राज्यपाल-कार्यशाला
राज्यपाल रमेन डेका ह युवा मनले आह्वान करीन हे कि ओमन ह डिजीटल तकनीक के उपयोग नवाचार अउ रचनात्मकता बर करय, फेर ओकरेच उपर निर्भर झन राहय। ओमन पंडित रविशंकर शुक्ल विश्वविद्यालय रईपुर म आज डिजीटल मानसिक स्वास्थ्य बिसय उपर राखे गे कार्यसाला म किहीन कि कोविड के बाद डिजीटल माध्यम ह शिक्षा, काम अउ रिस्ता ल आसान बनाइस, फेर एखर ले तनाव, चिंता अउ अवसाद जइसन समस्या घलो बाढ़े हे। योग-ध्यान अउ संतुलित जीवन ल अपना के ही मानसिक स्वास्थ्य ल मजबूत राखे जा सकत हे।
‘अटल श्रम सशक्तिकरण योजना‘
असंगठित श्रमिक मन ल अउ उंखर परिवार मनके विकास बर राज्य सरकार डहार ले ‘अटल श्रम सशक्तिकरण योजना‘ सुरू करे गेहे। प्रवासी श्रमिक मन ल सहयोग अउ मार्गदर्सन देबर योजना के पहिली चरण म पांच ठन राज्य-उत्तर प्रदेस, तेलांगाना, उड़ीसा, गुजरात अउ महाराष्ट्र म ‘‘मोर चिन्हारी भवन‘‘ बनाय जाही। एखर अलावा श्रमिक मन ल कैसलेस इलाज के सुविधा देवाय बर एक सौ छै ठन निजी अस्पताल ले अनुबंध करे गेहे। जेखर ले ओमन ल हृदय रोग, किडनी रोग, मस्तिष्क रोग अउ जटिल सर्जरी बर सुपर स्पेशिलिटी अस्पताल म इलाज के सुविधा मिलही। असंगठित श्रमिक मन बर रईपुर अउ कोरबा म सौ बिस्तर वाले अस्पताल कर्मचारी राज्य बीमा निगम डहार ले बनाय गेहे। उहें, भिलाई अउ रायगढ़ म सौ बिस्तर वाले अस्पताल के काम चलत हे। बिलासपुर म घलो सौ बिस्तर वाले अस्पताल के मंजूरी दे गे हवय।
श्रमिक अउ उंखर परिवार वाला मन ल एके जघा म सरकार के सबो योजना के फायदा देवाय बर ‘श्रमेव जयते‘ पोर्टल बनाय गे हवय। एखर अलावा योजना के निगरानी बर राज्य हरेक संभाग म श्रम कल्याण कार्यालय बनाय जावत हे।
मुख्यमंत्री-‘स्वच्छता संगम‘
मुख्यमंत्री विष्णुदेव साय ह काली बिलासपुर म राखे गे ‘स्वच्छता संगम‘ म छत्तीसगढ़ ल राष्ट्रीय स्तर म गौरव देवइया स्वच्छता दीदी मनके पांव धोवा के उंखर सम्मान करही। ओमन ह ए दउरान स्वच्छ सर्वेक्षण म सुघ्घर प्रदर्सन करइया नगरीय निकाय ल घलो सम्मानित करही। ए मउका म मुख्यमंत्री दू सौ साठ करोड़ रूपिया ले जादा के विकास काम के लोकार्पण अउ भूमिपूजन करही।
कारीकरम म तीन नगर निगम-बिरगांव, भिलाई-चरौदा अउ धमतरी के संग तिरालीस ठन नगर पालिका म ऑनलाइन संपत्तिकर जमा करे के सुविधा के बारे म जीआईएस आधारित प्रॉपर्टी टैक्स लाइव पोर्टल ल लॉन्च करे जाही। एखर ले एक्के संघरा छियालीस ठन सहर म ऑनलाइन संपत्तिकर जमा करे के सुविधा मिलही। स्वच्छता संगम कारीकरम के दउरान नगरीय निकाय म स्वच्छता अउ सहर के सौंदर्यीकरण ल बढ़ावा देबर राज्य स्तरीय प्रतियोगिता के सुरूआत करे जाही।
वक्फ बोर्ड-निर्देश
राज्य वक्फ बोर्ड ह पंद्रह अगस्त स्वतंत्रता दिवस के मउका म सबो मस्जिद, मदरसा अउ दरगाह म राष्ट्रीय झंडा फहराय के आग्रह करे हे। वक्फ बोर्ड कार्यालय ले जारी संदेस म कहे गे हवय कि स्वतंत्रता दिवस एक ठन पवित्र मउका हे अउ एला सबो धार्मिक स्थल म राष्ट्रीय ध्वज फहराके मनाना चाही। बोर्ड ह ए दिन ल देसभक्ति, एकता अउ भाईचारा के प्रतीक बनाय उपर जोर देहे।
उच्च न्यायालय-स्थायी न्यायाधीश
न्यायमूर्ति रविन्द्र कुमार ह आज छत्तीसगढ़ उच्च न्यायालय के स्थायी न्यायाधीश के रूप म सपथ लीन। मुख्य न्यायाधीश रमेश सिन्हा ह ओमन ल सपथ देवाइन। ए मउका म उच्च न्यायालय के सबो न्यायाधीश मन मौजूद रिहीन।
खबर के मुताबिक विधि अउ विधायी कार्य विभाग डहार ले न्यायमूर्ति रविन्द्र कुमार अग्रवाल ल छत्तीसगढ़ उच्च न्यायालय म स्थायी न्यायाधीश नियुक्त करे जाय बर सात अगस्त के अधिसूचना जारी करे गे रिहीस।
रामानुजगंज-केंद्रीय विद्यालय
केंद्रीय शिक्षा मंत्री धर्मेन्द्र प्रधान ह प्रदेस के बलरामपुर-रामानुजगंज जिला म जल्दीच केंद्रीय विद्यालय खोले के आस्वासन दीन हे। आदिमजाति विकास मंत्री रामविचार नेताम ह आज नई दिल्ली म केंद्रीय शिक्षा मंत्री धर्मेन्द्र प्रधान ले मुलाकात करीन। ए दउरान श्री नेताम ह केंद्रीय शिक्षा मंत्री ल बतइन कि रामानुजगंज म केंद्रीय विद्यालय खोले बर क्षेत्रवासी मन डहार ले मांग करे जावत हे। श्री नेताम के आग्रह म केंद्रीय मंत्री ह रामानुजगंज म केंद्रीय विद्यालय खोले जाय के बात किहीन।
उपमुख्यमंत्री-नारायणपुर
उपमुख्यमंत्री विजय शर्मा ह नारायणपुर जिला के नक्सल पुनर्वास केंद्र म आत्मसमर्पित माओवादी मन ले भेंट करीन। ए मउका म आत्मसमर्पित महिला माओवादी मन ह उपमुख्यमंत्री ल राखी बांधिन। ए दउरान श्री शर्मा ह किहीन कि जउन भाई-बहिनी मन ह नक्सल संगठन ल छोड़के मुख्यधारा म आगे हवय, ओमन ह अब हमर परिवार के हिस्सा हवय। उपमुख्यमंत्री ले गोठबात करत आत्मसमर्पित माओवादी मन ह सरकार के पुनर्वास नीति के तारीफ करीन अउ बतइन कि उंखर जीवन भटक गे रिहीस अउ हिंसा ले भरे रिहीस, फेर अब कौशल विकास प्रसिक्षण पाके ओमन ह आत्मनिर्भर बनत हे।
केरोसिन आवंटन
खाद्य, नागरिक आपूर्ति अउ उपभोक्ता संरक्षण विभाग डहार ले राज्य के गैर अनुसूचित क्षेत्र के गैस कनेक्सन भारी राशन कार्ड म घलो पीडीएस के तहत केरोसिन दे जाय के निरदेस दे गे हवय। एखर बर छत्तीसगढ़ ल अगस्त महिना बर एक हजार तीन सौ बत्तीस किलो लीटर केरोसिन के आवंटन करे गेहे, जेला उचित मूल्य के दुकान के माध्यम ले हितग्राही मन ल बांटे जाही। ए बारे म खाद्य विभाग डहार ले प्रदेस के सबो कलेक्टर अउ राज्य स्तरीय समन्वयक मन ल चिट्ठी भेजे गे हवय।
महिला आरक्षक-बर्खास्त
नौकरी लगाय के नांव म पइसा लेके आरोप म दुरूग पुलिस के महिला प्रधान आरक्षक मोनिका गुप्ता ल नौकरी ले बर्खास्त कर दे गेहे। एक झन मनखे डहार ले करे गे सिकायत म छावनी थाना म मोनिका के खिलाफ धोखाधड़ी के केस दर्ज करे गे रिहीस। विभागीय जांच के बाद छत्तीसगढ़ पुलिस ह नियमावली के तहत बर्खास्तगी के आदेस जारी करे हे। दुरूग के वरिष्ठ पुलिस अधीक्षक विजय अग्रवाल ह बतइन कि मोनिका गुप्ता ह अपन पद के गलत उपयोग करत पुलिस नियमावली अउ सेवा आचरण नियम के उल्लंघन करे हे। विभाग ह प्रावधान के अनुसार सेवा ले बर्खास्तगी के सजा देहे।
हाथी-विचरण
बलरामपुर जिला के राजपुर वन परिक्षेत्र के दुप्पी गांव म पाछू दू दिन ले पैंतीस ठन हाथी के दल घुमत हे। ए दल म चार झन सावक घलो हे, जउन मन ह झुंड के संग जंगल अउ सड़क किनारे घुमत हे। हाथी मनके ए दल ह दू दिन ले राष्ट्रीय राजमार्ग-तीन सौ तैंतालीस के आसपास घूमत रिहीस हे, जेखर ले तीर-तखार के गांव मन म डर के माहौल बने हे। रेंजर महाजन साहू ह बतइन कि अभी कोनो भी प्रकार के नुकसान के खबर नइ हे, फेर सावधानी राखे के जरूरत हे। श्री साहू ह ग्रामीण मन ले अपील करीन कि ओमन ह हाथी मनके तीर झन जावय अउ वन विभाग के निरदेस के पालन करय।
इशिका सिंह-सम्मान
सिडनी विश्वविद्यालय म पढ़इया भारत के दुरूग जिला के भिलाई निवासी छात्रा इशिका िंसंह ल कॉलेजिएट बिजनेस स्कूल बर अंतर्राष्ट्रीय स्तर म मान्यता प्राप्त संस्था बीटा गामा सिग्मा के सदस्यता बर चुने गेहे। बीटा गामा सिग्मा एक ठन अइसन संस्था हरय, जउन ह व्यावसायिक शिक्षा के क्षेत्र म सुघ्घर प्रदर्सन करइया विद्यार्थी मन ल सदस्यता देथे। ए सदस्यता वइसन छात्र मन ल मिलथे जउन मन अपन बैच के टॉपटेन म आथे। इशिका सिंह के चयन सिडनी विश्वविद्यालय म उंखर सैक्षणिक योग्यता समर्पण, अउ नेतृत्व क्षमता के आधार म करे गेहे।
मिनीमाता-पुण्यतिथि
छत्तीसगढ़ के प्रथम महिला सांसद अउ समाज सेविका स्वर्गीय मिनीमाता के आज पुण्यतिथि हे। ए मउका म मुख्यमंत्री विष्णुदेव साय ह ओमन ल अपन श्रध्दांजलि देवत किहीन कि उंखर जीवन निस्वार्थ सेवा, अटूट साहस अउ सामाजिक परिवर्तन के जीवंत प्रतीक हे। ओमन किहीन कि मिनीमाता जी ह वंचित वर्ग, माईलोगिन, दलित अउ गरीब मनके अधिकार के रक्षा ल अपन जीवन के उद्देस्य बनाइन अउ समाज म सम्मान, समानता अउ न्याय के नींव ल मजबूत करीन।