छत्तीसगढ़ समेत देसभर म आज राष्ट्रीय खेल दिवस मनाय जात हे। ए दिवस हर साल उनतीस अगस्त के हॉकी के दिग्गज खिलाड़ी मेजर ध्यानचंद के जयंती के मउका म मनाय जात हे। ए मउका म प्रधानमंत्री नरेंद्र मोदी ह सोसल मीडिया पोस्ट म मेजर ध्यानचंद ल श्रध्दांजलि अर्पित करीन। उहें, आज बिहनिया नई दिल्ली के मेजर ध्यानचंद राष्ट्रीय स्टेडियम म युवा कारीकरम अउ खेलमंत्री मनसुख मांडविया ह मेजर ध्यानचंद के प्रतिमा म पुष्पांजलि अर्पित करीन। ए मउका म आज ले इकतीस अगस्त तक पूरा देस म फिट इंडिया-अखिल भारतीय खेल आंदोलन के आयोजन करे जाही। ए राष्ट्रव्यापी खेल अउ फिटनेस आंदोलन ‘‘एक घंटा खेल के मैदान में थीम के तहत मनाय जात हे।
राष्ट्रीय खेल दिवस के मउका म आज राजधानी रईपुर आयोजित कारीकरम म उपमुख्यमंत्री अउ खेल मंत्री अरूण साव सामिल होइन। ए मउका म कारीकरम ल संबोधित करत श्री साव ह खेल मन ल बढ़ावा देबर रईपुर प्रीमियर लीग के आयोजन के घोसना करीन। ओमन किहीन कि ए जम्मों संभागीय मुख्यालय म एखर आयोजन के परयास करे जाही। श्री साव ह रईपुर नगर-निगम क्षेत्र के स्वच्छता बर अंतर्राष्ट्रीय स्तर के चार खिलाड़ी मन ल ब्रांड एंबेसडर बनाय के घोसना घलो करीन। ओमन कारीकरम म मौजूद लोगन मन ल फिट रहे बर मैदान म जाके खेले अउ एखर बर दूसर मन ल घलो प्रेरित करे के सपथ दिलाइन।
राष्ट्रीय-खेल दिवस-02
राष्ट्रीय खेल दिवस के मउका म सक्ति म राष्ट्रीय स्तर के खिलाड़ी अउ खेल संघ के पदाधिकारी मनके सम्मान करे गीस। कारीकरम म सांसद कमलेश जांगड़े अउ जिला पंचायत के मुख्य कार्यपालन अधिकारी वासु जैन मौजूद रिहीन। कारीकरम स्थल म जनप्रतिनिधि अउ अधिकारी मनके बीच रस्सा खिच स्पर्धा होइस।
उहें, जांजगीर म सांसद कमलेश जांगड़े समेत दूसर जनप्रतिनिधि अउ अधिकारी मनके मौजूदगी म फिट इंडिया के तहत पैदल मार्च निकाले गीस। ए मउका म राष्ट्रीय स्तर के खिलाड़ी मनके सम्मान करे के संघरा आने-आने खेल गतिविधि राखे गीस।
नीति आयोग-कार्यशाला
नीति आयोग कोति ले रईपुर म ‘‘फॉस्टरिंग मेंटरशिप इन एजुकेशनः ए पाथवे टू इक्विटी‘‘ बिसय उपर राष्ट्रीय परामर्स कार्यसाला के आयोजन करे गीस। कार्यशाला ल संबोधित करत नीति आयोग के सदस्य डॉक्टर वी.के.पॉल ह शिक्षा म संरचित अउ संस्थागत मेंटरशिप कारीकरम ल समय के जरूरत बतइन। डॉक्टर पॉल ह प्रायमरी स्कूल ले उच्च शैक्षणिक संस्थान तक ड्रॉपआउट दर के आंकड़ा उपर चिंता जतइन। ओमन किहीन कि ए न केवल व्यक्तिगत हानि हे बल्कि, राष्ट्र के क्षमता के नुकसान हरय।
कार्यसाला ल संबोधित करत वित्त मंत्री ओपी चौधरी ह शिक्षा म मेंटरशिप के भूमिका ल सामाजिक न्याय के दृष्टि ले अत्यंत महत्वपूर्ण बतइन। श्री चौधरी ह किहीन कि युवा मन ल अर्थव्यवस्था ले जोड़ना होही, ताकि ओमन विकसित भारत के निर्माण कर सकय।
मुख्यमंत्री-दक्षिण कोरिया
दक्षिण कोरिया यात्रा के दउरान मुख्यमंत्री विष्णुदेव साय ह काली सियोल म व्यापारिक संगठन कोरिया इंटरनेशनल ट्रेड एसोसिएशन के चेयरमेन जिन सिक युन अउ वाइस प्रेसिडेंट किम की ह्यून ले मुलाकात करीन। ए मउका म मुख्यमंत्री ह व्यापारिक संगठन के पदाधिकारी मन संग राज्य के औद्योगिक नीति प्राकृतिक संसाधन अउ कुशल मानव संसाधन के बिसय उपर चर्चा करीन। श्री साय ह उम्मीद जतइन कि ए साझेदारी ले राज्य म खाद्य प्रसंस्करण, इलेक्ट्रानिक्स, ऑटोमोबाइल, स्टील अउ नवीकरणीय ऊर्जा जइसन क्षेत्र म निवेस बाढ़ही अउ रोजगार के अवसर बनही।
इही बीच, उपमुख्यमंत्री अरूण साव ह आसा जतइन कि मुख्यमंत्री के विदेस दउरा ले राज्य के औद्योगिक विकास होही अउ युवा मन बर रोजगार मिलही।
मुख्यमंत्री श्री साय काली अपन विदेस दउरा ले स्वदेस लहूटही। रईपुर आगमन म भाजपा कोति ले मुख्यमंत्री के सुवागत करे जाही। एखर तियारी के सिलसिला म भाजपा कोति ले रईपुर म आज एक ठिन बइठका राखे गीस।
माओवादी-हथियार बरामद
‘‘माड़ बचाव‘‘ माओवादी विरोधी अभियान के तहत नारायणपुर जिला म सुरक्षाबल मन बड़का मात्रा म अत्याधुनिक हथियार, बिस्फोट सामग्री अउ माओवादी साहित्य बरामद करे म सफलता पाय हे। सुरक्षाबल कोति ले दावा करे गेहे कि अभियान के दउरान होय मुठभेड़ म कई झन माओवादी घायल घलो होय हे। मिले जानकारी के मुताबिक डिस्ट्रिक्ट रिजर्व गार्ड- डीआरजी, स्पेसल टास्क फोर्स-एसटीएफ अउ भारत तिब्बत सीमा पुलिस बल-आईटीबीपी के संयुक्त दल कसोड़, कुमुरादी, माड़ोडा, खोड़पार अउ गट्टाकाल क्षेत्र के गस्त म निकले रिहीस। इही बीच, कुतुल एरिया क्षेत्र के जंगल अउ पहाड़ी इलाका म माओवादी मन सुरक्षाबल के टीम उपर हमला कर दीन। लेकिन सुरक्षा बल के जवाबी कार्रवाई के बाद माओवादी भाग गे। तलासी अभियान चलाय म ए इलाका ले उनचास नग भरमार बंदूक, एलएमजी, इंसास, एसएलआर,स्टेनगन, मोटार्र, देसी कट्टा, जिंदा कारतूस, बीजीएल लांचर अउ हैंड ग्रेंनेड समेत दूसर बिस्फोटक अउ हथियार बरामद करे गीस।
बस्तर रेंज के पुलिस महानिरीक्षक सुंदरराज पी. ह किहीन कि सुरक्षाबल डहार ले सरलग करे जात ऑपरेसन के चलतेच प्रतिबंधित अउ गैर कानूनी सीपीआई माओवादी संगठन करा अब हिंसा छोड़ के आत्मसमर्पण करे के अलावा अउ कोनो विकल्प नइ बांचे हे। ओमन माओवादी मनले अपील करीन कि ओमन हिंसक गतिविधि छोड़के समाज के मुख्यधारा ले जुड़य।
उहें, नारायणपुर जिला के पुलिस अधीक्षक रोबिनसन गुरिया ह किहीन कि अबूझमाड़ के क्षेत्र म विकास अउ सांति कायम करके इंहा के मूल निवासी मन ल ओमन के क्षेत्र लहुटाय के उद्देस्य ले ए अभियान चलाय जात हे।
शूटिंग प्रतियोगिता
चौबीसवां राज्य स्तरीय शूटिंग प्रतियोगिता के सुभारंभ आज ले रईपुर के माना स्थित शूटिंग रेंज म होइस। प्रदेस रायफल एसोसिएशन कोति ले राखे गे ए स्पर्धा के उद्घाटन मउका म राज्य के पुलिस महानिदेसक अरूण देव गौतम, इंडियन आर्मी के कमांडर टीएस बाबा अउ छत्तीसगढ़ ओलंपिक संघ के महासचिव विक्रम सिसोदिया मौजूद रिहीन। कारीकरम ल संबोधित करत श्री गौतम ह किहीन कि राज्य के आदिवासी अंचल म खेल के असीमित संभावना छिपे हे अउ अइसे आयोजन ले नवा प्रतिभा ल आगू लाय के अवसर मिलथे।
छै सितंबर तक आयोजित ए प्रतियोगिता म प्रदेस के आने-आने जिला के प्रतिभागी सामिल होथे।
भाजपा-सेवा पखवाड़ा अभियान
भाजपा डहार ले अवइया सत्रह सितंबर ले दू अक्टूबर तक मनाय जाने वाला सेवा पखवाड़ा अभियान के तियारी ल लेके नई दिल्ली म एक बइठका आयोजित करे गीस। भाजपा केंद्रीय कार्यालय म राखे गे ए बइठका ल पार्टी के राष्ट्रीय अध्यक्ष जे.पी. नड्डा ह संबोधित करीन। ए बइठका म छत्तीसगढ़ भाजपा इकाई ले प्रदेस महामंत्री अखिलेश सोनी, उपाध्यक्ष सतीश लाटिया, प्रदेस मंत्री जयंती पटेल अउ हर्षिता पांडेय सामिल होइन।
विधानसभा परिसर-भीमराव अंबेडकर प्रतिमा
विधानसभा अध्यक्ष डॉक्टर रमन सिंह ह मुख्यमंत्री विष्णुदेव साय ल नवा रईपुर स्थित नवनिर्मित विधानसभा भवन परिसर म भारत रत्न बाबा साहेब डॉक्टर भीमराव अंबेडकर के पच्चीस फीट ऊंचा प्रतिमा स्थापित करे के अनुसंसा करत एक चिट्टी लिखिन हे। डॉक्टर सिंह ह किहीन कि विधानसभा परिसर म डॉक्टर अंबेडकर के प्रतिमा स्थापित होय ले एहा भावी पीढ़ी बर सामाजिक समता, न्याय अउ लोकतांत्रिक मूल्य के प्रेरणा के प्रतीक घलो बनही।
बातों-बातों में
प्रादेशिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत प्रधानमंत्री जनधन योजना के ग्यारा बछर पूरा होय म उपमहाप्रबंधक, स्टैट बैंक ऑफ इंडिया, आंचलिक कार्यालय रईपुर अउ राज्य स्तरीय बैंकर्स समिति के संयोजक राकेश कुमार सिन्हा ले लेगे बिसेस भेंटवार्ता के प्रसारण करे जाही। ए कारीकरम के प्रसारण काली तीस अगस्त के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।