जापान के ओसाका म तेरह अप्रैल ले चलत वर्ल्ड एक्सपो म छत्तीसगढ़ अपन धरोहर अउ विकास यात्रा देखाही। तेइस अक्टूबर तक चलइया ए एक्सपो म मुख्यमंत्री विष्णुदेव साय ल बिसेस नेवता मिले हे। एक्सपो के बिसय डिजाइनिंग फ्यूचर सोसायटी फॉर अवर लाइव्स हवय अउ एखर उप बिसय सेविंग लाइव्स इम्पावरिंग लाइव्स अउ कनेक्टिंग लाइव्स हे। मुख्यमंत्री विष्णुदेव साय ह किहीन हे कि छत्तीसगढ़ के भागीदारी राज्य के सांस्कृतिक अउ तकनीकी प्रगति ल वैश्विक मंच म बताना हे। उहें, छत्तीसगढ़ ल औद्योगिक विकास के विश्व मानचित्र म मजबूती ले स्थापित करना हे। ओमन किहीन कि छत्तीसगढ़ के औद्योगिक नीति गजब प्रभावी रेहे हे।
मुख्यमंत्री-साइबर सुरक्षा रथ
मुख्यमंत्री विष्णुदेव साय ह आज राजधानी रईपुर के अपन निवास परिसर म एसबीआई साइबर सतर्कता रथ ल हरियर झंडी दिखाके रवाना करीन अउ राज्य स्तरीय साइबर जागरूकता अभियान के सुरूआत करीन। ए मउका म श्री साय ह किहीन कि तकनीक ह मानव जीवन ल सरल अउ सहज बनाय हे। डिजीटल लेनदेन सुविधा जनक होय हे, फेर साइबर ठगी जइसन चुनौती घलो बाढ़े हे। ओमन किहीन कि थोरिक सावधानी ले साइबर धोखाधड़ी ले बांचे जा सकत हे।
साइबर सतर्कता रथ ले लोगन ल ऑडियो-वीडियो संदेस, नुक्कड़ अउ कटपुतली नाटक ले साइबर धोखाधड़ी के संबंध म जानकारी दे जाही। ए रथ बिसेस रूप ले ओ जघा म जाही, जिंहा साइबर ठगी के मामला जादा होथे। प्रदेस म अइसने उनतीस जघा के चिन्हारी करे गेहे।
छत्तीसगढ़ रजत-महोत्सव
मुख्यमंत्री विष्णुदेव साय ह स्वतंत्रता दिवस के मउका म राजधानी रईपुर के मुक्ताकांशी मंच ले छत्तीसगढ़ रजत महोत्सव के सुभारंभ करीन। ए महोत्सव अवइया बछर छै फरवरी तक जनभागीदारी संग मनाय जाही। ए मउका म श्री साय ह किहीन कि ए सरकारी नइ भलूक सबो प्रदेसवासी मनके महोत्सव हे, जेमा राज्य के हर वरग, समाज अउ हर बछर के लोगन के भागीदारी जरूरी हे। कारीकरम म रजत महोत्सव विसेषांक, पुस्तक विमोचन, लोगो अउ वैब पोर्टल के अनावरण घलो करे गीस।
राज्यपाल सम्मेलन
राज्यपाल रमेन डेका ह आज एम्स रईपुर म राखे गे नाक, कान, गला-ईएनटी रोग बिसेसज्ञ के वार्षिक सम्मेलन म संघरीन। ए मउका म श्री डेका ह किहीन कि बीमारी के पता लगाय अउ ओखर उपचार म एआई रोबोटिक सर्जरी अउ आने नवा तकनीक के भूमिका महत्ता के हो गेहे। ओमन किहीन कि ईएनटी कई अइसन गंभीर मुद्दा ले जुड़े हे, जेमा सिर, गला के कैंसर परमुख हवय। दुर्भाग्य ले छत्तीसगढ़ म तम्बाकू खाय के आदत जादा हे, जेखर सेति अइसन मामला के संख्या गजब हे। राज्यपाल ह ए समस्या ले निपटे बर समाज अउ बिसेसज्ञ ले मिलके काम करे के आह्वान करीन।
अटल बिहारी वाजपेयी-पुण्यतिथि
राष्ट्र आज पूर्व प्रधानमंत्री भारत रत्न अटल बिहारी वाजपेयी के सातवीं पुण्यतिथि म श्रध्दांलि देवत हे। बछर दू हजार अट्ठारा म सोलह अगस्त के उंखर निधन होय रिहीस। बछर दू हजार पंद्रह म ओमन ल भारत के सर्वोच्च नागरिक सम्मान भारत रत्न ले अलंकृत करे गीस। राष्ट्रपति द्रौपदी मुर्मु, प्रधानमंत्री नरेंद्र मोदी अउ आने केंद्रीय मंत्री, राजनीतिक नेता मन ह आज राष्ट्रीय राजधानी म उंखर समाधी सदैव अटल म फूलमाला चढ़ाइन।
ऐति, छत्तीसगढ़ म घलो वाजपेयी जी के पुण्यतिथि म श्रध्दांजलि देवत हे। राज्यपाल रमेन डेका अउ मुख्यमंत्री विष्णुदेव साय ह वाजपेयी जी ल श्रध्दांजलि दीन हे। राज्यपाल ह किहीन हे कि श्री वाजपेयी जी महान वक्ता, जननायक होय के संगेसंग सबो दल के बीच सम्मानीय रिहीन।
उहें, मुख्यमंत्री ह रईपुर के अवंति विहार चौक म स्थित पूर्व प्रधानमंत्री स्वर्गीय वाजपेयी जी के प्रतिमा म फूलमाला चढ़ाके सुरता करीन। ओमन किहीन की आज प्रदेसवासी अपन पता म छत्तीसगढ़ सब्द के उपयोग करथे, ओ अटल जी के ही देन हे। छत्तीसगढ़ राज्य के निर्माता के रूप म ओमन ल हमेसा सुरता करे जाही।
ओति, रईपुर के प्रदेस भाजपा कार्यालय म पूर्व प्रधानमंत्री अटल बिहारी वाजपेयी के पुण्यतिथि म उंखर छायाचित्र म फूलमाला चढ़ाके सुरता करे गीस। ए बेरा म प्रदेस संगठन महामंत्री पवन कुमार साय, विधायक भूलन मरावी, छत्तीसगढ़ राज्य विकास निगम के अध्यक्ष रामसेवक पैकरा, युवा आयोग के अध्यक्ष विश्व विजय िंसंह तोमर अउ भाजपा युवा मोर्चा के प्रदेस अध्यक्ष राहुल टिकरिहा ह समेता कतकोन कार्यकर्ता पदाधिकारी मौजूद रिहीन।
दरबार हॉल-नाम परिवर्तन
राजभवन के दरबार हॉल के नांव बदल के छत्तीसगढ़ मंडपम करे गेहे। राज्यपाल रमेन डेका ह काली स्वतंत्रता दिवस के मउका म एखर विधिवत अनावरण के घोसना करीन। ए मउका म मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह समेत मंत्रिमंडल के सदस्य अउ अधिकारी मौजूद रिहीन।
सेना भर्ती-रैली
मध्यप्रदेस के विदिसा म अवइया बाईस अगस्त ले दू सितंबर तक सेना भर्ती रैली राखे जाही। ए रैली म मध्यप्रदेस अउ छत्तीसगढ़ के आने-आने श्रेणी के उम्मीदवार मन ल चुने जाही। सेना भर्ती कार्यालय रईपुर के केंद्रीय नियंत्रण श्रेणी के पद-सिपाही फार्मा, सिपाही तकनीकी, नर्सिंग सहायक, धर्मगुरू जेसीओ, जेसीओ कैटरिंग, एजुकेसन हवलदार, हवलदार सर्वेयर अउ आटोमेटेड कार्टोग्राफर के भर्ती इकतीस अगस्त ले एक सितंबर तक होही। ए पद मन बर सिरिफ उही उम्मीदवार पात्र होही जउन मन सेना कोति ले पाछू जून-जुलाई म राखे गे प्रवेस परीक्षा पास करीन हे। रैली के दउरान उम्मीदवार मन के शारीरिक दक्षता, दस्तावेज के जांच अउ चिकित्सकीय जांच करे जाही। भर्ती म सामिल होवइया योग्य उम्मीदवार मन ल प्रवेस पत्र उंखर ईमेल म भेजे जाही। भर्ती स्थल म प्रवेस सिरिफ प्रवेस पत्र म लिखाय तारीख अउ समय के मुताबिक ही मिलही। अभ्यर्थी मनके दउड़ रतिहा एक बजे ले सुरू होही। रैली म भाग लेवइया उम्मीदवार मन ल प्रवेस पत्र सबो जरूरी दस्तावेज अउ आधार कारड ले लिंक मोबाइल, फोन संग लाना जरूरी हे।
बीएसपी-आगजनी
दुरूग जिला के भिलाई इस्पात संयंत्र के ब्लास्ट फर्नेस आठ म पाछू रतिहा आगी लग गे। ए हादसा म कोनो कीसम के जनहानि नइ होय हे। खबर के मुताबिक ब्लास्ट फर्नेस म वेस्ट कैचर के औचक फटे ले आगी लगिस। घटना के सूचना मिलतेच दमकल विभाग के टीम मउका म पहुंचिस अउ दू घंटा के मसक्कत के बाद आगी म काबू पाय गीस। आगी लगे ले उत्पादन म असर पड़े हे। आगी लगे के कारण अभी तक पता नइ चल पाय हे। बीएसपी प्रबंधन ह जांच के आदेस दे देहे।
माओवादी-मुठभेड़
कोंडागांव जिला म पाछू रतिहा सुरक्षाबल अउ माओवादी मनके बीच मुठभेड़ होय के खबर हे। ए घटना म गांव के एक मनखे घायल हो गेहे, जउन ल बहेरम के अस्पताल म भर्ती कराय गेहे। घटना के जघा के तलासी के दउरान जवान मन ह माओवादी साहित्य, वर्दी अउ दू घर मार बंदूक बरामद करे हे। डीएसपी सतीश भार्गव ह बतइन कि केसकाल थाना क्षेत्र के गांव नालाझार के जंगल म माओवादी मनके इकट्ठा होय के सूचना म पुलिस जवान सर्चिंग म निकले रिहीन। इही दउरान जंगल म पहिली ले घात लगाय बइठे माओवादी मन ह जवान मन उपर फायरिंग सुरू कर दीन। जवान मन कोति ले करे गे जवाबी कार्रवाई के बाद माओवादी जंगल के आड़ लेके भाग गे।
जन्माष्टमी
भगवान श्रीकृष्ण के जन्मोत्सव के परब जन्माष्टमी आज छत्तीसगढ़ समेत देसभर म भक्तिभाव संग मनाय जात हे। ए मउका म प्रदेस के कृष्ण मंदिर मन म तियारी करे गेहे। मंदिर अउ घरोघर आज रतिहा भगवान श्रीकृष्ण के बिसेस पूजा-पाठ करत जन्मोत्सव मनाय जाही। भगवान श्रीकृष्ण ल माखन मिश्री, पंजरी अउ आने कतकोन जिनिस के भोग लगही।
इही बीच, राजधानी रईपुर म कृष्ण मंदिर मन म सुघ्घर साज-सजावट करे गेहे। श्रीकृष्ण के बाल-गोपाल रूप के सिंगार करके बिसेस पोषाक पहनाय गेहे। राजधानी म टाटीबंध के इस्कॉन मंदिर, समता कालोनी के राधाकृष्ण मंदिर, सदर बाजार के गोकुल चंद्रमा मंदिर अउ दूधाधारी मठ म बिहनियच ले भक्त मनके भीड़ लगे हे। राष्ट्रपति द्रौपदी मुर्मु, प्रधानमंत्री नरेंद्र मोदी अउ छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल जन्माष्टमी के सुभकामना दीन हे।
पुलिस जवान-आत्महत्या
बालोद जिला के दल्लीराजहरा थाना म पदस्थ एएसआई हिरामन मंडावी ह आज पुलिस स्टाफ बैरक म फांसी लगाके आत्महत्या कर लीस। घटना के सूचना मिलतेच थाना म मौजूद पुलिस कर्मचारी मन ह तुरते अस्पताल ले गीन, िंजंहा डॉक्टर ह मृत घोसित कर दीस। पुलिस मामला के जांच करत हे।