सम्मेलन म छत्तीसगढ़ विधानसभा के अध्यक्ष डॉक्टर रमन सिंह घलो सामिल होवत हवय। ए मउका म डॉक्टर सिंह ह भारत लोकतंत्र के जननी बिसय उपर अपन व्याख्यान प्रस्तुत करीन।
राष्ट्रीय बुनकर अधिवेशन
राजधानी रायपुर म होवइया दू दिवसीय सहकार राष्ट्रीय बुनकर अधिवेशन आज सिराही। अधिवेसन के आखिरी दिन राज्यपाल रमेन डेका सामिल होइन। अधिवेसन ल संबोधित करत ओमन किहीन कि सहकारिता के क्षेत्र म रिसर्च अउ डेवलपमेंट उपर बिसेस धियान दे के जरूरत हवय। ओमन बुनकर मनले आह्वान करीन कि बेरा-बेरा म उत्पाद मन म नवा तकनीक ल अपनाके मांग के मुताबिक उत्पाद मनके डिजाइन म बदलाव लावय। राज्यपाल ह बुनकर मनले किहीन कि ‘‘सहकार ले समृध्दि‘‘ के मंत्र के संग आगू बढ़य अउ ए अभियान ल हरेक घर के हरेक मनखे मन तक पहुंचावय।
मुख्यमंत्री-जापान
मुख्यमंत्री विष्णुदेव साय ह अपन जापान प्रवास के चलत टोक्यो म बॉयस एंड मूर्स इंटरनेशनल कंपनी के बोर्ड ऑफ डायरेक्टर अउ बस्तर के अविनाश तिवारी ले मुलाकात करीन। ए मउका म छत्तीसगढ़ औद्योगिक निवेस अउ उद्योग स्थापना के संभावना उपर चर्चा होइस, जेमा मुख्यमंत्री ह राज्य सरकार के निवेस-अनुकूल नीति, औद्योगिक ढांचा अउ निवेसक मनले मिलइया सहयोग के जानकारी दीन। जानबा के मुताबिक अविनाश तिवारी बस्तर जिला के तोकापाल क्षेत्र के रहइया हरय। ओहा दंतेवाड़ा जिला के बारसूर नवोदय विद्यालय म पढ़ाई करीन हवय।
एखर अलावा मुख्यमंत्री ह जापान के टोक्यो के ‘लिटिल इंडिया‘ पहुंचके महात्मा गांधी के मूर्ति उपर फूलमाला चढ़ाके उनला नमन करीन। ए मउका म मुख्यमंत्री ह किहीन कि ‘लिटिल इंडिया‘ म गांधी जी के प्रतिमा भारत-जापान मैत्री अउ सांस्कृतिक जुड़ाव के प्रतीक हवय।
उपमुख्यमंत्री-ऑनलाइन गेमिंग अधिनियम
उपमुख्यमंत्री अउ गृह मंत्री विजय शर्मा ह किहीन हवय कि ऑनलाइन गेमिंग संवर्धन अउ विनियमन अधिनियम ल राज्य म जल्दीच लागू करे जाही। काली दुरूग म पत्रकार मनले गोठबात करत श्री शर्मा ह किहीन कि गेमिंग ऐप के जरिया देस म पइसा देके खेल खेले के आदत सरलग बाढ़त जात रिहीस। ए ऐप समाज खातिर बहुतेच खतरनाक रिहीस। इही ल धियान म राखत संसद म ऑनलाइन गेमिंग संवर्धन एवं विनियमन विधेयक पारित करे गे हवय। ए कानून नागरिक मन ल ऑनलाइन मनी गेम्स के खतरा ले बचाही।
खेल अलंकरण-सूची
प्रदेस के खेल विभाग ह ए बछर सम्मानित करे जाना वाला खिलाड़ी मन के सूची जारी कर दे हवय। ए सूची म 77 खिलाड़ी मनके नांव सामिल हवय, जेमन ल आने-आने खेल पुरस्कार दे जाही। गौरतलब हवय कि खिलाड़ी मनके ए सम्मान समारोह तीन सितंबर के आयोजित होही।
खेल संचालक तनुजा सलाम ह खिलाड़ी मन के सूची जारी करत बतइन कि ए दारी खिलाड़ी मन ल सहीद राजीव पांडेय पुरस्कार, शहीद कौशल पांडे पुरस्कार, वीर हनुमान सिंह पुरस्कार, शहीद पंकज विक्रम सम्मान, शहीद विनोद चौबे सम्मान, मुख्यमंत्री ट्राफी अउ ओलंपिक खेल सम्मान जइसन बड़का पुरस्कार ले सम्मानित करे जाही।
तीजा-पोला-सम्मेलन
राजधानी रायपुर के पंडित दीनदयाल उपाध्याय ऑडिटोरियम म आज छत्तीसगढ़ के पारंपरिक तिहार तीजा-पोरा बड़ उछाह अउ धूमधाम ले मनाय गीस। कारीकरम म बड़ संख्या म माईलोगिन मन सामिल होइन। ए मउका म राज्य सरकार के मंत्री अउ जनप्रतिनिधि मन ह माता अउ बहिनी मन के सुवागत करीन अउ ओमन ल उपहार म साड़ी, श्रृंगार करे के जिनिस अउ छत्तीसगढ़ कलेवा भेंट करीन।
समारोह ल संबोधित करत उपमुख्यमंत्री अरूण साव ह किहीन कि तीजा छत्तीसगढ़ म नारी सक्ति के मान, सम्मान अउ दृढ़ निश्चय के परब हवय। ओमन किहीन कि राज्य सरकार छत्तीसगढ़ महतारी के मान-सम्मान अउ गौरव ल बढ़ाय खातिर सरलग ए काम करत हवय।
ए समारोह ल कृषि मंत्री रामविचार नेताम, महिला अउ बाल विकास मंत्री लक्ष्मी राजवाड़े ह घलो संबोधित करीन।
फर्जी अंकसूची-महिला गिरफ्तार
बलरामपुर जिला के शंकरगढ़ थाना क्षेत्र म आंगनबाड़ी सहायिका भर्ती म फर्जीवाड़ा करे के आरोप म पुलिस ह 4 झिन माईलोगिन मन ल गिरफ्तार करीन हवय। ए महिला मन उपर आरोप हवय कि ए जम्मों झिन फर्जी अंकसूची लगाके भर्ती प्रक्रिया म सामिल होइन अउ उंखर मनके नियुक्ति होइस। ए मामला के सिकायत ग्राम जारगीम के एक महिला ह कलेक्टर ले करे रिहीस। जेखर बाद कलेक्टर ह फर्जी अंकसूची अउ आने दस्तावेज तियार करे लोगन मनके खिलाफ एफ.आई.आर. दर्ज कराय के निरदेस दे रिहीन। मामला के जांच खातिर 3 सदस्यीय जांच दल के गठन करे गे हवय। जांच म जम्मों महिला मनके नियुक्ति फर्जी अंकसूची के आधार म करे जाना पाय गीस, जेखर बाद पुलिस ह ए चारों माईलोगिन मन ल गिरफ्तार कर लीन हवय।
साइबर-जागरूकता
जांजगीर-चांपा जिला के बनाहिल गांव के ऋषभ विद्योदय महाविद्यालय म ‘सायबर जन जागरूकता‘ कारीकरम के आयोजन करे गीस। ए मउका म एडिसनल एस.पी. उमेश कश्यप ह सायबर अपराध ले बचे, ऑनलाइन धोखाधड़ी अउ सोसल मीडिया के सुरक्षित तरीका ले उपयोग करे के जानकारी दीन। श्री कश्यप ह बतइन कि अभी के बेरा म लिंक के जरिया खाता ले पइसा निकाले के घटना बाढ़त हवय।
ओिंत, नारायणपुर साइबर पुलिस टीम डहार ले सामुदायिक पुलिसिंग के तहत साइबर जागरूकता अभियान चलाय गीस। कस्तुरबा गांधी आवासीय बालिका विद्यालय बंगलापारा म विद्यार्थी अउ शिक्षक मन ल साइबर अपराध ले बांचे खातिर जानकारी दे गीस।
‘‘संडे ऑफ ऑन सायकल‘‘
मुंगेली जिला म आज फिट इंडिया मिशन के चलत ‘‘संडे ऑफ ऑन सायकल‘‘ के आयोजन करे गीस। ए मउका म पुलिस अधीक्षक भोजराम पटेल के अगुवई म मुंगेली पुलिस डहार ले सायकल चलाके शारीरिक तरीका ले फिट रहे खातिर जागरूक करे गीस। पुलिस अधीक्षक ह लोगन मन ले रोजेच बिहनिया तकरीबन 30 मिनट सायकल चलाय अउ शारीरिक रूप ले फिट रहे के अपील करीन हवय।
अउ अब थोरकुन समाचार सार म –
– कांकेर पुलिस ह नब्बे लाख रूपिया के सायबर ठगी के मामला म दू झन आरोपी मन ल गिरफ्तार करीन हवय। पुलिस डहार ले म्युल अकाउंट के आने खाता मन ल फ्रीज करे के कार्रवाई करे जावत हवय।
– जांजगीर-चांपा जिला के कोसाबाड़ी गांव के तीर दू ठिन दूपहिया वाहन के बीच होय टक्कर म एक झिन युवक के मउत होगिस। उहें, तीन झन आने लोगन मन घायल होगिन हवय।
– गौरेला-पेण्ड्रा-मरवाही जिला के पतेराटोला गांव म आज बिहनिया एक दंतैल हाथी ह अब्बड़ उत्पात मचाइस। हाथी ह कई ठिन मकान मन ल तोड़के घर म राखे अनाज ल खा लीस। संगेसंग फसल मन ल घलो नुकसान पहुंचाय हे।
अउ
– कोंडागांव पुलिस ह बांसकोट-उड़िसा मार्ग म गांजा तस्करी के आरोप म दू झिन लोगन मन ल गिरफ्तार करीन हवय। जेखर तीर ले तकरीबन 40 किलोग्राम गांजा बरामद करे गीस हवय, जेखर कीमत 4 लाख रूपिया बताय जात हे।