सहकार भारती के बुनकर प्रकोष्ठ के पहिली राष्ट्रीय अधिवेसन ल अवइया तेईस अउ चौबीस अगस्त के रईपुर म राखे जाही। आज रईपुर म एक ठन पत्रकार वार्ता म बोलत सहकार भारती के राष्ट्रीय अध्यक्ष डॉक्टर उदय जोशी ह बतइन हे कि दू दिवसीय अधिवेसन म एक हजार ले जादा सहकारी कुसल बुनकर प्रतिनिधि मन ह सामिल होही। ए कारीकरम के सुरूआत करे खातिर केंद्रीय गृहमंत्री अउ सहकारिता मंत्री अमित शाह, केंद्रीय कपड़ा मंत्री गिरिराज सिंह, मुख्यमंत्री विष्णुदेव साय, विधानसभा अध्यक्ष डॉक्टर रमन सिंह अउ सहकारिता मंत्री केदार कश्यप ल आमंत्रित करे गेहे। दू दिवसीय अधिवेसन म बुनकर मनके स्थिति अउ ओखर मुद्दा उपर गोठबात करे जाही।
आदि कर्मयोगी अभियान
मुख्य सचिव अमिताभ जैन ह आज रईपुर म आदि कर्मयोगी मन बर राज्य स्तरीय उन्मुखीकरण अउ जिला मास्टर ट्रेनर्स के चार दिवसीय प्रसिक्षण कारीकरम के सुभारंभ करीन। कारीकरम ल संबोधित करत श्री जैन ह किहीन कि ए अभियान के तहत प्रदेस के जनजातीय बहुल गांव मन म बुनियादी अधोसंरचना अउ सुविधा मन म जउन भी ‘क्रिटिकल गैप‘ बांचे हे, उंखर पहिचान करे जाही। संगेसंग स्थानीय प्रशासन के माध्यम ले ए कमी ल दूर करे बर ठोस कदम उठाय जाही। एखर ले हरेक गांव ल जादा ले जादा बुनियादी सुविधा मिलही। ओमन किहीन कि आदि कर्मयोगी, एक-एक झन आदिवासी परिवार ले मिलके उंखर जीवन सैली उंखर रोजी-रोटी, स्वास्थ्य, पोषण, सुरक्षित प्रसव अउ टीकाकरण जइसन बिसय म गोठबात करे जाही। उहें, प्रमुख सचिव सोनमणि बोरा ह किहीन कि आदि कर्मयोगी अभियान के तहत राज्य के अट्ठाइस ठन जिला के एक सौ अड़तीस ठन विकासखंड मन म करीबन एक लाख तैंतीस हजार वाल्टियर्स मन ल प्रसिक्षित करे के लक्ष्य राखे गेहे। ओमन बतइन कि ए अभियान के तहत गांव मन म आदि सेवक केंद्र बनाय जाही।
खबर के मुताबिक दू चरण म होवइया ए कारीकरम के पहिली चरण ल ग्यारा ले चौदह अगस्त अउ दूसरइया चरण ल अट्ठारा ले इक्काईस अगस्त तक चलाय जाही।
मुठभेड़-जवान घायल
बीजापुर जिला म आज सुरक्षाबल के टीम अउ माओवादी मनके बीच होय मुठभेड़ म डिस्ट्रिक्ट रिजर्व गार्ड- डीआरजी के दू झन जवान ह घायल हो गेहे। मिले खबर के मुताबिक माओवादी मनके मौजूदगी के सुचना मिले के बाद डीआरजी के टीम ह गंगालूर क्षेत्र म सर्चिंग करे बर निकले रिहीन। उही समय माओवादी मन ह फायरिंग सुरू कर दीन। जेमा दू झन जवान ह घायल होगे। घायल होय जवान के हालत ल खतरा ले बाहिर बताय जात हे।
अंतर्राष्ट्रीय युवा दिवस
आज अंतर्राष्ट्रीय युवा दिवस हरय। ए मउका म स्वास्थ्य मंत्री श्याम बिहारी जायसवाल ह राज्य म एचआईवी एड्स के प्रति जागरूक करे के उद्देस्य ले अपन निवास कार्यालय ले दू ठन एचआईवी एड्स जागरूकता गाड़ी ल हरियर झंडा देखाके रवाना करीन। ए अभियान के तहत राज्य के अइसन उन्नीस ठन जिला जिंहा एचआईवी के प्रति कम जागरूक हे, उंहा दू-दू ठन जागरूकता गाड़ी ल रवाना करे गेहे। ए जिला के जम्मों हाई स्कूल अउ हायर सेकेंडरी स्कूल मन म घलो एचआईवी ल लेके जागरूक करे के काम करे जाही।
ए मउका म स्वास्थ्य मंत्री ह किहीन कि एचआईवी के प्रति युवा मन ल जागरूक करे खातिर जम्मों जिला म कला जत्था के टीम डहार ले जागरूक करे के काम करे जाही। ओमन बतइन कि राज्य म एचआईवी संक्रमित मनखे मन बर आठ ठन एआरटी अउ पंद्रह ठन लिंक एआरटी केंद्र खोले गेहे, जेखर ले लोगन मन ल मुफत म इलाज के सुविधा दे जात हे।
निजी विद्यालय-लॉटरी
निसुल्क अउ बाल शिक्षा के अधिकार अधिनियम के तहत निजी विद्यालय मनके पच्चीस प्रतिसत सीट मन म भर्ती प्रक्रिया के तीसरइयां लॉटरी ल उन्नीस अगस्त के निकाले जाही। ए संबंध म लोक शिक्षण संचालनालय डहार ले आदेस जारी कर दे गेहे। एमा बताय गे हे कि दू चरण म निकाले गे लॉटरी के बाद घलो राज्य म करीबन एकसठ सौ सीट खाली हवय। जउन विद्यार्थी मनके चयन ह पहिलीच ले हो गेहे, उंखर नांव ल छोड़के बांचे आवेदक मन ल खाली सीट बर लॉटरी निकाले जाही। तीसरइया लॉटरी बर आवेदन जमा करे के जरूरत नइ हे।
हर घर तिरंगा
छत्तीसगढ़ के संगेसंग देसभर म दू अगस्त ले पंद्रह अगस्त तक हर घर तिरंगा अभियान चलाय जात हे। इही कड़ी म वन मंत्री केदार कश्यप ह कोंडागांव जिला के मर्दापाल म राखे गे तिरंगा बाईक रैली म सामिल हे। ए दउरान श्री कश्यप ह गांव वाले मन ल हर घर तिरंगा अभियान म भाग लेके अपील करीन। ए मउका म वन मंत्री ह जिला म छियानवे लाख रूपिया के लागत ले बनइया विकास काम के लोकार्पण अउ भूमिपूजन करीन।
भिलाई म सीमा सुरक्षा बल बीएसएफ के जवान मन डहार ले तिरंगा यात्रा निकाले गीस।
केंद्रीय संचार ब्यूरो-प्रदर्शनी
केंद्रीय संचार ब्यूरो डहार ले आज ले दुरूग म भारतीय स्वतंत्रता के वीरगाथा अउ विभाजन विभीषिका बिसय उपर तीन दिवसीय प्रदर्सनी के सुभारंभ करे गीस। ए मउका म छत्तीसगढ़ के स्वतंत्रता सेनानी मनके योगदान के संगेसंग बछर उन्नीस सौ सैंतालीस के भारत विभाजन ल फोटोग्राफ अउ प्रमाणिक दस्तावेज अउ फोटू के माध्यम ले देखाय गेहे। प्रदर्सनी म ठाकुर प्यारेलाल, वीरनारायण सिंह, रामदयालू िंसंह, ठाकुर नंदकुमार दानी, दुर्गा सिंह सिरमौर, शिवदास दादा, सरदार दिलीप सिंह, रामाधीन गोड़, धनीराम वर्मा, नारायण राव अंबिलकर अउ महंत लक्ष्मी नारायण के संगेसंग महान स्वतंत्रता सेनानी मनके जीवन अउ ओखर योगदान ल बिस्तार ले दर्साय गेहे। ए दउरान केंद्रीय संचार ब्यूरो दुरूग के सहायक निदेसक सुदीप्त कर ह स्मृति चिन्हा देके अतिथि मनके सुवागत करीन। उहें, कारीकरम के अगुवई पीएमश्री केंद्रीय विद्यालय दुरूग के प्राचार्य उमा शंकर मिश्रा ह करीन।
प्रधानमंत्री विकसित भारत रोजगार योजना
भारत सरकार डहार ले प्रधानमंत्री विकसित भारत रोजगार योजना के घोसना करे गेहे। ए संबंध म एक ठन जागरूकता कारीकरम ल संबोधित करत कर्मचारी भविष्य निधि संगठन के अपर आयुक्त वी. रंगनाथ ह दू दिन के दउरा म रईपुर आय हे। आज ओमन रईपुर म एक ठन जागरूकता कारीकरम ल संबोधित करत किहीन कि केंद्र सरकार ह विनिर्माण के क्षेत्र म नवा रोजगार के सृजन करे के संगेसंग कामगार मन बर सामाजिक सुरक्षा अउ ओमन ल आर्थिक स्थिरता देवाय के उद्देस्य ले ए योजना के सुरूआत करे के घोसना करे हे।
ए कारीकरम म उद्योग संघ, कन्फेडरेसन ऑफ ऑल इंडिया ट्रेडर्स, चैंबर ऑफ कामर्स के संगेसंग आने-आने कर्मचारी संघ के प्रतिनिधि मन ह भाग लीन।
युवक-हत्या
रईपुर के तीन झन जवान लइका मन के धमतरी म आठ-दस झन जवान लइका मन ह मिल के मार डरिन। ए मामला म पुलिस के टीम ह आठ झन युवक मन ल गिरफ्तार कर लेहे।
अर्जुनी पुलिस के मुताबिक काली रतिहा खाना खाय बर रईपुर ले पांच झन युवक मन ह धमतरी गे रिहीन। ए युवक मन ह नगरी सिहावा रद्दा के तीर एक ठन ढाबा म खाना खाइस हे, जेखर बाद युवक मन ह रईपुर आय बर निकले रिहीन। उही समय मथुराडीह अउ कोर्रा के कुछ युवक मन संग कोनो बात ल लेके विवाद होगे। ए दउरान स्थानीय युवक मन ह चाकू ले रईपुर के तीन झन युवक मन उपर हमला कर दीन। ए घटना म तीन झन युवक के मउकच म परान छूट गे, जेमा दू झन युवक मन ह भागके अपन जान ल बचा लीन। घटना के सूचना मिलतेच पुलिस के टीम ह मउका म पहुंच के तीन झन युवक मन ल गिरफ्तार कर लीन। एखर बाद पांच झन आरोपी मन ल घलो गिरफ्तार कर लीन। पुलिस ह आरोपी मन तीर ले चाकू अउ दिगर हथियार ल जब्त कर लेहे।
हाईकोर्ट-चैतन्य बघेल
छत्तीसगढ़ उच्च न्यायालय ह पूर्व मुख्यमंत्री भूपेश बघेल के बेटा चैतन्य बघेल के याचिका के ग्राह्यता उपर सुनवाई करत प्रवर्तन निदेसालय ईडी ल सपथ पत्र के संग जवाब दाखिल करे के निरदेस दीन। ए मामला के अगली सुनवाई ल अब पच्चीस अगस्त के करे जाही।