केंद्र सरकार ह पैंतीस ठन जरूरी दवई के कीमत म कटौती करे हे। ए कटौती राष्ट्रीय औषधि मूल्य निर्धारण प्राधिकरण-एनीपीपीए ह करे हे। ए दवा म एंटी-इंफ्लेमेटरी, हृदय रोग, एंटीबायोटिक, मधुमेह अउ मानसिक रोग ले जुड़े दवई सामिल हे। एमा प्रमुख दवई हे-एसीक्लोफेनाक, पैरासिटामोल, एमोक्सिसिलिन, पोटेशियम क्लैवुलनेट अउ एटोरवास्टेटिन।
स्वास्थ्य सेवा ल सरल बनाय के खातिर ए कटौती करे गेहे। ए दवई दवा कंपनी मन डहार ले बेचे जाथे, अउ इंखर कीमत म कमी करे गेहे, जेखर ले पुराना बीमारी ले परेसान मरीज ल फायदा पहुंचही, काबर कि एमा दिल के बीमारी अउ सूजन कम करइया दवई घलो सामिल हे।
मुख्यमंत्री विष्णुदेव साय ह केंद्र सरकार डहार ले पैंतीस ठन जरूरी दवई के कीमत म कटौती करे के फइसला के सुवागत करीन हे। ओमन किहीन कि ए मूल्य कटौती ले छत्तीसगढ़ जइसन आदिवासी बाहुल्य राज्य म गरीब, श्रमिक, किसान, माईलोगिन अउ सियान मन ल एखर फायदा मिलही।
हॉफ बिजली बिल योजना-संशोधन
राज्य सरकार डहार ले हाफ बिजली बिल योजना म दे जाने वाला छूट के सीमा म युक्तियुक्त संशोधन करे गेहे। अब हर महिना दे जाने वाला चार सौ यूनिट छूट के जघा म सौ यूनिट तक के मासिक खपत म पचास प्रतिसत के रियायत दे जाही।
अभी राज्य के पैंतालीस लाख घरेलू उपभोक्ता मन म करीबन इकतीस लाख परिवार अइसन हे, जिंखर खपत सौ यूनिट हर महिना ले कमती हे। ए इकतीस लाख परिवार म पंद्रह लाख बीपीएल-गरीबी रेखा के नीचे के परिवार घलो सामिल हे, जउन मन ल पहिली जइसे हाफ बिजली बिल योजना के फायदा मिलत रइही।
ए परिवार मन ल योजना म तीस यूनिट तक के मुफ्त बिजली पहिली जइसन मिलत रइही। संगेसंग अेमन ह हाफ बिजली बिल योजना के दूसर फायदा घलो उठात रही।
मुख्यमंत्री-ज्ञान धारा-शिक्षा संवाद
मुख्यमंत्री विष्णुदेव साय ह राजधानी रईपुर म एक ठन निजी समूह के कारीकरम ‘‘ज्ञान धारा-शिक्षा संवाद‘‘ म किहीन कि राज्य सरकार ह शिक्षा ल राष्ट्र निर्माण के बुनियाद मानथे। ओमन किहीन कि छत्तीसगढ़ म शिक्षक मन के जरूरत ल देखत जल्दीच पांच हजार नवा शिक्षक मनके भर्ती प्रक्रिया सुरू करे जाही। मुख्यमंत्री ह बतइन कि शिक्षा विभाग म सुधार के पहल करत पाय गीस कि गंवई क्षेत्र म विद्यार्थी मनके संख्या जादा हे अउ शिक्षक कम हे, जबकि सहरी क्षेत्र म शिक्षक जादा हे। ए असंतुलन ल दूर करे बर राज्य म युक्तियुक्तकरण के प्रक्रिया सुरू करे गीस, जेखर कारण आज छत्तीसगढ़ के कोनो भी स्कूल बिना शिक्षक के नइ हे।
मुख्यमंत्री-विधानसभा भवन
मुख्यमंत्री विष्णुदेव साय विधानसभा अध्यक्ष डॉक्टर रमन सिंह अउ उपमुख्यमंत्री अउ लोक निर्माण मंत्री अरूण साव ह नवा रईपुर म निर्माणाधीन छत्तीसगढ़ विधानसभा भवन के अवलोकन करीन। ओमन ह अधिकारी मन ल निरदेस दीन कि विधानसभा भवन म चलत निर्माण काम ल ए बछर सितंबर तक हर हाल म पूरा कर ले जाय, जेखर ले राज्योत्सव के मउका म जनता ल एला समर्पित करे जा सकय। मुख्यमंत्री ह किहीन कि छत्तीसगढ़ राज्य के एहा रजत जयंती वर्ष हे। ए मउका म राज्य ल एक ठन नवा विधानसभा भवन मिलही।
हाईकोर्ट-महिला जमानत
छत्तीसगढ़ उच्च न्यायालय ह ऑनलाइन ठगी के आरोपी महिला के जमानत याचिका ल खारिज कर देहे। ए महिला उपर फर्जी बीमा, लूडो गेम, ऑनलाइन क्रिकेट सट्टाबाजी अउ नौकरी के झांसा देके लोगन ले ठगी करके करीबन साढ़े छै करोड़ रूपिया के धोखाधड़ी करे के आरोप हे।
पुलिस मुख्यालय के निरदेस म ए महिला के खिलाफ बिलासपुर के साइबर थाना म प्रकरण दर्ज करके जांच सुरू करे गे रिहीस। पुलिस ह उत्कर्ष स्माल फाइनेंस बैंक के खाता के जांच करीस।
जांच म आगू आइस कि आारोपी महिला ह दू झन दूसर लोगन के संग मिल के अपन नांव ले बैंक खाता खोलिस अउ ओला ऑनलाइन सट्टाबाजी बर उपयोग करन दीस। आरोप हे कि ए माईलोगिन ल ए काम बर कमीसन मिलत रिहीस। पुलिस ह जांच म पाइस कि आरोपी महिला निशा साहू संघरा दूसर आरोपी मनके खाता ले बहुत अकन संदिग्ध लेनदेन होय हे।
ड्रग्स-आरोपी गिरफ्तार
रईपुर पुलिस ह एक ठन बड़े ड्रग्स रैकेट के भांडाफोड़ करे हे। पुलिस ह पंजाब के एक झन बड़े अंतर्राष्ट्रीय तस्कर संघरा नौ झन ल गिरफ्तार करे हे अउ ओखर मन तीर ले करीबन एक करोड़ रूपिया के चार सौ बारह ग्राम हेरोइन जब्त करे गेहे। ए ड्रग्स ल पाकिस्तान ले पंजाब के रस्ता होवत लाय जात रिहीस।
रईपुर के वरिष्ठ पुलिस अधीक्षक डॉक्टर लालउमेद सिंह ह बतइन कि ए रैकेट के सरगना पंजाब के गुरदासपुर के लवजीत िंसंह हे, जउन ह पाकिस्तान ले ड्रग्स मंगावत रिहीस। लवजीत ह अंतर्राष्ट्रीय नंबर के उपयोग करके इंटरनेट कालिंग ले पाकिस्तानी तस्कर मनले गोठबात करत रिहीस, ताकि जांच एजेंसी ओला पकड़ झन सकय। रईपुर म ड्रग रैकेट के जिम्मा सुवित श्रीवास्तव नांव के एक झन सख्स ह संभाले रिहीस। ओहा कमल विहार सेक्टर चार के अपन घर ल केंद्र बनाके ड्रग्स के आपूर्ति करत रिहीस। पुलिस के संयुक्त टीम ह काली कमल विहार के मकान म छापा मारके लवजीत सिंह, सुवित श्रीवास्तव अउ अश्विन चंद्रवंशी ल गिरफ्तार करे गीस। इंखर बाद पूछताछ के आधार म छै झन दूसर आरोपी मन ल घलो गिरफ्तार करे गेहे। रईपुर एसएसपी ह बतइन कि ड्रग्स के कारोबार म करोड़ो रूपिया के लेनदेन होय हे, जेखर बर म्यूल अकाउंट के उपयोग करे जावत रिहीस। पुलिस ल उंखर मन तीर ले वीडियो अउ लोकेसन सेयरिंग के घलो सबूत मिले हे, जेखर इस्तेमाल ओमन ह ग्राहक मन तक हेरोइन पहुंचाय बर करत रिहीन। सबो गिरफ्तार आरोपी मन उपर एनडीपीएस एक्ट के तहत एफआईआर दर्ज करे गेहे।
बच्चे-मौत
मोहला-मानपुर-अंबागढ़ चौकी जिला के ग्राम छछानपाहरी म काली तरिया म डूबे ले तीन झन लइका मनके मउत होगे। ग्राम पंचायत छछानपाहरी के सरपंच पंचराम चंद्रवंशी ह घटना के जानकारी देवत बतइन कि लइका मन ह अपन घर ले खेले बर निकले रिहीन, उही डहार ले तरिया म नहाय बर चल दीन। तलाब के गढ्ढच म जाके तीनों लइका बूड़ गीन। इंखर मनके उमर करीबन छै ले सात बछर बताय जावत हे।
दुर्घटना
गरियाबंद के फिंगेश्वर नाला म काली रतिहा एक ठन तेज रफ्तार कार ह अंतेतंते होके नाला म गिर गे। ए हादसा म दू झन के मउत हो गेहे। ए घटना फिंगेश्वर राजिम मुख्य मार्ग के हवय। घटना के बाद आस-पास के लोगन मन पुलिस ल सूचना दीन अउ बचाव अभियान सुरू करे गीस। बहुत मेहनत करे के बाद तीन झन घायल मन अस्पताल म भर्ती कराय गीस अउ दू झन के मउत मउकच म होगिस। कार म पांच झन बइठे रिहीन। ओमन ह बिलाईगढ़ भटगांव ल भूतेश्वरनाथ जावत रिहीन। फिंगेश्वर पुलिस ह घटना के जांच सुरू कर देहे।
भूपेश बघेल-सुप्रीम कोर्ट
सुप्रीम कोर्ट ह पूर्व मुख्यमंत्री अउ कांग्रेस नेता भूपेश बघेल के दायर याचिका उपर सुनवई करे ले मना करत हुए ओमन ल हाईकोर्ट या ट्रायल कोर्ट जाय बर किहीन हे। श्री बघेल ह सुप्रीम कोर्ट म दायर अपन याचिका म सराब घोटाला के संबंध म ईडी डहार ले आने-आने जांच अउ चार्जशीट दाखिल करे के प्रवृत्ति ल चुनौती दे रिहीस।
हालांकि सुप्रीम कोर्ट ह पीएमएलए अधिनियम के धारा पचास अउ तिरसठ ल चुनौती देवइया भूपेश बघेल के याचिका ल सुनवई बर मंजूर कर लेहे। जेखर उपर अवइया छै अगस्त के दिन सुनवई होही।
इही बीच, भूपेश बघेल के बेटा चैतन्य बघेल के न्यायिक रिमांड अवधि सिराय के बाद आज ओला एक घाव फेर अदालत म पेस करे गीस, जिंहा ले ओला फेर ले चौदह दिन कि न्यायिक रिमांड म भेज दे गेहे।
रेरा-आदेश
छत्तीसगढ़ रियल एस्टेट रेगुलेटरी अथॉरिटी ह एक ठन बडे़ फइसला म एक झिन आबंटी ल लंबित रख-रखाव सुल्क अउ विकास लागत प्रमोटर ल भुगतान करे के आदेस दीन हे। सीजी रेरा ह केहे हे कि अइसन मामला म यदि आवंटी अपन जिम्मेदारी ले बचथे तो एखर ले प्रमोटर मनके परियोजना चलाय म बाधा होथे अउ एहा रियल एस्टेट अधिनियम के विरूध्द हे। रेरा ह अपन आदेस म ए बात म जोर देहे कि वित्तीय पारदर्सिता अउ जिम्मेदारी रियल एस्टेट सेक्टर बर जरूरी हे।
सावन मास
सावन महीना के चौथा अउ आखिरी सोमवार के आज प्रदेस के शिव मंदिर मन म श्रद्धालु मनके भारी भीड़ देखे गीस। जम्मों वर्ग के लोगन मन भगवान भोलेनाथ के पूजा-पाठ करके मंदिर मन म पहुंचत हे। जांजगीर-चांपा खरौद के लक्ष्मणेश्वर मंदिर, गरियाबंद के राजिम स्थित कुलेश्वर नाथ, राजधानी रायपुर के महादेवघाट स्थित हटकेश्वर नाथ अउ बूढ़ेश्वरनाथ मंदिर म श्रद्धालु मन पवित्र जल ले अभिषेक करीन।