प्रधानमंत्री नरेंद्र मोदी ह केहे हे कि इक्कीसवीं सदी के भारत म विज्ञान ह नवा ऊर्जा के संग आगू बाढ़त हे। आज आकाशवाणी ले मन की बात कारीकरम म ओमन किहीन कि अंतरिक्ष ले शुभांशु शुक्ला के सुरक्षित वापसी ले देस ह गर्व ले भर गेहे। ओमन यहू किहीन कि लइका मन म नवाचार ल बढ़ावा देबर सुरू करे गे इंस्पायर मानक अभियान के तहत हर स्कूल ले पांच झिन लइका चुने जात हे अउ हरेक लइका एक ठिन नवा आइडिया लेके आथे। श्री मोदी ह खुसीयारी देखावत किहीन कि अब तक ले लाखों लइका ए अभियान ले जुड़े हवय।
प्रधानमंत्री ह बतइन कि स्वच्छ भारत मिसन ह अब एक ठिन जन आंदोलन बन गेहे। ए बछर के स्वच्छ सर्वेक्षण म साढ़े चार हजार ले जादा सहर अउ कस्बा जुडे़ हे।
मन की बात कारीकरम म प्रधानमंत्री ह छत्तीसगढ़ के बिलासपुर जिला के बिल्हा नगर पंचायत जघा के घलो जिकर करीन अउ स्वच्छता क्षेत्र म सुघ्घर काम करइया इंहा के माईलोगिन मन के बड़ई करीन।
श्री नरेंद्र मोदी ह हरियाली तीज के मउका म देसवासी मन ल सुभकामना दीन। ओमन यहू किहीन कि अवइया नाग पंचमी, राखी अउ आठे तिहार याने जन्माष्ठमी ह हमर मन के भावना ले जुड़े हे। प्रधानमंत्री ह देसवासी मन ल ए पावन परब के सुभकामना घलो दीन।
मन की बात-छत्तीसगढ़
प्रधानमंत्री नरेंद्र मोदी के मन की बात कारीकरम ल आज मुख्यमंत्री के रईपुर स्थित निवास म घलो सुने गीस। ए मउका म मुख्यमंत्री विष्णुदेव साय ह किहीन कि प्रधानमंत्री ह मन की बात कारीकरम म बिल्हा के उल्लेख करत छत्तीसगढ़ के रहइया मनके गौरव बढ़ाइन हे। ओमन किहीन कि ए बछर छत्तीसगढ़ ह स्वच्छता क्षेत्र म सुघ्घर प्रदर्सन करे हे। राष्ट्रपति द्रौपदी मुर्मु डहार ले सात ठिन सहर ल सम्मानित करे गेहे। श्री साय ह किहीन कि प्रधानमंत्री के मार्गदर्सन म राज्य सरकार ह स्वच्छ भारत मिसन ल जन-जन तक पठोय के संगे मातृसक्ति ल सक्षम अउ सशक्त बनाय बर संकल्पित हे।
उहें, केंद्रीय आवासन अउ सहरी कार्य राज्यमंत्री तोखन साहू ह राजस्थान के सीकर स्थित भाजपा जिला कार्यालय म मन की बात कारीकरम ल सुनिन। ओमन किहीन कि ए ह सिरिफ गोठबात नइ, भलूक संकल्प के श्रृंखला हरय।
केंद्रीय मंत्री-समीक्षा बैठक
केंद्र सरकार ह, छत्तीसगढ़ के नक्सल प्रभावी अउ दूरिहा इलाका म डिजिटल संचार ल मजबूत बनाय बर चार सौ नवा बीएसएनएल टावर लगाय के योजना उपर काम करत हे। ए जानकारी केंद्रीय ग्रामीण विकास अउ दूरसंचार राज्य मंत्री डॉक्टर पेम्मासानी चंद्रशेखर ह आज रईपुर म दीन। ओमन बतइन कि ए टावर के लगाय ले सुरक्षा बल अउ वन विभाग ले मंजूरी मिले बाद क्रमवार कार्रवाई करे जाही।
एखर पहिली, डॉक्टर चंद्रशेखर ह रईपुर म अधिकारी मन के उच्च स्तरीय समीक्षा बइठका लीन। बइठका म ग्रामीण विकास, डाक, दूरसंचार अउ भारत संचार निगम लिमिटेड बीएसएनएल के बड़का अधिकारी मन भाग लीन। ए दउरान केंद्रीय राज्यमंत्री ह प्रधानमंत्री आवास योजना-ग्रामीण अउ प्रधानमंत्री ग्राम सड़क योजना असन योजना मनके क्रियान्वयन उपर संतोष जतइन। डॉक्टर चंद्रशेखर ह बतइन कि नक्सल प्रभावित क्षेत्र मन म विकास काम ल मिसन मोड म लागू करे जात हे।
उहें, केंद्रीय संचार राज्यमंत्री ह आज मुख्मंत्री विष्णुदेव साय ले रईपुर स्थित उंखर निवास कार्यालय म मुलाकात करीन। ए दउरान दूनों नेता मनके बीच ग्रामीण विकास, केंद्र अउ राज्य सरकार के योजना मनके सुघ्घर ढंग ले समन्वय ले क्रियान्वयन, आदिवासी इलाका मन म मजबूत संचार सुविधा अउ माओवाद प्रभावित क्षेत्र मन म चलत विकास काम ल लेके विस्तार ले चर्चा होइस।
सेना भर्ती परीक्षा-परिणाम
भारतीय सेना म भर्ती बर ए बछर जून अउ जुलाई महिना म राखे गे ऑनलाइन संयुक्त प्रवेस परीक्षा के रिजल्ट निकल गेहे। सफल उम्मीदवार मन ल सूचना भारतीय सेना के आधिकारिक वेबसाइट म जारी कर दे गेहे। उम्मीदवार परीक्षा परिणाम ले संबंधित कोनो भी जानकारी या स्पष्टीकरण बर सेना भर्ती कार्यालय नवा रईपुर ले संपर्क कर सकत हे।
स्कूल-निर्देश
केंद्रीय शिक्षा मंत्रालय ह सबो राज्य अउ केंद्रशासित प्रदेस मन ल पढ़इया लइका मनके सुरक्षा अउ कल्याण तय करे बर तुरते बने कदम उठाय के निरदेस जारी करे हे। एमा राष्ट्रीय सुरक्षा संहिता मुताबिक स्कूल अउ पढ़इया लइका मनले जुड़े सहूलियत के अनिवार्य रूप ले सुरक्षा ऑडिट, इमरजेंसी तियारी म कर्मचारी अउ लइका मन बर ट्रेनिंग अउ परामर्स सामिल हे। मंत्रालय ह शिक्षा विभाग, स्कूल बोर्ड अउ एखर ले जुड़े प्राधिकरण मन ले आग्रह करे हे कि बताय गे उपाय मन ल लागू करे म देरी झन करय, अउ एखर बर तुरते कार्रवाई करय।
माओवादी-मुठभेड़
बीजापुर जिला म काली सुरक्षा बल मन संग होय मुठभेड़ म दू झिन माईलोगिन समेत चार झिन माओवादी मारे गेहे। सबो माओवादी मनके सिनाख्त कर ले गेहे। एखर मन उपर सत्रह लाख रूपिया के इनाम घोसित रिहीस। जिला के पुलिस अधीक्षक जितेन्द्र यादव ह बतइन कि दक्षिण-पश्चिम क्षेत्र म माओवादी मन के मौजूदगी के खुफिया सूचना मिले बाद डिस्ट्रिक्ट-रिजर्व गार्ड-डीआरजी के टीम ह तलासी अभियान म निकले रिहीस, तभे बासागुड़ा अउ गंगालूर थाना के सरहदी जंगल म आगू ले घात लगाय बइठे माओवादी मन सुरक्षा बल मन उपर फायरिंग सुरू कर दीस, फेर जवान मन डहार ले करे गे जवाबी कार्रवाई म चार झिन माओवादी मारे गीस। घटना जघा ले एक ठिन एसएलआर, तीन ठिन बीजीएल लॉन्चर, सेल्फ लोडिंग राइफल समेत बड़अकन हथियार मिले हे।
ओति, दंतेवाड़ा जिला के मालेवाही थाना क्षेत्र ले सुरक्षा बल के टीम ह गांव कहचेनार सोज तलासी अभियान म निकले रिहीस, तभे जवान मन माओवादी मन डहार ले बनाय गे तीन ठिक स्मारक ल ध्वस्त कर दीन।
जीएसटी-छापा
राज्य जीएसटी विभाग ह रायगढ़ स्थित मेसर्स श्याम सर्जिकल उपर कार्रवाई करत सुरूआती जांच म पाछू चार-पांच बछर म करीबन अड़तालीस करोड़ रूपिया के जिनिस ल चार ले पांच गुणा जादा रेट म सप्लाई करके अउ चार सौ ले पांच सौ प्रतिसत के फायदा लेहे। ए लाभ लुकाय अउ जीएसटी देनदारी ले बांचे बर फर्म के निर्देसक ह अपन परिवार वाले मन के नांव म तीन ठिन आने फर्म बनाके आपसे म खरीदी-ब्रिकी देखा दीस।
मुख्यमंत्री विष्णुदेव साय ह केहे हे कि राज्य सरकार ह सरकारी पइसा अउ जन स्वास्थ्य ले जुड़े सेवा मन म कोनो भी तरह के भ्रष्टाचार ल नइ बर्दास्त करही। ए तरह के धोखाधड़ी ह न केवल आर्थिक अपराध हे, भलूक जनहित संग विस्वासघात घलो हे।
बारिश
प्रदेस म पाछू तीन दिन ले चलत होवत सरलग बरसा ले नदिया-नरवा उफनावत हे, जेखर ले जन-जीवन उपर भारी असर पड़े हे। दंतेवाड़ा जिला के बारसूर इलाका म ए झारावाया नाला म डेम पार करत बेरा बाप अउ बेटा बोहा गीन, फेर पुलिस अउ बचाव दल के टीम ह बेटा ल बचा लेहे अउ बाप ल खोजे जात हे।
ओति, खैरागढ़-छुईखदान-गंडई जिला के इतवारी बाजार जघा म एक झिन जवान लइका घलो नरवा म बोहागे।
उहें, गौरेला-पेण्ड्रा-मरवाही जिला म सरलग बरसा ले गुजरा अउ भेड़मा नाला समेत बड़अकन पुल-पूलिया म पानी ह खतरा के चिन्हा ले उपर बोहावत हे।
फिट इंडिया
छत्तीसगढ़ समेत देसभर म आज ‘‘फिट इंडिया संडे ऑन साइकिल‘‘ के आयोजन करे गीस, जेखर उद्देस्य लोगन मन ल फिटनेस सोज जागरूक करना अउ पर्यावरण बचाय के आरो देना रिहीस। दुरूग जिला के भिलाई म केंद्रीय औद्योगिक सुरक्षा बर सीआईएसएफ भिलाई यूनिट के उप महानिरीक्षक नागेन्द्र नाथ त्रिपाठी ह पांच किलोमीटर साइकिल चलाके ए अभियान के अगुवई करीन।
इंहा, बतादन कि ए कारीकरम ह प्रधानमंत्री नरेंद्र मोदी डहार ले सुरू करे गे फिट इंडिया मूवमेंट के हिस्सा हरय।