केंद्रीय कृषि अउ किसान कल्याण मंत्री शिवराज सिंह चौहान ह किहीन हे कि नकली कीटनाशक अउ खाद-बीज बनइया कंपनी मनके खिलाफ कड़ा कार्रवाई करे जाही। श्री चौहान ह मध्यप्रदेस म नकली दवा छिड़के ले सोयाबीन के फसल ल होय नुकसान के निरीक्षण बर पहुंचे रिहीन। केंद्रीय कृषि मंत्री ल नकली खरपतवार नाशक दवा ले सोयाबीन के फसल ल नुकसान होय के सिकायत मिले रिहीस। श्री चौहान ह किहीन कि अइसन कंपनी मनके खिलाफ पूरा देस म अभियान चलाय जाही। उंखर निरदेस म भारतीय कृषि अनुसंधान परिषद डहार ले तुरते जांच समिति बना दे गेहे।
सीपी राधाकृष्णन-उपराष्ट्रपति उम्मीदवार
महाराष्ट्र के राज्यपाल सीपी राधाकृष्णन ह उपराष्ट्रपति चुनाव बर राष्ट्रीय जनतांत्रिक गठबंधन के प्रत्यासी होही। भारतीय जनता पार्टी अध्यक्ष जगत प्रकाश नड्डा ह काली नई दिल्ली के पार्टी मुख्यालय म भाजपा संसदीय बोर्ड के बइठका के बाद ए घोसना करीन। श्री नड्डा ह किहीन कि गठबंधन के सबो सहयोगी मन ह ए फइसला के समर्थन करीन हे। ओमन किहीन कि भाजपा के उद्देस्य सबो दल के संग समन्वय बनाके उपराष्ट्रपति चुनाव ल सर्व सम्मति ले कराना हे। श्री नड्डा ह किहीन कि पाछू एक हफ्ता म गठबंधन के सहयोगी अउ विपक्षी दल ले ए बारे म संपर्क करे गेहे।
प्रधानमंत्री नरेंद्र मोदी ह सोशल मीडिया पोस्ट म किहीन कि श्री राधाकृष्णन ह सार्वजनिक सेवा के लंबा दौर म अपन विनम्रता, बुध्दिमता अउ समर्पण ले अलगे पहिचान बनाइन हे। आने-आने पद म राहत ओमन ह हमेसा जनसेवा अउ समाज के वंचित वर्ग ल मजबूत बनाय उपर धियान दीन। प्रधानमंत्री ह विश्वास जतइन कि श्री राधाकृष्णन ह एक सशक्त अउ प्रेरक उपराष्ट्रपति होही।
पटवारी कार्यालय-राशि
राज्य सरकार ह पटवारी कार्यालय के बने संचालन बर सात करोड़ सत्तर लाख रूपिया के मंजूरी देहे। एखर ले आम जनता ल राजस्व सेवा जल्दी ले अउ पारदर्सिता के संग मिल सकही। मुख्यमंत्री विष्णुदेव साय ह किहीन हे कि पटवारी मन ह ग्रामीण राजस्व बेवस्था के रीढ़ हवय। उंखर समस्या के निपटारा सरकार के प्राथमिकता हरय। उहें, राजस्व मंत्री टंकराम वर्मा ह किहीन कि राज्य सरकार ह पटवारी मनके जायज मांग ल मंजूर करत वित्तीय स्वीकृति देहे। चालू वित्तीय बछर म पटवारी मन बर आने-आने मद म रासि आवंटित करे गेहे। एमा कार्यालय संचालन जरूरी संसाधन अउ सुविधा के विस्तार बर ए रासि उपलब्ध कराय जाही।
जवान-शहीद
बीजापुर जिला म आज माओवादी मन डहार ले करे गे आईईडी बिस्फोट म डिस्ट्रिक्ट रिजर्व गार्ड- डीआरजी के एक झन जवान दिनेश नाग सहीद होगिन अउ तीन झन दूसर जवान मन घायल होगे हवय। घायल जवान मनके स्थिति खतरा ले बाहिर बताय गे हवय। मिले जानकारी के अनुसार जिला के नेशनल पार्क क्षेत्र म डीआरजी के टीम ह काली सर्चिंग अभियान म निकले रिहीस, इही दउरान आज बिहनिया माओवादी मन ह आईईडी ले बिस्फोट कर दीन। जेखर चपेट म आय ले डीआरजी के एक झन जवान ह सहीद होगे।
मुख्यमंत्री विष्णुदेव साय ह ए घटना उपर दुख जतावत सहीद जवान के परिवार बर अपन संवेदना जतइन हे। ओमन ह घायल जवान मनके जल्दी ठीक होय के कामना घलो करीन हे।
प्राचार्य-पदोन्नति
राज्य सरकार ह स्कूल शिक्षा विभाग के अंतर्गत प्राचार्य टी-संवर्ग के पदोन्नति के आदेस जारी कर देहे। पदोन्नत प्राचार्य मनके पद स्थापना बर ओपन काउंसिलिंग रईपुर के शासकीय शिक्षा महाविद्यालय परिसर म बीस अगस्त ले सुरू होही, जउन ह तेईस अगस्त तक चलही। काउंसिलिंग म आठ सौ पैंतालिस पदोन्नत प्राचार्य सामिल होही। काउंसिलिंग के प्रक्रिया हर दिन बिहनिया दस बजे ले सुरू होही। पदोन्नत प्राचार्य अउ रिक्त पद के सूची स्कूल शिक्षा विभाग के वेबसाइट म दे गे हवय। काउंसिलिंग म अनुपस्थित रहइया प्राचार्य मन ल आखिरी दिन तेईस अगस्त के मउका दे जाही।
राज्यपाल-रविशंकर विवि
राज्यपाल रमेन डेका ह पंडित रविशंकर शुक्ल विश्वविद्यालय रईपुर ल नैक डहार ले ए प्लस ग्रेड दे जाय म सुभकामना दीन हे। रविशंकर शुक्ल विश्वविद्यालय रईपुर के कुलपति प्रोफेसर सच्चिदानंद शुक्ला ह आज राज्यपाल ले भेंट करके विश्वविद्यालय ल नैक डहार ले ए प्लस ग्रेड प्राप्त होय के चिट्ठी सौंपिन। ए मउका म राज्यपाल ह किहीन कि राज्य के दूसर शासकीय विश्वविद्यालय मन ल घलो एखर ले प्रेरणा मिलही अउ ओमन ह गुणवत्ता म सुधार लाही।
खबर के मुताबिक रविशंकर विश्वविद्यालय राज्य के पहिली शासकीय विश्वविद्यालय हे, जेला सामान्य विश्वविद्यालय के श्रेणी म ए प्लस ग्रेड दे गे हवय।
उज्बेकिस्तान प्रतिनिधिमंडल-दौरा
रईपुर के इंदिरा गांधी कृषि विश्वविद्यालय अउ उज्बेकिस्तान के डेनाऊ इंस्टीट्यूट ऑफ इंटरप्रेन्योरशिप एंड पेडागॉजी के बीच शिक्षा अउ अनुसंधान के क्षेत्र म एक ठन समझौता होय हे। एखर तहत उज्बेकिस्तान ले आठ झन सदस्य वाले प्रतिनिधिमंडल इक्कीस अगस्त के इंदिरा गांधी कृषि विश्वविद्यालय के दउरा म आही। ए प्रतिनिधि मंडल ह दूनों संस्था मनके बीच शिक्षा अउ अनुसंधान के क्षेत्र म करे जावत काम के जायजा लिही।
एनएचएम कर्मचारी-हड़ताल
राष्ट्रीय स्वास्थ्य मिशन-एनएचएम के सोलह हजार ले जादा संविदा कर्मचारी मन ह अपन दस सूत्रीय मांग ल लेके आज ले अनिश्चित कालीन हड़ताल करत हे। ए कर्मचारी मन डहार ले पाछू दू दिन ले घलो जिला मुख्यालय अउ राजधानी रईपुर म प्रदर्सन करे गे रिहीस। संविदा कर्मचारी संघ उहार ले घोसना करे गे हे कि हड़ताल के दउरान बिसेस नवजात शिशु देखभाल इकाई-एसएनसीयू म नवजात शिशु देखभाल संघरा सबो प्रकार के आपातकालीन सेवा के घलो बहिष्कार करे जाही।
मुख्यमंत्री विष्णुदेव साय ले राष्ट्रपति रोवर रेंजर अवार्ड ले सम्मानित देवाशीष मखीजा अउ रेंजर मनतृप्त कौर संधू ह भेंट करीन। ए मउका म मुख्यमंत्री ह दूनों झन ल प्रतीक चिन्ह भेंट कर उंखर उपलब्धि बर सम्मानित करीन।
खबर के मुताबिक राष्ट्रपति द्रौपदी मुर्मू ह पाछू बाईस जुलाई के राष्ट्रपति भवन, नई दिल्ली म राखेगे खास समारोह म छत्तीसगढ़ के रोवर देवाशीष माखीजा, रेंजर मनतृप्त कौर संधू अउ गाईड कुसुम सिन्हा ल अलग-अलग श्रेणी म सम्मानित करीन। श्री देवाशीष ह बतइन कि ए पुरस्कार चार बछर के अंतराल म देसभर ले चुने गे सोलह झन प्रतिभागी मन ल दे गीस। ए बार छत्तीसगढ़ ले तीन झन प्रतिभागी मन ह ए सम्मान हासिल करीन।
ब्रेवरेजेस कार्पोरेशन-प्रबंधक संचालक
राज्य सरकार ह भारतीय प्रशासनिक सेवा के अधिकारी आर संगीता ल छत्तीसगढ़ ब्रेवरेजेस कार्पोरेशन अउ छत्तीसगढ़ स्टेट मार्केटिंग कार्पारेशन लिमिटेड के प्रबंध संचालक के उपराहा प्रभार सौंपे हे। आईएएस अधिकारी आर संगीता ह छत्तीसगढ़ कैडर के दू हजार पांच बैच के अधिकारी हे। उहें, आईएएस अधिकारी श्याम लाल धावड़े ल ए प्रभार ले मुक्त करे गेहे।
चैतन्य बघेल-रिमांड
सराब घोटाला मामला म गिरफ्तार पूर्व मुख्यमंत्री भूपेश बघेल के बेटा चैतन्य बघेल के चौदह दिन के न्यायिक रिमांड अवधि सिराय म आज ओमन ल बिसेस कोर्ट म पेस करे गीस। कोर्ट ह सुनवाई के बाद ओमन ल तीसरइया घांव चौदह दिन के न्यायिक रिमांड म जेल भेज देहे। ए मामला म अब एक सितंबर के सुनवाई होही।
इही बीच, प्रवर्तन निदेशालय-ईडी ह चैतन्य बघेल के पांच दिन के कस्टोडियल रिमांड के मांग करे हे, जेखर उपर सुनवाई काली होही।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म राज्य मंत्रिपरिषद के बइठका काली उन्नीस अगस्त के बिहनिया ग्यारा बजे नवा रईपुर के मंत्रालय म होही।
– सक्ति जिला के ओडेकेरा गांव के सेवा सहकारी समिति के प्रभारी संस्था प्रबंधक उपर किसान मन ह खाद-बीज नइ देवाय के अउ दुर्व्यवहार के आरोप लगावत क्षेत्र के किसान मन ह आज जैजैपुर-हसौद मुख्य मार्ग म चक्काजाम करके प्रदर्सन करीन।
– जांजगीर-चांपा जिला शिक्षा अधिकारी ह स्कूल म सराब पीके अवइया प्रधान पाठक ल निलंबित कर देहे।
अउ
– राजनांदगांव जिला के इंदामरा गांव तीर एक ठन अज्ञात वाहन के चपेट म आय ले नौ झन मवेसी मनके मउत हो गेहे।