केन्द्रीय मंत्रिमंडल ह ‘‘प्रधानमंत्री किसान संपदा योजना‘‘ बर एक हजार नौ सौ बीस करोड़ रूपिया के उपरहा खरचा के संग कुल छह हजार पांच सौ बीस करोड़ रूपिया के परिव्यय ल मंजूरी दे देहे। आज नई दिल्ली म संवाददाता मन ल बतावत सूचना अउ प्रसारण मंत्री अश्विनी वैष्णव ह किहीन कि एमा बजट घोषणा के मुताबिक घटक योजना-एकीकृत शीत श्रृंखला अउ मूल्य संवर्धन अवसंरचना के अंतर्गत पचास ठिन बहु-उत्पाद खाद्य विकिरण इकाई बनाय बर एक हजार करोड़ रूपिया सामिल हे। एमा घटक योजना-खाद्य सुरक्षा अउ गुणवत्ता आश्वासन अवसंरचना के अंतर्गत एनएबीएल ले मान्यता मिले सौ ठिन खाद्य परीक्षण प्रयोगशाला बनाय बर होवइया खरचा घलो सामिल हे। मंत्रिमंडल के मंजूरी म पन्द्रहवां वित्त आयोग चक्र के दउरान प्रधानमंत्री किसान संपदा योजना म मंजूर करे गे परियोजना बर नौ सौ बीस करोड़ रूपिया घलो सामिल हे।
उहें, मंत्रिमंडल ह अवइया चार बछर के बेरा बर दू हजार करोड़ रूपिया के खरचा के संग केन्द्रीय योजना राष्ट्रीय सहकारी विकास निगम अनुदान सहायता-एनसीडीसी ल घलो मंजूरी देहे।
पीएम किसान सम्मान निधि
प्रधानमंत्री किसान सम्मान निधि योजना के बीसवां किश्त सनिच्चर दू अगस्त के जारी करे जाही। प्रधानमंत्री नरेन्द्र मोदी ह उत्तरप्रदेश के वाराणसी ले ए कार्यक्रम के अगुवई करही। ए बारे म काली नई दिल्ली म केन्द्रीय कृषि मंत्री शिवराज सिंह चौहान के अध्यक्षता म एक ठिन उच्च स्तरीय बइठका होइस। ए दउरान ओमन अधिकारी मन ल राष्ट्रीय, राज्य, जिला अउ ग्राम स्तर किसान मन ल ए कार्यक्रम ले जोड़े के निरदेस दीन। ओमन पूरा देस के किसान मन ल ए कार्यक्रम म भाग लेके बिनती करे हे।
राज्यसभा-स्मारक/किला सर्वें
केन्द्र सरकार ह छत्तीसगढ़ म स्मारक, किला अउ आने धरोहर संरचना मनके पहिचान के संगेसंग ओला संजो के राखे बर सर्वेक्षण करे हे। सर्वें काम बर पाछु पांच साल म छब्बीस करोड़ चौबीस लाख दे गीस। ए जानबा केन्द्रीय संस्कृति अउ पर्यटन मंत्री गजेन्द्र सिंह शेखावत ह आज राज्यसभा म छत्तीसगढ़ के सांसद फूलादेवी नेताम डहार ले पूछे गे सवाल के जवाब म दीन। श्री शेखावत ह बतईन कि भारतीय पुरातत्व सर्वेक्षण ह बछर दू हजार चौदह-पन्द्रह ले दू हजार चौबीस-पच्चीस तक छत्तीसगढ़ म सात सौ चौंसठ गांव के सर्वें करीन, जेमा ले तिहत्तर गांव मन म प्राचीन अवशेष पाय गीस।
आरटीई-सीट आवंटन
शिक्षा का अधिकार अधिनियम-आरटीई के तहत चालू शिक्षा सत्र बर सीट बांटे अउ दूसर चरण के लॉटरी आज लोक शिक्षण संचालनालय म निकाले गीस। दूसर चरण के लॉटरी म दस हजार चार सौ अटहत्तर छात्र मनके चयन करे गेहे।
स्कूल शिक्षा विभाग के अधिकारी मन ह बतईन कि दूसर चरण के लॉटरी के तहत प्रदेस के छह हजार नौ सौ तिरपन प्राईवेट स्कूल मन म प्रवेस बर बयालीस हजार ले जादा अरजी मिले रिहीस। ओमन बतईन कि प्राईवेट स्कूल मन म प्रवेस के काम दस अगस्त तक पूरा कर ले जाही।
बस्तर-आकांक्षी जिला
रायपुर म दू अगस्त के होवइया राज्य स्तरीय आकांक्षी जिला श्रेणी म बस्तर जिला ल स्वर्ण पदक ले सम्मानित करे जाही। उहें, बस्तर जिला के तोकापाल विकासखंड ल आकांक्षी ब्लॉक श्रेणी म कांस्य पदक ले सम्मानित करे गेहे। दूनों पुरस्कार नीति आयोग डहार ले संपूर्णता अभियान के तहत राखे गे छह ठिन प्रमुख सूचकांक मन म सत-प्रतिसत कामकाज के आधार म दे जात हे।
ए सफलता उपर मुख्यमंत्री विष्णुदेव साय ह बस्तर जिला प्रशासन, जनप्रतिनिधि अउ आम लोगन मन ल बधाई दे हवय।
मुंगेली-राखी
मुंगेली जिला म ऑपरेशन सिपाही रक्षासूत्र संकलन अभियान के तहत साठ हजार राखी देस के सीमा म तैनात सैनिक मन बर भेजे गेहे। रक्षाबंधन के दिन ए राखी ल सैनिक मन ल बांधे जाही। ए अभियान ले जुड़के महिला मोर्चा के सदस्य अउ कतकोन स्कूल के छात्रा मन ह घलो सैनिक बर राखी भेजे हे। पूर्व सैनिक संगठन के अध्यक्ष महेन्द्र प्रताप सिंह राणा ह बतईन कि पाछु तीन साल म सैनिक मन बर पन्द्रह लाख ले जादा राखी भेजे गेहे।
हाथी हमला-मौत
सरगुजा जिला म पाछु दू दिन म हाथी के हमला म चार झिन लोगन के मउत होगे हे। वन विभाग के मुताबिक जंगली हाथी मनके दल ले एक ठिन हाथी ह ऐति-ओति होगे। ए हाथी ह थोरिक दिन ले लुंड्रा वन परिक्षेत्र म लोगन मन ल परेसान करे हे। मिले जानबा के मुताबिक आज असकला गांव म ए हाथी ह दू झिन लोगन मन उपर हमला कर दीन, जेमा ले एक झिन के मउकाच म मउत होगे। उहें, सीतापुर क्षेत्र म घलो ए हाथी ह एक झिन किसान ल कुचल दीस। एखर पहिली, हाथी के हमला म काली एक झिन माईलोगिन के मउत होगे रिहीस।
घटना के जानबा मिले के बाद सरगुजा अउ लुंड्रा वन परिक्षेत्र के अधिकारी मन ह मउका म पहुंच हे। एखर अलावा वन विभाग के टीम डहार ले पंचनामा तैयार करके मुआवजा के कार्रवाई करे जात हे। वन विभाग के अधिकारी मन ह बतईन कि ए बेरा हाथी मनके दल ह सरगुजा के मैनपाट म घूमत हे।
कृषि मंत्री-बैठक
कृषि मंत्री रामविचार नेताम ह आज कांकेर म बालोद, धमतरी अउ कांकेर जिला के अधिकारी मनके संग बइठका लेके बीजा अउ खातू बांटे के संगेसंग किसान मन बर चलाय जात योजना मनके कामकाज के जानबा लीन। ओमन जैविक कृषि, कोदो-कुटकी अउ उन्नत खेती बर किसान मनके बीच एखर ले जुड़े योजना मनके जादा ले जादा प्रचार-प्रसार के निरदेस दीन। संगेसंग किसान मन ल जागरूक करे बर किहीन। बइठका म कृषि मंत्री ह सहकारी समिति मन म राखे गे खातू मन ल किसान मन ल उंखर मांग के मुताबिक देके निरदेस दीन। ओमन उद्यानिकी के क्षेत्र म रोजगार के मउका बढ़ाय युवा मन ल रिफ्रेशर प्रशिक्षण अउ तकनीकी जानबा दे बर कहिन। कृषि मंत्री ह क्षेत्र के जलवायु के मुताबिक मसाला वर्गीय फसल ले बर किसान मन ल आगू लाय के निरदेस दीन।
उपमुख्यमंत्री-बैठक
उपमुख्यमंत्री विजय शर्मा के अध्यक्षता म मंत्रालय म होय पंचायत अउ ग्रामीण विकास विभाग के बइठका म पंचायत मनके माध्यम ले बिना लड़ई-झगड़ा के नामांतरण अउ बंटवारा के कामकाज उपर गोठबात होइस। उपमुख्यमंत्री ह किहीन कि अब ग्राम पंचायत ह अपन अधिकार क्षेत्र म अविवादित राजस्व मामला के समाधान करत हे, एखर ले गांव के लोगन मन ल तहसील के चक्कर लगाय बर नइ पड़य। ओमन निरदेस दीन कि जम्मों जिला मन म ए व्यवस्था के जादा ले जादा प्रचार-प्रसार करे जाय। श्री शर्मा ह ग्राम पंचायत मनके परिसंपत्ति के डिजिटल रिकॉर्ड बर बनाय गे ‘‘ग्राम संपदा ऐप‘‘ के समीक्षा करत किहीन कि पंचायत मन म राखे गे परिसंपत्ति मनके पारदर्सिता बर ऐप ल अपडेट करे जाय। बइठका म अटल डिजिटल सुविधा केन्द्र के कामकाज उपर घलो गोठबात करे गीस।
धमतरी-धान खरीदी केन्द्र
धमतरी जिला के इक्कीस ठिन धान उपार्जन केन्द्र मन म दू सौ मीटरिक टन क्षमता के गोदाम बनाय जाही। एखर बर मंडी बोर्ड ह दू सौ अड़सठ लाख रूपिया ले जादा के मंजूरी दे देहे। जिला कलेक्टर अविनाश मिश्रा ह बतईन कि ए गोदाम बने ले जिला म बयालीस सौ मीटरिक टन धान भंडारण के बने ढंग ले व्यवस्था करे जा सकही। एखर ले जउन किसान मन ह धान बेचथे, ओखर खरीदी केन्द्र मन म बने ढंग ले राखे के व्यवस्था हो सकही।
पद्म पुरस्कार-आवेदन
पद्म पुरस्कार मन बर नामांकन अउ अनुसंसा के आखिरी तारीख पन्द्रह अगस्त तक बढ़ा दे गेहे। पुरस्कार बर नामांकन सिरिफ राष्ट्रीय पुरस्कार पोर्टल म ऑनलाइन ले जाही। बछर दू हजार छब्बीस बर पद्म पुरस्कार मनके घोषणा छब्बीस जनवरी के मउका म करे जाही। ए पुरस्कार म पद्म विभूषण, पद्म भूषण अउ पद्मश्री जइसन सबले बड़का नागरिक पुरस्कार सामिल हे।
सना माचू-बॉक्सिंग चैंपियनशिप
इंग्लैंड के लिवरपूल म चार ले चौदह सितंबर तक होवइया विश्व बॉक्सिंग चैंपियनशिप म बिलासपुर रेलमंडल म काम करइया बॉक्सर सना माचू के चयन भारतीय टीम ह होय हे। सना माचू ह बिलासपुर रेलमंडल म सीसीटीसी के पद म काम करत हे। भारतीय बॉक्सिंग टीम म चुने जाय उपर मुख्यमंत्री ह सना माचू ल शुभकामना देवत किहीन कि ओखर चयन सिरिफ छत्तीसगढ़ के नइ हरय, भलूक पूरा देस बर गर्व के बार हरय।