मुख्यमंत्री विष्णुदेव साय के अध्यक्षता म आज मंत्रालय म राज्य मंत्रिमंडल के बइठका होइस, जेमा छत्तीसगढ़ जिला खनिज संस्थान न्यास नियम म जरूरी संशोधन लाय के फइसला करे गीस। एखर ले न्यास तीर उपलब्ध रासि के न्यूनतम सत्तर प्रतिशत रासि के खरचा उच्च प्राथमिकता वाले क्षेत्र के विकास बर करे जाही।
मंत्रिपरिषद ह छत्तीसगढ़ गौण खनिज साधारत रेत नियम अउ छत्तीसगढ़ गौण खनिज साधारण रेत उत्खनन अउ व्यवसाय नियम ल रद्द करत नवा नियम छत्तीसगढ़ गौण खनिज साधारण रेत नियम दू हजार पच्चीस के अनुमोदन करे गेहे। एखर ले रेत के अवैध उत्खनन अउ परिवहन ल रोके बर कड़ा कदम उठाय जाही, जेखर ले आम जनता ल उचित कीमत म रेत मिल सकही। प्रस्तावित नियम म रेत खदान आवंटन के कार्यवाही इलेक्ट्रॉनिक नीलामी के माध्यम ले करे जाही, जेखर ले राजस्व म घलो बढ़ोतरी होही।
एखर ठिन दूसर फइसला म राज्य मंत्रिमंडल ह कृषि भूमि के बाजार मूल्य दर के निर्धारण के बारे म वाणिज्य कर पंजीयन विभाग ले मिले प्रस्ताव के अनुमोदन करे हे। एमा ग्रामीण कृषि भूमि के बाजार मूल्य के गिनती बर पांच सौ वर्गमीटर तक के भू-खंड के दर ल खतम करत संपूर्ण रकबा के गणना हेक्टेयर दर ले करे जाही। उहें, भारतमाला परियोजना अउ बिलासपुर के अरपा भैंसाझार म जउन अनियमितता आगू आय रिहीस, ओखर ले बांचे बर ए व्यवस्था मदद करही।
मंत्रिपरिषद के बइठका म छत्तीसगढ़ स्टेट क्रिकेट संघ ल नवा रायपुर के ग्राम परसदा म क्रिकेट अकादमी के स्थापना बर करीबन आठ एकड़ जमीन दे जाय के प्रस्ताव ल घलो मंजूरी दे गे हवय।
मुख्यमंत्री-दिल्ली रवाना
मुख्यमंत्री विष्णुदेव साय आज राज्य मंत्रिमंडल के बइठका के बाद दू दिन के दिल्ली प्रवास बर रवाना होगे हे। एखर पहिली रायपुर विमानतल म पत्रकार मन ले चर्चा करत मुख्यमंत्री ह बतईन कि दिल्ली पहुंचे के ओमन ह छत्तीसगढ़ के सांसद अउ कैबिनेट मंत्री मन ले भेंट करही।
वित्त मंत्री-अमेरिका
वित्त मंत्री ओ.पी. चौधरी आज ले अमेरिका के सात दिन के दउरा बर रवाना होगे हे। ए यात्रा के उद्देश्य अमेरिका म बसे प्रवासी छत्तीसगढ़िया मन ले भेंट करके ओमन ल राज्य के विकास ले जोड़ना हे। वित्तमंत्री अमेरिका म राहत छत्तीसगढ़ी मूल के नागरिक मन ल प्रदेस के विकास म भागीदार बने बर प्रेरित करही अउ ओमन ल बछर दू हजार सैंतालीस तक विकसित छत्तीसगढ़ बने के दिसा म तैयार ‘‘छत्तीसगढ़ अंजोर विजन‘‘ के बारे म बताही। श्री चौधरी प्रवासी छत्तीसगढ़िया मन ल राज्य के रजत जयंती समारोह म सहभागी बने बर घलो आमंत्रित करही। अपन विदेस यात्रा के दउरान वित्तमंत्री आने-आने सहर म प्रवासी समुदाय, छात्र, निवेसक अउ उद्योगपति मन ले गोठबात करही।
पत्रकार हत्या-आरोपी गिरफ्तार
बीजापुर जिला म गंगालूर-मिरतुर सड़क निर्माण म भ्रष्टाचार के मामला म पुलिस ह लोक निर्माण विभाग के पांच झिन अधिकारी मन ल गिरफ्तार हे। एमा ले दू झन सेवानिवृत्त कार्यपालन अभियंता घलो हे। जिला के पुलिस अधीक्षक जितेन्द्र कुमार यादव ह बतईन कि पत्रकार के हत्या के बाद सड़क निर्माण म गड़बड़ी के जांच सुरू होय रिहीस, जेमा विभागीय अधिकारी मनके भूमिका देखे गेहे।
उपमुख्यमंत्री अरूण साव ह किहीन कि ए मामला म सामिल कोनों भी आरोपी ल बख्शे नइ जाही।
खबर के मुताबिक बछर दू हजार दस म स्वीकृत गंगालूर थाना क्षेत्र म बने नेलसनार-कोड़ोली-मिरतुर-गंगालूर सड़क के लागत करीबन तिहत्तर करोड़ रूपिया रिहीस। फेर, निर्माण काम म भ्रष्टाचार अउ गुणवत्ता म कमी के बारे म पत्रकार मुकेश चंद्राकर ह रिपोर्टिंग करे रिहीन। एखर बाद इही बछर एक जनवरी रतिहा ले मुकेश चंद्राकर लापता होगे रिहीन। बाद म उंखर सव ल ठेकेदार सुरेश चंद्राकर के बाड़ा म बने सेप्टिक टैंक ले बरामद करे गीस। पुलिस ह ए मामला म ठेकेदार सुरेश चंद्राकर, ओखर भाई रितेश अउ दिनेश चंद्राकर के संग सुपरवाइजर महेन्द्र रामटेके ल गिरफ्तार करे रिहीन। एसआईटी जांच के दउरान पुलिस ह सड़क निर्माण म गड़बड़ी के सबूत मिले हे।
सीजीएमएससी-ईडी छापा
प्रवर्तन निदेशालय-ईडी के टीम ह छत्तीसगढ़ मेडिकल सर्विसेज कॉर्पोरेशन लिमिटेड-सीजीएमएससी घोटाला म दुरूग के मोक्षित कार्पोरेशन के ठिकाना म आज बिहनिया छापा मार कार्रवाई करीस। ईडी के टीम ह बिहनिया करीब छह बजे मोक्षित कार्पोरेशन के कार्यालय म पहुंचीस अउ दस्तावेज के जांच करीस। मोक्षित कार्पोरेशन म करीब छह सौ करोड़ रूपिया के सीजीएमएससी घोटाला म सामिल रेहे के आरोप हे। इही बछर सत्ताईस जनवरी के आर्थिक अपराध अन्वेषण ब्यूरो-ईओडब्ल्यू के टीम ह रईपुर अउ दुरूग म मोक्षित कार्पोरेशन के ठिकाना म छापा मारे रिहीस। एखर अलावा टीम ह हरियाणा के पंचकुला के शशांक के भाई, उंखर रिश्तेदार मनके घर अउ कार्यालय म घलो छापा मारके दस्तावेज जब्त करे रिहीन।
आरटीई-सीट आवंटन
शिक्षा के अधिकार अधिनियम-आरटीई के तहत चालू सैक्षणिक सत्र बर दूसर चरण के लॉटरी अउ विद्यार्थी मनके सीट के आवंटन काली इकतीस जुलाई के नवा रायपुर के लोक सिक्षण संचालनालय कार्यालय म करे जाही। स्कूल शिक्षा विभाग के अधिकारी मन ह बतईन कि दूसर चरण म सोलह हजार दू सौ बावन रिक्त सीट बर कुल सोलह हजार छह सौ ले जादा आवेदन मिले हे, जेखर आवंटन लॉटरी के माध्यम ले करे जाही। ओमन ह बतईन कि प्रवेस के प्रक्रिया काली ले सुरू होही, जउन ह दस अगस्त तक चलही।
विशेष कार्यक्रम
सुनइया मन ल बतादन कि केन्द्र सरकार ह रोजगार सृजन ल बढ़ावा दे बर रोजगार आधारित प्रोत्साहन योजना सुरू करही। आकाशवाणी समाचार ह ए बारे म बात करीस भारत सरकार के श्रम अउ रोजगार मंत्रलाय के अंर्तगत कर्मचारी भविष्य निधि संगठन के क्षेत्रीय भविष्य निधि आयुक्त गौरव डोगरा ले। रोजगार आधारित प्रोत्साहन योजना उपर श्री डोगरा होय भेंटवार्ता के प्रसारण काली इकतीस जुलाई के बिहनिया नौ बजे से आकाशवाणी केन्द्र रईपुर ले करे जाही, जेला छत्तीसगढ़ के आकाशवाणी के सबो केन्द्र मन ह रिले करही।
धमतरी-स्कूटी दीदी
धमतरी जिला म छत्तीसगढ़ राज्य ग्रामीण आजीविका मिशन-बिहान ले जुड़के उमरदा गांव के महिला ऐनू चंद्राकर ह नोनी अउ माईलोगिन मन ल स्कूटी चलाय के प्रसिक्षण देवत हे। अब ऐनू चंद्राकर ल लोगन ‘‘स्कूटी दीदी‘‘ के नाव ले जाने बर लगे हे। ऐनु चंद्राकर ह बतईन कि बछर दू हजार तेईस म ओमन ह महिला दुपहिया प्रशिक्षण केन्द्र के स्थापना करे रिहीन। अभी तक ओमन ह तीस ले जादा माईलोगिन मन ल स्कूटी चलाना सिखा डरे हे।
उमरदा गांव के सरपंच पन्ना साहू ह आकाशवाणी समाचार ल बतईन कि ऐनु चंद्राकर डहार ले माईलोगिन मन ल स्कूटी चलाय के प्रसिक्षण देना सराहनीय कदम हे।
ऐनू चंद्राकर के योगदान सिरिफ ड्राईविंग प्रसिक्षण तक सीमित नइ हे। ओमन ह सिलाई-कढ़ाई, एलईडी असेंबली, मनरेगा कार्य अउ घरेलू प्रबंधन म घलो माईलोगिन मन ल योग्य बनाय हे।
अउ अब थोरकुन समाचार सार म –
– प्रधानमंत्री राष्ट्रीय बाल पुरस्कार बर काली इकतीस जुलाई तक आवेदन मंगाय गे हवय।
– बीजापुर जिला के मिंगाचल कैम्प म पदस्थ केन्द्रीय रिजर्व पुलिस बल-सीआरपीएफ के एक झन जवान ह आज बिहनिया अपन सर्विस रायफल ले खुदेच ल गोली मारके आत्महत्या कर लेहे।
– दुरूग जिला के उतई थाना प्रभारी शिवप्रसाद चंद्रा ल कथावाचक पंडित प्रदीप मिश्रा के कथा स्थल म प्रवेस के दउरान लापरवाही बरते अउ आदेस के अवहेलना म निलंबित कर दे गेहे।
– जिला रोजगार अउ स्वरोजगार मार्गदर्शन केन्द्र डहार ले राजनांदगांव के आने-आने जनपद पंचायत म एक ले सात अगस्त तक बिहनिया साढ़े दस बजे ले मंझनिया तीन बजे तक प्लेसमेंट कैम्प के आयोजन करे जाही। एखर माध्यम ले एक सौ पचहत्तर पद म भर्ती करे जाही।
अउ
– कोरबा जिला के बनवार गांव म काली कुंआ धसे ले मलबा म दबे एके परिवार के तीन झन सदस्य के सव ल छब्बीस घंटा बाद बाहिर निकाल ले गेहे।