केंद्र सरकार ह बारह हजार करोड़ रूपिया ले जादा के अनुमानित लागत ले ए बछर बर प्रधानमंत्री उज्जवला योजना के उपभोक्ता मन बर सब्सिडी जारी रखे के स्वीकृति दे देहे। प्रधानमंत्री नरेंद्र मोदी के अध्यक्षता म मंत्रिमंडल के बइठका म आज ए फइसला ले गेहे। नई दिल्ली म मंत्रिमंडल के फइसला के बारे म सूचना अउ प्रसारण मंत्री अश्विनी वैष्णव ह बतइन कि ए योजना ले दस करोड़ तैंतीस लाख ले जादा परिवार मन ल फायदा होय हे। सरकार चौदह किलो दू सौ ग्राम के रसोई गैस सिलेण्डर उपर तीन सौ रूपिया तक के सब्सिडी दीही। श्री वैष्णव ह किहीन कि ए सब्सिडी साल म नौ बार तक सिलेण्डर भरवाय उपर मिलही।
केंद्र नक्सल राशि स्वीकृति
केंद्र सरकार ह नक्सल प्रभावित क्षेत्र म ग्रामीण संपर्क सुदृढ़ करे बर सड़क सपंर्क परियोजना के तहत छत्तीसगढ़ ल एक सौ पंचानवे करोड़ रूपिया के स्वीकृति देहे। ए निधि बिसेस रूप ले नक्सल प्रभावित जिला-दंतेवाड़ा, बीजापुर, सुकमा, नारायणपुर, कांकेर, बस्तर, राजनांदगांव, बलरामपुर, कोंडागांव अउ जशपुर के सुदूर ग्रामीण क्षेत्र मन म नवा सड़क के निर्माण अउ मौजूदा रद्दा मनके सुदृढ़ीकरण अउ पुलपूलिया निर्माण बर दे देहे। एमन के माध्यम ले बस्ती मन ल ब्लाक अउ जिला मुख्यालय, बाजार, स्कूल अउ स्वास्थ्य केंद्र मनले जोड़े जाही।
उहें, केंद्र सरकार ह प्रधानमंत्री जनमन योजना के तहत छत्तीसगढ़ ल तीन सौ पचहत्तर करोड़ रूपिया ले जादा के लागत के सौ पुलिया मनके स्वीकृति घलो देहे। एखरे संग अब तक राज्य ल कुल सात सौ पंद्रह सड़क अउ सौ पुल प्रधानमंत्री जनमन योजना के अंतर्गत स्वीकृत करे जा चुके हे।
मुख्यमंत्री-एमओयू
मुख्यमंत्री विष्णुदेव साय के मौजूदगी म आज रईपुर म राखे गे कारीकरम म राज्य सरकार, भारतीय प्रबंधन संस्थान आईआईएम रईपुर, राष्ट्रीय प्रौद्योगिकीय संस्थान एनआईटी रईपुर अउ मोतीलाल ओसवाल फाउंडेसन के बीच त्रिपक्षीय एमओयू म हस्ताक्षर करे गीस। ए समझौता के तहत स्थापित होवइया उद्यमिता केंद्र के निर्माण ए साल ले सुरू होही अउ एला बछर दू हजार सत्ताईस-अट्ठाईस तक पूर्ण रूप ले क्रियासील करे के लक्ष्य निर्धारित करे गेहे।
ए मउका म मुख्यमंत्री ह किहीन कि ए समझौता ले ‘‘छत्तीसगढ़ अंजोर विजन‘‘ ल साकार करे म महत्वपूर्ण सहायता मिलही। ए साझेदारी ले प्रदेस म गांव-गांव तक शिक्षा, कौशल विकास अउ नवाचार के क्रांति पहुंचही, जउन युवा मन ल आगू बढ़े बर प्रेरित करही। ए त्रिपक्षीय समझौता के तहत ‘‘नवाचार अउ उद्यमिता उत्कृष्टता केंद्र‘‘ के स्थापना करे जाही जउन युवा मन ल शोध, प्रयोग अउ उद्यमिता के माध्यम ले आत्मनिर्भर बनाय के काम करही।
मोतीलाल ओसवाल फाउंडेसन ह आईआईएम रईपुर अउ एनआईटी रईपुर ल कुल एक सौ बहत्तर करोड़ रूपिया देके घोसना करे हे। एमा ले एक सौ एक करोड़ रूपिया आईआईएम रईपुर ल अउ इकहत्तर करोड़ रूपिया एनआईटी रईपुर ल प्रदान करे जाही।
हर घर तिरंगा
छत्तीसगढ़ समेत देसभर म दू ले पंद्रह अगस्त तक हर घर तिरंगा अभियान चलाय जात हे। इही कड़ी म बालोद जिला के ग्राम बघमरा म चार ठिन स्व-सहायता समूह के बीस झन महिला दिन रात तिरंगा झंडा बनाय म जुटे हे अउ अब तक छै हजार ले जादा तिरंगा तियार कर चुके हे। ए झंडा ल बेच के समूह के महिला मन अब तक करीबन दू लाख रूपिया के आमदनी कर लेहे। स्व-सहायता समूह के महिला मन किहीन कि ए अभियान ह ओमन ल नवा पहिचान देहे अउ एखर ले होय आमदनी ले ओमन लइका मनके पढ़ई अउ घर के जरूरत घलो पूरा करत हे।
उहें, राष्ट्रीय ग्रामीण आजीविका मिसन के सहायक परियोजना अधिकारी ह बतइन कि जिला के तेरह स्व-समूह ह अब तक आठ हजार ले जादा तिरंगा बनाके बेचे हे अउ पांच हजार झंडा मनके अतिरिक्त आर्डर घलो मिले हे।
बातों-बातों में
प्रादेशिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत देसभर म चलाय जात हर घर तिरंगा अभियान उपर केंद्रित रिही। ए दारी के अंक म संस्कृति विभाग के संचालक विवेक आचार्य ले लेगे बिसेस भेंटवार्ता के प्रसारण करे जाही। ए कारीकरम के प्रसारण काली नौ अगस्त के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
उपमुख्यमंत्री-समीक्षा
उपमुख्यमंत्री विजय शर्मा ह किहीन कि दीदी यदि कोई मनखे दू ले जादा बार सराब या दूसर नसा के तस्करी म संलिप्त पाय जाथे त ओखर संपत्ति जब्त करे के कानूनी कार्रवाई करे जाही। काली जगदलपुर म आने-आने विभाग के कार्य के समीक्षा के दउरान उपमुख्यमंत्री ह नसा उन्मूलन बर पुलिस विभाग, जनप्रतिनिधि अउ दवा व्यापारी मन ल आपसी समन्वय स्थापित करके काम करे बर किहीन ओमन जगदलपुर के सुपर स्पेशियलिटी अस्पताल म तुरते ओपीडी सेवा सुरू करे बर घलो किहीन।
उपमुख्यमंत्री-जवान मुलाकात
उपमुख्यमंत्री विजय शर्मा ह आज बीजापुर जिला के डिमरापाल मेडिकल कालेज हास्पिटल पहुंचके आईईडी बिस्फोट म घायल ग्रामीण अउ भालू के हमला म घायल जवान ले भेंट करके ओमन के स्वास्थ्य के बारे म जानकारी लीन। ए दउरान ओमन अधिकारी अउ चिकित्सक मन ल जवान मनके बेहतर उपचार के निरदेस दीन।
हाईकोर्ट-सुनवाई
छत्तीसगढ़ उच्च न्यायालय ह राज्य स्तरीय टूर्नामेंट ले सीबीएसई स्कूल के विद्यार्थी मन ल वंचित करे जाय के मामला ल स्वतः संज्ञान लेहे। उच्च न्यायालय ह ए मामला म जनहित याचिका उपर सुनवाई करत राज्य शासन ल नोटिस जारी करके जवाब पेस करे के निरदेस देहे।
राज्य सरकार के स्कूल शिक्षा विभाग ह हालेच म फइसला ले रिहीस, कि सीबीएसई ले जुड़े स्कूल मनके छात्र ब्लॉक, जिला अउ राज्य स्तर के खेल प्रतियोगिता मन म हिस्सा नइ ले पाय हे। एखर चलते करीबन छै स्कूल के चार लाख ले जादा लइका खेल प्रतियोगिता म भाग लेहे ले वंचित रइ गीन। उच्च न्यायालय ह राज्य शासन के निर्णय ल गंभीर मानत स्कूल, शिक्षा विभाग ल नोटिस जारी करके दू हफ्ता के भीतर जवाब पेस करे बर कहे हे।
उहें, उच्च न्यायालय के मुख्य न्यायाधीश रमेश सिन्हा अउ न्यायाधीश बीडी गु्रप के डिवीजन बैंच ह सड़क म रील बनाय अउ स्टंट करे के मामला म मुख्य सचिव ल नोटिस जारी करके सपथ पत्र के साथ पूरा जानकारी पेस करे के निरदेस दीन हे। हाईकोर्ट ह राज्य शासन ले पूछिस कि अब तक रील बनाय वाला दोषी मन उपर का कार्रवाई करे गेहे अउ भविष्य म एखर उपर रोक लगाय बर का योजना बनाय गेहे। सुनवाई के दउरान मुख्य न्यायाधीश ह किहीन कि सड़क म रील बनाना अउ यातायात बाधित करे जइसे उपद्रव लोगन मनके जान ल खतरा म डालथे।
माओवादी-गिरफ्तार
मोहला-मानपुर-अंबागढ़ चौकी जिला म सुरक्षाबल ह एक माओवादी ल गिरफ्तार करे हे। एखर उपर आठ लाख रूपिया के इनाम घोसित रिहीस। पुलिस अधीक्षक यशपाल सिंह ह बतइन कि जिला पुलिस बल अउ आईटीबीपी के संयुक्त टीम ह मुठभेड़ के बाद एक झिन माओवादी ल हथियार समेत गिरफ्तार करीस। ए माओवादी डिविजनल कमेटी के सदस्य हे अउ एखर नांव श्रीकांत पुनेम हे। ओमन बतइन कि इंखर करा ले बंदूक, मोबाइल, जिंदा कारतूस अउ दूसर जिनिस घलो बरामद करे गेहे।
रक्षाबंधन
भाई-बहिनी के पवित्र स्नेह अउ प्रेम के प्रतीक रक्षाबंधन काली मनाय जाही। रक्षाबंधन के तिहार ल लेके राजधानी रईपुर समेत प्रदेस के जम्मों जिला मनके बाजार म बने रौनक देखे जात हे। यहू दरी स्व-सहायता समूह के महिला मन डहार ले बनाय गे तरह-तरह के राखी लोगन मनके आकर्षण के केंद्र बने हे। ए राखी मनके बिक्री ले स्व-सहायता समूह ल अच्छा आमदनी होवत हे।
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह रक्षाबंधन के मउका म प्रदेसवासी मन ल बधई अउ सुभकामना दीन हे।