देस काली उनयासीवां स्वतंत्रता दिवस मनाही। प्रधानमंत्री नरेन्द्र मोदी ह नई दिल्ली म लाल किला के प्राचीर ले झंडा फहराही अउ राष्ट्र ल संबोधित करही। बछर दू हजार सैंतालीस तक विकसित भारत के सरकार के दृष्टिकोण के मुताबिक एसो पन्द्रह अगस्त समारोह के बिसय नवा भारत हवय।
प्रदेस म घलो पन्द्रह अगस्त के तैयारी पूरा होगे हे। मुख्य समारोह रईपुर के पुलिस परेड ग्राउंड म होही, जिहां मुख्यमंत्री विष्णुदेव साय ह झंडा फहरा के परेड के सलामी लीहीं। त उहें, विधानसभा अध्यक्ष डॉक्टर रमन सिंह राजनांदगांव, केन्द्रीय राज्यमंत्री तोखन साहू ह बस्तर, उपमुख्यमंत्री अरूण साव ह बिलासपुर अउ विजय शर्मा ह दुरूग म मुख्य समारोह म झंडा फहराही।
अइसने, मंत्री रामविचार नेताम ह सरगुजा, दयालदास बघेल ह गरियाबंद, केदार कश्यप ह बालोद, लखनलाल देवांगन कोरबा, श्यामबिहारी जायसवाल ह जशपुर, ओपी चौधरी ह रायगढ़, लक्ष्मी राजवाड़े सूरजपुर अउ टंकराम वर्मा ह जांजगीर-चांपा म काली पन्द्रह अगस्त के झंडा फहराही। आने जिला मन म घलो सांसद अउ विधायक मन ह झंडा फहरा के परेड के सलामी लीही।
राज्यपाल रमेन डेका अउ मुख्यमंत्री विष्णुदेव साय ह स्वतंत्रता दिवस के मउका म प्रदेस के लोगन मनके संगेसंग वीर सैनिक अउ स्वतंत्रता संग्राम सेनानी मन ल सुभकामना दे हवय।
स्वतंत्रता दिवस के मउका म विधानसभा भवन ल काली आम लोगन मन बर बिहनिया दस बजे ले संझा पांज बजे तक खुल्ला राखे जाही।
उहें, रायपुर स्थित मंडल रेल प्रबंधक कार्यालय म घलो स्वतंत्रता दिवस उछाह के संग मनाय जाही। ए मउका म मुख्य अतिथि मंडल रेल प्रबंधक दयानंद ह झंडा फहराही।
राष्ट्रपति-संबोधन
राष्ट्रपति द्रौपदी मुर्मु ह उनयासीवां स्वतंत्रता दिवस के पूर्व संध्या म आज राष्ट्र ल संबोधित करही। ए संबोधन अब ले थोरिक देर बाद आकाशवाणी के जम्मों राष्ट्रीय नेटवर्क म प्रसारित होही। संगेसंग दूरदर्शन के जम्मों चैनल म हिन्दी अउ अंग्रेजी म प्रसारित होही, जेखर बाद दूरदर्शन के क्षेत्रीय चैनल डहार ले क्षेत्रीय भासा म घलो एखर प्रसारण करे जाही। आकाशवाणी अपन जुड़े क्षेत्रीय नेटवर्क म रात साढ़े नौ बजे क्षेत्रीय भासा म एखर प्रसारण करही।
पुलिसकर्मी-पदक
स्वतंत्रता दिवस के मउका म पुलिस, अग्निशमन, होमगार्ड, नागरिक सुरक्षा अउ सेवा मनके कुल एक हजार नब्बे कर्मी मन ल वीरता अउ सेवा पदक ले सम्मानित करे जाही। केन्द्रीय गृह मंत्रालय ह किहीन हे कि दू सौ तैंतीस कर्मी मन ल वीरता पदक, निन्यानवे कर्मी मन ल विशिष्ट सेवा बर राष्ट्रपति पदक अउ सात सौ अंठावन कर्मी मन ल सराहनीय सेवा बर पदक ले सम्मानित करे जाही।
जेमा छत्तीसगढ़ के घलो पच्चीस झिन पुलिस अधिकारी सामिल हे। गृह मंत्रालय डहार ले छत्तीसगढ़ के चौदह पुलिसकर्मी मनके नाव वीरता पदक बर घोषित करे गेहे। एमा पुलिस अधीक्षक सुनील शर्मा, उप निरीक्षक संदीप कुमार मडिले अउ आरक्षक मदकम पांडु, मदकम हड़मा, मदकम देव, बरसे हुंगा के संगेसंग रोशन गुप्ता अउ आने पुलिसकर्मी सामिल हे। उहें, तीन झिन पुलिसकर्मी स्वर्गीय रामुराम नाग, स्वर्गीय कुंजाम जोगा अउ स्वर्गीय वंजाम भीमा ल मरणोपरांत सम्मानित करे जाही। वीरता पदक बर आरक्षक सूरज कुमार मरकार, माड़वी सन्नू अउ पुरूषोत्तम देवांगन के संगेसंग कंपनी कमांडर करोद सिंह के नाव घलो सामिल हे।
विशिष्ट सेवा बर राष्ट्रपति पदक ले छत्तीसगढ़ के निदेशक हिमांशु गुप्ता ल सम्मानित करे जाही।
उहें, सराहनीय सेवा बर छत्तीसगढ़ के दस पुलिसकर्मी के नाव के घोसना घलो करे गेहे, जेमा पुलिस महानिरीक्षक धु्रव गुप्ता, पुलिस अधीक्षक प्रशांत कुमार ठाकुर, कमांडेंट श्वेता राजमणि, पुलिस अधीक्षक रवि कुमार कुर्रे, निरीक्षक कौशल्य भट्ट, सहायक पुलिस महानिरीक्षक रोहित कुमार झा, निरीक्षक कमलेश कुमार मिश्रा, प्लाटून कमांडर दल सिंह नामदेव, कंपनी कमांडर दिलीप कुमार साहू अउ सहायक उप निरीक्षक सुशील कुमार बरूआ सामिल हे।
स्वतंत्रता दौड़
स्वतंत्रता दिवस के मउका म आज प्रदेस के कतकोन जिला मन म स्वतंत्रता दउड़ राखे गीस। मुख्यमंत्री विष्णुदेव साय ह रईपुर के मरीन ड्राईव म राखे गे स्वतंत्रता दउड़ म सामिल होइन। कार्यक्रम ल संबोधित करत श्री साय ह किहीन कि स्वतंत्रता दउड़ अउ तिरंगा यात्रा सिरिफ एक ठिन आयोजन नइ हरय, भलूक हमर एकता, अखंडता अउ राष्ट्रीय गौरव के जीवंत प्रतीक हरय। ए मउका म खेल अउ युवा कल्याण मंत्री टंकराम वर्मा घलो सामिल होइन।
हर घर तिरंगा
प्रदेस के संगेसंग पूरा देस म ए बेरा हर घर तिरंगा अभियान चलाय जात हे। एखर संगेसंग प्रदेस म तिरंगा यात्रा घलो निकाले जात हे।
रईपुर के शहीद स्मारक भवन ले काली तिरंगा यात्रा निकाले गीस, जेमा मुख्यमंत्री सामिल होइन। ए यात्रा के सहर म जघा-जघा स्वागत करे गीस। ए मउका म मुख्यमंत्री ह किहीन कि ए तिरंगा बर हमर देस के लाखों लोगन मन अपन बलिदान देहे। अइसन लोगन मनके सुरता म तिरंगा यात्रा निकाले जात हे।
ओति, वित्त मंत्री ओ.पी. चौधरी ह आज रईपुर स्थित अपन घर म तिरंगा फहरा के आजादी के अमृत महोत्सव म सहभागिता निभईन। ए मउका म ओमन किहीन कि ए अभियान हमर राष्ट्रीय एकता, गौरव अउ देशभक्ति के चिन्हा हरय।
उहें, राजस्व मंत्री टंकराम वर्मा ह बलौदाबाजार जिला मुख्यालय म राखे गे तिरंगा यात्रा म सामिल होइन। ए यात्रा अंबेडकर चउक ले सुरू होके कतकोन रद्दा ले होवत अटल चउक पहुंचीन।
हर घर तिरंगा अभियान म मुंगेली जिला के धरमपुरा स्थित शासकीय उच्चतर माध्यमिक विद्यालय के लइका मन डहार ले तिरंगा रैली निकाले गीस।
त उहें, बिलासपुर रेलमंडल डहार ले तिरंगा रैली अउ बाइक रैली के आयोजन करे गीस। मंडल कार्मिक अधिकारी रूहीना तुफैल खान ह ए रैली ल हरा झंडा दिखईन।
जवान घायल/माओवादी स्मारक ध्वस्त
मोहला-मानुपर जिला के मदनवाड़ा इलाका म काली संझा होय मुठभेड़ म दू झिन इनामी माओवादी मारे गेहे। एमा ले एक माओवादी के पहिचान जोनल कमेटी सदस्य विजय रेड्डी के रूप म होय हे। एखर उपर कुल नब्बे लाख रूपिया के इनाम घोसित रिहीस। उहें, मुठभेड़ म मारे गे दूसर माओवादी डिवीजनल कमेटी सचिव लोकेश सलामे रिहीस। एखर उपर छब्बीस लाख रूपिया के इनाम घोषित रिहीस। जिला के पुलिस अधीक्षक यशपाल सिंह ह बतईन किए मुठभेड़ कारेकट्टा अउ रेते गांव के बीच बंडा पहाड़ म होइस। इहां पुलिस द्वारा संयुक्त तलाशी अभियान चलाय जात रिहीस, तभे ए मुठभेड़ होइस। मुठभेड़ के बाद घटनास्थल के तलाशी के बाद दूनों माओवादी के सव के संगेसंग मउका ले दू ठिन रायफल अउ आने-आने सामान मिले हे।
ओति, बीजापुर जिला म आज माओवादी मन डहार ले लगाए गे आईईडी के चपेट म आय डिस्ट्रिक्ट रिजर्व गार्ड-डीआरजी के एक झिन जवान घायल होगे। हमर संवाददाता ले मिले जानबा के मुताबिक डीआरजी के टीम ह इंद्रावती जघा म माओवादी विरोधी अभियान म निकले रिहीन। इही दउरान आईईडी विस्फोट होगे। घायल जवान के हालत खतरा ले बाहिर बताय जात हे।
इही जिला के पामेड़ थाना क्षेत्र के उड़तामल्ला के जंगल म माओवादी मन डहार ले बनाय गे एक ठिन स्मारक ल सुरक्षा बल मन ह गिरा दीन।
उहें, जिला पुलिस बल अउ केन्द्रीय रिजर्व पुलिस बल-सीआरपीएफ के संयुक्त टीम ह कोमटपल्ली के जंगल ले माओवादी मन डहार ले बड़का पथरा के बीच लुका के राखे गे भरमार बंदूक, बीजीएल राउंड अउ राड, बीजीएल पार्ट्स के संगेसंग बड़ मात्रा म माओवादी जिनीस बरामद करे हे।
शीघ्रलेखन/मुद्रलेखन-परीक्षा
शीघ्रलेखन अउ मुद्रलेखन कम्प्यूटर कौशल परीक्षा परिषद ह हिन्दी अउ अंग्रेजी शीघ्रलेखन परीक्षा के तारीख जारी कर देहे। तेईस अगस्त के अंग्रेजी शीघ्रलेखन सौ शब्द प्रति मिनट के गति के परीक्षा रायपुर संभाग म चुने गे परीक्षा केन्द्र म होही। त उहें, चौबीस अगस्त के हिन्दी शीघ्रलेखन सौ शब्द प्रति मिनट गति के परीक्षा रईपुर, दुरूग, बिलासपुर अउ बस्तर संभाग के चुने गे चार ठिन परीक्षा केन्द्र म ले जाही।
हलषष्ठी
संतान के लंबा उमर के कामना ले जुड़े हलषष्ठी माने कमरछठ के परब आज प्रदेस म विधि-विधान के संग मनाय जात हे। ए मउका म माता मन ह उपास राखथे अउ माटी के छोटे से कुंड माने सगरी बनाके पूजापाठ करथे। पूजा के जिनीस के रूप म महुआ, लाई अउ पसहर चाउर चढ़ाथे अउ हलषष्ठी के कथा सुनथे।