ओमन ह किहीन कि तिहार के खुसी के बीच स्वच्छता उपर जोर देवत रहना चाही, काबर कि जिंहा स्वच्छता हे उंहा तिहार के खुसी ह अउ जादा बाढ़ जाथे। ओमन ह किहीन कि ‘एक भारत-श्रेष्ठ भारत‘ के भावना ह देस के विकास बर बड़ जरूरी हे अउ एमा खेल के बड़का भूमिका घलो हे। संगेसंग श्रीनगर म आयोजित प्रथम खेलो इंडिया जलक्रीड़ा उत्सव के घलो गोठ करीन।
प्रधानमंत्री ह किहीन कि मानसून के चलत आय प्राकृतिक आपदा ह पाछू कुछू हफ्ता ले देस म बाढ़ अउ भूस्खलन के रूप म बड़का बिपत्ति लेके आय हे। परेसानी के ए बेरा म स्थानीय लोगन सामाजिक कार्यकर्ता, चिकित्सा अउ प्रशासन ह भरपूर मदद करे हे।मन की बात-02
प्रधानमंत्री ह डिजिटल ऐप प्रतिभा सेतु के घलो गोठ करीन। ए ऐप म ओ उम्मीदवार मनके जानकारी राखे गेहे, जउन मन ह यूपीएससी के आने-आने परीक्षा के सबो चरण ल पास कर लीन हे, फेर आखिरी मैरिट सूची म उंखर नाव ह नइ आय पाइस। ए पोर्टल ले प्राइवेट कंपनी ह ए होनहार छात्र मनके जानकारी लेके ओमन ल अपन इंहा नियुक्ति दे सकत हे।
श्री मोदी ह किहीन कि सौर ऊर्जा किसान मनके जीवन म बड़का बदलाव लावत हे। रामायण अउ भारतीय संस्कृति के प्रति प्रेम ह अब दुनिया भर के हरेक कोना म बाढ़त जात हे। ओमन ह इटली म महर्षि वाल्मीकि अउ कनाडा म भगवान श्रीराम के प्रतिमा के अनावरण के उल्लेख करीन।
प्रधानमंत्री ह बतइन कि पंद्रह सितंबर के भारत के महान इंजीनियर मोक्षगुंडम विश्वेश्वरैय्या के जनमदिन हरय, जेला इंजीनियर दिवस के रूप म मनाय जाथे। ओमन ह किहीन कि सत्रह सितंबर के विश्वकर्मा जयंती हे। श्री मोदी ह बतइन कि ए दिन ह ओ विश्वकर्मा बंधू मन ल समर्पित हरय जउन मन परंपरागत सिल्प, कौशल अउ ज्ञान-विज्ञान ल सरलग एक पीढ़ी ले दूसर पीढ़ी तक पहुंचावत हे।
मन की बात-छत्तीसगढ़
प्रधानमंत्री नरेंद्र मोदी के रेडियो कारीकरम ‘मन की बात‘ ल छत्तीसगढ़ म घलो सुने गिस। मुख्यमंत्री विष्णुदेव साय ह नवा रायपुर के डॉक्टर श्यामा प्रसाद उद्योग अउ व्यापार परिसर म आयोजित कारीकरम म सामिल होइन। ए मउका म मंत्री, विधायक, जनप्रतिनिधि अउ आम लोगन मन ह घलो बड़का संख्या म मौजूद रिहीन।
ए बेरा म मुख्यमंत्री ह किहीन कि ‘मन की बात‘ हर महिना प्रदेस के लोगन मन ल नवा ऊर्जा अउ प्रेरणा देथे। ओमन ह किहीन कि प्रधानमंत्री के ए रेडियो कारीकरम ह समाज के सबो वर्ग म सकारात्मक सोच अउ राष्ट्रीय चेतना ल प्रबल करथे। छत्तीसगढ़ के रजत जयंती बछर के बारे म बोलत हुए मुख्यमंत्री ह किहीन कि विकसित छत्तीसगढ़ के निर्माण तभे संभव हे, जब हरेक लोगन मन ह अपन भूमिका ल ईमानदारी ले निभावय।
हाईकोर्ट-नीट/यूजी
छत्तीसगढ़ उच्च न्यायालय ह नीट/यूजी के काउंसिलिंग प्रक्रिया अउ आवंटन के खिलाफ दायर याचिका ल खारिज कर देहे। छत्तीसगढ़ चिकित्सा शिक्षा निदेसालय-सीजीडीएमई कोति ले जारी करे गे प्रावीण्य सूची ल वैध मानत हुए हाईकोर्ट ह ओखर आधार म करे गे सीट आवंटन के प्रक्रिया ल सही माने हे। एखर बाद चिकित्सा काउंसिलिंग समिति ले काउंसिलिंग के नवा तिथि के दिसा निरदेस मिले म दूसर चरण अउ अवइया चरण के नवा समय सारिणी ल डीएमई कोति ले जारी करे जाही। नवा समय-सारिणी के जानकारी ह अभ्यर्थी मन ल सीजीडीएमई के वेबसाइट म मिल जही।
जानबा के अनुसार नीट/यूजी के काउंसिलिंग के बेरा एक झन अभ्यर्थी ह पहिली चरण के काउंसिलिंग म सीजीडीएमई कोति ले देगे श्रेणी अउ संपर्क म बदले के विकल्प ल चुनौती देवत हुए हाईकोर्ट म याचिका लगाय रिहीन। संगेसंग एखरे आधार म बारह अगस्त के जारी करे गे प्रावीण्य सूची ल घलो मान्य नइ करे के मांग करे गे रिहीस।
जीडीपी-वृध्दि अनुमान
भारत के वास्तविक सकल घरेलू उत्पाद- जीडीपी वर्तमान वित्त बछर के अप्रैल-जून तिमाही म सात दसमलव आठ प्रतिसत के दर ले बाढे़ के अनुमान हे। एहा पांच तिमाही म सबले जादा हे। पाछू वित्त बछर के चौथा तिमाही म जीडीपी ह सात दसमलव चार प्रतिसत रिहीस। जबकि पाछू वित्त बछर के पहिली तिमाही म एहा छै दसमलव पांच प्रतिसत रिहीस। सांख्यिकी अउ कारीकरम कार्यान्वयन मंत्रालय कोति ले जारी करे गे, पहिली तिमाही के आंकड़ा के अनुसार नामिनल जीडीपी म आठ दसमलव आठ प्रतिसत के वृध्दि होइस हे।
ऐति, छत्तीसगढ़ लघु उद्योग भारती सर्विसेस इकाई के बैंकिंग विभाग के उद्योगपति दुर्गा प्रसाद ह किहीन हे कि छोटे इकाई म सरकार ह जादा धियान देवत हे। एखरे सेति ए वृध्दि देखे बर मिलत हे।
दीदी के गोठ
‘‘दीदी के गोठ‘‘ रेडियो कारीकरम ल सुने बर प्रदेस के सबो जिला पंचायत म बिसेस बेवस्था करे गे रिहीस। दीदी के गोठ रेडियो कारीकरम के प्रसारण हर महिना के आखिरी ईतवार के मंझनिया बारह बजके पंद्रह मिनट म आकाशवाणी केंद्र ले करे जाही।साइबर जागरूकता कार्यक्रम
साइबर अपराध ल रोके अउ लोगन मन ल जागरूक करे के उद्देस्य ले सक्ति पुलिस अउ एसबीआई बैंक कोति ले साइबर जागरूकता कारीकरम के आयोजन करे गीस। ए बेरा म नुक्कड़ नाटक करके लोगन मन ल साइबर ठगी के बारे म बताय गीस। उहें, साइबर सर्तकता रथ ल घलो हरा झंडी दिखाके रवाना करे गीस। ए रथ ह जघा-जघा घूमके लोगन मन ल साइबर अपराध ले बांचे के उपाय ल बताही।
फुटबॉल प्रतियोगिता
ऑल इंडिया फुटबॉल फेडरेशन अउ रामकृष्ण मिशन आश्रम कोति ले नारायणपुर म सब जूनियर महिला राष्ट्रीय फुटबॉल प्रतियोगिता के आयोजन करे जात हे। ए प्रतियोगिता के चलत खेले गे दूसर सेमीफाइनल मुकाबला म केरल ेके टीम ह राजस्थान ल दू के मुकाबला म आठ गोल ले हराके फाइनल म प्रवेस करे हे। ए प्रतियोगिता के फाइनल मुकाबला तीन सितंबर के केरल अउ उत्तर प्रदेस के बीच खेले जाही। ए प्रतियोगिता म देसभर के चौदह ठिन टीम ह भाग लीन।
चक्रधर समारोह
रायगढ़ म चलत चक्रधर समारोह के चौथा दिन ओडिशी, कथक, पंथी नृत्य, सितार वादन अउ कव्वाली के प्रस्तुति ह लोगन मन के मन ल मोह डरिन। त उहें, दिल्ली ले आय अनीस साबरी के कव्वाली ह दर्सक मन ल झूमे बर मजबूर कर दीन।
ऐति, सुप्रसिध्द पंथी नर्तक पद्मश्री राधेश्याम बारले के टीम ह संत बाबा गुरूघासी दास के संदेस उपर जीवंत प्रस्तुति दीन। ए कारीकरम म इशिका गिरि ह ठुमरी, श्वेता वर्मा ह कत्थक, प्रोफेसर डॉक्टर लवली शर्मा ह सितार वादन अउ खैरागढ़ संगीत विश्वविद्यालय के छात्र मन ह लोकनृत्य ल प्रस्तुत करीन।