प्रधानमंत्री नरेंद्र मोदी ह आज बेंगलुरू म केएसआर रेलवे स्टेसन ले तीन ठन वंदे भारत ह ट्रेन ह हरा झंडा दिखाइन। एमा बेंगलुरू-बेलगामी, माता वैष्णव देवी कटरा-अमृतसर अउ नागपुर-पुणे वंदे भारत सामिल हे।
प्रधानमंत्री ह रागी गुड्डा के तिर आरवी रोड स्टेसन म येलो लाइन मेट्रो सेवा के घलो उद्घाटन करिन, जउन इलेक्ट्रानिक सिटी ल बोम्मनहल्ली ल जोड़थे। श्री मोदी ह ए बेरा लइका मन ले घलो गोठबात करिन।
मुख्यमंत्री-बैंक शाखा
मुख्यमंत्री विष्णुदेव साय ह जशपुर जिला के बगिया गांव म अपन कार्यालय ले आरा, कुड़ेकेला अउ छिछली म छत्तीसगढ़ राज्य ग्रामीण बैंक के नवा शाखा के वर्चुअल लोकार्पण करीन। ए मउका म मुख्यमंत्री ह किहीन कि राज्य अउ जिला के दूरिहा ग्रामीण इलाका म बैंक सुविधा कराना राज्य सरकार के प्राथमिकता आय। बैंकिंग सेवा न सिरिफ आर्थिक गतिविधि ल बढ़ाही भलूक सरकारी योजना मनके प्रभाव ल घलो बढ़ाथे। मुख्यमंत्री ह बतइन कि जशपुर जिला के दू सौ अड़सठ पंचायत म अटल डिजीटल सुविधा केंद्र सुरू करे गेहे, जेखर ले अब तक करीबन पंद्रह करोड़ रूपिया के लेनदेन हो चुके हे। अवइया पंचायत दिवस तक जिला के सबो पंचायत मन म ए सुविधा सुरू करे के योजना हे। ए केंद्र मन ले ग्रामीण मन ल उंखर गांव म ही बैंकिंग, बीमा अउ सरकारी योजना ले जुड़े सेवा मिलही।
निर्वाचन आयोग-पार्टी सूची
निर्वाचन आयोग ह किहीस हे कि देस के आने-आने राज्य अउ केंद्रशासित प्रदेस मनके तीन सौ चौंतीस के पंजीकृत गैर-मान्यता प्राप्त राजनीतिक दल मन ल सूची ले हटा दे गेहे। ए दल मन बछर दू हजार उन्नीस ले छै बछर तक एक्को चुनाव लड़े के अनिवार्य सर्त ल पूरा नइ कर पाइन। ए दल मन के कार्यालय के घलो अता-पता नइ हे। एखर सेति छत्तीसगढ़ के नौ ठन राजनीतिक दल के पंजीकरण घलो निर्वाचन आयोग ह सूची ले हटा देहे। एमन म छत्तीसगढ़ एकता पार्टी, छत्तीसगढ़ मुक्ति मोर्चा, छत्तीसगढ़ समाजवादी पार्टी, छत्तीसगढ़ संयुक्त जाति पार्टी, छत्तीसगढ़ विकास पार्टी, अलग बस्तर राज्य पार्टी, राष्ट्रीय आदिवासी बहुजन पार्टी, राष्ट्रीय मानव एकता कांग्रेस पार्टी अउ राष्ट्रीय समाजवादी स्वाभिमान मंच सामिल हें।
बतादन कि देस के राष्ट्रीय राजनीतिक दल, स्थानीय राजनीतिक दल अउ पंजीकृत गैर-मान्यता प्राप्त राजनीतिक दल जनप्रतिनिधित्व अधिनियम के प्रावधान के अंतर्गत निर्वाचन आयोग म पंजीकृत हें।
मुख्यमंत्री-ई रिक्शा
मुख्यमंत्री विष्णुदेव साय ह राखी तिहार के मउका म जशपुर जिला के बगिया ले जशपुर एक्सप्रेस के सुभारंभ करिन अउ बिहान योजना ले जुड़े बारह दीदी मन ल राखी के भेंट सही ई-रिक्सा बांटिन। एखर संचालन जिला के आने-आने जघा म माईलोगन मन करही।
ए मउका म मुख्यमंत्री ह किहीन कि ई-रिक्सा न सिरिफ पर्यावरण के अनुकूल हे, भलूक एखर परिचालन लागत कमती हे। एखर ले माईलोगन स्थानीय परिवहन सेवा म अपन भागीदारी निभावत आत्मनिर्भर बनही।
उपमुख्यमंत्री-नक्सलवाद
उपमुख्यमंत्री विजय शर्मा ह किहीन हे कि नक्सलवाद के खातमा बर समाज के सबो वर्ग के सहयोग जरूरी हे। ए गोठ ओमन आज सुकमा जिला म समीक्षा बइठका के बेरा किहीन। ओमन यहू किहीन कि सुरक्षाबल मनके सरलग कार्रवाही ले नक्सलवाद अपन आखिरी चरण म हे अउ एखर खातमा बर समाज के हर वरग ल सक्रिय रहे बर परही। बइठका म ओमन अधिकारी मन ल निरदेस दीन कि अंधरूनी इलाका म सड़क, पुलिया अउ भवन निर्माण कारज ल जादा संशाधन के संग बेरा ले पूरा करे जाय। संगे अवैध धर्मांतरण उपर रोक लगाय के संग रोहिंग्या अउ बांग्लादेसी मन के घुसपैठ उपर घलो सक्ति ले नियंत्रण करे के निरदेस दीन।
नेक्स्ट जेन ई-हास्पिटल
बस्तर संभाग म नेक्स्ट जेन ई-हॉस्पिटल अउ आयुष्मान भारत डिजिटल मिसन जइसन आधुनिक तकनीक के सफल कारज ह स्वास्थ्य सेवा ल नवा गति अउ दिसा देखाय हे। डिजिटल पंजीकरण, हेल्थ रिकॉर्ड अउ पारदर्सी सेवा प्रणाली ले मरीज मन ल बेरा ले सस्ता अउ गुणवत्ता के इलाज मिलत हे।
मुख्यमंत्री विष्णुदेव साय ह किहीन कि ए उदिम न सिरिफ बस्तर बर भलुक जम्मों प्रदेस बर हे, जेला हमन झटकुन राज्य के सबो जिला म लागू करके ‘‘स्वस्थ अउ सशक्त छत्तीसगढ़‘‘ के संकल्प ल साकार करबो।
बतादन कि बस्तर के छै जिला अस्पताल मन म दू अस्पताल अउ इकतालीस सामुदायिक स्वास्थ्य केंद्र म नेक्स्ट जेन ई-हॉस्पिटल प्रणाली के संचालन करे जावत हे, जेखर ले ओपीडी पंजीकरण, परामर्स, जांच, दवा वितरण अउ मरीज मन के सबो प्रकार के जानकारी अब एके डिजिटल मंच म मिलत हे।
दुर्घटना
गौरेला-पेंड्रा-मरवाही जिला म बीते रतिहा एक सड़क दुर्घटना म तीन लोगन के मउत होगे। उहें, एक झन आने मनखे गंभीर रूप ले घायल होगिस, जउन ल बिलासपुर के अस्पताल म भर्ती कराय गेहे। मिले जानकारी ले एक्के ठन फटफटी म सवार होके सहर डहार जावत रिहीन, इही बेरा सड़क म बइठे गाय ले टकरा गिन। ए हादसा म भाई-बहिनी संग तीन झन के मउत होगे।
महेश मिश्रा-राष्ट्रपति पदक
कोरिया जिला के ‘ट्रेफिक मैन‘ महेश मिश्रा ल स्वतंत्रता दिवस म राष्ट्रपति पदक ले सम्मानित करे जाही। रइपुर म होवइया राज्य स्तरीय मुख्य समारोह म मुख्यमंत्री विष्णुदेव साय ह ओमन ल ए पदक भेंट करहीं।
बतादन कि महेश मिश्रा नगर सेना म कार्यरत हे अउ पाछू कई बछर ले यातायात बर जागरूकता अभियान चलावत हे। ओमन अब तक पांच सौ ले जादा जागरूकता सिविर आयोजित कर डारे हे, जेमा ले चार लाख ले जादा लोगन ल सड़क सुरक्षा के नियम के जानकारी दे गीस।
दिव्या रंगारी-एशियन वूमेंस चैंपियनशिप
मलेशिया म चौदह ले बीस सितम्बर तक आयोजित होवइया अंडर-सिक्सटीन एशियन वूमेंस चैंपियनशिप म महासमुंद जिला के दिव्या रंगारी घलो हिस्सा लिही। एखर ले पहिली, बास्केटबाल फेडरेसन ऑफ इंडिया डहार ले दस अगस्त ले बारह सितंबर तक चेन्नई म राष्ट्रीय प्रसिक्षण सिविर के आयोजन करे जाही। जेमा सामिल होय बर दिव्या रंगारी रवाना हो गेहे।
बतादन कि दिव्या रंगारी प्रदेस बास्केटबाल संघ ले जुड़े अइसन खिलाड़ी आय जउन मालदीव म बारह ले पंद्रह जून तक आयोजित क्सालिफायर बास्केटबाल चैंपियनशिप म स्वर्णपदक जीत के एशियन चैंपियनशिप बर चयनित होय हे।