भारत के वास्तविक सकल घरेलू उत्पाद जीडीपी वर्तमान वित्त बछर के अप्रैल-जून तिमाही म सात दसमलव आठ प्रतिसत के दर ले बाढ़े के अनुमान हरय। ए पांच तिमाही म सबले जादा हे। पाछू वित्त बछर के चौथा तिमाही म जीडीपी ह सात दसमलव चार प्रतिसत रिहीस। जबकि पाछू वित्त बछर के पहिली तिमाही म एहा छै दसमलव पांच प्रतिसत रिहीस। सांंख्यकीय अउ कारीकरम कार्यान्वयन मंत्रालय कोति ले जारी होय पहिली तिमाही के आंकड़ा के अनुसार नामिनल जीडीपी म आठ दसमलव आठ प्रतिसत के वृध्दि होय हे।
मुख्यमंत्री विदेश दौरा-वापसी
मुख्यमंत्री विष्णुदेव साय ह अपन आठ दिन के जापान अउ दक्षिण कोरिया के बिदेस दउरा के बाद आज राजधानी रायपुर लहुट गेहे। स्वामी विवेकानंद विमानतल म पत्रकार मनले गोठबात करत हुए मुख्यमंत्री ह किहीन कि उंखर ए यात्रा ह बढ़िया रिहीस। ए यात्रा ले प्रदेस म बिदेसी निवेस अउ औद्योगिक विकास के रद्दा खुलही। श्री साय ह बतइन कि प्रधानमंत्री नरेंद्र मोदी के जापान यात्रा के बेरा म ए तय होय हे कि भारत म जापान ह छै लाख करोड़ रूपिया के निवेस करही अउ दस साल के आर्थिक रोड मैप ल तियार करे गेहे। जेखर बड़का हिस्सा छत्तीसगढ़ ल घलो मिलइया हे। ओमन ह बतइन कि भारत अउ जापान के बीच होय समझौता ले प्रदेस म एआई, सेमी कंडक्टर अउ रक्षा क्षेत्र म निवेस के संभावना बाढ़े ले रोजगार के बड़े अवसर छत्तीसगढ़ के जवान लइका मन ल मिलही।
मुख्यमंत्री ह बतइन कि ए यात्रा के बेरा म जापान अउ दक्षिण कोरिया ले छत्तीसगढ़ म निवेस के संबंध म गोठबात होइस अउ एआई, सेमी कंडक्टर, टेक्सटाइल अउ खाद्य प्रसंस्करण जइसे क्षेत्र म बड़का निवेस के सहमति बने हे। संगेसंग कतकोन औद्योगिक संस्थान ले छत्तीसगढ़ म निवेस के प्रस्ताव घलो मिले हे। श्री साय ह बतइन कि उंहा के व्यापारिक संगठन के प्रतिनिधि मनले घलो चर्चा होइस। दूनों ही देस के प्रतिनिधि मन ह छत्तीसगढ़ म निवेस ल लेके सकारात्मक दिखाई दीन। श्री साय ह बतइन कि जापान के ओसाका सहर म आयोजित वर्ल्ड एक्स्पो म छत्तीसगढ़ ह घलो अपन पवेलियन बनाय रिहीस, जेमा हर दिन तीस हजार ले जादा लोगन मन पहुंचत रिहीन। ए एक्स्पो म छत्तीसगढ़ के औद्योगिक स्थिति निवेस के संभावना अउ संस्कृति के बारे म लोगन मन ह बिस्तार ले जानकारी लीन।
एखर ले पहिली, श्री साय के वापस लहुटे म रायपुर के स्वामी विवेकानंद विमान तल म मंत्री, भाजपा के पदाधिकारी अउ कार्यकर्ता मन ह उंखर जोरदार स्वागत करीन।
स्वास्थ्य मिशन-कर्मचारी आदेश
प्रदेस म राष्ट्रीय स्वास्थ्य मिशन-एनएचएम करमचारी मनके हड़ताल ह आज घलो चलत हे। जांजगीर-चांपा जिला म ए करमचारी मन ह पीपीई कीट पहिनके रैली निकालिन अउ विरोध प्रदर्सन करीन। ए मउका म संघ के प्रदेस अध्यक्ष अमित मिरी ह किहीन कि सरकार ह जतना भी दबाव डाल लेवय, जब तक मांग पूरा नइ होही, ए आंदोलन ह चलत रइही।
इही बीचव, राज्य सरकार ह किहीन हे कि राष्ट्रीय स्वास्थ्य मिशन-एनएचएम के अधिकारी अउ करमचारी मन ल काम के जघा म नइ रहे म ‘‘काम नहीं तो वेतन नहीं‘‘ के सिध्दांत के पालन करना होही। ए संबंध म स्वास्थ्य विभाग ह मुख्य चिकित्सा अउ स्वास्थ्य अधिकारी मन ल ए महिना म नइ आय म वेतन ल आहरित नइ करे के निरदेस घलो जारी करे हे। सबो जिला के मुख्य चिकित्सा अउ स्वास्थ्य अधिकारी मन ल भेजे गे एक ठिक चिट्ठी म कहे गेहे कि पाछू अट्ठारा अगस्त ले सरलग नइ आवत एनएचएम अधिकारी अउ करमचारी मनके जानकारी ल तुरते राज्य कार्यालय ल भेजे जाय।
शिक्षादूत-हत्या
बीजापुर जिला म पाछू रतिहा माओवादी मन ह एक झिन शिक्षक के हत्या कर दीन। जानबा के अनुसार गंगालूर थाना क्षेत्र के नेन्द्रा म पदस्थ शिक्षक ह काली संझा स्कूल ले अपन घर लहुटत रिहीस। फेर इही बेरा म माओवादी मन ह ओखर अपहरण करके हत्या कर दीस। मृतक कल्लू ताती तोरता के रहइया रिहीस। फेर अइसने कुछू दिन पहिली घलो माओवादी मन ह एक झिन अउ शिक्षक के हत्या करे रिहीन।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘‘मन की बात‘‘ कारीकरम म अपन बिचार साझा कारही। आकाशवाणी अउ दूरदर्शन के सबो नेटवर्क, आकाशवाणी समाचार के वेबसाइट अउ न्यूज ऑन मोबाइल ऐप म ए कारीकरम सीधा प्रसारित होही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल म घलो एखर सीधा प्रसारण करे जाही।
उच्च न्यायालय रजत जयंती समारोह
छत्तीसगढ़ उच्च न्यायालय के रजत जयंती बछर के चलत काली उच्च न्यायालय के सभागार म अधिवक्ता मन बर वाद-विवाद प्रतियोगिता के आयोजन करे गीस। ए प्रतियोगिता ह ‘‘नैतिक मूल्यों से समझौता किए बिना क्या कृत्रिम बुध्दिमता-एआई न्याय को अधिक प्रभावी बना सकती हैं?‘‘ बिसय उपर आधारित रिहीस। जेमा अधिवक्ता मन ह न्याय प्रणाली म एआई के उपयोग उपर अपन राय दीन। एखर बाद मुख्य न्यायाधीश रमेश सिन्हा ह ए प्रतियोगिता म शीर्ष तीन झिन प्रतिभागी मन ल इनाम दीन।
सांसद खेल महोत्सव
राष्ट्रीय खेल दिवस के मउका म काली राष्ट्रीय ताप विद्युत निगम लिमिटेड-एनटीपीसी सीपत म केंद्रीय राज्यमंत्री तोखन साहू ह सांसद खेल महोत्सव अभियान के सुभारंभ करीन। सांसद खेल महोत्सव ह अवइया बीस सितंबर तक चलही। ए बेरा म खेल पंजीयन करे जाही अउ इक्कीस सितंबर ले पच्चीस दिसंबर तक कतकोन खेल के आयोजन होही।
सांसद खेल महोत्सव अभियान के चलत अंतर ग्रामीण कबड्डी प्रतियोगिता के आयोजन करे गीस, जेमा आठ ठिन गांव के छियानवे झिन खिलाड़ी मन सामिल होइन।
समीक्षा-बैठक
वाणिज्यिक कर मंत्री लखनलाल देवांगन ह काली नवा रायपुर म आबकारी विभाग के कामबूता के जानकारी लीन। ए बेरा म ओमन ह आबकारी विभाग के चार ठिन नवा सॉफ्टवेयर ल लॉन्च करीन। एमा आईओएस मनपसंद मोबाइल एप्लीकेशन, सैलरी कलेक्सन वेब एप्लीकेशन, सेव सुविधा मोबाइल एप्लीकेशन अउ टोल फ्री एप्लीकेशन सामिल हरय।
दीदी के गोठ
राज्य ग्रमीण आजीविका मिशन-बिहान के चलत तियार बिसेस रेडियो कारीकरम ‘‘दीदी के गोठ‘‘ कारीकरम के सुभारंभ काली इकतीस अगस्त के मंझनिया बारह बजके पंद्रह मिनट म करे जाही। ए कारीकरम ह आकाशवाणी रायपुर समेत प्रदेस के सबो आकाशवाणी केंद्र ले एके संघरा प्रसारित होही। संगेसंग एखर सीधा प्रसारण ऑनलाइन प्लेटफार्म म घलो उपलब्ध रइही। जेखर ले लोगन मन जुड़ सकय।
ए बेरा म मुख्यमंत्री विष्णुदेव साय, केंद्रीय ग्रामीण विकास मंत्री शिवराज सिंह चौहान अउ राज्य के उपमुख्यमंत्री अउ पंचायत तथा ग्रामीण विकास मंत्री विजय शर्मा के ग्रामीण माईलोगिन मनके नांव संदेस प्रसारित करे जाही।
जानबा के अनुसार दीदी के गोठ‘‘ कारीकरम के मुख्य उद्देस्य ग्रामीण अंचल के माईलोगिन मन ल शासन के कतकोन योजना ले जोड़ना ओमन ल स्व-रोजगार के मउका देना हवय। ए कारीकरम म स्व-सहायता समूह के सफल माईलोगिन मन के कहानी सुनाय जाही।
कर्मयोगी-अभियान
पर्यटन मंत्री राजेश अग्रवाल ह काली अंबिकापुर म आदि कर्मयोगी अभियान के चलत आयोजित जिला स्तरीय उन्मुखी कारीकरम म सामिल होइन। ए बेरा म श्री अग्रवाल ह किहीन कि प्रधानमंत्री नरेंद्र मोदी कोति ले सुरू करे गे ‘‘आदि कर्मयोगी अभियान‘‘ जनजाति क्षेत्र बर एक ठिक परिवर्तनकारी राष्ट्रीय आंदोलन हरय। ए अभियान ह ‘‘सबका साथ सबका विकास, सबका विश्वास और सबका प्रयास‘‘ के आधार लेके सुरू करे गेहे। पर्यटन मंत्री किहीन कि राज्य के जनजातीय क्षेत्र म मूलभूत सुविधा उपलब्ध कराय बर तेजी ले कोसिस करे जात हे। केंद्र अउ राज्य सरकार के कारीकरम ल अउ अच्छा तरीका ले करे बर सामूहिक रूप ले लोगन मनके सहभागिता ह जरूरी हरय।
नो हेलमेट-नो पेट्रोल
रायपुर पेट्रोल पंप एसोसिएसन ह एक सितंबर ले ‘‘नो हेलमेट-नो पेट्रोल‘‘ अभियान ल चलाय के फइसला लेहे। एसोसिएसन के अध्यक्ष अखिल धगट के नेतृत्व म प्रतिनिधिमंडल ह काली ए संबंध म उपमुख्यमंत्री अरूण साव अउ कलेक्टर डॉक्टर गौरव सिंह ल ज्ञापन सौंपिन। श्री धगट ह बतइन कि एसोसिएसन के बइठका म तय होय हे कि पेट्रोल पंप म हेलमेट पहिनके अवइया दोपहिया गाड़ी चलइया मन ल ही पेट्रोल दे जाही। एसोसिएसन ह लोगन मनले आग्रह करे हे कि दूपहिया गाड़ी चलात बेरा हेलमेट जरूर पहिने। ओमन ह ए अभियान म लोगन मन ले घलो सहयोग के अपील करे हे।