आज दिनभर के खबर ल अपन गुरतुर छत्तीसगढ़ी भाखा म पढ़व

रायपुर-जबलपुर-ट्रेन शुभारंभ
मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह आज रईपुर रेलवे स्टेसन ले रईपुर-जबलपुर नवा एक्सप्रेस ट्रेन ल हरा झंडी देखाके पठोइन। सुभारंभ मउका म गुजरात के भावनगर म होय मुख्य समारोह म केंद्रीय मंत्री अश्विनी वैष्णव, मनसुख मांडविया अउ मध्यप्रदेस के मुख्यमंत्री डॉक्टर मोहन यादव ह वर्चुअल रूप म उपस्थित रिहीन। मुख्य समारोह म रींवा-पुणे एक्सप्रेस अउ भावनगर टर्मिनस-  अयोध्या एक्सप्रेस के घलो रींवा अउ भावनगर ले सुभारंभ करे गीस।
ए मउका म मुख्यमंत्री ह रईपुर-जबलपुर नवा ट्रेन के सौगात मिले उपर प्रधानमंत्री अउ रेल मंत्री के आभार जतइन। मुख्यमंत्री ह किहीन कि छत्तीसगढ़ म सैंतालीस हजार करोड़ रूपिया ले जादा के रेल परियोजना चलत हे, जउन ह छत्तीसगढ़ म रेलवे नेटवर्क अउ यात्री मन के सहुलियत ल नवा ऊंचाई तक ले जाही। मुख्यमंत्री ह किहीन कि अमृत भारत स्टेसन ए योजना के चलत छत्तीसगढ़ के बत्तीस ठिन रेलवे टेसन मन ल छै सौ अस्सी करोड़ के लागत ले सबो कीसम के सहुलियत वाले बनाय के संगे पूरा कायाकल्प करे जात हे। ओमन किहीन कि रईपुर ले जबलपुर बर रेल सेवा मिले ले पर्यटन, शिक्षा संबंधी गतिविध के संगे व्यापार ल बढ़ावा मिलही।

उहें, समारोह म बोलत विधानसभा अध्यक्ष डॉक्टर रमन सिंह ह किहीन कि ए रेल सेवा ह छत्तीसगढ़ महाराष्ट्र अउ मध्यप्रदेस भीतर सुघ्घर संपर्क के बढ़िया माध्यम बनही।
रेलवे के अधिकारी मन ह बतइन कि ट्रेन ह रईपुर ले मंझनिया दू बज के पैंतालीस मिनट म रवाना होके दस बजके पैंतालीस मिनट म करीबन आठ घंटा म जबलपुर पहुंचही। उहें, वापसी म ए ट्रेन ह जबलपुर ले बिहनिया छै बजे ले रवाना होही तउन मंझनिया एक बजके पचास मिनट म रईपुर पहुंचही।

उपमुख्यमंत्री-समीक्षा बैठक

उपमुख्यमंत्री अरूण साव ह मंत्रालय म नगरीय प्रशासन अउ विकास विभाग के कामकाज के समीक्षा करीन। ओमन नागरिक मन ल सुघ्घर सहुलियत देवई, निर्माण काम मन म तेजी लवई के संगे साफ-सफाई अउ सौन्दर्यीकरण के  काम ल बने ढंग ले धरातल याने भुंईया म उतारे के निरदेस दीन। उपमुख्यमंत्री ह राज्य सहरी विकास अभिकरण डहार ले चलत ई-गर्वनेंस मोर संगवारी ए योजना के समीक्षा करत एखर कामकाज म घलो तेजी लाय बर निरदेस दीन।
उहें, उपमुख्यमंत्री विजय शर्मा के पगरइती म पंचायत अउ ग्रामीण विकास विभाग के समीक्षा बइठका होइस, जेमा उपमुख्यमंत्री श्री शर्मा ह प्रधानमंत्री आवास योजना-ग्रामीण, प्रधानमंत्री ग्राम सड़क योजना, महात्मा गांधी राष्ट्रीय ग्रामीण रोजगार गारंटी योजना, राष्ट्रीय ग्रामीण आजीविका मिसन अउ महिला सशक्तिकरण ले जुड़े योजना मनके प्रगति बारे म जानबा लीन। उपमुख्यमंत्री ह माईलोगिन अउ वंचित वर्ग मन ल स्व-सहायता समूह के माध्यम ले आजीविका ले जोड़े के निरदेस दीन। ओमन आत्मसमर्पित माओवादी मन ल घलो समूह मन ले जोड़के इंकम वाले काम ले जोड़े के निरदेस दीन।

संपूर्णता अभियान-पुरस्कार

मुख्यमंत्री विष्णुदेव साय ह संपूर्णता अभियान म राखे गे लक्ष्य ल हासिल करे म सुघ्घर काम करइया आकांक्षी जिला अउ विकासखंड मन ल काली रईपुर म राखे गे कारीकरम म पुरस्कृत करीन। मुख्यमंत्री ह आकांक्षी जिला-बस्तर अउ कांडागांव संगे आकांक्षी विकासखंड-शंकरगढ़, मैनपुर, माकड़ी, कोयलीबेड़ा, ओरछा अउ प्रतापपुर ल स्वर्ण पदक दीन।
समारोह म बोलत मुख्यमंत्री ह किहीन कि प्रधानमंत्री नरेंद्र मोदी के विकसित भारत के संकल्पना म सबो वरग के विकास अमाय हे। ओमन किहीन कि दूरिहा जघा म रहवइया अउ बिसेस पिछड़ी जनजाती मन ल विकास के सबले जादा जरूरत हे, जेला धियान म राखत केंद्र सरकार ह प्रधानमंत्री जनमन योजना सुरू करे हे। ओमन यहू किहीन कि राज्य म केंद्र सरकार डहार ले घोसित आकांक्षी जिला अउ विकासखंड मन म सामिल गांव-गंवई ह सरलग आगू बाढ़त हे।

उपमुख्यमंत्री-हाट मेला

उपमुख्यमंत्री विजय शर्मा ह आज कवर्धा म राखे गे तीन दिन वाले आकांक्षा हाट मेला के सुभारंभ करीन। ए मउका म संपूर्णता अभियान के लागू करे म सुघ्घर काम करइया अधिकारी अउ फ्रंट लाइन वर्कर मन ल प्रशस्ति पत्र देके सम्मानित करे गीस। संगे उपमुख्यमंत्री ह स्व-सहायता समूह अउ विभाग डहार ले लगाय गे बड़ अकन स्टाल मन के अवलोकन घलो करीन। मेला म स्व-सहायता समूह डहार ले बनाय गे जिनिस मनके प्रदर्सनीय अउ बिक्री करे जात हे।
इंहा ए बतादन कि संपूर्णता अभियान म कबीरधाम जिला ह पूरा प्रदेस म सुघ्घर काम करत कांस्य पदक झोंके हे।

मुख्यमंत्री कांवड़ यात्रा

मुख्यमंत्री विष्णुदेव साय ह आज रईपुर के गोढ़ियारी म निकाले गे कांवड़ यात्रा म सामिल होइन, जिहां ओमन भगवान भोलेनाथ के रूद्राअभिषेक करके छत्तीसगढ़ के खुसियारी अउ विकास के विनती बिनोइन। ए मउका म मुख्यमंत्री ह किहीन कि सावन महिना म कांवड़ यात्रा ह शिव भक्त मनके आस्था भक्ति अउ समर्पण के चिन्हारी हे।
ए मउका म विधानसभा अध्यक्ष डॉक्टर रमन िंसंह, पूर्व राज्यपाल रमेश बैस, कृषि मंत्री रामविचार नेताम, महिला अउ बाल विकास मंत्री लक्ष्मी राजवाड़े, सांसद बृजमोहन अग्रवाल अउ रईपुर पश्चिम विधायक राजेश मूणत समेत बड़ झिन श्रध्दालु अउ सामाजिक संगठन के प्रतिनिधि मन मौजूद रिहीन।
इंहा ए बतादन कि काली आखिरी सावन सम्मार हरय।

नीट-परीक्षा

राष्ट्रीय आयुर्विज्ञान परीक्षा बोर्ड-एनबीईएमएस डहार ले देस भर के कई ठिन नीट पीजी परीक्षा राखे गे रिहीस। छत्तीसगढ़ म घलो मेडिकल पढ़इया विद्यार्थी मन हजारों के संख्या म रईपुर-दुरूग अउ बिलासपुर म बड़ अकन परीक्षा केंद्र म परीक्षा दीन। नीट यूजी के बाद नीट पीजी के परीक्षा घलो आज एके पाली म राखे गे रिहीस। ए परीक्षा ह कम्प्यूटर आधारित रिहीस।

ऑनलाइन-ठगी

बिलासपुर जिला के सिविल लाइन क्षेत्र म एक झिन सियान ले संतावन लाख रूपिया के ऑनलाइन ठगी करे के मामला आगू आय हे। आरोपी म अज्ञात नंबर ले पीड़ित ल फोन करके खुद ल पुलिस अधिकारी बतावत ओला झूठा केस म फंसाय के धमकी देत डिजीटल अरेस्ट कर लीस, बाद म पीड़ित ल पुलिस कार्रवाई ले बचाय के नांव म संतावन लाख रूपिया के ठगी कर दीस। फेर आरोपी के खिलाफ मामला दर्ज करत पुलिस ह जांच सुरू कर देहे।

अउ अब मौसम के हाल…

मौसम विभाग ले मिले जानकारी मुताबिक काली प्रदेस के उत्तरी छत्तीसगढ़ म कोनो जघा म थोरकुन ले जादा पानी गिर सकत हे। मौसम विज्ञानी एच.पी.चंद्रा ह बतइन कि बंगाल के खाड़ी म बने हुए सिस्टम ह कमजोर पड़ गेहे, ए पाय के प्रदेस के अधिकतर जघा मन म मौसम सामान्य रइही।

प्रयोगशाला परिचारक-परीक्षा

छत्तीसगढ़ व्यावसायिक परीक्षा मंडल व्यापमं रईपुर डहार ले प्रयोगसाला परिचारक पद के भर्ती बर आज प्रवेस परीक्षा राखे गे रिहीस। रईपुर जिला के तैंतीस ठिन केंद्र म राखे गे ए परीक्षा म दस हजार ले जादा उम्मीदवार मन सामिल होइन।