राष्ट्र आज उनयासीवां स्वाधीनता दिवस मनावत हे। प्रधानमंत्री नरेंद्र मोदी ह दिल्ली म ऐतिहासिक लालकिला म राष्ट्रीय झंडा फहरा के समारोह के अगुवई करीन। लालकिला के प्राचीर ले राष्ट्र ल संबोधित करत प्रधानमंत्री ह ऑपरेसन सिंदूर के जांबाज सैनिक मन ल नमन करीन। ओमन किहीन कि ऑपरेसन सिंदूर ह देस के सशस्त्र बल मनके साहस अ सौर्य के सशक्त साक्षी हरय। प्रधानमंत्री ह किहीन कि सरकार ह सशस्त्र बल मन ल रणनीति तियार करे बर लक्ष्य अउ बेरा तय करे के खुल्ला छूट दीस जेखर ले हमर सेना ह ओकर दिखाइस, जउन कई दसक तक कभू नइ होय रिहीस। सैंकड़ो किलोमीटर तक दूश्मन के भुईया म जाके ओखर आतंकी हेडक्वाटर्स ल माटी म मिलाइस।
प्रधानमंत्री ह किहीन कि भारत ह अब फइसला कर लेहे, कि लहू अउ पानी संगे नइ बोहाही। ओमन किहीन कि देस के रहवइया मन अब जान लेहे कि सिंधूजल समझौता उचित नइ रिहीस फेर अब परमाणु हमला के धमकी ल थोरकहू बर्दास्त नइ करही। कारीकरम म बोलत प्रधानमंत्री ह किहीन कि भारत ह दूश्मन मन ल करारा जवाब देबर सशक्त हथियार प्रणाली सुदर्शन चक्र मिसन सुरू करही।
स्वतंत्रता दिवस-प्रधानमंत्री
श्रीमोदी ह एक लाख करोड़ रूपिया ले मुख्य रोजगार योजना सुरू करे के घोसना करीन। प्रधानमंत्री विकसित भारत रोजगार योजना आज 15 अगस्त ले लागू होवत हे, जउन ह सब झिन बर खुसखबरी हरय। एखर चलत प्राइवेट क्षेत्र म पहिली नौकरी पवइया जवान लइका ल बेटा-बेटी ल पंद्रह हजार रूपिया सरकार के तरफ ले दे जाही। कंपनी मन घलो जउन ह नवा रोजगार देके मउका जादा देही ओला घलो प्रोत्साहन रासि दे जाही।
प्रधानमंत्री ह किहीन कि अवइया देवारी तक नेक्स्ट जनरेसन जीएसटी सुधार सुरू करे जाही। जेखर ले सामान्य मनखे, किसान अउ मध्यम वर्ग ल राहत मिलही अउ आर्थिक गतिविधि म तेजी आही।
प्रधानमंत्री ह नेक्स्ट जनरेसन सुधार ल लागू करे बर टास्क फोर्स बनाय के घोसना करीन। अइसने, श्री मोदी ह समुद्री संसाधन मन ल बउरे बर गहरा पानी म खोजे के उद्देस्य ले राष्ट्रीय मिसन बनाइन अउ ए बछर के आखिरी तक मेड इन इंडिया सेमी कंडक्टर चिप्स सुरू करे के घलो घोसना करीन।
प्रधानमंत्री संबोधन-बस्तर
प्रधानमंत्री नरेंद्र मोदी ह लालकिला के प्राचीर ले अपन संबोधन म बस्तर के बिसेस रूप ले उल्लेख करीन। ओमन किहीन कि एक समय म बस्तर के नांव लेवत नक्सलवाद अउ मारकाट के सुरता आवय। फेर आज तस्वीर ह पूरा तरह ले बदल गे। अब बस्तर के जवान लइका मन बंदूक के जघा खेलकूद म आगू बाढ़त हे। बस्तर ओलंपिक असन आयोजन ह, उंहा के जवान लइका मनके उर्जा, प्रतिभा अउ उछाह के चिन्हारी बन गेहे। प्रधानमंत्री ह ए बदलाव ल सुरक्षा विकास अउ लोगन मनके सहभागिता के परिणाम बतइन।
स्वतंत्रता दिवस-मुख्यमंत्री
छत्तीसगढ़ म घलो स्वतंत्रता दिवस ह देसभक्ति अउ उल्लास के संग मनाय जात हे। मुख्य समारोह ह राजधानी रईपुर के पुलिस परेड ग्राउंड म होइ, जिहां मुख्यमंत्री विष्णुदेव साय ह तिरंगा झंडा फहरा के परेड के सलामी लीन। ए मउका म बोलत मुख्यमंत्री ह प्रदेसवासी मन ले आत्मनिर्भर भारत अउ आत्मनिर्भर छत्तीसगढ़ बनाय के आह्वान करीन। ओमन रईपुर म पुलिस कमिश्नर प्रणाली लागू करे के घलो घोसना करीन। संगे छत्तीसगढ़ स्थापना के पच्चीसवां बछर के उपलक्ष्य म छत्तीसगढ़ रजत महोत्सव के सुभारंभ करीन। श्री साय ह बस्तर अउ सरगुजा संभाग म मुख्यमंत्री ग्रामीण बस सेवा योजना सुरू करे के घलो घोसना करीन। ओमन किहीन कि दूनों संभाग म स्थानीय मनखे ही ए बस के संचालन करही। एखर ले गंवई के मनखे मन ले आवाजाही आसान होय ले उंखर रोजमर्रा के हलाकानी दूरियाही।
मुख्यमंत्री ह प्रदेसवासी मनले विकसित भारत अउ विकसित छत्तीसगढ़ बने म सहभागी बनके आरो दीन। श्री साय ह प्रदेस के रहवइया मन ल स्वदेसी जिनिस ल अपनाय के अपील करत किहीन कि प्रधानमंत्री नरेंद्र मोदी ह स्वदेसी ल जनआंदोलन के रूप देहे।
मुख्यमंत्री ह किहीन कि राष्ट्रीय राजधानी क्षेत्र के तर्ज म राज्य राजधानी क्षेत्र के विकास बर प्राधिकरण गठन के निर्णय ले गेहे। ओमन किहीन कि नगरीय निकाय मनके रूप रंग संवारे बर राज्य म मुख्यमंत्री नगर उत्थान योजना सुरू करे गेहे।
स्वतंत्रता दिवस- छत्तीसगढ़
राज्यपाल रमेन डेका ह राजभवन म राष्ट्रीय झंडा फहराके परेड के सलामी लीन। संगे ओमन परेड के निरीक्षण घलो करीन। ए मउका म राज्यपाल ह राजभवन सचिवालय के अधिकारी अउ कर्मचारी मन ल स्वतंत्रता दिवस के बधई अउ सुभकामना दीन।
विधानसभा अध्यक्ष डॉक्टर रमन सिंह ह राजनांदगांव म राष्ट्रीय झंडा फहरा के परेड के सलामी लीन। उहें, केंद्रीय राज्य मंत्री तोखन साहू ह बस्तर उपमुख्यमंत्री अरूण साव ह बिलासपुर, अउ विजय शर्मा ह दुरूग म होय मुख्य समारोह म ध्वजारोहण करीन।
अइसने, मंत्री रामविचार नेताम ह सरगुजा, दयालदास बघेल ह गरियाबंद, केदार कश्यप ह बालोद, लखन लाल देवांगन ह कोरबा, श्याम बिहारी जायसवाल ह जशपुर, ओपी चौधरी ह रायगढ़, लक्ष्मीराजवाड़े ह सूरजपुर अउ टंकराम वर्मा ह जांजगीर-चांपा म ध्वजारोहण करे बाद परेड के सलामी लीन। आने जिला मन म सांसद अउ विधायक मन ध्वजारोहण करीन अउ मुख्यमंत्री के संदेस ल सुनाइन।
पुलिसकर्मी-सम्मान
स्वतंत्रता दिवस के मउका म पुलिस, फायर ब्रिगेड, होमगार्ड अउ नागरिक सुरक्षा अउ सुधार सेवा बर एक हजार नब्बे झिन कर्मी मन ल वीरता अउ सेवा पदक ले सम्मानित करे गीस। गृह मंत्रालय के मुताबिक दू सौ तैंतीस झिन कर्मी मन ल वीरता पदक निनान्वे झिन मन ल विसिष्ट सेवा बर राष्ट्रपति पदक अउ सात सौ अंठावन झिन कर्मी मन ल सराहनीय सेवा पदक ले सम्मानित करे गीस।
सम्मान पवइया मन म छत्तीसगढ़ के घलो पचीस झिन पुलिस अधिकारी सामिल हे।
मुख्यमंत्री-चित्र प्रदर्शनी
मुख्यमंत्री विष्णुदेव साय ह आज राजधानी रईपुर के ऐतिहासिक टाउन हॉल म छत्तीसगढ़ के स्वतंत्रता संग्राम सेनानी मनके जीवन उपर आधारित छायाचित्र प्रदर्सनी के उद्घाटन करीन। ए मउका म श्री साय ह किहीन कि महापुरूष मनके जीवन वाले ए प्रदर्सनी ह जवान लइका बिसेस रूप ले स्कूली पढ़इया लइका मन बर बड़ उपयोगी हे। जनसंपर्क विभाग डहार ले राखे गे ए प्रदर्सनी ह अवइया इक्काइस अगस्त तक रोजिना बिहनिया साढ़े दस बजे ले रतिहा आठ बजे तक लोगन मन बर खुले रइही।
दुर्घटना-मौत
राजनांदगांव जिला के बार्डर म आज बिहनिया एक ठिन रोड एक्सीडेंट म छै झिन जवान लइका के मौत होगे। मउत होय चार झिन जवान लइका इंदौर के अउ एक झिन ओडिसा के रहवइया रिहीस, फेर एक झिन आने लइका के सिनाख्ती नइ होय पाय हे।
एडिसनल एसपी राहुलदेव ह बतइन कि आज भिनसरहे बागनदी थाना जघा के चिरचारी तीर नागपुर ले रईपुर सोज आवत एक ठिन तेज रफ्तार कार ह अंतेतंते होके डिवाइडर ले टकराय बाद ट्रक म झपा गे। जेखर ले ए एक्सीडेंट म छै झिन जवान लइका के मउकाच म मउत हो गे। उहें, एक झिन गंभीर रूप ले घायल जवान लइका ल अस्पताल म भर्ती कराय गेहे। पुलिस ह सबो झिन के लास ल पोस्टमार्टम बर पठो देहे। फेर मामला के जांच चलत हे। पुलिस ह आसंका जताय हे कि ड्राइवर ल झपकी आय के सेति एक एक्सीडेंट होय हे।
मौसम विभाग ह चेतावनी दे हे कि अवइया अड़तालीस घंटा के दौरान बस्तर दुरूग अउ रईपुर संभाग के एक-दू जघा म जोरदरहा पानी गिर सकत हे।
उहें, कतकोन जघा म थोरकुन ले जादा बरसा हो सकत हे।