संसद के दूनों सदन म ऑपरेसन सिंदूर उपर बिसेस चर्चा चलत हे। केंद्रीय गृह मंत्री अमित शाह ह चर्चा म भाग लेवत किहीन कि काली ऑपरेसन महादेव के दउरान भारतीस सेना, सीआरपीएफ अउ जम्मू-कश्मीर पुलिस ह पहलगाम आतंकवादी हमला म सामिल तीन झन आतंकवादी मन ल ढेर कर दीस।
श्री शाह ह किहीन कि पहलगाम आतंकी हमला म निरदोस पर्यटक मन ल उंखर परिवार के आगू मारे गे रिहीस। ओमन किहीन कि प्रधानमंत्री नरेंद्र मोदी ह जवाबी कार्रवाई करीन अउ ऑपरेसन सिंदूर ल सफलता के संग पूरा करीन। श्री शाह ह भारतीय सशस्त्र बल के तारीफ करत किहीन कि ओमन ह आतंकवादी मनके सफाया करीन। ऑपरेसन सिंदूर सात मई के सुरू करे गे रिहीस अउ रतिहा एक बजके चार मिनट ले एक बजके चौबीस मिनट के बीच एला संचालित करे गीस, जेमा पाकिस्तान म नौ ठन आतंकी ठिकाना ल ध्वस्त करे गीस अउ सौ ले जादा आतंकवादी मारे गीन। श्री शाह ह विपक्ष उपर ए मुद्दा के राजनीतिकरण करे के आरोप लगइन। ओमन किहीन कि ऑपरेसन सिंदूर के दउरान पाकिस्तान के मारक क्षमता करीबन खतम होय के बाद, ओखर तीर आत्मसमर्पण करे के अलावा अउ कोनो रद्दा नइ बांचे रिहीस।
इही बीच, छत्तीसगढ़ के मुख्यमंत्री विष्णुदेव साय ह ‘‘ऑपरेसन महादेव‘‘ के तहत पहलगाम आतंकी हमला म सामिल तीन झन आतंकवादी मन ल मार गिराय म सुरक्षाबल के साहस के तारीफ करीन हे। ओमन किहीन कि सेना के ए ऑपरेसन ह सिरिफ एक ठन कार्रवाई नइ हे, फेर एहा एक ठन संदेस हे ओ सबो दुस्मन मन बर जउन मन ह भारत के धरती म आतंकी इरादा ले आथे।
राष्ट्रीय शिक्षा नीति
राष्ट्रीय शिक्षा नीति ल आज पांच बछर हो गेहे। पाछू पांच बछर म ए नीति ह भारत म विद्यार्थी-केंद्रित अउ भविष्य अनुरूप शिक्षा प्रणाली के नींव रखे हे। आज नई दिल्ली म अखिल भारतीय शिक्षा समागम म केंद्रीय शिक्षा मंत्री धर्मेन्द्र प्रधान ह किहीन कि राष्ट्रीय शिक्षा नीति विश्व स्तर के शिक्षा ल बढावा देबर बनाय गेहे। ओमन किहीन कि राष्ट्रीय शिक्षा नीति, भारतीय शिक्षा प्रणाली म एक ठन परिवर्तनकारी पुर्नजागरण लेके आवत हे।
स्कूल मरम्मत-राशि
राज्य सरकार ह जांजगीर-चांपा जिला के स्कूल मनके मरम्मत, जीर्णोध्दार अउ जरूरी निर्माण काम बर दू करोड़ रूपिया ले जादा के रासि मंजूर करे हे। उहें, जिला खनिज संस्थान न्यास ले बारह ठन स्कूल म उपराहा कमरा अउ आठ ठन आंगनबाड़ी भवन बर दू करोड़ नौ लाख रूपिया के मंजूरी दे गेहे। राज्य सरकार अउ जिला खनिज संस्थान न्यास ले मंजूर चार करोड़ रूपिया ले जादा के रासि ले जिला के स्कूल मनके मरम्मत, शौचालय निर्माण अउ बुनियादी सुविधा के विस्तार करे जाही।
कलेक्टर जन्मेजय महोबे ह अधिकारी मन ल समय-सीमा म काम ल पूरा करे के निरदेस दीन हे।
नन-न्यायिक रिमांड
मानव तस्करी के आरोप म दुरूग रेलवे स्टेसन ले गिरफ्तार दूनों झन नन ल आज दुरूग जिला न्यायालय म पेस करे गीस। दूनों के जमानत याचिका ल कोर्ट ह खारिज कर देहे। न्यायालय ह एला गंभीर प्रकृति के आरोप मानत आरोपी मन ल आठ अगस्त तक न्यायिक रिमांड म भेज देहे।
इही बीच, धर्मान्तरण अउ मानव तस्करी के मामला म दुरूग सेंट्रल जेल म बंद नन मन ले मिले बर अखिल भारतीय कांग्रेस कमेटी-एआईसीसी के एक ठन प्रतिनिधि मंडल ह पहुंचिस। मीडिया ले गोठबात करत ओमन किहीन कि ए मामला के रिपोर्ट एआईसीसी ल सौंपे जाही। ए मउका म पूर्व मुख्यमंत्री भूपेश बघेल, पूर्व गृह मंत्री ताम्रध्वज साहू अउ दुरूग सहर के पूर्व विधायक अरूण वोरा घलो मौजूद रिहीन।
खबर के मुताबिक नारायणपुर म धर्म परिवर्तन के नांव म नोनी मन ल नर्स के ट्रेनिंग देवाय के बाद नौकरी लगाय के झांसा दे के मामला म ए नन मन ल गिरफ्तार करे गेहे।
माओवादी-मुठभेड़
सुकमा जिला के गोगोंडा के जंगल म सुरक्षा बल अउ माओवादी मनके बीच काली ले मुठभेड़ चलत हे। अभी मिले जानकारी के अनुसार ए मुठभेड़ म एक झन माओवादी मारे गेहे। उहें, माओवादी मन डहार ले लगाय गे आईईडी के चपेट म आय ले दू झन जवान मन घायल हो गेहे।
जिला के पुलिस अधीक्षक किरण चव्हाण अउ सीआरपीएफ के डीआईजी आनंद सिंह राजपुरोहित ह बतइन कि ए अभियान म डिस्ट्रिक्ट रिजर्व गार्ड-डीआरजी, केंद्रीय रिजर्व पुलिस बल- सीआरपीएफ अउ स्पेसल टास्क फोर्स-एसटीएफ के जवान सामिल हे।
कुंआ-हादसा
कोरबा जिला म कोडरी ग्राम पंचायत के बनवार गांव म भारी बरसा के सेति एक ठन कुंआ धस गे। एमा एकेच परिवार के तीन झन सदस्य मन दब गे हवय। कटघोरा के थाना प्रभारी धरम नारायण तिवारी ह आकाशवाणी समाचार ल बतइन कि कुंआ म लगाय गे मोटर पंप ल निकालत खानी ए हादसा होइस। ओमन बतइन कि एसडीआरएफ के टीम ह राहत अउ बचाव काम म लगे हे।
प्रधानमंत्री राष्ट्रीय बाल पुरस्कार-आवेदन
प्रधानमंत्री राष्ट्रीय बाल पुरस्कार बर इकतीस जुलाई तक आवेदन मंगाय गेहे। छत्तीसगढ़ सरकार ह नागरिक, संस्था, अभिभावक अउ शिक्षक मन ले अपील करीन हे कि ओमन ह अपन क्षेत्र के पांच ले अट्ठारा बछर आयु वाले ओ लइका मन ल ए सम्मान बर आवेदन कराय, जउन मन ह बहादुरी, सामाजिक सेवा, पर्यावरण संरक्षण, खेल, कला-संस्कृति अउ विज्ञान-प्रौद्योगिकी जइसन क्षेत्र म असाधारण प्रदर्सन करीन हे। महिला अउ बाल विकास मंत्रालय ह जानकारी देहे कि ‘‘अवॉर्ड्स डॉट जीओवी डॉट इन‘‘ पोर्टल के माध्यम ले सिरिफ ऑनलाइन नामांकन ही मंजूर करे जाही।
नाग पंचमी
नाग पंचमी के परब ल आज प्रदेस म पारंपरिक रूप ले मनाय जावत हे। ए मउका म सहर ले गांव तक नाग देवता के मूर्ति बनाके पूजा-पाठ करे गीस। उहें, कुस्ती अउ दंगल के घलो आयोजन करे जावत हे। रईपुर के दंतेश्वरी अखाड़ा म घलो कुस्ती के आयोजन करे गीस।
सक्ति जिला के कैथा गांव म नाग पंचमी के मउका म बिरतिया बाबा के दर्सन बर लोगन के भीड़ उमड़े रिहीस, उंहा नाग पंचमी म मेला लगथे।
उहें, जांजगीर-चांपा जिला के दल्हापहाड़ म सूर्यकुंड दर्सन बर लोगन के तांता लगे हे। इंहा घलो हर बछर नाग पंचमी म मेला के आयोजन करे जात हे।
अंतर्राष्ट्रीय बाघ दिवस
आज अंतर्राष्ट्रीय बाघ दिवस हरय। ए दिन बाघ मनके प्राकृतिक आवास के सुरक्षा अउ दुनियाभर म उंखर संरक्षण बर जागरूकता बढ़ाय के उद्देस्य ले हर बछर उनतीस जुलाई के वैश्विक स्तर म मनाय जात हे। ए मउका म केंद्रीय पर्यावरण, वन अउ जलवायु परिवर्तन मंत्री भूपेंद्र यादव ह आज नई दिल्ली के राष्ट्रीय प्राणी उद्यान म राखे गे एक ठन कारीकरम म किहीन कि देस म बाघ अभयारण्य के संख्या बाढ़के अब अंठावन हो गेहे।
अउ अब मौसम के हाल…
प्रदेस म काली कतकोन जघा म हल्का ले मध्यम बरसा होय के अउ गरज-चमक के संग छींटा पड़े के संभावना हे। मौसम विभाग ह एक-दू जघा म आकाशीय बिजली गिरे के चेतावनी देहे। मौसम विभाग के अनुसार सिस्टम के कमजोर पड़े ले अवइया तीन दिन तक प्रदेस म वर्षा के गतिविधि म कमी आय हे।
इही बीच, बलौदाबाजार जिला म होवत सरलग बरसा ले अभी तक छै ठन बांध-बैजनाथ, बलौदा, खैरादतान, लवन, बालसमुंद अउ कुकदा म सत-प्रतिसत जलभराव हो गेहे। उहें, तेरह ठन बांध म पचास प्रतिसत ले जादा पानी भराय हे।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म काली तीस जुलाई के बिहनिया ग्यारा बजे ले मंत्रालय म राज्य मंत्रिपरिषद के बइठका होही।
– मुख्यमंत्री ग्राम सड़क अउ विकास योजना के तहत जशपुर जिला ल करीबन बयालीस करोड़ रूपिया के मंजूरी प्रदान करे गेहे। ए रासि ल जिला के बारह ठन प्रमुख ग्रामीण सड़क मन ल बनाय के काम म उपयोग करे जाही।
– खैरागढ़ के रानी रश्मि देवी सिंह शासकीय महाविद्यालय म मूलभूत समस्या ल लेके काली भारतीय राष्ट्रीय छात्र संगठन-एनएसयूआई ह प्रदर्सन करीस। एखर बाद विद्यार्थी मन ह कलेक्ट्रेट जाके कलेक्टर इंद्रजीत सिंह चंद्रवाल ल अपन ज्ञापन सौंपिन।
अउ
– दुरूग जिला के पुराना भिलाई थाना क्षेत्र म खेम म लगे बिजली के तार के चपेट म आय ले बारह बछर के एक झन लइका के मउत होगे। पुलिस ह मृतक के पिता के रिपोर्ट के आधार म खेत मालिक के खिलाफ अपराध दर्ज कर लेहे।