छत्तीसगढ़ लोक सेवा आयोग ह अवइया भर्ती परीक्षा मन बर नवा दिसा-निरदेस जारी करे हे। नवा गाइडलाइन म माईलोगिन मन ल मंगलसूत्र अउ नाक-कान म पहिरे ले छूट दे गेहे। एखर अलावा करिया, गाढ़ा हरा, नीला संग आने रंग के कपड़ा पहिरके अवइया अभ्यर्थी मन ल परीक्षा केंद्र म प्रवेस नइ दे जाही। संगेसंग अभ्यर्थी मन अब जूता पहिरके घलो परीक्षा नइ दे पाही। पीएससी ह अभ्यर्थी मन ल परीक्षा ले दू घंटा पहिली केंद्र पहुंचे के निरदेस देहे। उंहे, परीक्ष सुरू होय ले पंद्रह मिनट पहिली मुख्य द्वार बंद होही, एखर बाद कोनो ल प्रवेस नइ दे जाही।
बतादन कि एखर ले पहिली पीएससी डहार ले भर्ती परीक्षा के बेरा बिलासपुर म परीक्षा देवइया ह हाईटेक तरीका ले नकल करत पकड़े गे रिहीस, जेखर बाद पीएससी ह ए नवा निरदेस जारी करे हे।
राज्य मंत्रिमंडल-बैठक
मुख्यमंत्री विष्णुदेव साय के अध्यक्षता म उन्नीस अगस्त के मंत्रालय म बिहनिया ग्यारा बजे ले मंत्रिमंडल के बइठका होही। उपमुख्यमंत्री अरूण साव ह बतइन कि ए बइठका म कतकोन महत्वपूर्ण फइसला ले जा सकथे।
निर्वाचन आयोग-मतदाता सूची
निर्वाचन आयोग ह किहीस हे कि मतदाता-सूची जम्मों कायदा-कानून के पालन करके तियार करे जाथे। मतदाता सूची तियार करे के बेरा हर चरण राजनीतिक दल मन ल सामिल करे गे रिहीस। बतादन कि पाछू चुनाव मन के मतदाता सूची म कथित रूप ले कमी के मुद्दा उठाय जाय ले आयोग ह आलोचना करिस। किहीस कि मतदाता सूची ले जुड़े कोनो घलो मुद्दा, दावा-आपत्ति के बेरा उठाय गे होतिस, त उंखर जांच करे जा सकत रिहीस। आयोग ह यहू किहीस कि कतकोन राजनीतिक दल अउ उंखर बूथ कार्यकर्ता मन मतदाता सूची के मसौदा उपर कोनो आपत्ति दर्ज नइ कराय रिहीन।
माओवादी-आत्मसमर्पण
गरियाबंद जिला म आज दू झिन माईलोगिन संग चार झन माओवादी मन आत्मसमर्पण करिन हें। एमा डीवीएस सदस्य दीपक मंडावी घलो सामिल हे, जेखर उपर आठ लाख रूपिया के इनाम घोसित रिहीस। उंहे, दू झन आने माओवादी मन उपर पांच-पांच लाख अउ एक झन उपर एक लाख रूपिया इनाम रिहीस।
आज गरियाबंद म आयोजित पत्रकारवार्ता म रायपुर रेंज के पुलिस महानिरीक्षक अमरेंद्र मिश्रा अउ नक्सल ऑपरेशन के आईजी अंकित गर्ग ह बतइन कि ए सबो माओवादी धमतरी-गरियाबंद अउ नुआपाड़ा डिवीजन कमेटी म बछर दू हजार तेरह ले सक्रिय रिहीन।
पुलिस महानिरीक्षक श्री मिश्रा ह बतइन कि इही जिला म चलाय गे एक ठन आने अभियान म सुरक्षाबल मन धमतरी-गरियाबंद सीमा तिर ले माओवादी कैंप ले साढ़े सोलह लाख रूपिया नगदी संग भारी मात्रा म आने-आने हथियार अउ नक्सल साहित्य बरामद करिन हें।
रियल स्टेट-क्यूआर कोड
छत्तीसगढ़ रियल एस्टेट रेगुलेटरी अथॉरिटी-रेरा ह रियल एस्टेट क्षेत्र म पारदर्सिता अउ उपभोक्ता अधिकार के रक्षा बर सबो प्रकार के रियल एस्टेट के विज्ञापन म रेरा पंजीकरण नंबर अउ रेरा वेबसाइट के पता स्पष्ट रूप ले प्रकासित करे बर अनिवार्य कर देहे। ए निरदेस के पालन प्रिंट मीडिया, डिजीटल प्लेटफार्म , पोस्टर, होडिंग, पंप्लेट अउ आने सबो प्रचार माध्यम मन ल करना होही।
बतादन कि रेरा डहार ले जारी निरदेस के तहत हर विज्ञापन म रेरा के क्यूआर कोड घलो सामिल करना होही। रेरा ह नियम के पालन नइ करे म प्रमोटर या एजेंट मन के खिलाफ कार्रवाही के चेतावनी देहे।
रामविचार नेताम-बलरामपुर
आदिम जाति विकास मंत्री रामविचार नेताम ह बलरामपुर जिला के ग्राम पंचायत कुण्डपान म आयोजित कारीकरम म बांसठ करोड़ रूपिया के लागत ले बने बिजली बिस्तार कारज के सुभारंभ करिन। संगेसंग ग्राम पंचायत डिंडो म एक करोड़ इंक्यानवे लाख रूपिया ले जादा लागत के पचास सीट के पोस्ट मैट्रिक छात्रावास के सिलान्यास करिन। कारीकरम ल संबोधित करत श्री नेताम ह किहीन कि कुण्डपान म बिजली बिस्तार होय ले इलाका के साढ़े ग्यारा हजार ले जादा परिवार तक बिजली पहुंचही।
निजी विवि-लॉटरी
शिक्षा के अधिकार अधिनियम के तहत निजी विद्यालय मनके पचीस प्रतिसत सीट मन भर्ती प्रक्रिया के तीसरइया लॉटरी उन्नीस अगस्त के निकाले जाही। दू चरण म निकाले गे लॉटरी के बाद घलो प्रदेस म छै हजार एक सौ सीट अभी घलो खाली हे। ए खाली सीट मन बर पहिली मिले आवेदन मन ले तीसरइया लॉटरी निकाले जाही। जेन लइका मनके चयन पहिली हो चुके हे, उंखर नांव ल छोड़ के बांचे आवेदक मन बर लॉटरी निकाले जाही। एखर बर फेर आवेदन भरे के जरूरत नइ हे।
रायगढ़-रेडी टू ईट यूनिट
रायगढ़ जिला के कोतरलिया ग्राम पंचायत के महिला स्व-सहायता समूह ह ‘‘रेडी-टू-ईट‘‘ के उत्पादन सुरू कर देहे। वित्त मंत्री ओपी चौधरी ह ‘‘रेडी-टू-ईट‘‘ इकाई के सुभारंभ करिन अउ स्वयं मसीन चलाके निर्माण प्रक्रिया के निरीक्षण करिन एखरे संग माईलोगन मन ल खाद्य पदार्थ के गुणवत्ता ल बनाय राखे के निरदेस देइन। ए दउरान ओमन किहीन कि रायगढ़ के ए इकाई ह एक ठन माडल के रूप म आय, जउन ल झटकुन प्रदेस के सबो जिला म लागू करे जाही।
बतादन कि हालेच म मुख्यमंत्री विष्णुदेव साय ह रायगढ़ के दस ठन महिला स्व-सहायता समूह मन ल अनुबंध पत्र बांटे रिहीन, जेखर बाद मसीन के कारज ल पूरा करे गीस।
अंबिकापुर-प्लास्टिक प्रोसेसिंग इकाई
स्वच्छ भारत मिसन-ग्रामीण के तहत सरगुजा जिला के दरिमा ग्राम पंचायत म जिला स्तरीय ‘‘प्लास्टिक प्रोसेसिंग इकाई‘‘ के स्थापना करे गीस हे, जउन प्रदेस के दूसरइया अउ सरगुजा संभाग के पहिली केंद्र आय। लूंड्रा विधायक प्रबोध मिंज ह ए केंद्र के उद्घाटन करिन अउ ए बेरा किहीन कि स्वच्छता प्रबंधन के क्षेत्र म सरगुजा ह आने जिला मन बर रोल माडल बनत हे। ए केंद्र ह न सिरिफ पर्यावरण संरक्षण बर मील के पत्थर साबित होही, भलुक महिला सशक्तिकरन अउ ग्रामीन अर्थबेवस्था ल घलो मजबूत बनाही।
बतादन कि ‘प्लास्टिक प्रोसेसिंग इकाई‘ म जिला के सबो गांव म ले सुक्खा अउ ठोस कचरा सकेल के प्रोसेसिंग इकाई भेजे जाही, जिंहा प्लास्टिक के दुबारा परयोग करके उत्पाद तियार करे जाही।
शीघ्रलेखन/मुद्रलेखन-परीक्षा
शीघ्रलेखन अउ मुद्रलेखन कम्प्यूटर कौशल परीक्षा परिषद ह हिन्दी अउ अंग्रेजी शीघ्रलेखन परीक्षा मनके तारीख जारी कर देहे। तेईस अगस्त के अंग्रेजी शीघ्रलेखन सौ शब्द प्रति मिनट के गति के परीक्षा रायपुर संभाग म एक ठन परीक्षा केंद्र म आयोजित होही। उहें, चौबीस अगस्त के हिन्दी शीघ्रलेखन सौ शब्द प्रति मिनट के गति के परीक्षा रायपुर, दुरूग, बिलासपुर अउ बस्तर संभाग के चार ठन परीक्षा केंद्र म आयोजित करे जाही।
दुर्ग पुलिस-रैली
दुरूग पुलिस ह आज नसा-मुक्ति अभियान के तहत रैली निकालिस। ‘नशा ल छोड़व, जिनगी ले नाता जोड़व‘ थीम उपर ए रैली म जिला के अतिरिक्त पुलिस अधीक्षक अभिषेक झा, उपपुलिस अधीक्षक संग पुलिस विभाग के आने-आने अधिकारी-करमचारी सामिल होइन। ए दउरान रैली के जरिया ले लोगन ल नशा ले दूरिहा रहे के संदेस दीन।
अउ अब थोरकुन समाचार सार म –
– प्रदेस म स्टाफ नर्स के दू सौ पच्चीस पद के भर्ती बर ऑनलाइन आवेदन प्रक्रिया सुरू हो गेहे। उम्मीदवार मन तीन सितंबर तक आवेदन कर सकत हें। इक्काईस सितंबर के व्यापम ह परीक्षा लिही।
– प्रदेस म टी-संवर्ग के पदोन्नत प्राचार्य मनके पदस्थापना बर काउंसिलिंग प्रक्रिया बीस अगस्त ले सुरू होके तेईस अगस्त तक चलही।
– खैरागढ़-छुईखदान-गंडई जिला म पुलिस ह बिस्फोटक जिनिस के संग सात झन आरोपी ल गिरफ्तार करिस, इंखर उपर एक झन मनखे ल बिस्फोटक ले मारे बर साजिस के आरोप हे।
– महासमुंद पुलिस ह नसा-दवई के संग नौ लोगन ल गिरफ्तार करे हे, जिंखर तिर ले सिरफ अउ पांच सौ गोली जब्त करे गिस।
– बलरामपुर जिला के पास्ता थाना इलाका म ट्रक अउ बस के बीच जोरदार टक्कर होगे। हादसा म ट्रक चलइया संग दू झन घायल होगिन।