मुख्यमंत्री विष्णुदेव साय ह आज संसद भवन म प्रधानमंत्री नरेंद्र मोदी ले सौजन्य भेंट करीन। ए बेरा म मुख्यमंत्री ह प्रधानमंत्री ल एक नवंबर के रईपुर म होवइया ‘‘अमृत रजत महोत्सव‘‘ म मुख्य अतिथि के रूप म सामिल होय बर आमंत्रित करीन। संगेसंग ओमन ह प्रधानमंत्री ल राज्य सरकार के योजना, विकास के प्राथमिकता अउ जनकल्याण ले जुड़े जरूरी बिसय के जानकारी घलो दीन। जानबा के मुताबिक छत्तीसगढ़ म राज्य गठन के पच्चीसवां वर्षगांठ अमृत रजत जयंती बछर के रूप म मनाय जाही। मुख्यमंत्री ह किहीन कि ए योजना छत्तीसगढ़ बर ऐतिहासिक होही अउ प्रधानमंत्री के उपस्थिति ले एखर महत्ता अउ बाढ़ जाही।
मुख्यमंत्री ह नक्सल प्रभावित क्षेत्र म चलत पुनर्वास अउ बिस्वास बहाली के योजना के घलो उल्लेख करीन। ओमन किहीन कि राज्य सरकार के संवेदनसील अउ दूरदर्सी नीति के परिणाम स्वरूप बड़ संख्या म माओवादी आत्मसमर्पण करके सामान्य जीवन डहार लहुटे हे।
मुख्यमंत्री-केंद्रीय गृहमंत्री
उहें, मुख्यमंत्री विष्णुदेव साय ह आज संसद भवन म केंद्रीय गृह मंत्री अमित शाह ले भेंट करीन। ए दउरान मुख्यमंत्री ह माओवादी चुनौती ले निपटे के रणनीति के संग आने-आने बिसय म केंद्रीय गृहमंत्री ले चर्चा करीन। संगेसंग आज नई दिल्ली म केंद्रीय जलसक्ति मंत्री सी.आर.पाटिल ले घलो मुलाकात करीन।
मुख्यमंत्री-नितिन गडकरी मुलाकात
केंद्रीय सड़क परिवहन मंत्री नितिन गडकरी ह केंद्रीय सड़क निधि के तहत छत्तीसगढ़ ल छै सौ करोड़ रूपिया के मंजूरी देहे। एखर ले प्रदेस म कतकोन सड़क बनाय अउ उन्नयन के काम करे जाही। मुख्यमंत्री ह कें्रदीय मंत्री ले काली मुलाकात करीन, जेमा राज्य के कतकोन जरूरी सड़क परियोजना ल मंजूरी मिलिस। एखरे संग स्टेट कैपिटल रीजन म अवइया दू लेन रद्दा ल चार लेन म अपग्रेड करे के योजना ल घलो मंजूरी मिले हे। रईपुर सहर के यातायात ल अच्छा बनाय म चार बड़का ब्रिज बनाय जाही, जेखर भूमिपूजन जल्दी होही।
उहें, राजधानी रईपुर ले आने जिला तक के सड़क दू लेन ले चार लेन म बदले जाही, जेखर ले अवई-जवई तेज अउ सुरक्षित होही।
एखर अलावा राष्ट्रीय राजमार्ग क्रमांक-एक सौ तीस-ए, राष्ट्रीय राजमार्ग क्रमांक-तिरालीस अउ राष्ट्रीय राजमार्ग क्रमांक- तीस के उन्नयन अउ मजबूतीकरण बर लगभग एक सौ सोलह करोड़ रूपिया के काम के स्वीकृति मिले हे।
मुख्यमंत्री-मनसुख मांडविया मुलाकात
मुख्यमंत्री विष्णुदेव साय ह केंद्रीय श्रम अउ रोजगार, युवा कार्य अउ खेल मंत्री मनसुख मांडविया ले काली नई दिल्ली म मुलाकात करीन। ए दउरान बस्तर ओलंपिक ल ए बछर ले ‘‘खेलों इंडिया ट्राइबल गेम्स‘‘ के रूप म आयोजित करे के सहमति दे गीस। ए निर्णय न केवल जनजातीय युवा मनके प्रतिभा ल राष्ट्रीय स्तर म पहिचान दिलाही, बल्कि छत्तीसगढ़ के पारंपरिक खेल संस्कृति ल घलो वैश्विक मंच म प्रतिष्ठा दिलाही।
उपराष्ट्रपति-चुनाव
निर्वाचन आयोग ह आज देस के उपराष्ट्रपति पद बर चुनई कारीकरम के घोसना कर देहे। निर्वाचन आयोग के अनुसार चुनई नौ सितंबर के होही अउ नामांकन दाखिल करे के आखिरी तारीख इक्कीस अगस्त होही।
पाछू महिना उपराष्ट्रपति पद ले, जगदीप धनखड़ के इस्तीफा के बाद ए चुनई जरूरी हो गेहे। ए सत्रहवां उपराष्ट्रपति पद बर चुनई होही।
यूपीआई-नियम
भारतीय राष्ट्रीय भुगतान नियम-एनपीसीआई ह आज ले यूनीफाईड पेमेंट्स इंटरफेस-यूपीआई के नवा नियम लागू कर देहे। नवा नियम म अवइया सबो लेनदेन ले पहिली पवइया के नांव भेजइया ले देखाय जाही। सबो यूपीआई ऐप उपयोगकर्ता मन ल दिन म पचास घौं अपन बैंक खाता म जमा रासि ल देखे के सुविधा देही।
पीएम किसान सम्मान निधि-राशि
प्रधानमंत्री किसान सम्मान निधि योजना के बीसवां किस्त काली दू अगस्त के जारी करे जाही। प्रधानमंत्री नरेंद्र मोदी काली उत्तर प्रदेस के वाराणसी म प्रधानमंत्री किसान सम्मान निधि योजना के तहत नौ करोड़ सत्तर लाख ले जादा किसान मन ल बीस हजार पांच सौ करोड़ रूपिया जारी करही।
इही बीच, छत्तीसगढ़ के कृषि मंत्री रामविचार नेताम ह आज कांकेर म एक पत्रकारवार्ता म बतइन कि प्रधानमंत्री किसान सम्मान निधि योजना के तहत काली प्रदेस के पच्चीस लाख सैंतालिस हजार किसान मन ल पांच सौ तिरपन करोड़ रूपिया ले जादा पइसा दे जाही। कृषि मंत्री ह बतइन कि ए योजना के तहत बीसवां किस्त ल मिलाके किसान मन ल भुगतान के पइसा नौ हजार सात सौ पैंसठ करोड़ रूपिया हो जाही।
उहें, कृषि मंत्री ह किहीन कि किसान मन ल समय म खाद अउ बीज उपलब्ध कराय बर राज्य सरकार पूरा तरीका ले प्रतिबध्द हे। सबो जिला म खाद बीज भंडारण के पर्याप्त बेवस्था सुनिश्चित करे गेहे। किसान मन ल खाद बीज के वितरण सुचारू रूप ले करे जात हे।
महतारी वंदन योजना
राज्य सरकार ह महतारी वंदन योजना के तहत आज अट्ठारवां किस्त के पइसा के भुगतान करे देहे। महिला अउ बाल विकास विभाग ह प्रदेस के उनहत्तर लाख ले जादा माईलोगिन मन ल छै सौ सैंतालिस करोड़ रूपिया ले जादा के सहायता रासि उंखर बैंक खाता म भेजे हे।
जानबा के मुताबिक ए योजना के तहत अब तक अट्ठारा महिना म ग्यारा हजार सात सौ अट्ठाईस करोड़ रूपिया के रासि माईलोगिन मन ल दे जा चुके हे।
महतारी वंदन योजना के सहायता रासि डीबीटी के जरिया ले दे जावत हे, जेन हितग्राही के खाता डीबीटी इनेबल नइ हे, ओमन बैंक जाके आधार लिंक करवाय, काबर कि उंखर भुगतान करे गे पइसा वापस होवत जावत हे।
उपमुख्यमंत्री-स्वच्छता सम्मान
उपमुख्यमंत्री अरूण साव ह आज बिल्हा म अट्ठाईस स्वच्छता दीदी, बीस सफाई मित्र अउ दस स्वच्छता कमांडोस ल सम्मानित करीन। ए बेरा म उप मुख्यमंत्री अउ नगरीय प्रशासन मंत्री श्री साव ह स्वच्छता दीदी मनले किहीन कि आप लोगन मनके कारण छत्तीसगढ़ ल देस म कतकोन प्रतिष्ठा मिले हे। स्वच्छता म देस म पहला स्थान हासिल करना हम सब बर गौरव के बात हे। कारीकरम म ओमन ह लोगन ल स्वच्छता के सपथ घलो दिलाइन।
जानबा के मुताबिक ए बछर स्वच्छ सर्वेक्षण म बिल्हा ह बीस हजार ले कम जनसंख्या वाला सहर म देस के सबले साफ-सुथरा सहर के पुरस्कार पाय हे।
तहसीलदार-हड़ताल
प्रदेस के तहसीलदार अउ नायब तहसीलदार अपन सत्रह सूत्रीय मांग ल लेके नवा रईपुर स्थित धरना स्थित तूता म धरना प्रदर्सन करत हे। छत्तीसगढ़ कनिष्क प्रशासनिक सेवा संघ के प्रांत अध्यक्ष कृष्णकुमार लहरे ह आकाशवाणी समाचार ल बतइन कि उनतीस जुलाई ले जारी ए हड़ताल मांग पूरा होय तक अनिश्चितकाल तक चलही।
बस्तर-आकांक्षी जिला
रईपुर म काली दू अगस्त के होवइया राज्य स्तरीय आकांक्षी जिला श्रेणी म बस्तर जिला ल स्वर्ण पदक ले सम्मानित करे जाही। उहें, बस्तर जिला के तोकापाल विकासखंड ल आकांक्षी ब्लाक श्रेणी म कांस्य पदक ले सम्मानित करे जाही। दूनों पुरस्कार नीति आयोग डहार ले संपूर्णता अभियान के तहत निर्धारित छै प्रमुख सूचकांक म सत-प्रतिसत क्रियान्वयन के आधार म दे जावत हे।
नन मामला-सुनवाई
धर्मांतरण अउ मानव तस्करी के आरोप म दुरूग रेलवे स्टेसन ले गिरफ्तार दू नन मन के मामला के सुनवाई आज बिलासपुर स्थित राष्ट्रीय जांच एजेंसी-एनआईए के बिसेस कोर्ट म करे गीस। दूनों पक्ष के दलील सुने के बाद कोर्ट ह फइसला सुरक्षित राखे हे। गिरफ्तार नन के जमानत याचिका म निर्णय काली ले जाही।
जानबा के मुताबिक नारायणपुर जिला के तीन युवा मन ल नर्स के ट्रेनिंग दे के बाद आगरा ले जाके नौकरी लगाय के झांसा दे के आरोप म ए नन मन ल दुरूग रेलवे स्टेसन ले गिरफ्तार करे गे रिहीस। ए नन मन उपर युवती मनके धर्म परिवर्तन कराय के आरोप हे। ए मामला म एक युवक ल घलो गिरफ्तार करे गेहे।
हाथी-मौत
कोरबा जिला के कुदमुरा वन परिक्षेत्र म एक नर हाथी के संदिग्ध परिस्थिती म मउत हो गेहे। हाथी के सव आज कुदमुरा अउ बैगामार के जंगल के बीच पाय गेहे। आसंका जताय जात हे कि हाथी के मउत करंट लगे ले होय हे। घटना के जानबा मिलत ही वन विभाग के टीम ह मउका म पहुंच के जांच सुरू कर देहे।