प्रदेस के किसान मन ल चालू खरीफ विपणन वर्ष म धान बेचे के संगेसंग आने सरकारी योजना के फायदा लेबर अब एग्रीस्टैक पोर्टल म पंजीयन कराना जरूरी होही। एखर बर राज्य शासन डहार ले एकीकृत किसान पोर्टल ल एग्रीस्टैक पोर्टल ले जोड़े गेहे, जउन किसान मन पहिली धान बेचे बर पंजीयन कराय हवय, वहू मन ल घलो संशोधन या कैरी फारवर्ड के पहिली एग्रीस्टैक पोर्टल म पंजीयन कराना होही। बिना एग्रीस्टैक पंजीयन के कोनो भी किसान धान नइ बेच पाय। किसान मन अपन तिर के सहकारी समिति या ग्राहक सेवा केंद्र म जाके अपन पंजीयन मुफत म करा सकथे। कृषि विभाग के अधिकारी मन बतइन कि एग्रीस्टैक पोर्टल म पंजीकृत किसान मन ल कृषक उन्नति योजना के घलो फायदा मिलही। ए योजना के तहत पाछू खरीफ म पंजीकृत किसान मन ल, जउन मन धान के जघा आने खरीफ फसल लगाय रिहीन अउ ओखर मनके गिरदावरी म पुष्टि होय हे, ओमन ल प्रति एकड़ ग्यारा हजार रूपिया के सहायता रासि दे जाही। उहें, दलहन, तिलहन, मक्का या कपास के खेती करइया किसान मन ल प्रति एकड़ दस हजार रूपिया के सहायता रासि दे जाही। कृषि विभाग ह किसान मनले अपील करे हवय कि ओमन सरकारी योजना के फायदा लेबर एग्रीस्टैक पोर्टल म अपन पंजीयन जरूर करावय।
गौधाम योजना
राज्य सरकार ह गांव-गंवई के अर्थव्यवस्था ल अउ जादा मजबूत बनाय के संगेसंग पशुधन संरक्षण ल नवा दिसा दे बर गौधाम योजना के सुरूआत करत हे। ए योजना न सिरिफ पशुधन के सुरक्षा अउ नसल सुधार ल बढ़ावा दीही, भलूक जैविक खेति, चारा विकास अउ गौ आधारित उद्योग के माध्यम ले गांव-गांव म रोजगार के नवा मउका खुलही। ए योजना ल अइसन ढंग ले तियार करे गेहे कि घुमन्तु गौवंशीय पशु मनके देखभाल के संग चरवाहा अउ गौ सेवक मन ल नियमित आय के स्थायी स्त्रोत मिल सकही। गौधाम योजना के प्रारूप ल वित्त अउ पशुधन विकास विभाग ले घलो मंजूरी मिल चुके हे। ए योजना मवेसी मनके तस्करी या फेर अवैध परिवहन म पकड़े गे पशु अउ घुमन्तु पशु मन के सुरक्षा ल धियान म राखके तियार करे गेहे।
गौधाम योजना के तहत चरवाहा मन ल दस हजार नौ सौ सोलह रूपिया हरेक महिना अउ गौसेवक मन ल तेरह हजार एक सौ छब्बीस रूपिया प्रति महिना मानदेय जाही। संगेसंग मवेसी मनके चारा बर घलो रासि मंजूर करे जाही। उत्कृष्ट गौधाम ल उंहा रहइया हरेक पशु बर पहिली साल दस रूपिया, दूसरइया साल बीस रूपिया अउ तीसरइया साल तीस रूपिया प्रतिदिन के हिसाब ले पइसा दे जाही।
मुख्यमंत्री-उज्जवला योजना
मुख्यमंत्री विष्णुदेव साय ह प्रधानमंत्री उज्जवला योजना के अंतर्गत हरेक एलपीजी सिलेंडर उपर तीन सौ रूपिया के सब्सिडी ल वित्तीय बछर दू हजार पच्चीस-छब्बीस तक जारी रखे के फइसला के सुवागत करत प्रधानमंत्री नरेंद्र मोदी ल धन्यवाद दे हवय। मुख्यमंत्री ह किहीन कि रक्षाबंधन के ए पावन परब म देस के करोड़ो बहिनी मन बर एहा मंगलकारी उपहार हरय। केंद्र सरकार के ए फइसला ले दस करोड़ तैंतीस लाख उज्जवला लाभार्थी परिवार मन ल राहत मिलही। उहें, छत्तीसगढ़ के घलो लाखों बहिनी मन ल एखर ले फायदा मिल पाही।
विश्व आदिवासी दिवस
आज विश्व आदिवासी दिवस मनाय जात हे। ए मउका म राजधानी रईपुर के संगेसंग प्रदेस के जम्मों जिला मन म कतकोन कारीकरम चलत हे। रईपुर के बूढ़ापारा स्थित स्टेडियम म विश्व आदिवासी दिवस के मउका म जोरदरहा कारीकरम होइस। कारीकरम के सुरूआत आदिवासी परंपरा के मुताबिक पूजा-पाठ अउ सुवागत गीत ले होइस। उहें, आदिवासी संस्कृति लोकगीत, नृत्य अउ पारंपरिक पहनावा ले सजे कलाकार मन ह रंगारंग कारीकरम पेस करीन। ए मउका म कतकोन जिला मन म जागरूकता रैली निकाले गीस। रैली के माध्यम ले लोगन मन ह आदिवासी समाज के संस्कृति, अधिकार अउ एला संजो के राखे के संदेस दीन।
नालंदा परिसर
प्रतियोगी परीक्षा मनके तियारी करत प्रदेस के युवा मन बर चौतीस ठन नवा नालंदा परिसर बनाय जात हे। ए नालंदा परिसर रईपुर, बिलासपुर, दुरूग, भिलाई,रायगढ़ जइसन बड़का सहर के संगेसंग दूर-दराज के वनांचल सुकमा, दंतेवाड़ा, नारायणपुर, सूरजपुर, बैकुंठपुर, चिरमिरी, कुनकुरी, जशपुर, बलरामपुर अउ पेण्ड्रा जइसन सहर मन म घलो बनत हे। नगरीय प्रशासन विभाग ह पाछू दू बछर म तैंतीस ठिन नवा नालंदा परिसर बर पइसा के मंजूरी करे हे। त उहें, रायगढ़ म सीएसआर ले सात सौ सीटर सेंट्रल लाइब्रेरी बनाय जात हे। एखर बर रायगढ़ नगर निगम अउ एनटीपीसी के बीच करार होय हे। एहा प्रदेस के सबले बड़का नालंदा परिसर होही।
वर्ल्ड रोबोटिक्स ओलंपियाड
वर्ल्ड रोबोटिक्स ओलंपियाड के क्षेत्रीय राउंड बर रईपुर के पीएमश्री आर.डी.तिवारी अंग्रेजी माध्यम उत्कृष्ट विद्यालय के तीन झिन छात्रा मनके चयन होय हे। ए ओलंपियाड म देसभर ले आय सैंकड़ों प्रोजेक्ट म चार सौ प्रोजेक्ट ल चुने गीस, जेमा ले रईपुर के पीएमश्री आर.डी.तिवारी अंग्रेजी माध्यम उत्कृष्ट विद्यालय के कक्षा आठवीं के छात्रा पारूल सिरमौर, पूर्वा साकार, रिचल एक्का के ‘स्मार्ट पार्किंग‘ प्रोजेक्ट घलो सामिल हे। अब ए छात्रा मन ग्यारा अगस्त के कोलकाता म होवइया रीजनल राउंड म अपन प्रोजेक्ट के प्रदर्सन करही।
जानबा के मुताबिक वर्ल्ड रोबोटिक्स ओलंपियाड विश्व स्तरीय प्रतियोगिता हरय, जेमा चार राउंड होथे।
कोंडागांव-पोदल उरस्कना
बस्तर संभाग म ए बेरा ‘‘पोदल उरस्कना‘‘ वृक्षारोपण कारीकरम के तहत ‘‘एक पेड़ शहीदों के नाम‘‘ पउधा लगाय जात हे। इही कड़ी म आज कोंडागांव स्थित पुलिस लाइन म पुलिस अधीक्षक वाय. अक्षय कुमार ह पउधा लगाके पोदल उरस्कना कारीकरम के सुरूआत करीन। ए दउरान पुलिस विभाग के अधिकारी अउ करमचारी मन ह ‘‘एक पेड़ शहीदों के नाम‘‘ उपर पउधा लगइन। उहें, पोदल उरस्कना के तहत जिला के आने-आने आफिस थाना चौकी अउ पुलिस कैंप मन म घलो पेड़-पउधा लगाय गीस।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र एके संगरा रिले करही। ए बखत के अंक म ‘‘कोंडागांव‘‘ जिला के गतिविधि के बारे म जानकारी दे जाही।
रक्षाबंधन
भाई-बहिनी के मया-दुलार के परब रक्षाबंधन के तिहार आज प्रदेस के संगेसंग देसभर म उछाह के संग मनाय जात हे। आज के दिन बहिनी ह अपन भाई के कलाई म रक्षासूत्र माने राखी बांधथे अउ मिठाई खवाथे। भाई घलो अपन बहिनी के रक्षा के संकलप लेके उपहार के रूप म कोनो-कोनो जिनिस देथे। राष्ट्रपति द्रौपदी मुर्मू, प्रधानमंत्री नरेंद्र मोदी, राज्यपाल रमेन डेका अउ मुख्यमंत्री विष्णुदेव साय ह रक्षा बंधन के मउका म लोगन मन ल बधाई दे हवय। आज रक्षा बंधन के परब के मउका म रईपुर स्थित मुख्यमंत्री आफिस म प्रजापिता ब्रम्हकुमारी ईश्वरीय विश्वविद्यालय रईपुर के संचालिका ब्रम्हकुमारी सविता बहन ह मिलिन अउ ओमन ल रक्षासूत्र बांधके उंखर स्वास्थ्य अउ खुसहाली के कामना करीन। ए मउका म मुख्यमंत्री ह किहीन कि रक्षाबंधन सिरिफ एक ठन परब नइ हरय, भलूक हमर भावनात्मक एकता अउ सामाजिक मूल्य के गहराई दर्साय वाला उत्सव हरय।
रक्षाबंधन के मउका म आज दंतेवाड़ा के सर्किट हाउस म उपमुख्यमंत्री विजय शर्मा अउ वनमंत्री केदार कश्यप ल ‘दंतेश्वरी फाइटर‘ अउ आत्मसमर्पण करइया माओवादी बहिनी मन ह रक्षासूत्र बांधिन। ए मउका म मंत्री ह किहीन कि ए उही बहिनी हरय जउन मन नक्सलवाद के रद्दा ल छोड़ के विकास के मुख्यधारा ल अपनाय हे। ए दउरान हर घर तिरंगा, हर घर स्वच्छता, स्वतंत्रता का उत्सव स्वच्छता के संग अभियान म स्वच्छता जागरूकता रथ ल हरा झंडी दिखाके रवाना करे गीस। संगेसंग परिसर म पौधरोपण घलो करे गीस।
अउ अब थोरकुन समाचार सार म –
– जांजगीर के प्रथम जिला अउ अतिरिक्त सत्र न्यायाधीश के अदालत ह मादक पदार्थ के तस्करी के दू झिन आरोपी मन ल दोषी ठहरावत पंद्रह साल के कठोर कारावास के सजा सुनाय हे।
– नेशनल सिक्योरिटी गार्ड-एनएसजी मानेसर गुड़गांव के ग्यारा सदस्यीय टीम डहार ले वीआईपी सुरक्षा म तैनात जवान अउ पुलिस वाहन चालक मन ल आपात कालीन स्थिति ले निपटे बर रईपुर म प्रसिक्षण दे गीस।
अउ
– मोहला-मानपुर-अंबागढ़ चौकी जिला के अंबागढ़ थाना म पदस्थ जिला पुलिस बल के एक झिन आरक्षक ह फांसी लगाके आत्महत्या कर लीन।