मुख्यमंत्री विष्णुदेव साय ह केहे हे कि छत्तीसगढ़ के अधिकारी-कर्मचारी मन ल अब केन्द्र सरकार के अधिकारी-कर्मचारी के बरोबर महंगाई भत्ता मिलही। राज्य सासन ह प्रदेस के अधिकारी-कर्मचारी के महंगाई भत्ता म दू प्रतिशत के बढ़ोत्तरी करत एला पचपन प्रतिशत कर देहे।
पहिली छत्तीसगढ़ के कर्मचारी मन ल तिरपन प्रतिशत महंगाई भत्ता मिलत रिहीस। ए असमानता ल हटावत ह प्रदेस के अधिकारी-कर्मचारी के महंगाई भत्ता म दू प्रतिशत के बढ़ोतरी करे गेहे।
मंत्रिमंडल बैठक
मुख्यमंत्री विष्णुदेव साय के पगरइति म आज मंत्रालय म होय राज्य मंत्रिमंडल के बइठका म कतकोन फइसला ले गीस। मंत्रिपरिषद ह नवा रायपुर म सूचना प्रौद्योगिकी उद्योग के स्थापना ल प्रोत्साहित करे बर नब्बे एकड़ भूईंया ल रियायती दर म देके फइसला लेहे। एखर उद्देश्य आईटी क्षेत्र म निवेस ल बढ़ावा अउ औद्योगिक विकास ल गति देना हे। आईटी कंपनी के स्थापना ले क्षेत्र म आधारभूत संरचना विकसित होही, जेखर ले स्थानीय निवासी मन ल फायदा मिलही।
उहें, मंत्रिपरिषद ह राज्य के अनुसूचित जनजाति क्षेत्र म रहवइया अंत्योदय अउ प्राथमिकता श्रेणी के परिवार ल सार्वजनिक वितरण प्रणाली के तहत हर महीना बांटे जाने वाला चना के जरूरी मात्रा नागरिक आपूर्ति निगम डहार ले एन.ई.एम.एल. ई ऑक्सन प्लेटफार्म के माध्यम ले खरीदे के फइसला लेहे। एखर ले खरीदी प्रक्रिया पारदर्सी अउ सस्ता होही। एखर संगेसंग मंत्रिपरिषद ह केहे हे कि जुलाई ले नवंबर तक जउन हितग्राही मन ल चना नइ लेहे, ओमन ल पात्रतानुसार दिसंबर महीना तक दू किलो चना दे जाही।
राज्य मंत्रिमंडल सदस्य-शपथ ग्रहण
राज्य मंत्रिमंडल के काली विस्तार होही। नवा सदस्य मनके शपथ ग्रहण समारोह काली बिहनिया साढ़े दस बजे ले राजभवन म आयोजित करे जाही। राज्यपाल रमेन डेका ह नवा सदस्य मन ल पद अउ गोपनीयता के शपथ देवाही। भाजपा विधायक दल के सचेतक सुशांत शुक्ला ह शपथ ग्रहण समारोह म आय बर जम्मांं विधायक मन ल नेवता देहे।
पीएम ग्राम सड़क योजना-राशि
केन्द्र सरकार ह प्रधानमंत्री ग्राम सड़क योजना के तहत छत्तीसगढ़ म सड़क के निर्माण बर ढाई सौ करोड़ रूपिया के रासि मंजूर करे हे। केन्द्रीय ग्रामीण विकास मंत्रालय ह ए रासि वित्त मंत्रालय के ‘‘जस्ट-इन-टाइम‘‘ फंडिग व्यवस्था के तहत सिंगल नोडल एजेंसी स्पर्श मॉडल ले जारी करे हे। मंत्रालय ह छत्तीसगढ़ सरकार ले ए रासि के उपयोग सुनिश्चित करे बर केहे हे। प्रधानमंत्री ग्राम सड़क योजना म अब तक छत्तीसगढ़ ल एक हजार एक सौ चार करोड़ रूपिया जारी करे जा चुके हे।
स्टेट कैपिटल रीजन
मुख्यमंत्री विष्णुदेव साय ह किहीन हे कि रायपुर, दुर्ग, भिलाई अउ राजनांदगांव ल स्टेट कैपिटल रीजन के रूप म विकसित करे जाही। एखर ले विकास काम म तेजी आही अउ नगरीय सुविधा के विस्तार होही। ए बात मुख्यमंत्री ह भिलाई नगर निगम म राखे गे एक ठिन कार्यक्रम के दउरान किहीन। ओमन किहीन कि नगरीय निकाय चुनाव के दउरान जारी करे गे अटल विश्वास पत्र के जम्मों वादा ल एक-एक करके पूरा करे जाही।
ए मउका म श्री साय ह भिलाई म नगर पालिक निगम क्षेत्र बर दू सौ इकचालीस करोड़ रूपिया ले जादा के आने-आने विकास काम के लोकार्पण अउ सिलान्यास करीन। ए दउरान मुख्यमंत्री ह भिलाई नगर पालिक निगम के नवा कार्यालय भवन बर बीस करोड़ रूपिया देके घलो घोसना करीन।
विकसित कृषि संकल्प अभियान
केन्द्रीय कृषि अउ किसान कल्याण मंत्री शिवराज सिंह चौहान ह किहीन हे कि ए बछर तीन अक्टूबर ले विकसित कृषि संकल्प अभियान के सुरूआत करे जाही। लोकसभा म प्रश्नकाल के दउरान पूरक प्रश्न के उत्तर देवत श्री चौहान ह किहीन कि ए अभियान अट्ठारह अक्टूबर तक चलही। कृषि मंत्री ह किहीन कि सरकार वैज्ञानिक कृषि पद्धति ल अपनाय अउ सतत कृषि विकास ल बढ़ावा दे उपर ध्यान केन्द्रित करत हे।
आरटीई-लॉटरी
शिक्षा का अधिकार अधिनियम-आरटीई के तहत निजी स्कूल म प्रवेस बर आज नवा रायपुर स्थित लोक शिक्षण संचालनालय म तीसर चरण के लॉटरी निकाली गीस। एमा एक हजार पांच छात्र मनके चुनई करे गेहे। तीसर चरण बर तीस हजार सात सौ अड़सठ अरजी मिले रिहीस। आरटीई के तहत चुने गे छात्र मनके भर्ती के काम आज ले चालू होगे हे, जउन ह उनतीस अगस्त तक चलही।
राष्ट्रीय खेल दिवस-कार्यक्रम
राष्ट्रीय खेल दिवस के मउका म उनतीस ले इकतीस अगस्त तक देशभर म खेल अउ फिटनेस ल बढ़ावा दे बर कार्यक्रम के आयोजन करे जाही। ए बारे म आज केन्द्रीय खेल मंत्री मनसुख मांडविया ह वीडियो कॉन्फ्रेंसिंग के माध्यम ले जम्मों राज्य के खेल मंत्री मन ल बइठका लेके जरूरी दिसा-निरदेस दीन।
ए मउका म खेल मंत्री टंक राम वर्मा ह किहीन कि छत्तीसगढ़ के जम्मों स्कूल, कॉलेज अउ बड़े स्टेडियम म घलो खेल गतिविधि आयोजित करे जाही। ओमन बतईन कि प्रदेस म ‘संडे ऑन साईकल‘ अभियान घलो चलाय जाही, जेमा आम लोगन अउ खिलाड़ी सामिल होही। खेल के आयोजन बर हरेक जिला म एक नोडल अधिकारी के नियुक्ति करे जाही। ओमन बतईन कि जिला मुख्यालय स्तर म बड़े आयोजन होही, जेमा जनप्रतिनिधि अउ स्थानीय खिलाड़ी के मौजूदगी रइही। समन्वय अउ मॉनिटरिंग बर फिट इंडिया पोर्टल म रिपोर्टिंग के व्यवस्था होही।
सैनिक बोर्ड कार्यालय-स्वास्थ्य शिविर
रायपुर स्थित राज्य सैनिक बोर्ड कार्यालय म काली वीर माता अउ पूर्व सैनिक मन बर स्वास्थ्य जांच सिविर के आयोजन करे जाही। छत्तीसगढ़ अउ ओड़िशा सब एरिया (कोसा) डहार ले राखे गे ए सिविर म कोसा के कमांडर ब्रिगेडियर तेजिंदर सिंह बावा डहार ले वीर नारी अउ वीर माता के सम्मान करे जाही।
समारोह के माईपहुना गृह विभाग के अपर मुख्य सचिव मनोज कुमार पिंगुआ होही।
निवारक सतर्कता अभियान
केन्द्रीय सतर्कता आयोग के निर्देश म बिलासपुर स्थित साउथ ईस्टर्न कोल फील्ड्स लिमिटेड-एसईसीएल मुख्यालय म निवारक सतर्कता अभियान सुरू होइस। ‘‘सतर्कता : हमारी साझा जिम्मेदारी‘‘ के थीम म आधारित ए अभियान के पांच प्रमुख बिन्दु हवय – लंबित सिकायत के निपटारा, लंबित मामला के निपटारा, अधिकारी अउ कर्मचारी मन बर क्षमता निर्माण कार्यक्रम के संचालन, संपत्ति के प्रभावी प्रबंधन अउ डिजिटल पहल ल बढ़ावा देके कार्यप्रणाली ल पारदर्सी बनाना। तीन महीना तक चलइया ए अभियान के सुभारंभ मुख्यमंत्री के सचिव पी. दयानंद ह करीन। कार्यक्रम के पगरइति एसईसीएल के सीएमडी हरीश दुहन ह करीन।
ए मउका म माईपहुना पी. दयानंद ह किहीन कि सार्वजनिक क्षेत्र म पारदर्सिता जरूरी हे। अइसन आयोजन ले सतर्कता अउ पारदर्सी ल बढ़ावा देथे।
उहें, एसईसीएल के सीएमडी हरीश दुहन ह एसईसीएल के सदस्य मन ले ेआह्वान करीन कि ओमन नियम अउ नीति के दायर म रहिके ईमानदारी अउ सत्यनिष्ठा के संग काम करय।
स्वतंत्रता दिवस-नाचा
स्वतंत्रता दिवस के मउका म उत्तर अमेरिका म राखे गे भारत दिवस परेड म छत्तीसगढ़ ह अपन विशिष्ट सांस्कृतिक, औद्योगिक अउ जनजातीय धरोहर के प्रदर्सन करीन। नार्थ अमेरिका छत्तीसगढ़ एसोसिएशन-नाचा के अगुवई म सिएटल, टोरंटो अउ कैलिफोर्निया-बे एरिया म प्रवासी छत्तीसगढ़ी परिवार ह अपन परंपरा ल जीवंत राखत भारत के राष्ट्रीय गौरव ल साझा करीन।
सिएटल म नाचा वॉशिंगटन चैप्टर के अध्यक्ष नमिता खंडेलवाल के अगुवई म परेड के आयोजन होइस। इहां छत्तीसगढ़ के औद्योगिक चिन्हारी, भिलाई इस्पात संयंत्र अउ धान के कटोरा झांकी ह मुख्य आकर्षण रिहीस।
उहें, टोरंटो म राखे गे परेड के संचालन कनाडा चैप्टर के अध्यक्ष पंकज अग्रवाल ह करीन। इहां पुरूष मन ह धोती, कुर्ता, गमछा अउ गौर मुकुट पहिन के बस्तर के पंरपरा ल देखईन।
कैलिफोर्निया-बे एरिया म नाचा के अध्यक्ष पूजा महतो के अगुवई म राखे गे कार्यक्रम म प्रवासी परिवार मन ह गीत, नृत्य अउ सांस्कृतिक प्रस्तुति के माध्यम ले छत्तीसगढ़ी पंरपरा ल प्रदर्सित करीन।
रेडियो श्रोता दिवस
ओल्ड लिसनर्स ग्रुप ऑफ छत्तीसगढ़ काली रेडिया श्रोता दिवस मनाही। ए मउका म रायपुर म रेडियो श्रोता मन बर एक कार्यक्रम के आयोजन करे जाही। कार्यक्रम के अध्यक्षता पूर्व जिला पंचायत अध्यक्ष अशोक बजाज करही। उहें, कार्यक्रम के मुख्य अतिथि ओल्ड लिसनर्स ग्रुप ऑफ छत्तीसगढ़ जोन के मैनेजिंग डायरेक्टर महेन्द्र मोदी होही।