छत्तीसगढ़ म आज राज्य मंत्रिमंडल के बढ़वार करे गीस। राज्यपाल रमेन डेका ह राजभवन म राखे गे कार्यक्रम म भाजपा विधायक गजेन्द्र यादव, राजेश अग्रवाल अउ गुरू खुशवंत सिंह ल मंत्री पद के सपथ देवईन। अब राज्य मंत्रिमंडल म मंत्री मनके संख्या बाढ़के चौदह होगे हे। ए मउका म मुख्यमंत्री विष्णुदेव साय, उपमुख्यमंत्री अरूण साव अउ विजय शर्मा, विधानसभा अध्यक्ष डॉक्टर रमन सिंह समेत मंत्री परिषद के सदस्य मौजूद रिहीन।
आज शपथ लेवइया नवा मंत्री मन ल विभाग के बंटवारा कर दे गेहे। मंत्री गजेन्द्र यादव ल स्कूल शिक्षा, ग्रामोद्योग, विधि अउ विधायी कार्य विभाग के जिम्मा सौंपे गेहे। उहें, गुरू खुशवंत साहेब ल कौशल विकास, तकनीकी शिक्षा अउ रोजगार अउ अनुसूचित जाति विकास विभाग के मंत्री बनाय गेहे। अइसने, राजेश अग्रवाल ल पर्यटन, संस्कृति, धार्मिक न्यास अउ धर्मस्व विभाग के जिम्मा सौंपे गेहे।
उहें, कुछेक जुन्ना मंत्री मन ल नवा विभाग दे गेहे। एमा मंत्री लखनलाल देवांगन ल आबकारी विभाग अउ केदार कश्यप ल परिवहन विभाग के जिम्मेवारी सौंपे गेहे।
मुख्यमंत्री विष्णुदेव साय ह आज सपथ लेवइया तीनों मंत्री ल बधाई अउ सुभकामना दीन हे।
लोकसभा-ऑनलाइन गेमिंग
केन्द्रीय इलेक्ट्रॉनिकी अउ सूचना प्रौद्योगिकी मंत्री अश्विनी वैष्णव ह आज लोकसभा म ऑनलाइन गेमिंग प्रोत्साहन अउ विनियमन विधेयक पेश करीन। एखर उद्देश्य ई-खेल अउ ऑनलाइन सोशल गेम्स ल बढ़ावा दे अउ पइसा देके मिलइया खतरनाक ऑनलाइन गेमिंग सेवा, विज्ञापन अउ ओखर ले जुड़े वित्तीय लेनदेन म रोक लगाना हे। एमा समन्वित नीतिगत मदद, रणनीतिक विकास अउ विनियमन बर ऑनलाइन गेमिंग अधिकार के नियुक्ति के प्रावधान हे। एखर उद्देश्य ए खेल ले जुड़े प्रभाव ले लोगन ल सुरक्षा देना हे।
ए विधेयक म पइसा लेके ऑनलाइन खेले बर बलाना, संचालन करना या लोगन ल खेल खेले बर उकसाय बर प्रतिबंध के प्रावधान हरय। ऑनलाइन गेम ले जुड़े कानून तोड़े म तीन बछर तक के कैद अउ एक करोड़ रूपिया के जुर्माना या फेर दोनों हो सकत हे।
माओवादी-आत्मसमर्पण
बस्तर संभाग म चलाय जात पूना मारगेम माने पुनर्वास ले पुनर्जीवन अभियान म दंतेवाड़ा अउ नारायणपुर जिला म आज कुल उनतीस झिन माओवादी मन ह आत्मसमर्पण करीन हे, जेमा दस महिला माओवादी सामिल हे।
दंतेवाड़ा जिला म आज जउन इक्कीस झिन माओवादी मन आत्मसमर्पण करीन, ओमा ले तेरह झिन उपर करीबन पच्चीस लाख रूपए के इनाम घोषित रिहीस। ए माओवादी मन ह दंतेवाड़ा रेंज के उप महानिरीक्षक कमलोचन कश्यप अउ केन्द्रीय रिजर्व पुलिस बल-सीआरपीएफ के पुलिस उप महानिरीक्षक राकेश चौधरी के आगू आत्मसमर्पण करीन।
उहें, नारायणपुर जिला म दू महिला समेत आठ झिन माओवादी मन ह आत्मसमर्पण करीन हे। ए जम्मों झन उपर तीस लाख रूपिया के इनाम घोषित रिहीस। आत्मसमर्पण करइया दूनांं जिला के माओवादी मन उपर आने-आने घटना म सामिल रेहे के आरोप हे। ए माओवादी मन ल राज्य सरकार के पुनर्वास नीति म पचास-पचास हजार रूपिया के प्रोत्साहन रकम दे गीस। संगेसंग सासन कोति ले कौशल विकास खातिर प्रसिक्षण अउ किसानी बर भूईंया देवाय जाही।
मुख्यमंत्री-कलेक्टर बैठक
मुख्यमंत्री विष्णुदेव साय ह सबो जिला के कलेक्टर मन ल केहे हे कि अब ‘‘पेशी पर पेशी‘‘ के दउर खतम करके राजस्व प्रकरण मनके निपटारा तय बेरा म करे जाय। मुख्यमंत्री ह ए निरदेस काली मंत्रालय म सरकारी योजना मनके समीक्षा करत दीन। वीडियो कॉन्फ्रेंसिंग ले सबो जिला के कलेक्टर मन संग बोलत श्री साय ह किहीन कि राजस्व मामला म कोताही बर्दास्त नइ करे जाही। बइठका म मुख्यमंत्री ह नामांतरण, अविवादित अउ विवादित बंटवारा, अभिलेख दुरूस्ती, त्रुटि सुधार, भू-अर्जन, सीमांकन अउ डायवर्सन ले जुड़े प्रकरण के स्थिति के जानकारी लीन। ओमन भारतमाला परियोजना म भू-अर्जन, माओवाद प्रभावित क्षेत्र म रद्दा बनाय समेत, कतकोन आने विषय म गोठबात करीन। संगेसंग मुख्यमंत्री ह छत्तीसगढ़ निर्माण के पच्चीसवीं वर्षगांठ म मनाय जाने वाला छत्तीसगढ़ रजत महोत्सव के तियारी के घलो समीक्षा करीन।
हाईकोर्ट सुनवाई
छत्तीसगढ़ उच्च न्यायालय ह तीन आईएएस अउ दू आने अधिकारी मन ल अवमानना के दोषी ठहराय हे। बछर दू हजार तेरह म जेल विभाग म काम करत फार्मासिस्ट वर्ग-दो के कर्मचारी मन ह सिकईत करे रिहीन कि ओमन ल आने विभाग के फार्मासिस्ट मनके तुलना म कमती तनखा दे जावत हे। फार्मासिस्ट मन ह ए मामला म हाईकोर्ट म याचिका दायर करे रिहीन, जेमा सुनवाई करत कोर्ट ह याचिकाकर्ता के पक्ष म फइसला सुनईन। लेकिन राज्य सासन ह ए फैसला ल लागू करे के जघा हाईकोर्ट म अपील करीन, जउन ल अदालत ह खारिज कर दे रिहीस। एखर बाद याचिकाकर्ता मन ह कोर्ट के फइसला लागू करे म होवइया अबेर के सेती अवमानना याचिका दायर करीन। एमा न्यायाधीश रविन्द्र कुमार अग्रवाल ह कोर्ट के अवमानना मानत आईएएस अधिकारी अविनाश चंपावत, हिमशिखर गुप्ता अउ अमित कटारिया के खिलाफ पचास-पचास हजार रूपिया के जमानती वारंट जारी करे हे। उहें, आईपीएस हिमांशु गुप्ता अउ मनोज पिंगुआ ल घलो अवमानना नोटिस जारी करीन। ए मामला के अवइया सुनवाई चार सितंबर के होही।
स्वास्थ्य जांच शिविर
रईपुर के राज्य सैनिक बोर्ड कार्यालय म आज वीर नारी, वीर माता अउ पूर्व सैनिक मन बर स्वास्थ्य जांच शिविर लगाय गीस। छत्तीसगढ़ अउ ओड़िशा सब एरिया (कोसा) कोति ले राखे गे ए सिविर म गृह विभाग के अपर मुख्य सचिव मनोज कुमार पिंगुआ मुख्य अतिथि के रूप म संघरीन। कार्यक्रम म ब्रिगेडियर तेजिंदर सिंह बावा ह वीर नारी अउ वीर महतारी मन ल सम्मानित करीन।
रेरा-स्वैच्छिक अनुपालन योजना
छत्तीसगढ़ रियल एस्टेट रेगुलेटरी अथॉरिटी-रेरा ह रियल एस्टेट क्षेत्र म पारदर्सिता अउ जवाबदेही बढ़ाय बर स्वैच्छिक अनुपालन योजना लागू करे हे। ए योजना अवइया सितंबर महीना तक प्रभावी रइही। ए योजना म इकतीस मार्च दू हजार-चौबीस तक पंजीयन होय सबो परियोजना ल रूके तिमाही रिपोर्ट अउ बछर भर के ऑडिट रिपोर्ट एक संघरा जमा करे के सुभीता दे गेहे। रूके रिपोर्ट जमा करे म विलंब शुल्क म सत्तर प्रतिशत तक छूट मिलही। उहें, जउन परियोजना तीर काम पूरा होय के प्रमाण पत्र हे, ओमन ल नब्बे प्रतिशत तक छूट दे जाही।
प्राचार्य-काउंसिलिंग प्रक्रिया
टी-संवर्ग के नवा-पदोन्नत प्राचार्य मन बर आज ले रईपुर के सासकीय शिक्षा महाविद्यालय परिसर म ऑनलाइन ओपन काउंसिलिंग के काम सुरू होगे हे। तेईस अगस्त तक चलइया ए काम म आठ सौ पैंतालीस पदोन्नत प्राचार्य सामिल होही। काउंसिलिंग दू पाली म राखे जात हे। पहिली पाली बिहनिया दस बजे ले डेढ़ बजे तक अउ दूसर पाली मंझनिया दू बजे ले संझा पांच बजे तक होही। दूनों पाली म डेढ़-डेढ़ सौ प्राचार्य मन ल सामिल करे जाही। काउंसिलिंग के आखिरी दिन तेईस अगस्त के बाकी दिन अनुपस्थित रइहया प्राचार्य मन ल घलो मउका मिलही।
रेडियो श्रोता दिवस
ओल्ड लिसनर्स ग्रुप ऑफ छत्तीसगढ़ कोति ले आज रेडियो श्रोता दिवस मनाय गीस। रईपुर के वृंदावन हॉल म राखे गे कार्यक्रम म छत्तीसगढ़ के आने राज्य ले श्रोता संघरीन। ओल्ड लिसनर्स ग्रुप ऑफ छत्तीसगढ़ जोन के प्रांतीय अध्यक्ष मोहन लाल देवांगन ह बतईन कि ए कार्यक्रम म ओल्ड लिसनर्स ग्रुप ऑफ इंडिया के राष्ट्रीय अध्यक्ष महेन्द्र मोदी, आकाशवाणी रायपुर के कार्यालय प्रमुख वी. राजेश्वर अउ कार्यक्रम प्रमुख पंकज मेश्राम सामिल होइन। ए दउरान कार्यक्रम म विशेष रूप ले मौजूद छत्तीसगढ़ के लोक गायिका कविता वासनिक ह छत्तीसगढ़ी लोक गीत प्रस्तुत करीन।
अब जानव मौसम के हाल..
मौसम विभाग के मुताबिक एक उपरी हवा के चक्रवाती घेरा दक्षिण-पूर्व मध्यप्रदेश के उपर बने हे। उहें, मानसून द्रोणिका दक्षिण कोति स्थित हे। मौसम विज्ञानी एच.पी. चन्द्रा ह बतईन कि एखर प्रभाव ले प्रदेस म कतकोन जघा म हल्का ले मध्यम बरसा अउ गरज-चमक संग छीटा बौछार होय के संभावना हवय। उहें, एक-दू जघा म गाज गिरे के चेतावनी दे गेहे।
इही बीच, बिलासपुर जिला के कुंआपाली गांव म गाज गिरे ले दू झिन माईलोगिन मनके मउत होगे। उहें, चार झिन आने माईलोगिन झुलस गीन। बताय जात हे कि जब ये मन खेत म बुता करके लहुटत रिहीन, तभे गाज के चपेट म आ गे। घायल मन ल अस्पताल म भर्ती कराय गेहे।