मुख्यमंत्री श्री साय ह दंतेवाड़ा के चूड़ीटिकरा वार्ड म बनाय गे अस्थाई राहत सिविर पहुंचिन, जिंहा ओमन ह बाढ़ प्रभावित परिवार ले भेंट करके उंखर समस्या ल सुनिन। मुख्यमंत्री ह ए सिविर म भरपूर खाना, साफ पानी अउ सुरक्षित रहे के जघा के बेवस्था करे के निरदेस दीन। श्री साय ह इंहा लगाय गे स्वास्थ्य सिविर म घलो पहुंचिन अउ दवई के उपलब्धता, डॉक्टर के तैनाती अउ मरीज मन ल दे जात प्राथमिक स्वास्थ्य सेवा के जानकारी घलो लीन।
मुख्यमंत्री श्री साय ह बाढ़ के सेति टूटे पुल ल देखिन अउ ओ जघा के आय-जाय के बेवस्था अउ ओला फेर ले बनाय के काम के जानकारी लीन। ओमन ह अधिकारी मन ल प्रभावित गांव म रद्दा, बिजली अउ पिये के पानी जइसे जरूरी सुविधा ल जल्दी ले जल्दी देके बात करीन। ओमन ह किहीन हे कि राहत अउ पुनर्वास के काम म कोनो भी प्रकार के लापरवाही बर्दास नइ करे जाही।
अपन बस्तर दउरा म मुख्यमंत्री ह दंतेवाड़ा म अधिकारी मनके बइठका लीन। मुख्यमंत्री ह किहीन कि बाढ़ ले प्रभावित हरेक परिवार तक बेरा राहत मदद पहुंचाना राज्य सरकार के सबले बड़का प्राथमिकता हे अउ एखर बर सबो स्तर म संवेदनसीलता अउ तत्परता जरूरी हे।
साक्षरता सप्ताह
देसभर म चलइया साक्षरता सप्ताह ह आज ले सुरू हो गेहे। जेखर चलत प्रदेस म कतकोन कारीकरम आयोजित करे जाही। केंद्रीय शिक्षा मंत्रालय के निरदेस के अनुसार सबो बर शिक्षा म आधारित योजना ‘‘उल्लास नव भारत साक्षरता कार्यक्रम‘‘ अउ राष्ट्रीय शिक्षानीति के अनुरूप ए साक्षरता सप्ताह ल मनाय जात हे।
राज्य साक्षरता मिशन प्राधिकरण के अधिकारी मन ह बतइन कि कारीकरम के चलत आज ले मोबाइल ऐप म पंजीयन बर बिसेस अभियान अउ शिक्षा स्वयं सेवक मनके नामांकन सुरू होय हे। काली ले कार्यसाला, सेमीनार अउ वेबीनार के माध्यम ले नवा भारत साक्षरता कारीकरम बर जागरूकता बढ़ाय जाही। तीन सितंबर के पंचायत स्तरीय बइठका, माईलोगिन अउ किसान मनके संग साक्षरता संवाद आयोजित होही। अइसने चार सितंबर के रैली, नाटक अउ गीत के माध्यम ले लोगन मन ल साक्षरता के महत्व ल बताय जाही। फेर पांच सितंबर के शिक्षण सामग्री के प्रदर्सन अउ छै सितंबर के वाद-विवाद, भाषण जइसे प्रतियोगिता होही। त उहें, सात सितंबर के रेडियो िंजंगल, लघु फिलिम अउ महिला साक्षरता उपर बिसेस कारीकरम आयोजित होना हे अउ आखिरी दिन आठ सितंबर के अंतर्राष्ट्रीय साक्षरता दिवस के मउका म जिला स्तर म मुख्य कारीकरम होही, जेमा जनप्रतिनिधि, साहित्यकार, शिक्षक अउ पढ़इया लइका मन भाग लिही।
नशीली दवा कार्रवाई
प्रदेस म औषधि अउ पुलिस विभाग कोति ले नसीला दवई के अवैध व्यापार के खिलाफ म बड़का कदम उठाय जात हे। हाले म कतकोन जघा म बड़का मात्रा म प्रतिबंधित दवई ल जब्त करके आरोपी मन ल पकड़े गे रिहीस।
कबीरधाम जिला के पंडरिया म प्रतिबंधित दवई के दू सौ ठिन पत्ता ल जब्त करे गीस। त उहें, रायपुर म कोडीन फॉस्फेट मिले दवई के अवैध बिक्री उपर कार्रवाई करत हुए दु झिन मनखे ल हिरासत म ले गीस, जिखर करा ले एक सौ बीस नग दवई पाय गीस। गरियाबंद जिला के कोपरा म एक दवई दुकान म प्रतिबंधित नसीला दवई के खरीदी-बिक्री रिकार्ड म गड़बड़ी पाय जाय म दुकान संचालक के खिलाफ कार्रवाई करे गीस।
फेर इही बीच, औषधि विभाग कोति ले नसा के खिलाफ जागरूकता अभियान घलो चलाय जात हे। बेमेतरा म औषधि अउ महिला व बालविकास विभाग के डहार ले एक ठिन कारीकरम करके लोगन मन ल नसा ले दूर रहे बर बोले जात हे। एखर अलावा कोंडागांव, जांजगीर-चांपा, बिलासपुर अउ राजनांदगांव म घलो औषधि निरीक्षक मन कोति ले स्कूल म जागरूकता कारीकरम करके जवान लइका मन ल नसा ले दूर रहे के सपथ दिलाय गीस।
महासमुंद म जिला प्रशासन कोति ले दवई बेचइया मनके बइठका लेके ओमन ले समाज ल नसा ले बचाय खातिर सहयोग देके अपील करीन।
भाजपा महिला मोर्चा
बिहार के दरभंगा म प्रधानमंत्री नरेंद्र मोदी उपर कथित रूप ले करे गे आपत्तिजनक टिप्पणी के विरोध म छत्तीसगढ़ भाजपा महिला मोर्चा कोति ले काली रायपुर म प्रदर्सन करे जाही। मोर्चा के प्रदेस अध्यक्ष विभा अवस्थी ह आज रायपुर म एक ठिन पत्रकारवार्ता म बतइन कि काली बीटीआई मैदान म एक आमसभा होही, जेखर बाद एक रैली के रूप म चलके मोर्चा के सदस्य मन कांग्रेस कार्यालय राजीव भवन के घेराव करइया हे। प्रदर्सन म कतकोन सामाजिक संगठन ले जुड़े माईलोगिन मन ह घलो सामिल होही।
नकली शराब-आरोपी गिरफ्तार
मुंगेली पुलिस ह नकली सराब के खिलाफ कार्रवाई करत हुए चार झिन अंतर्राज्यीय तस्कर मन ल गिरफ्तार करे हे। एखर करा ले पैंतीस हजार बल्क लीटर स्प्रिट अउ बड़का मात्रा म नकली सराब बनाय के समान घलो जब्त होय हे। जब्त करे के सामान के कीमत ह छियालिस लाख रूपिया ले जादा के बताय जात हे। पुलिस अधीक्षक भोजराम पटेल ह बतइन कि मुखबिर के सूचना के मिलतेच फास्टरपुर पुलिस अउ साइबर सेल के संयुक्त टीम ह एक ट्रक टैंकर ले ए समान ल पकड़े हे। फेर आरोपी मन के खिलाफ मामला दरज करके ओमन ल न्यायिक रिमांड म भेज देहे।
शालेय क्रीड़ा प्रतियोगिता
गौरेला पेण्ड्रा मरवाही जिला के पेण्ड्रा म आज ले पच्चीसवां राज्य स्तरीय चार दिन के शालेय क्रीड़ा प्रतियोगिता ह सुरू हो गेहे। एमा बस्तर, दुरूग, रायपुर, सरगुजा अउ बिलासपुर संभाग के करीबन छै सौ पचहत्तर झिन खिलाड़ी अउ पचास झिन कोच मन ह भाग लेवत हे। ए प्रतियोगिता म जिमनास्टिक, ताइक्वांडो अउ क्रिकेट खेल के मुकाबला होही। आज सुभारंभ के मउका म सबो खिलाड़ी मन ह बढ़िया मार्चपास्ट करत हुए लोक नृत्य के सुघ्घर प्रस्तुति दीन। ए प्रतियोगिता के समापन ह चार सितंबर के होवइया हे।
उहें, कोंडागांव म चलत पच्चीसवां राज्य स्तरीय शालेय क्रीड़ा प्रतियोगिता ह रंगारंग सांस्कृतिक कारीकरम के संग पूरा होइस, जेमा ओवर ऑल चैंपियनशिप के खिताब ल बस्तर जोन ह जितिस। फुटबॉल अउ मलखंभ म बस्तर जोन के खिलाड़ी मन अव्वल रिहीन, त उहें, तीरंदाजी के तीनों आयु वर्ग म बिलासपुर जोन ह बाजी मारिन। रायपुर जोन ह दूसरइया स्थान म रिहीन। ए प्रतियोगिता म प्रदेसभर के सबो पांच ठिन संभाग के आठ सौ ले जादा खिलाड़ी मन ह भाग लीन।
अउ अब पेस हे मौसम के हाल…
प्रदेस म मानसून ह एक घांव फेर तेज हो गेहे। मौसम विभाग के अनुसार काली ले चार सितंबर तक बिलासपुर, रायपुर अउ दुरूग संभाग के कतकोन जिला के कुछेक जघा म भारी बरसा अउ एक-दू जघा म अतिभारी बरसा होय के संभावना हे। उहें, काली प्रदेस के जादातर जघा म हल्का ले मध्यम बरसा होय या फेर गरज-चमक के संग बूंदाबांदी हो सकत हे। फेर काली एक-दू जघा म गाज घलो गिर सकत हे। भारी बरसा के मुख्य क्षेत्र बिलासपुर अउ रायपुर संभाग के पूर्वी जिला संभावित हे।
राजधानी रायपुर म आज मंझनिया के बाद कतकोन जघा म तेज बरसा होइस।
इही बीच, सुकमा जिला के तेलावर्ती गांव म भारी बरसा के चलत एक झिन जवान लइका ह शबरी नदी के तीर म फंस गे रिहीस, जेखर जानकारी लगतेच पुलिस अउ सीआरपीएफ के टीम ह मउका म पहुंचिन अउ करीबन बारह घंटा के रेस्क्यू ऑपरेसन के बाद ओला भारतीय वायुसेना के हेलीकॉप्टर के मदद ले सुरक्षित बचा ले गीस।
ओति, डोंगरगढ़ विकासखंड के कोलेंद्रा अउ ठाकुर टोला गांव के बीच उफनत नाला के तेज बहाव म काली एक झन जवान लइका ह बोहागे रिहीस। जेखर बाद बहुत मुस्किल ले पुलिस अउ गांव के रहइया लोगन मन ह मिलके ओखर शव ल बरामद करीन हे।