मुख्यमंत्री विष्णुदेव साय ह छत्तीसगढ़ म प्रधानमंत्री सूर्यघर मुफ्त बिजली योजना ल प्रोत्साहित करे के निरदेस दीन हे। योजना म रूफटॉप सोलर पावर प्लांट लगाय बर केन्द्र अउ राज्य सरकार कोति ले एक किलोवाट तक पैंतालीस हजार, तीन किलो वाट बर एक लाख आठ हजार रूपिया तक अनुदान दे जाही। श्री साय ह किहीन कि प्रधानमंत्री सूर्यघर मुफ्त बिजली योजना के उद्देश्य लोगन ल बिजली के क्षेत्र म आत्मनिर्भर बनाना अउ हरेक महीना अवइया बिजली बिल म कमी लाना हे।
छत्तीसगढ़ राज्य विद्युत वितरण कंपनी लिमिटेड के मुख्य अभियंता ह बतईन कि ए योजना म नवीकरणीय ऊर्जा के उपयोग ल बढ़ावा दे खातिर विद्युत कंपनी के सबो नियमित अधिकारी-करमचारी मन ल अपन आवासीय परिसर म रूफटॉप सोलर पावर प्लांट लगाय के सलाह दीन हे। ओमन किहीन कि जउन अधिकारी-करमचारी बोर्ड क्वाटर, किराया के मकान या बहुमंजिला इमारत म राहत हे, ओमन अपन गृहनगर म खुद के या पुस्तैनी मकान म रूफटॉफ सोलर पावर प्लांट लगा सकत हे। ओमन अधिकारी-करमचारी मन ले किहीन कि तीन महीना के भीतरी अपन परिसर म रूफटॉफ सोलर प्लांट लगावयं। अइसन नइ करइया मन उपर बिजली बिल म बिसेस छूट के सुविधा ल रोके जाय म बिचार करे जाही।
मुख्यमंत्री-समीक्षा
मुख्यमंत्री विष्णुदेव साय ह काली मंत्रालय म वन अउ जलवायु परिवर्तन विभाग के समीक्षा बइठका करीन। बइठका म ओमन किहीन कि हाथी-मानव द्वंद अउ आने हिंसक वन्यप्राणी मन कोति जनहानि, पशु हानि अउ फसल क्षति के घटना वनांचल क्षेत्र म एक बड़े चुनौती हरय। अइसन बेरा म सासन के जिम्मेवारी हवय कि पीड़ित मन ल झटकिन अउ न्याय संगत मदद देवाय जाय। मुख्यमंत्री ह अधिकारी मन ल निरदेस दीन कि जम्मों संबंधित प्रकरण के नियम के मुताबिक तुरते निपटारा करे जाय। श्री साय ह व्यक्तिगत वन अधिकार पट्टा के संबंध म जानकारी लीन। बइठका म प्राकृतिक आपदा ले होवइया फसल नकसान के आरबीसी के प्रावधान म मिलइया सहायता रासि म घलो गोठबात करे गीस।
राजस्व अधिकारी हड़ताल-खत्म
राज्य म पाछु अट्ठाईस जुलाई ले चलत राजस्व अधिकारी मनके हड़ताल आज सिरा गेहे। राजस्व मंत्री टंकराम वर्मा ह आज रईपुर म राजस्व संघ के पदाधिकारी मनके बइठका करीन। बइठका म मंत्री कोति ले उंखर सत्रह सूत्रीय मांग म विचार करे के भरोसा देवाय के बादे ओमन अपन हड़ताल खतम करे के घोसना करीन। ए बेरा म राजस्व मंत्री ह किहीन कि राजस्व विभाग शासन के रीढ़ हे अउ अधिकारी मनके भूमिका महत्ता के हवय। उंखर समस्या के सही समाधान बर शासन कटिबद्ध हवय।
राजस्व अधिकारी मनके हड़ताल सिराय के बाद प्रदेस के राजस्व कार्यालय म कामकाज फेर ले सामान्य होगे हे। अब राजस्व ले जुड़े नामांतरण, बंटवारा, भू-अधिकार अभिलेख अउ सीमांकन के काम जल्दी हो सकही अउ लोगन ल राहत मिलही।
माओवादी-मुठभेड़
बीजापुर जिला म आज सुरक्षा बल संग होय मुठभेड़ म एक माओवादी मारे गेहे, जेखर सव बरामद कर ले गेहे।
खबर के मुताबिक गंगालूर थाना क्षेत्र म माओवादी मनके होय के सूचना के आधार म डिस्ट्रिक्ट रिजर्व गार्ड-डीआरजी अउ स्पेशल टॉस्क फोर्स-एसटीएफ के संयुक्त टीम सर्चिंग निकले रिहीस। इही बेरा जंगल म घात लगाय बइठे माओवादी मन ह सुरक्षा बल उपर गोलीबारी सुरू कर दीन। जवान मन कोति ले करे गे जवाबी कार्रवाई म एक माओवादी मारे गेहे। घटना के जघा ले हथियार बरामद करे गेहे। अभी घलो रूक-रूक के सुरक्षा बल अउ माओवादी मनके बीच मुठभेड़ चलत हे।
उहें, बीजापुर जिला म आज नौ झिन माओवादी मन ह पुलिस के आगू आत्मसमर्पण करीन हे। एमा ले छै झिन माओवादी मन उपर चौबीस लाख रूपिया के इनाम घोषित रिहीस।
बिजली योजना-कांग्रेस प्रदर्शन
राज्य सरकार कोति ले बिजली बिल हाफ योजना म फेरबदल करे जाय के विरोध म प्रदेस कांग्रेस काली सात अगस्त के सबो जिला मुख्यालय मन म विद्युत मंडल कार्यालय के आगू विरोध प्रदर्सन करही।
ृ प्रदेस कांग्रेस अध्यक्ष दीपक बैज ह किहीन कि बिजली बिल हाफ योजना बंद करे के फइसला के खिलाफ कांग्रेस कोति ले चरणबद्ध आंदोलन करे जाही। ओमन किहीन कि ए योजना म बदलाव ले लोगन उपर अतिरिक्त आर्थिक बोझ पड़ही। कांग्रेस ए योजना ल पहिली असन लागू करे के मांग करत हे।
मुख्यमंत्री-स्काउट गाईड
मुख्यमंत्री विष्णुदेव साय ले आज रईपुर के उंखर निवास कार्यालय म भारत स्काउट्स अउ गाईड्स के प्रतिनिधिमंडल ह भेंट करीन। ए दउरान प्रतिनिधिमंडल ह मुख्यमंत्री ल प्रदेसभर म चलाय गे ‘‘एक राखी सैनिक भाईयों के नाम‘‘ अभियान के जानकारी दीन। ओमन बतईन कि ए अभियान म राज्य के सबो जिला के बुलबुल, गाइड अउ रेंजर बहिनी मन कोति ले हाथ ले बनाय राखी सैनिक भाई मन बर मिले हे, जेला सैनिक भाई मन तीर भेजे जाही।
मुख्यमंत्री भारत स्काउट्स अउ गाईड्स के ए अभियान के प्रसंसा करत किहीन कि अइसन पहल ले लइका मन म देसभक्ति के भावना बाढ़ही अउ हमर जवान मन ल भावनात्मक रूप ले मजबूती मिलही।
मुख्यमंत्री-नमी राय पारेख
मुख्यमंत्री विष्णुदेव साय ह आज रईपुर के उंखर निवास कार्यालय म एशियन अफ्रीकन पैसिफिक पावरलिफ्टिंग चैंपियनशिप के स्वर्ण पदक जीतइया नमी राय पारेख ले भेंट करीन। ए दउरान मुख्यमंत्री ल नमी राय ह बतईन कि पांच ले तेरह जुलाई तक जापान के हिमेजी म राखे गे एशियन अफ्रीकन पैसिफिक पावरलिफ्टिंग चैंपियनशिप म ओमन संतावन किलोग्राम डेडलिफ्ट वरग म स्वर्ण पदक जीते हे। एखर बर मुख्यमंत्री ह नमी राय पारेख ल बधाई देवत किहीन कि एखर ले प्रदेस के बेटी मन ल प्रेरणा मिलही।
एनटीपीसी-हादसा
बिलासपुर जिला के सीपत के राष्ट्रीय ताप विद्युत निगम-एनटीपीसी म आज होय हादसा म एक झिन मजदूर के मउत होगे। उहें, चार आने मजूर गंभीर रूप ले घायल होगे हे। खबर के मुताबिक एनटीपीसी प्लांट के यूनिट-पांच म रखरखाव के काम चलत रिहीस। इही दउरान प्री-एयर हीटर प्लेटफॉर्म औचक टूट गे, जेखर ले उहां काम करत मजूर नीचे गिर गे। ए हादसा म पांच झिन मजूर गंभीर रूप ले घायल होगे, जेमा ले एक के इलाज के दउरान मउत होगे। उहां के लोगन अउ मजदूर संगठन ह ए हादसा म नाराजगी जतात सीपत रद्दा म चक्काजाम करके प्रदर्सन करीन।
ृ घटना के सूचना मिले के बाद पुलिस अउ प्रशासन के टीम मउका म पहुंचीस। प्रसासन कोति ले हादसा के कारण अउ रखरखाव के काम म होय कोताही के जांच करे जात हे।
डिजिटल ठगी
रईपुर के सेजबहार स्थित शासकीय इंजीनियिरिंग कॉलेज के प्रोफेसर संतोष कुमार ले अठासी लाख रूपिया के ठगी के मामला आगू आय हे। ठग ह ओमन ल महीना भर तक डिजिटल अरेस्ट करके रिहाई के नाव म उंखर तीर ले अठासी लाख रूपिया वसूल लीस। ए मामला के सिकईत प्रोफेसर ह पुरानी बस्ती थाना म दरज कराय हे। पुलिस के मुताबिक ठग ह प्रोफेसर उपर मानव तस्करी, मनी लॉडिंªग अउ आने अपराध म धमका के ठगी ल अंजाम दीन। पुलिस साइबर सेल के मदद ले आरोपी के तलाश करत हे।
उहें, देवेन्द्र नगर क्षेत्र म ऑनलाइन ठगी के मामला आगू आय हे। पुलिस के मुताबिक ठग ह इंस्टाग्राम ले शेयर ट्रेडिंग के नाव म एक मनखे ले करीबन साठ लाख पचासी हजार रूपिया के ठगी करे हे। देवेन्द्र नगर पुलिस ह अपराध दरज करके जांच सुरू कर देहे।
अउ अब जानन मौसम के हाल..
मौसम विभाग के मुताबिक एक द्रोणिका उत्तर-पश्चिम बिहार ले दक्षिण पूर्व बांग्लादेश होवत पश्चिम बंगाल तक विस्तारित हे, जेखर परभाव ले प्रदेस म काली हल्का ले मध्यम बरसा होय अउ गरज-चमक संग छींटा बौछार होय के संभावना हे। उहें, एक-दू जघा गाज गिरे के आसार हवय। मौसम विभाग ह आठ अउ नौ अगस्त के प्रदेसभर म बरसा होय के संभावना जताय हे।
इही बीच, महासमुंद जिला के मूढ़ीपार गांव म आज मंझनिया गाज गिरे ले खेत म काम करत पति-पत्नी दूनों के मउत होगे। उहें, एक आने मनखे झुलस गे, जउन ल अस्पताल म भर्ती कराय गेहे।