्री के संख्या ल असंवैधानिक बतावत चौदहवां मंत्री ल बर्खास्त करे के मांग करे गेहे। आज होय सुनवाई म राज्य सासन ह अपन पक्ष राखीन। सासन कोति ले अधिवक्ता ह बतईन कि मंत्रिमंडल के सीमा तय करे ले जुड़े मामला सुप्रीम कोर्ट म लंबित हवय।
एमा मुख्य न्यायाधीश ह कहिन कि जब यह मामला सुप्रीम कोर्ट म लंबित हवय, त एखर फैसला उहें होना चाही। एमा याचिकाकर्ता ह अदालत ले दू हफ्ता के समय मांगत कहिन कि ए दउरान हम सुप्रीम कोर्ट ले ओ मामला म निर्णय या कोनो दिसा-निरदेस ले आही, तब तक याचिका ल खारिज झन करे जाय। एमा मुख्य न्यायाधीश ह ए मामला म याचिकाकर्ता ल बेरा देवत अवइया सुनवाई तीन हफ्ता के बाद करे के बात कहिन।
उद्योग मंत्री-समीक्षा
वाणिज्य अउ उद्योग मंत्री लखनलाल देवांगन ह आज मंत्रालय म विभागीय कामकाज के समीक्षा करीन। बइठका म श्री देवांगन ह रायपुर के उरला म उनचालीस करोड़ रूपिया के लागत ले बनत प्रदेस के पहिली प्लास्टिक पार्क निर्माण के जानकारी लीन अउ तीस अक्टूबर तक पूरा करे के निरदेस अधिकारी मन ल दीन। ओमन प्रदेस म चार नवा स्मार्ट इंडस्ट्रीयल एरिया के काम जल्दी सुरू करे बर किहीन। एमा जांजगीर-चांपा जिला के सीलादेही-बिर्रा गांव, राजनांदगांव जिला के ग्राम बीजेतला, नवा रायपुर म प्रस्तावित फार्मास्युटिकल पार्क अउ बस्तर जिला के नियानार गांव सामिल हे। बइठका म उद्योग मंत्री ह निर्धारित समय-सीमा म उद्योग स्थापित नइ करइया मामला म नोटिस के बाद भू-निरस्तीरकण के कार्यवाही करे के निरदेस दीन।
त्यौहार/छठ पूजा-स्पेशल ट्रेन
रेलवे ह तिहार के दउरान यात्री मनके सुविधा बर स्पेशल ट्रेन चलाय के फइसला लेहे। एखर तहत दुर्ग अउ सुलतानपुर के बीच रेलवे प्रशासन डहार ले दू फेरा बर फेस्टिवल स्पेशल गाड़ी चलाय जाही। ए गाड़ी दुरूग ले तेरह सितंबर ले लेके उनतीस नवंबर तक हरेक सनिच्चर के सुलतानपुर बर रवाना होही। उहें, चौदह सितंबर ले तीस नवंबर तक हर इतवार के सुलतानपुर ले दुरूग बर चलही।
उहें, अक्टूबर महीना म देवारी के मउका म दुरूग अउ पटना के बीच दिवाली स्पेशल ट्रेन चलाय जाही। ए गाड़ी गोंदिया ले उन्नीस अक्टूबर अउ पटना ले बीस अक्टूबर के चलही।
रेलवे प्रशासन ह छठ पूजा के मउका म गोंदिया अउ पटना के बीच दू फेरा बर छठ पूजा स्पेशल गाड़ी चलाय के फइसला लेहे। ए गाड़ी गोंदिया ले तेईस अउ चौबीस अक्टूबर के संगेसंग पटना ले चौबीस अउ पच्चीस अक्टूबर के चलही।
मौसम
मौसम विभाग ह अवइया चौबीस घंटा के दउरान रायपुर अउ दुरूग संभाग म गरज-चमक के संग भारी बरसा होय के चेतावनी देहे। उहें, प्रदेस के कुछुक जघा म गाज गिरे के आसंका जताय गेहे।
मौसम विभाग के मुताबिक एक निम्नदाब के क्षेत्र उत्तर-पश्चिम बंगाल के खाड़ी के ऊपर बने हे। एखर अवइया चौबीस घंटा म अउ जादा प्रबल होके ओड़िशा कोति बाढ़े के संभावना हवय। उहें, मानसून द्रोणिका बीकानेर, जयपुर, दतिया, सीधी, झारसुगुड़ा, पुरी, उत्तर पश्चिम बंगाल के खाड़ी म स्थित निम्नदाब के केन्द्र तक बने हे। एखर असर ले काली प्रदेस के अधिकाशं जघा म हल्का ले मध्यम बरसा हो सकत हे।
अउ अब थोरकुन समाचार सार म –
– राजधानी रायपुर म काली तीजा मिलन समारोह के आयोजन करे जाही। मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह समारोह के माईपहुना होही।
– सुकमा जिला म माओवादी मन ह दू झिन ग्रामीण मनके हत्या कर देहे। ए घटना ल माओवादी मन ह सिरसट्टी पंचायत के नंदा पारा म अंजाम दीन हे। पुलिस ह मामला के जांच सुरू कर देहे।
– महासमुंद जिला के कोमाखान पुलिस ह गांजा तस्करी के मामला म दू झिन आरोपी मन ल भिलाई ले गिरफ्तार करे हे। आरोपी मनके तीर ले बाईस किलो गांजा जब्त करे गेहे, जेखर कीमत करीबन तीन लाख तैंतीस हजार रूपिया बताय गेहे।
– जांजगीर-चांपा जिला के सेमरा गांव म ट्रैक्टर के चपेट म आय ले फटफटी म बठे चार झिन लइका मन ह घायल होगे हे, जेमा ले दू झिन के स्थिति गंभीर बने हवय।