राष्ट्रीय शिक्षक पुरस्कार
राष्ट्रीय शिक्षक पुरस्कार-दू हजार पच्चीस बर देसभर ले पैंतालीस झिन शिक्षक मन ल चुने गेहे, जेमा छत्तीसगढ़ के दू झिन शिक्षक डॉक्टर प्रज्ञा सिंह अउ संतोष कुमार चौरसिया घलो सामिल हे। ए शिक्षक मन ल अवइया पांच सितंबर के शिक्षक दिवस के मउका म नई दिल्ली के विज्ञान भवन म सम्मानित करे जाही।
राष्ट्रीय शिक्षक सम्मान बर चुने गे डॉक्टर प्रज्ञा सिंह ए बेरा दुरूग जिला के शासकीय माध्यमिक विद्यालय हनोदा म पदस्थ हवय। त उहें, संतोष कुमार चौरसिया ह कोरबा जिला के पीएम श्री स्कूल जवाहर नवोदय विद्यालय, सलोरा म काम करत हे।
ऑल इंडिया स्पीकर्स कॉन्फ्रेंस
पहिली निर्वाचित भारतीय स्पीकर वीर विट्ठल भाई पटेल के शताब्दी वर्ष समारोह के मउका म दिल्ली विधानसभा म राखे गे दू दिन के ऑल इंडिया स्पीकर्स कॉन्फ्रेंस आज सिरागे। समापन समारोह के मुख्य अतिथि लोकसभा अध्यक्ष ओम बिरला रिहीन। समापन दिवस के पहिली सत्र म पूर्व लोकसभा अध्यक्ष श्रीमती मीरा कुमार ह ‘‘विट्ठल भाई पटेल भारतीय संविधान और विधाई संस्थानों के निर्माण में भूमिका‘‘ बिसय उपर अपन व्याख्यान पेस करीन। उहें, दूसर सत्र म केंद्रीय संसदीय कार्यमंत्री किरेन रिजिजू ह ‘‘कृत्रिम बुध्दिमत्ता में पारदर्शिता और जवाबदेही सुनिश्चित करना तथा शासन पर भरोसा‘‘ बिसय उपर अपन बात राखिन। कारीकरम म छत्तीसगढ़ विधानसभा अध्यक्ष डॉक्टर रमन सिंह घलो सामिल होइन।
मुख्य न्यायाधीश-बालिका संरक्षण कार्यक्रम
छत्तीसगढ़ उच्च न्यायालय के मुख्य न्यायाधीश रमेश सिन्हा ह किहीन हे कि नोनी मन के सुरक्षा-सम्मान अउ सशक्तिकरण ल पक्का करना सिरिफ विधिक जिम्मेदारी नइ, भलुक नैतिक अउ संवैधानिक दायित्व घलो हरय। श्री सिन्हा ह ए बात ‘बालिका संरक्षण-भारत में उसके लिए एक सुरक्षित और सक्षम वातावरण की ओर‘ बिसय उपर बिलासपुर म राखे गे राज्य स्तरीय कारीकरम ल संबोधित करत किहीन। ए कारीकरम म राज्य, राष्ट्रीय अउ वैश्विक परिप्रेक्ष्य म नोनी मनके विरूध्द हिंसा अउ ‘बेटी बचाओ बेटी पढ़ाओ‘ जइसन परमुख योजना मनके समीक्षा के संगेसंग आने बिसय उपर गोठबात करे गीस।
ए कारीकरम के आयोजन उच्च न्यायालय के बिसेस सेल फॉर पॉक्सो समिति अउ किशोर न्याय समिति कोति ले छत्तीसगढ़ राज्य न्यायिक अकादमी अउ छत्तीसगढ़ राज्य विधिक सेवा प्राधिकरण, बिलासपुर के मदद ले करे गीस।
स्कूल शिक्षा मंत्री-बैठक
स्कूल शिक्षा मंत्री गजेन्द्र यादव ह किहीन हे कि लइका मन ल शिक्षित करना अउ बने शिक्षा देवाना सरकार के प्राथमिकता हरय। मंत्री ह आज मंत्रालय म स्कूल शिक्षा विभाग के समीक्षा बइठका ल संबोधित करत अधिकारी मन ल निरदेस दीन कि ओमन स्कूल मन म पढ़ई-लिखई बने ढंग ले होवय एखर उपर बिसेस धियान देके बात किहीन। ओमन किहीन कि शिक्षक मनके प्रसिक्षण के दउरान शिक्षा के नवा तकनीक, नवाचार अउ आधुनिक शिक्षा पध्दति के बारे म जरूर बतावय।
बइठका म स्कूल शिक्षा विभाग के प्रमुख योजना अउ ओखर कामकाज उपर गोठबात होइस।
पूर्व सहायक आयुक्त-गिरफ्तार
दंतेवाड़ा जिला म फर्जी टेंडर जारी करे के आरोप म आदिवासी विकास विभाग के दू झिन पूर्व सहायक आयुक्त डॉक्टर आनंद सिंह अउ के.एस.मसराम ल पुलिस ह गिरफ्तार कर लेहे। दंतेवाड़ा पुलिस ह दूनों आरोपी मन ल रईपुर अउ जगदलपुर ले गिरफ्तार करके दंतेवाड़ा कोर्ट म पेस करे गीस। जानकारी के मुताबिक सिकइत मिले उपर जिला कलेक्टर कुणाल दुदावत ह पांच सदस्यीय जांच टीम बनाके आदिमजाति विभाग म पाछू पांच साल के दउरान डीएमएफ मद ले कराय गे काम के जांच करीन। जांच रिपोर्ट म पता चलिस कि दूनों पूर्व अधिकारी मन ह अपन कार्यकाल के दउरान कलर्क संजय कोडोपी के संग मिलके फर्जी दस्तावेज ले पैंतालीस फर्जी टेंडर निकलवाइन अउ डीएमएफ फंड म करोड़ो रूपिया के घोटाला करीन। जांच रिपोर्ट आगू आय के बाद कलर्क संजय कोडोपी ल निलंबित कर दे गेहे अउ पुलिस ह ओखर खोजबीन करत हे।
मुख्यमंत्री-जापान
मुख्यमंत्री विष्णुदेव साय ह किहीन हे कि छत्तीसगढ़ के पहिचान सिरिफ धरोहर अउ लोक संस्कृति तक सीमित नइ हे, भलुक उद्योग, नवाचार अउ वैश्विक सहयोग के दिसा म घलो तेजी ले आगू बाढ़त हे। ए बात मुख्यमंत्री ह जापान के ओसाका म चलत वर्ल्ड एक्सपो के भारत मंडपम म बनाय गे छत्तीसगढ़ पैवेलियन ल देखे के बाद किहीन ओमन ए पैवेलियन म छत्तीसगढ़ के संस्कृति, परंपरा अउ आधुनिक प्रगति उपर आधारित प्रदर्सनी ल देखिन। पैवेलियन म छत्तीसगढ़ के जनजाति कला, बुनाई, हाथ ले बनाय गे उत्पाद, हर्बल वाले जिनिस अउ पर्यटन स्थल मनके झांकी के माध्यम ले बने ढंग ले प्रदर्सित करे गीस।
जानबा के मुताबिक ए पैवेलियन के उद्घाटन दिवस म ही करीबन बाईस हजार दर्सक मन देखिन।
ऑनलाइन गेमिंग रोक-आभार
महिला बाल विकास अउ समाज कल्याण विभाग मंत्री लक्ष्मी राजवाड़े ह ऑनलाइन गेमिंग उपर रोक ल लेके संसद म पारित बिल बर प्रधानमंत्री नरेंद्र मोदी अउ केंद्र सरकार ल आभार जताय हे। ओमन विस्वास जतइन कि ए बिल के मदद ले लइका मनके जिनगी म सही रद्दा म आगे बढ़े के शिक्षा मिलही।
एमबीबीएस-काउंसलिंग स्पष्टीकरण
राज्य म एमबीबीएस काउंसलिंग-राज्य कोटा, ल लेके पात्रता सूची अउ आवंटन सूची म अंतर उपर चिकित्सा शिक्षा निदेशालय, रईपुर ह स्पष्ट करे हे कि अंतर सूची ह नियम के मुताबिक हे। विभाग कोति ले बताय गेहे कि राष्ट्रीय प्रसिक्षण एजेंसी-एनटीए कोति ले जारी पात्रता सूची सिरिफ अर्जी करइया मन डहार ले एलिजिबिलिटी स्टेट उपर आधारित होथे। ए सूची म मूल निवास प्रमाण पत्र सामिल नइ राहय। फेर राज्य ह अपन अलग मेरिट लिस्ट अर्जी करइया मन डहार ले पेस करे गे प्रमाण पत्र अउ राज्य के सर्त मनके मुताबिक तियार करथे।
विभाग कोति ले यहू केहे गेहे। कि एलिजिबिलिटी लिस्ट सिरिफ सुविधा बर प्रकासित होथे। कतकोन बार राष्ट्रीय प्रसिक्षण एजेंसी-एनटीए के लिस्ट म अइसन छात्र मनके नाम होथे, जउन मन राज्य कोटा म अर्जी नइ करय। एखरे सेति दूनों सूची म अंतर दिखाई देथे। विभाग ह स्पष्ट करे हे कि प्रदेस म प्राइवेट मेडिकल कालेज के काउंसलिंग घलो चिकित्सा शिक्षा निदेशालय रईपुर ह इही नियम के मुताबिक करथे।
जानबा के मुताबिक एमबीबीएस काउंसलिंग के दूसर चरण सत्ताईस अगस्त ले सुरू होही।
नदी-हादसा
दंतेवाड़ा जिला के गीदम क्षेत्र म इंद्रावती नदिया म डोंगा पलटे ले एक झिन गांव के लोगन बोहागे, जेखर खोजबीन करे जात हे। डोंगा म अउ बइठे मनखे मन तंउर के नदी ले बाहिर निकल गे। हमर संवाददाता ले मिले जानबा के मुताबिक गिरसपारा गुमलनार के रहइया पांच झिन मनखे मन डोंगा ले नदिया पार करत रिहीन। बरसा के सेति नदिया म बाढ़ आय रिहीस, बहाव जादा होय के सेति डोंगा ह पलट गे। पाछू दू महिना के दउरान ए नदिया म डोंगा पलटे के एहा दूसर घटना हरय।
हरितालिका तीज
प्रदेस म काली हरितालिका तीज माने तीजा के परब मनाय जाही। ए मउका म सुहागिन माईलोगिन मन निर्जला उपास रखथे अउ मानता के मुताबिक भगवान शिव अउ माता पार्वती के पूजापाठ करथे।
विधानसभा अध्यक्ष डॉक्टर रमन सिंह ह तीजा के सुभकामना देवत जम्मों तिजहारिन माता अउ बहिनी मन के सुख-समृध्दि अउ खुसहाली के कामना करे हे।
अब मौसम के हाल…
मौसम विभाग ह प्रदेस के तीस ठिन जिला म गरज-चमक के संग गाज गिरे अउ भारी बरसा होय के चेतावनी देहे। भारी बरसा के मुख्य क्षेत्र बस्तर संभाग अउ ओखर ले लगे जिला होही। मौसम विभाग के मुताबिक मध्यप्रदेस म बने कम दबाव के क्षेत्र के असर ले राज्य म बरसा के स्थिति बनत हे। ऐति, राजधानी रईपुर के संगेसंग प्रदेस के आने सहर मन आज दिन भर बादर छाय रिहीस अउ कोनो -कोनो जघा म हल्का ले मध्यम बरसा होइस।
अउ अब थोरकुन समाचार सार म –
– सराब घोटाला अउ मनी लॉड्रिंग मामला म गिरफ्तार करे गे पूर्व मुख्यमंत्री भूपेश बघेल के बेटा चैतन्य बघेल के जमानत याचिका ल उच्च न्यायालय ह खारिज कर देहे।
अउ
– कबीरधाम जिला म रणवीरपुर चौकी के कोहड़िया गांव म पाछू रतिहा खेत म लगाय गे हाईटेंशन तार के चपेट म आके करंट लगे ले दू झन मनखे के मउत होगे।