प्रदेस के बस्तर संभाग म पाछु दू-तीन दिन ले होवत बरसा के कारण इंद्रावती के संग कतकोन नदी-नाला उफान म हे। उहें, कतकोन गांव के जिला मुख्यालय मन ले सड़क संपर्क टूट गेहे। बरसा के कारण सामान्य जनजीवन उपर घलो असर पड़े हे। सुकमा, दंतेवाड़ा अउ बीजापुर जिला के कतकोन गांव म बाढ़ जइसन हालात बन गेहे। राहत अउ आपदा प्रबंधन के टीम बाढ़ म फंसे दू हजार ले जादा लोगन मन ल राहत सिविर म पहुंचाय हे।
दंतेवाड़ा जिला म जादा बरसा के चलत करीब दू सौ घर क्षतिग्रस्त होय हे। कतकोन गांव के निचला बस्ती म घलो पानी भर गेहे। बरसा के कारण दंतेवाड़ा ले जगदलपुर के बीच रेलवे ट्रैक म मिट्टी धंसे ले दंतेवाड़ा-किरंदुल के बीच अवई-जवई बाधित होय हे। रेलवे के कर्मचारी मरम्मत के काम म जुटे हे।
इही बीच, मुख्यमंत्री विष्णुदेव साय ह आज वीडियो कॉन्फ्रेंसिंग के जरिया ले बस्तर, दंतेवाड़ा, बीजापुर अउ सुकमा जिला के कलेक्टर अउ वरिष्ठ अधिकारी मनके संग बाढ़ प्रभावित क्षेत्र म राहत अउ पुनर्वास के काम के समीक्षा करीन। ओमन ह बाढ़ प्रभावित हरेक परिवार तक हरसंभव मदद उपलब्ध कराय बर कहिन। श्री साय ह अधिकारी मन ल निरदेस दीन कि प्रभावित परिवार मन ल बाढ़ ले होय जनहानि अउ पशुहानि के राहत राशि बिना देर करे उपलब्ध कराय जाय। मुख्यमंत्री ह कहिन कि बाढ़ प्रभावित जिला के प्रभारी सचिव अपन-अपन जिला के दउरा करके राहत काम के जायजा लेवय।
उहें, उपमुख्यमंत्री अरूण साव ह किहीन कि बस्तर क्षेत्र म बाढ़ के हालत ल देखत हुए प्रसासन डहार ले लोगन मनके हरसंभव मदद करे जावत हे। ओमन ह कहिन कि राहत अउ बचाव के काम सरलग जारी हे।
मुख्यमंत्री-दक्षिण कोरिया
दक्षिण कोरिया प्रवास के दूसरइया दिन मुख्यमंत्री विष्णुदेव साय आज सियोल म होवइया छत्तीसगढ़ इन्वेस्टर कनेक्ट कार्यक्रम म सामिल होइन। ए दउरान ओमन ह कोरिया इंटरनेशनल ट्रेड एसोसिएशन अउ निवेसक मन ल छत्तीसगढ़ म निवेस के संभावना के जानबा दीन। श्री साय ह किहीन कि छत्तीसगढ़ म कतकोन मात्रा म जल, ऊर्जा, लोहा, स्टील अउ अवई-जवई के अच्छा सुविधा हे। ए संसाधन दक्षिण कोरियाई निवेसक मन बर अवसर के नवा दरवाजा खोलही। मुख्यमंत्री ह निवेसक मन ल दिलासा दीन कि राज्य सरकार सिंगल-विंडो क्लीयरेंस, व्यवसाय ल सरल बनाना अउ उद्योग-अनुकूल नीति मनके जरिया ले हरेक निवेसक मन ल सबो स्तर म सहयोग दीहीं।
ए बेरा म मुख्यमंत्री ह भारत के राजदूत अमित कुमार ले भारतीय दूतावास म मिलके छत्तीसगढ़ म निवेस के संभावना उपर घलो चर्चा करीन।
जन-धन योजना
प्रधानमंत्री जन-धन योजना ल आज ग्यारह बछर होगे हे। ए दुनिया के सबले बड़का वित्तीय समावेशन पहल म से एक हे। प्रधानमंत्री नरेन्द्र मोदी ह पन्द्रह अगस्त दू हजार चौदह म लालकिला के प्राचीर ले ए पहल के घोसना करे रिहीन। अट्ठाईस अगस्त के कार्यक्रम के सुभारंभ करत हुए प्रधानमंत्री ह ए अवसर ल गरीब मनके दुष्चक्र ले मुक्ति के उत्सव बताय रिहीन।
प्रधानमंत्री ह एक सोशल मीडिया पोस्ट म प्रधानमंत्री जन-धन योजना के झलकी ल देखावत हुए बतईन कि कइसे ए योजना ह लोगन मनके वित्तीय समावेशन ले सशक्तिकरण करके पूरा भारत म जीवन ल बदल देहे। ओमन ह कहिन कि जब समाज के आखिरी छोर म बइठे मनखे वित्तीय रूप ले जुड़ जाथे, त पूरा देस एके संघरा आगू बाढ़थे अउ ए प्रधानमंत्री जन-धन योजना ले संभव हो पाय हे।
यूआईडीएआई-बायोमेट्रिक
भारतीय विशिष्ट पहचान प्राधिकरण-यूआईडीएआई ह देसभर के स्कूल मन ले पांच ले पन्द्रह बछर के लइका मन बर समय म आधार अनिवार्य बायोमेट्रिक अपडेट करे बर किहीन। प्राधिकरण के कार्यकारी अधिकारी भुवनेश कुमार ह ए संबंध म सबो राज्य अउ केन्द्रसासित प्रदेस के मुख्य सचिव मन ल पत्र लिखके एखर ले संबंधित सिविर आयोजित करे म सहयोग करे के अनुरोध करीन।
चक्रधर समारोह
राज्यपाल रमेन डेका ह काली रायगढ़ के रामलीला मैदान म आयोजित चालीसवां चक्रधर समारोह के शुभारंभ करीन। ए बेरा ओमन ह कहिन कि छत्तीसगढ़ राज्य गठन के पच्चीसवां बछर ल हमन रजत जयंती के रूप म मनावत हन अउ ए दउरान छत्तीसगढ़ के संस्कृति ल समृद्ध बनाय म चक्रधर समारोह के कतकोन योगदान हे। राज्यपाल ह किहीन कि राजा चक्रधर सिंह ह कला अउ संस्कृति ल नवा पीढ़ी तक पहुंचाय के जेन सपना देखे रिहीन, ए उत्सव ओखर प्रतीक हे।
ए बेरा म केन्द्रीय संस्कृति अउ पर्यटन मंत्री गजेन्द्र सिंह शेखावत ह राजा चक्रधर सिंह ल नमन करत हुए कहिन कि कथक म रायगढ़ घराना के स्थापना करके ओमन ह भारतीय संस्कृति समृद्ध करीन।
दस दिवसीय चक्रधर समारोह के पहिली दिन काली प्रख्यात कथक करइया पंडित राजेन्द्र गंगानी ह अपन प्रस्तुति ले दर्सक मनके मन मोह लीन।
उहें, सुप्रसिद्ध कवि डॉक्टर कुमार विश्वास ह काव्य पाठ करीन। समारोह के दूसरइया दिन आज सुनील मानिकपुरी ह लोक कर्मा गायन प्रस्तुत करही। उहें, राजनंदिनी पटनायक ओडिसी नृत्य, प्रियंका सलूजा अउ पूजा जैन कथक, पंडित उदय कुमार मल्लिक शास्त्रीय गायन अउ डॉक्टर राखी रॉय भरतनाट्यम जइसन नृत्य कला प्रस्तुत करही। समारोह म देस के पहिली ट्रांसजेंडर माईलोगिन कथक नृत्य करइया देविका देवेन्द्र मंगलामुखी अपन कला के प्रदर्सन करही।
राष्ट्रीय युवा संसद प्रतियोगिता
नवा रायपुर के अटल नगर स्थित पीएमश्री केन्द्रीय विद्यालय म आज ले क्षेत्रीय स्तर म छत्तीसवां राष्ट्रीय युवा संसद प्रतियोगिता सुरू होगे हे। दू दिवसीय ए प्रतियोगिता म छत्तीसगढ़ के आठ केन्द्रीय विद्यालय के चार सौ ले जादा विद्यार्थी मन भाग लेवत हे।
केन्द्रीय विद्यालय संगठन रायपुर के क्षेत्रीय कार्यालय के सहायक आयुक्त रवीन्द्र कुमार ह बतईन कि ए कार्यक्रम के मुख्य उद्देश्य लइका मन ल संसदीय कार्य प्रणाली ले अवगत कराना अउ उंखर मन म नेतृत्व क्षमता के विकास करना हे।
राष्ट्रीय युवा संसद प्रतियोगिता के विजेता मन ल पुरस्कार अउ प्रमाण पत्र दे जाही।
नुआखाई
ऋषि पंचमी म आज उत्कल समाज डहार ले नुआखाई के परब मनाय जात हे। कृषि परंपरा के ए परब म नवा अन्न के स्वागत करे जात हे। ए दिन नवा धान अउ नवा अन्न के सबले पहिली ईष्ट देवता ल भोग लगाके ग्रहण करे जाथे। नुआखाई म उत्कल समाज डहार ले आज रायपुर म जुलूस निकाले गीस। उहें, प्रदेसभर म आने-आने कार्यक्रम आयोजित करे जात हे।
शालेय क्रीड़ा प्रतियोगिता
कोंडागांव म आज ले पच्चीसवां राज्य स्तरीय शालेय क्रीडा प्रतियोगिता सुरू होगे हे, जेखर शुभारंभ विधायक लता उसेंडी ह करीन। ए मउका म ओमन खिलाड़ी मन ल अच्छा प्रदर्सन करे बर प्रोत्साहित करीन। इकतीस अगस्त तक चलइया ए प्रतियोगिता म रायपुर, बस्तर, दुर्ग, बिलासपुर अउ सरगुजा संभाग के पांच सौ सत्तर खिलाड़ी भाग लेवत हे। प्रतियोगिता म फुटबॉल, तीरंदाजी, अउ मलखंभ जइसन खेल के मुकाबला होही।
उहें, सरगुजा म आज ले सभांग स्तरीय दू दिवसीय सालेय क्रीड़ा प्रतियोगिता सुरू होगे हे। कलेक्टर विलास भोसकर ह ए प्रतियोगिता के सुभारंभ करत हुए खिलाड़ी मन ल अनुशासन, निष्ठा अउ लगातार अभ्यास के संग खेल म भाग ले बर प्रोत्साहित करीन। ए प्रतियोगिता म संभाग के सब्बो जिला ले चार सौ बत्तीस खिलाड़ी हिस्सा लेवत हे। एखर तहत दउड़, गोला फेंक, भाला फेंक, लंबी अउ ऊंची कूद जइसन प्रतियोगिता आयोजित करे जात हे।
अउ अब थोरकुन समाचार सार म –
– बिलासपुर केन्द्रीय जेल म आज कैदी मन ह सुप्रसिद्ध कवि स्वर्गीय माखनलाल चतुर्वेदी के रचित कविता ‘‘पुष्प की अभिलाषा‘‘ के सामूहिक पाठ करीन। ए कार्यक्रम म उपमुख्यमंत्री अरूण साव घलो सामिल होइन।
– जांजगीर-चांपा जिला के लगरा गांव ले पाछु पच्चीस अगस्त ले लापता एक लइका ल पुलिस ह रतनपुर क्षेत्र ले सुरक्षित ढूंढ लेहे। ए मामला म चार आरोपी मन ल गिरफ्तार करे गेहे।
अउ
– सारंगढ़-बिलाईगढ़ जिला के सिटी कोतवाली पुलिस ह एक गाड़ी ले गांजा बरामद करके पांच आरोपी मन ल गिरफ्तार करे हे। एमा एक माईलोगिन घलो सामिल हे।