संसद ह ऑनलाइन गेमिंग संवर्धन अउ विनियमन विधेयक पारित कर देहे। एला आज राज्यसभा म घलो मंजूरी दे देहे। ए विधेयक ई-स्पोर्ट्स अउ ऑनलाइन सोशल गेम्स ल प्रोत्साहित करे, संगेसंग हानिकारक ऑनलाइन मनी गेमिंग सेवा, विज्ञापन अउ ओखर ले जुड़े वित्तीय लेनदेन म रोक लगाय के बारे म हवय। एमा ए क्षेत्र के समन्वित नीतिगत सहयोग, रणनीतिक विकास अउ नियामक निगरानी बर एक ऑनलाइन गेमिंग प्राधिकरण के नियुक्ति के प्रावधान हे। विधेयक के उद्देश्य मनखे, विशेषकर युवा अउ कमजोर वर्ग ल अइसन खेल के सामाजिक, आर्थिक, मनोवैज्ञानिक अउ गोपनीयता संबंधी प्रभाव ले बचाना हे। विधेयक म ऑनलाइन मनी गेम्स के पेसकस, संचालन या सुविधा उपर पूर्ण प्रतिबंध लगाय के प्रावधान हे। ऑनलाइन मनी गेमिंग ले जुड़े कानून के उल्लंघन करे म तीन बछर तक के कैद या एक करोड़ रूपिया तके के जुर्माना या दूनों के प्रावधान हे।
केन्द्रीय इलेक्ट्रॉनिक्स अउ सूचना प्रौद्योगिकी मंत्री अश्विनी वैष्णव ह विधेयक पेश करत किहीन कि ऑनलाइन मनी गेमिंग समाज बर एक खतरा बन गेहे। ओमन किहीन कि ऑनलाइन गेमिंग के सेती कई झिन परिवार वाले मन ल आर्थिक तंगी के सामन करना पड़त हे। ओमन किहीन कि ऑनलाइन मनी गेमिंग समाज बर गंभीर चिंता के विषय हवय।
मुख्यमंत्री-जपान/दक्षिण कोरिया
मुख्यमंत्री विष्णुदेव साय आज ले जापान अउ दक्षिण कोरिया के दस दिन के प्रवास म रवाना होगे हे। रायपुर के स्वामी विवेकानंद विमानतल म पत्रकार मन ले गोठबात करत श्री साय ह किहीन कि ओमन ओसाका वर्ल्ड एक्सपो म सामिल होके निवेसक अउ उद्यमी मन ले छत्तीसगढ़ के नवा उद्योग नीति के बारे म गोठबात करही।
छत्तीसगढ़-रजत महोत्सव
मुख्यमंत्री विष्णुदेव साय ह काली सूरजपुर जिला के तिलसिवां गांव म राखे गे छत्तीसगढ़ रजत महोत्सव कार्यक्रम अउ किसान मेला के वर्चुअल सुभारंभ करीन। ए मउका म ओमन दू सौ ग्यारह करोड़ रूपिया ले जादा के विकास काम के लोकार्पण अउ भूमिपूजन करीन। मुख्यमंत्री ह सूरजपुर के नवा बस स्टैंड स्थित अटल परिसर म भारतरत्न स्वर्गीय अटल बिहारी वाजपेयी के मूर्ति के अनावरण करीन।
कार्यक्रम ल संबोधित करत मुख्यमंत्री ह कहिन कि छत्तीसगढ़ राज्य स्थापना के पच्चीस बछर पूरा होय के मउका म रजत जंयती बछर मनाय जावत हे। मुख्यमंत्री ह जम्मों लोगन मन ले एकजुट होके प्रदेस ल प्रगति के नवा ऊंचाई म पहुंचाय के आह्वान करीन।
आदि कर्मयोगी अभियान
आदि कर्मयोगी अभियान के तहत प्रदेस के अट्ठाईस जिला के एक सौ अड़तीस विकासखंड म करीबन एक लाख तैंतीस हजार वॉलंटियर्स बनाय के लक्ष्य राखे गेहे। प्रमुख सचिव सोनमणि बोरा ह काली वीडियो कॉन्फ्रेंसिंग के माध्यम ले ए अभियान के तैयारी ल लेके जिला कलेक्टर मनके बइठका लीन अउ जरूरी दिसा-निरदेस दीन। ओमन किहीन कि छह हजार छह सौ पचास आदिवासी बहुल गांव मन म ए अभियान के लक्ष्य ल प्राप्त करे बर आने-आने विभाग ले घलो जरूरी सहयोग ले जाही। ओमन किहीन कि चिन्हित करे गे आदिवासी बहुल गांव मन म जउन भी क्रिटिकल गेप हवय, ओला ए अभियान म जिला स्तर म आदि कर्मयोगी, ब्लॉक स्तर म आदि सहयोगी अउ ग्राम स्तर म आदिसाथी के माध्यम ले पूरा करे जाय के लक्ष्य निर्धारित करे गेहे। प्रमुख सचिव ह बतईन कि एक नवंबर के राज्य स्थापना के रजत जयंती अउ पन्द्रह नवंबर के जनजातीय गौरव दिवस के मउका म कार्यक्रम के आयोजन करे जाही।
राजस्व मंत्री-समीक्षा
राजस्व मंत्री टंकराम वर्मा ह विभागीय अधिकारी मनके बइठका लेके राजस्व काम के समीक्षा करीन। श्री वर्मा ह निरदेस दीन कि जनता मन ल नामांतरण, बंटवारा अउ सीमांकन जइसन राजस्व सेवा बर भटकना झन पड़य, एखर बर जम्मों काम समय अउ पारदर्सिता के संग पूरा करे जाय। संगेसंग ओमन एग्रीस्टेक अउ जिओ-रिफ्रेंसिंग के समीक्षा करत अधिकारी मन ल नवा तकनीक के उपयोग करके डिजिटल समाधान अपनाय के निरदेस दीन।
बलरामपुर-प्रयास आवासीय विद्यालय
बलरामपुर जिला म पच्चीस करोड़ रूपिया के लागत ले प्रयास आवासीय विद्यालय बनाय जाही। मुख्यमंत्री विष्णुदेव साय ह आवासीय विद्यालय के भवन बर राशि मंजूर करे हे। आदिम जाति विकास मंत्री रामविचार नेताम ह बतईन कि बलरामपुर म आवासीय विद्यालय सुरू होय ले जिला के जनजातीय परिवार मनके संगेसंग आने-आने वर्ग के प्रतिभावन छात्र मन ल घलो एखर फायदा मिलही। ए विद्यालय मन म स्कूली सिक्षा के संगेसंग अखिल भारतीय मेडिकल अउ इंजीनियरिंग परीक्षा के घलो तैयारी कराय जाथे।
डाक सेवा एप्लीकेशन
भारतीय डाक विभाग ह एडवांस्ड पोस्टल टेक्नालॉजी-एटीपी एप्लीकेशन के सुरूआत करे हे। ए अत्याधुनिक आईटी ‘टू प्वॉइंट ओ‘ प्रणाली डाक सेवा ल अउ जादा स्मार्ट, तेज अउ ग्राहक अनुकूल बनाय के दिसा म एक ठिन सुघ्घर पहल हवय।
दुर्ग डाक संभाग के प्रवर अधीक्षक बी.एल. जांगड़े ह बतईन कि दुरूग संभाग म इकसठ डाकघर अउ दू सौ अंठावन साखा डाकघर म एडवांस्ड पोस्टल टेक्नालॉजी के सुरूआत करे हे। ओमन किहीन कि नवा एडवांस्ड पोस्टल टेक्नालॉजी के उद्देश्य डाक सेवा ल आधुनिक बनाना अउ ग्राहक मन ल सुघ्घर अउ पारदर्सी सेवा प्रदान करना हे। ओमन किहीन कि अब एखर माध्यम ले नागरिक बिना पोस्ट ऑफिस आय अपन घरे ले ऑनलाइन रजिस्ट्री, स्पीड पोस्ट बुकिंग, मनी ऑर्डर बुकिंग जइसन सुविधा के फायदा ले सकही।
सिंगापुर-शैक्षणिक कार्य
आईआईएम रायपुर, आईआईटी भिलाई अउ एनआईटी रायपुर अब सिंगापुर के संग मिलके सोध अउ शैक्षणिक काम करही। आईआईएम रायपुर म उच्च शैक्षणिक संस्था के अधिकारी मनके संग राखे गे उच्च स्तरीय बइठका म सिंगापुर गणराज्य के महावाणिज्य दूतावास के कौंसुल राजनीतिक जेरोम वोंग अउ एरिका ह भाग लीन। बइठका म सिंगापुर के विश्वविद्यालय के संग संयुक्त पाठ्यक्रम सुरू करे अउ डिग्री कार्यक्रम चलाय के संग अंतर्राष्ट्रीय छात्र विनिमय योजना के विस्तार करे म सहमति बनीस।
श्रम आयुक्त-कार्रवाई
प्रदेस के श्रम आयुक्त ह कॉमन सर्विस सेंटर संचालक मन डहार ले श्रमिक मन ले पंजीयन-योजना के आवेदन बर निर्धारित सुल्क ले जादा रासि लेके सिकायत म कार्रवाई करे बर कहिन हे। ए बारे म ओमन जम्मों जिला के सहायक श्रम आयुक्त, श्रम पदाधिकारी अउ सहायक श्रम पदाधिकारी मन ल चिट्ठी जारी करे हे। चिट्ठी म केहे गेहे कि कॉमन सर्विस सेंटर के माध्यम ले ऑनलाइन पोर्टल म श्रमिक पंजीयन आवेदन बर तीस रूपिया अउ योजना आवेदन बर बीस रूपिया सुल्क निर्धारित हे। उहें, उंखर संज्ञान म आय हे कि कुछेक कॉमन सर्विस सेंटर संचालक मन डहर ले पंजीयन-योजना आवेदन करे बर श्रमिक मन ले एक ले डेढ़ हजार रूपिया तक के वसूली करे जावत हे। श्रम आयुक्त ह निरदेस दीन हे कि जम्मों कॉमन सर्विस सेंटर म पंजीयन-योजना बर निर्धारित सुल्क के सूचना जरूरी रूप ले प्रदर्सित करे जाय।
कोंडागांव-साइबर जागरूकता
कोंडागांव स्थित भारतीय स्टेट बैंक अउ बड़ेडोंगर के सासकीय उच्चतर माध्यमिक विद्यालय म साइबर जागरूकता कार्यक्रम के आयोजन करे गीस। कार्यक्रम म निरीक्षक सौरभ उपाध्याय ह ऑनलाइन बुलिग, फिशिंग अउ ओटीपी लेके धोखाधड़ी के बारे म स्कूली लइका अउ लोगन मन ल जानकारी दीन। ओमन लोगन मन ले अपन बैंक खाता अउ एटीएम पिन के जानकारी कोनों संग साझा नइ करे बर किहीन। ओमन किहीन कि कोनों भी प्रकार के साइबर ठगी होय म साइबर पोर्टल या साइबर हेल्प लाईन नंबर – एक नौ तीन शून्य म सिकायत दर्ज कराय के संगेसंग अपन तीर के पुलिस थाना या साइबर सेल जाके रिपोर्ट दर्ज करा सकत हे।
अस्पताल भवन-राशि स्वीकृत
राज्य सासन ह मनेन्द्रगढ़-चिरमिरी-भरतपुर जिला म दू सौ बीस बिस्तर के आधुनिक अस्पताल भवन के निर्माण बर पैंतीस करोड़ रूपिया ले जादा के मंजूरी देहे। स्वास्थ्य मंत्री श्याम बिहारी जायसवाल ह किहीन कि जिला म अस्पताल भवन के निर्माण ले स्थानीय लोगन मन ल सुघ्घर स्वास्थ्य सुविधा मिल सकही। संगेसंग मरीज मन ल गंभीर बीमारी के इलाज बर आने-आने सहर उपर निर्भर नइ रहना पड़ही।
अउ अब मौसम के हाल..
प्रदेस म अवइया चौबीस घंटा के दउरान कतकोन जघा म हल्का ले मध्यम बरसा होय या गरज-चमक के संग छींटा पड़े के संभावना हे। उहें, कुछेक जघा म गाज घलो गिर सकत हे। मौसम विज्ञानी एच.पी. चन्द्रा ह बतईन कि उत्तरी छत्तीसगढ़ के एक-दू जघा म भारी बरसा हो सकत हे।