यूरिया/डीएपी खाद-मंजूरी
केन्द्र सरकार ह छत्तीसगढ़ ल यूरिया अउ डीएपी खातू के पचास-पचास हजार मीटरिक टन अतिरिक्त आवंटन ल मंजूरी दे देहे। काली नई दिल्ली म कृषि मंत्री रामविचार नेताम के अगुवई म छत्तीसगढ़ के सांसद मन ह केन्द्रीय रसायन अउ उर्वरक मंत्री जगत प्रकाश नड्डा ले भेंट करके यूरिया अउ डीएपी खातू के आपूर्ति के संबंध म गोठबात करीन। ओमन केन्द्रीय मंत्री ले राज्य के किसान मन ल खरीफ सीजन म रोपा, बियासी के बेरा खातू के जरूरत के जानकारी देवत खरीफ मौसम बर छत्तीसगढ़ ल अलग ले पचास-पचास हजार टन यूरिया अउ डीएपी खातू आवंटित करे के आग्रह करीन। एमा केन्द्रीय मंत्री श्री नड्डा ह प्रदेस के किसान मन बर खातू के अतिरिक्त आवंटन खातिर मंजूरी दीन।
हर घर तिरंगा
छत्तीसगढ़ सहित देसभर म दू ले पन्द्रह अगस्त तक हर घर तिरंगा अभियान चलाय जात हे। मुख्यमंत्री विष्णदेव साय ह लोगन ले ए अभियान ले जुड़े के अपील करीन हे।
हर घर तिरंगा अभियान म उपमुख्यमंत्री विजय शर्मा ह आज रईपुर म अपन निवास म तिरंगा लगाके ए अभियान बर अपन सहभागिता निभईन। ओमन प्रदेस के लोगन ले आह्वान करीन कि हर घर तिरंगा अभियान ले जुड़के अपन-अपन घर म तिरंगा लगावय। संगेसंग तिरंगा संग अपन फोटो लेके हैशटैग हर घर तिरंगा अभियान के हिस्सा बनय अउ एला हर घर तिरंगा डॉट कॉम म साझा करय।
उहें, सीमा सुरक्षा बल-बीएसएफ कोति ले इस्पात नगरी भिलाई म तिरंगा यात्रा निकाले गीस। पांच किलोमीटर लंबा ए तिरंगा रैली म बड़ संख्या म स्कूल के लइका मन ह भाग लीन।
बालोद जिला के बघमरा गांव म स्व-सहायता समूह के माईलोगिन स्वतंत्रता दिवस बर दिन-रात तिरंगा झंडा बनावत हे। चार समूह के करीबन बीस झिन माईलोगिन मन अब तक करीबन छह हजार तिरंगा बना डरे हे, जेखर ले ओमन ल करीबन दू लाख रूपिया के आमदनी होय हे। स्व-सहायता समूह के सदस्य सरिता साहू ह बतईन कि ओमन ल तिरंगा बनाय म गरब होवत हे।
होल्ड बाईट – सरिता साहू ( 15 सेकेंड)
ए पहल ले ये माईलोगिन मन आर्थिक रूप ले मजबूत होय हे। उहें, अपन क्षेत्र म राष्ट्र प्रेम के भावना ल बढ़ावा देवत हे।
खिलेश्वरी देवांगन-स्वतंत्रता दिवस
नई दिल्ली म होवइया स्वतंत्रता दिवस समारोह म छत्तीसगढ़ के बालोद जिला के गब्दी गांव के लखपति दीदी खिलेश्वरी देवांगन विशेष अतिथि के रूप म सामिल होही। खिलेश्वरी देवांगन ह दीनदयाल अंत्योदय योजना अउ राष्ट्रीय ग्रामीण आजीविका मिशन-बिहान म बनाय गे जय संतोषी स्व-सहायता समूह के सदस्य हरय। ओमन बिहान योजना म मुर्गीपालन अउ किराना दुकान सुरू करीन अउ लाखों रूपिया कमा के लखपति दीदी बनीन। कभू घर तक रहवइया खिलेश्वरी अपन इच्छा शक्ति अउ बिहान योजना ले लखपति दीदी के रूप म पहिचान बन गेहे अउ ओ क्षेत्र के आने माईलोगिन मन बर अगुवई के काम करत हे। खिलेश्वरी आने माईलोगिन मन ल वित्तीय साक्षरता घलो देवत हे। स्वतंत्रता दिवस समारोह म विशेष अतिथि के रूप म संघरे ले खिलेश्वरी ह प्रधानमंत्री नरेन्द्र मोदी के आभार जतईन हे।
राष्ट्रपति भवन कार्यक्रम-अस्मी खरे
स्वतंत्रता दिवस के मउका म राष्ट्रपति भवन म होवइया कार्यक्रम म एसो कुछेक गणमान्य लोगन संग आने-आने सरकारी योजना के लाभार्थी समेत सामान्य नागरिक मन ल बलाय गेहे। एमा छत्तीसगढ़ के दुरूग जिला के भिलई के अस्मी खरे सामिल हे। ए ह भिलाई इंस्टीट्यूट ऑफ टेक्नोलॉजी म अंतिम बछर के छात्रा हवय। ओमन दिसंबर दू हजार चौबीस म अपन टीम कोडिंग विजार्ड संग एनआईटी श्रीनगर म स्मार्ट इंडिया हैकाथॉन म जीते रिहीन। अस्सी खरे ह राष्ट्रपति भवन म होवइया कार्यक्रम म सामिल होय बर नेवता मिले म उछाह के संग राष्ट्रपति द्रौपदी मुर्मू के आभार जतईन हे।
वक्फ बोर्ड-निर्देश
राज्य वक्फ बोर्ड ह स्वतंत्रता दिवस के मउका म सबो मस्जिद, मदरसा अउ दरगाह म राष्ट्रीय ध्वज फहराय के आग्रह करीन हे। छत्तीसगढ़ राज्य वक्फ बोर्ड के अध्यक्ष डॉक्टर सलीम राज ह आकाशवाणी समाचार ले गोठबात म किहीन कि तिरंगा हमर मान-सम्मान अउ अभिमान के प्रतीक हरय।
खबर के मुताबिक राज्य वक्फ बोर्ड कार्यालय कोति ले जारी पत्र म केहे गेहे कि स्वतंत्रता दिवस एक पवित्र मउका हे अउ एला सबो धार्मिक स्थल म राष्ट्रीय ध्वज फहरा के मनाना चाही। बोर्ड ह ए दिन ल देसभक्ति, एकता अउ भाईचारा के प्रतीक बनाय म जोर दीन हे।
भाजपा-प्रदेश पदाधिकारी नियुक्ति
भारतीय जनता पार्टी के प्रदेस अध्यक्ष किरण सिंह देव ह प्रदेश पदाधिकारी मनके नियुक्ति करीन हे। एमा जगन्नाथ पाणिग्रही, रामजी भारती, रूपकुमारी चौधरी, रंजना साहू, प्रबल प्रताप सिंह जूदेव, नंदनलाल जैन, जी. वेंकटेश्वर अउ सतीश लाटिया ल प्रदेश अध्यक्ष बनाय गीस। उहें, यशवंत जैन, अखिलेश सोनी अउ नवीन मारकंडे ल प्रदेस महामंत्री बनाय गीस।
प्रदेस मंत्री के रूप म संध्या परगनिया, शिवनाथ यादव, जंयती पटेल, अमित साहू, जितेन्द्र कुमार वर्मा, हर्षिता पांडेय, विद्या सिदार, ऋतु चौरसिया ल नियुक्त करे गेहे। प्रदेश कोषाध्यक्ष के जिम्मेवारी राम गर्ग ल सौंपे गीस। कार्यालय प्रभारी अशोक बजाज अउ सह प्रभारी प्रीतेश गांधी ल बनाय गेहे। उहें, सांसद संतोष पांडे ल पार्टी के मुख्य प्रवक्ता बनाय गीस।
केन्द्रीय श्रम मंत्री-मुलाकात
श्रम मंत्री लखनलाल देवांगन ह काली नई दिल्ली म केन्द्रीय श्रम मंत्री मनसुख मांडविया ले भेंट करीन। ए दउरान श्री देवांगन ह श्री मांडविया ल छत्तीसगढ़ म कर्मचारी राज्य बीमा निगम-ईएसआईसी के नर्सिंग कॉलेज के स्थापना बर अनुरोध पत्र सौंपीन। ओमन बतईन कि प्रदेस म नर्सिंग कॉलेज होय ले श्रमिक मन ल बने चिकित्सा सुभीता मिल सकही। उहें, बीमा होय श्रमिक के लइका मन ल आरक्षित सीट म दाखिला घलो मिल सकही। भेंट के दउरान श्री देवांगन ह कोरबा के ईएसआईसी अस्पताल म खाली पद म भर्ती बर मंजूरी देके मांग करीन। ओमन डॉक्टर अउ आने स्टाफ के भर्ती के काम ल जल्दी पूरा करे अनुरोध करीन।
जल, जंगल-यात्रा
लइका मन ल प्रकृति ले जोड़े पर्यावरण जिम्मेवारी बर जागरूक करे अउ वन विभाग के योजना ल बताय बर बलौदाबाजार वनमंडल के अर्जुनी वन परिक्षेत्र म जल, जंगल यात्रा कार्यक्रम राखे गीस। ए कार्यक्रम सोनाखान के स्वामी आत्मानंद अंग्रेजी माध्यम स्कूल के पढ़ईया लइका मन बर राखे गीस, जेमा लइका मन उछाह के संग भाग लीन।
वन मंडल अधिकारी ह किहीन कि जल-जंगल यात्रा सिरिफ एक भ्रमण नो हे, भलूक प्रकृति ले जुड़े अउ ओला समझे के काम हे। ओमन किहीन कि ए जागरूकता यात्रा म लइका मन ल वन के महत्व, लघु वनोपज, औषधीय पौधा के उपयोगिता अउ जल संरक्षण के संबंध म जानकारी दे गीस।
अन्न-खरीद सुधार-कार्यशाला
केन्द्रीय खाद्य अउ सार्वजनिक वितरण विभाग कोति ले रईपुर म राज्य स्तरीय अन्न-खरीद सुधार कार्यशाला राखे गीस। एखर अगुवई भारतीय खाद्य निगम के अध्यक्ष अउ प्रबंधक निदेशक आशुतोष अग्निहोत्री ह करीन। ए कार्यशाला के उद्देश्य प्रमुख अन्न-खरीद करइया राज्य मन म अन्न-खरीद कामकाज म साफगोई अउ डिजिटल एकीकरण ल मजबूत करना हे।
एनआईटी-नशा मुक्त भारत अभियान
राष्ट्रीय प्रौद्योगिकी संस्थान-एनआईटी रायपुर के एनसीसी क्लब कोति ले नशामुक्त भारत अभियान के पांचवां वर्षगांठ म जागरूकता सत्र राखे गीस। ए सत्र म ब्रम्हाकुमारी सौम्या जी अउ निशा जी अ आत्म-सशक्तिकरण, अनुशासन अउ सकारात्मक जीवन के महत्ता म व्याख्यान दीन। ओमन नशामुक्त भारत बनाय बर सामूहिक प्रतिबद्धता के जरूरत म बल दीन।
ए कार्यक्रम के उद्देश्य विद्यार्थी, शिक्षक अउ कर्मचारी मन ल नशा ले होवइया हानिकारक प्रभाव बर जागरूक करना अउ स्वस्थ जीवनशैली ल बढ़ावा देना रिहीस।
अउ अब थोरकुन समाचार सार म –
– राज्यपाल रमेन डेका ह वनवासी विकास समिति छत्तीसगढ़ ल एंबुलेंस बर सात लाख तिरसठ हजार रूपिया के आर्थिक सहायता राशि दीन हे। एखर ले दूर-दराज के मरीज मन ल बेरा म चिकित्सा सुविधा मिलही।
अउ
– स्वतंत्रता दिवस के मउका म रईपुर के मरीन ड्राईव म केन्द्रीय रिजर्व पुलिस बल-सीआरपीएफ कोति ले विशेष बैंड के आयोजन करे जाही। ए कार्यक्रम म देशभक्ति गीत प्रस्तुत होही।