राष्ट्रीय क्षय उन्मूलन कारीकरम के तहत राज्यपाल रमेन डेका ह राज्य के जम्मों जिला मन म तीन सौ तीस टीबी मरीज मन ल ‘निक्षय मित्र‘ बनके गोद लीन हे। एखर तहत हर मरीज ल पौष्टिक आहार उपलब्ध कराय बर प्रतिमाह पांच सौ रूपिया के रासि दे जात हे। राज्यपाल ह उद्योगपति, समाज सेवी संगठन, राइस मिल एसोसिएसन अउ आम नागरिक मन ले अपील करीन हे, कि ओमन आगू आके ‘निक्षय मित्र‘ बनय अउ टीबी मरीज मन ल गोद लेके ए जनआंदोलन के हिस्सा बनय। ओमन किहीन कि सामूहिक परयास ले ही छत्तीसगढ़ समेत पूरा भारत ल टीबी मुक्त बनाय के संकल्प साकार करे जा सकत हे।
मुख्यमंत्री-जापान
मुख्यमंत्री विष्णुदेव साय के अगुवई म छत्तीसगढ़ के एक प्रतिनिधि मंडल ए दिन म जापान अउ दक्षिण कोरिया के दउरा म हे। ए ग्लोबल आउटरीच मिसन के उद्देस्य छत्तीसगढ़ ल वैश्विक निवेस मानचित्र म स्थापित करना अउ अंतर्राष्ट्रीय सहयोग के नवा औसर ल तरासना हरय।
श्री साय ह जापान पहुंचे के बाद सबले पहिली राजधानी टोक्यो के ऐतिहासिक असाकुसा मंदिर के दर्सन करीन। ए हा टोक्यो के सबले प्राचीन अउ प्रतिष्ठित मंदिर सांति अउ सामर्थ्य के प्रतीक माने जाथे। मुख्यमंत्री ह मंदिर म पूजा-अर्चना करके छत्तीसगढ़ के जनता के खुसहाली अउ समृध्दि के कामना करीन।
महतारी सदन
प्रदेस के जम्मों ग्राम पंचायत मन म ग्रामीण महिला मन ल स्वावलंबी अउ आत्मनिर्भर बनाय अउ महिला सशक्तिकरण के उद्देस्य ले महतारी सदन बनाय जाही। अब तक एक सौ छैंसठ महतारी सदन ल मंजूरी मिल गेहे। एखर बर शासन ह उनचास करोड़ अस्सी लाख रूपिया जारी करे हे। महतारी सदन म कमरा, शौचालय, बरामदा, हॉल, किचन अउ स्टोर रूम जइसन सुविधा मौजूद रइही। उपमुख्यमंत्री विजय शर्मा ह किहीन कि न्यू इंडिया के ग्रोथ सायकल म महिला मनके भागीदारी सरलग बाढ़त हे। ओमन किहीन कि आत्मनिर्भर भारत अभियान महिला मनके क्षमता ल देस के विकास के संग जोड़त हे। महतारी सदन घलो ए दिसा म एक ठिन परयास हरय। उपमुख्यमंत्री श्री शर्मा ह बतइन कि अवइया पांच साल म प्रदेस के जम्मों ग्राम पंचायत मन म महतारी सदन बनाय के योजना हे।
उज्बेकिस्तान-वैज्ञानिक दौरा
छत्तीसगढ़ के धान के विलक्षण जैव विविधता अउ उत्पादन तकनीक ह उज्बेकिस्तान के वैज्ञानिक मन ल आकर्षित करे हे। इंदिरा गांधी कृषि विश्वविद्यालय म आयोजित संगोष्ठी म सामिल होय बर उज्बेकिस्तान के वैज्ञानिक प्रोफेसर रोजिव अउ उंखर टीम रायपुर पहुंचे रिहीन। संगोष्ठी के दउरान प्रोफेसर रोजिव के संस्थान अउ इंदिरा गांधी कृषि विश्वविद्यालय के बीच कृषि शिक्षा अउ अनुसंधान ल लेके एक समझौता ज्ञापन उपर हस्ताक्षर करे गीस। एखर तहत कृषि, पर्यावरण, जल संरक्षण, औषधीय पउधा मनके उत्पादन, खाद्य प्रसंस्करण जइसे क्षेत्र मन म संयुक्त अनुसंधान कार्य करे जाही। एखर ले इंदिरा गांधी कृषि विश्वविद्यालय के विद्यार्थी मन ल अंतर्राष्ट्रीय स्तर म उच्च शिक्षा अउ अनुसंधान के मउका मिलही। संगोष्ठी के अध्यक्षता विश्वविद्यालय के कुलपति डॉक्टर गिरिश चंदेल ह करीन।
सहकार भारती-राष्ट्रीय सम्मेलन
सहकार भारती डहार ले बुनकर मन बर काली ले रईपुर म दू दिन के प्रथम राष्ट्रीय सम्मेलन के आयोजन करे जाही। उद्घाटन सत्र म विधानसभा अध्यक्ष डॉक्टर रमन सिंह, उपमुख्यमंत्री अरूण साव, विजय शर्मा, उद्योग मंत्री लखनलाल देवांगन, सहकारिता मंत्री केदार कश्यप सामिल होही। सहकार भारती के राष्ट्रीय अध्यक्ष डॉक्टर उदय जोशी ह बतइन कि सम्मेलन म कई ठन राज्य मनके एक हजार ले जादा बुनकर भाग लिही। सम्मेलन म बुनाई उद्योग के वर्तमान चुनौती, बुनकर मनके मुद्दा अउ दूसर बिसय उपर बिस्तार ले चर्चा करे जाही। संघरा आने-आने प्रस्ताव घलो पारित करे जाही।
रेलवे-उपलब्धि
भारतीय रेलवे के इतिहास म दक्षिण-पूर्व मध्य रेलवे ह एक ठिन अउ स्वर्णीम अध्याय जोड़ देहे। वित्तीय बछर दू हजार पच्चीस-छब्बीस म महज एक सौ चवालीस दिन म सौ मिलियन टन माल लदान कर एसईसीआर ह अब तक सबले तेज ‘‘सेन्चुरी‘‘ दरज करे हे। ए उपलब्धि देस के ऊर्जा जरूरत, कोयला आधारित पावर प्लांट, इस्पात उद्योग अउ आने-आने कारखाना मन ल निर्बाध आपूर्ति सुनिश्चित करत हासिल करे हे।
ऑनलाइन गेमिंग विधेयक
संसद ह काली ऑनलाइन गेमिंग संवर्धन अउ विनियमन विधेयक ल पारित कर देहे। ए विधेयक ई-स्पोर्ट्स अउ ऑनलाइन सोसल गेम्स ल प्रोत्साहित करे के संघरा हानिकारक ऑनलाइन मनी गेमिंग सेवा, विज्ञापन अउ उंखर ले जुड़े वित्तीय लेनदेन उपर प्रतिबंध लगाय के बारे म हे। कानून के उल्लंघन करे म तीन साल तक के कैद अउ एक करोड़ रूपिया तक के जुर्माना या दूनों के प्रावधान हे।
पुलिस मुख्यालय म एआईजी टेक्निकल सर्विसेस कवि गुप्ता ह ए विधेयक के सराहना करत किहीन कि एखर ले छत्तीसगढ़ के लाखो युवा मनके भविष्य ल बचाय जा सकही।
दुर्ग-रेलवे परियोजना छूट
दुरूग जिला प्रशासन ह खरसिया-नया रायपुर-परमलकसा रेल परियोजना बर जिला के प्रभावित तेईस गांव मन म भू-अर्जन संबंधी प्रतिबंध म आंसिक छूट देके निरदेस दीन हे। पहिली के आदेस अनुसार ए गांव मन म भूमि खाता विभाजन, अंतरण अउ खरीदी बिक्री उपर पूरा तरह ले रोक लगाय गे रिहीस। अब केवल ओ खसरा मन म ए प्रतिबंध जारी रिही, जउन मन रेलवे ट्रैक ले एक सौ पचास मीटर के परिधि म आथे।
दक्षिण-पूर्व मध्य रेलवे डहार ले देगे नवा सूची म सामिल खसरा मन ल छोड़ के बांकी जम्मों भूमि उपर लगे प्रतिबंध तत्काल प्रभाव ले हटा दे गेहे। ए गांव मनके अलावा दुरूग अनुभाग के दू ठन नवा गांव-करगाडीह अउ काऊपारा म घलो भूमि अंतरण, खाता विभाजन ल आंसिक रूप से प्रतिबंधित करे गेहे। रेलवे के नवा सूची के अनुसार ए दूनों गांव ल ए रेल परियोजना म सामिल करे गेहे। शासन डहार ले जारी आदेस के अनुसार जउन मनखे मनके जमीन ए प्रतिबंध ले प्रभावित होय हे, ओमन अपन आवेदन प्रस्तुत कर सकत हे। ए आवेदन उपर रेलवे विभाग ले राय लेके बाद उचित निर्णय ले जाही।
रेलवे-तीजा फेस्टिवल फास्ट मेमू
तीजा तिहार के मउका म दक्षिण-पूर्व मध्य रेलवे ह महिला यात्री मनके सुविधा बर बिसेस रेल व्यवस्था के घोसना करे हे। रायपुर-अनूपपुर अउ रायपुर-ताड़ोकी के बीच दू जोड़ी तीजा फेस्टिवल फास्ट मेमू ट्रेन चौबीस, पच्चीस, अट्ठाईस अउ उनतीस के चलही। रेलवे ह बतइस कि ए बेवस्था तीजा परब के दउरान महिला मन ल बेहतर यात्रा अनुभव देबर करे गेहे।
हेरोइन-आरोपी गिरफ्तार
राजधानी रायपुर म वीडियो अउ लोकेशन सेयरिंग के जरिया हेरोइन के सिंडिकेट चलावत गिरोह के छै सदस्य मन ल पुलिस ह गिरफ्तार करीस हे, जेमा दू झन माईलोगिन घलो सामिल हे। एमन करा ले पुलिस ह दू सौ तिहत्तर ग्राम ले जादा हेरोइन जब्ती करे हे, जेखर कीमत संतावन लाख रूपिया ले जादा बताय जात हे। कबीर नगर थाना पुलिस ह आरोपी मनके खिलाफ नार्कोटिक्स एक्ट क ेतहत मामला दरज करे हे।
बातों-बातों में
प्रादेशिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत गौधाम योजना उपर छत्तीसगढ़ राज्य गौ सेवा आयोग के अध्यक्ष विशेषर सिंह पटेल ले लेगे बिसेस भेंटवार्ता के प्रसारण करे जाही। ए कारीकरम के प्रसारण काली तेईस अगस्त के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
अउ अब मौसम के हाल...
प्रदेस म मानसून के गतिविधि बाढ़ गेहे। मौसम विभाग ह अवइया चौबीस घंटा के दउरान प्रदेस के अधिकांस जघा मन म हल्का ले मध्यम बरसा होय या गरज चमक के संग छींटा पड़े के संभावना व्यक्त करे हे। उहें, एक-दू जघा मन म गरज-चमक के संग गाज गिरे अउ भारी बरसा होय के चेतावनी दे गेहे। भारी बरसा के मुख्य क्षेत्र उत्तर छत्तीसगढ़ रहे के आसार हे।
इही बीच, रायगढ़ जिला म सरलग होत बारिस के बाद केलोबांध के चार गेट खोल दे गेहे, जेखर ले केलो नदी के जल स्तर बाढ़ गेहे। कई ठिन नदिया-नरवा उफान म हे।