दुरूग जिला के ग्राम सुरजीडीह अउ रामपुर नाला के बाड़ म तीन झन फंस गे रिहीन, जेन ल आज एसडीआरएफ के टीम ह सुरक्षित निकाल लेहे। एसडीआरएफ प्रभारी अउ जिला सेनानी नागेन्द्र कुमार बानसूर ह बतइन कि बाढ़ म लोगन मनके फंसे के सूचना मिलते ही एसडीआरएफ के टीम तुरते रवाना होगे अउ कड़ा मसक्कत के बाद तीन झन लोगन अउ पशु मन ल सुरक्षित निकाले गेहे।
ओति, सरगुजा जिला म लगातार बरसा ले कई ठन नदी नाला उफान म हे। मैनपाट म मछली नदी म तीन झन बोहागे। ऐति, खैरागढ़ समेत जिला के वनांचल क्षेत्र म पाछू रतिहा होवत बरसा के बाद कई ठन इलाका म बाढ़ जइसे हालात हे। ईतवारी बाजार समेत निचला क्षेत्र म पानी भर गेहे। नदी-नाला मनके जल स्तर बाढ़े ले पूल-पुलिया के उपर पानी बोहावत हे। जिला अउ पुलिस प्रशासन के टीम ल मउका म तैनात करे गेहे।
उहें, जांजगीर-चांपा जिला म रिंगनी नाला उफान म हे। पूल के उपर दू फीट पानी बोहावत हे अउ आवागमन बाधित हे। मउका म होमगार्ड के टीम तैनात करे गेहे। अइसने बिलारी नाला घलो उफान म हे अउ पूल ले दू फीट उपर पानी बोहावत हे, जेखर ले राहौद-सलखन मार्ग म आवागमन रूक गेहे।
अइसने, महासमुंद जिला म घलो महानदी समेत कई ठन नदी-नाला के जल स्तर बाढ़ गेहे। उहें, नदी किनारे के गांव अउ निचला बस्ती मन म पानी भरे ले सामान्य जनजीवन प्रभावित होय हे।
केन्द्रीय मंत्री-नारायणपुर
केंद्रीय ग्रामीण विकास अउ संचार राज्य मंत्री डॉक्टर पेम्मासानी चंद्रशेखर ह अपन छत्तीसगढ़ प्रवास के दउरान नारायणपुर जिला म आने-आने योजना अउ संस्थान मनके निरीक्षण करीन। ए दउरान ओमन ग्राम पंचायत खड़कागांव म मनरेगा योजना के अंतर्गत व्यक्तिमूलक पौधरोपण कारीकरम म सामिल होइन। इंहा किसान मनके भूमि म आम, अमरूद, काजू, नींबू अउ कटहल के पौधा लगाय गीस।
एखर बाद केंद्रीय राज्य मंत्री ह ‘‘प्रधानमंत्री जनमन योजना‘‘ के तहत काकोड़ी ले बागडोंगरी तक बने सड़क के अवलोकन घलो करीन। संगेसंग ओमन बागडोंगरी म प्रधानमंत्री आवास योजना के तहत नवनिर्मित आवास के निरीक्षण कर लाभार्थी पार्वती पोटाई संग गोठबात करीन।
एखर अलावा, डॉक्टर चंद्रशेखर ह एजुकेशन हब गरांजी स्थित ‘परीयना निःसुल्क जेईई-नीट कोचिंग संस्थान‘ अउ परीयना दिव्यांग आवासीय विद्यालय के निरीक्षण कर उंहा के पढ़इया लइका मन संग घलो गोठबात करीन।
इही बीच, केंद्रीय राज्यमंत्री ह आज मोहला-मानपुर-अंबागढ़ चौकी जिला के मोहला म अधिकारी मन संग बइठका लेके शासन के योजना मनके समीक्षा करीन। एखर बाद ओमन भाजपा के पदाधिकारी अउ कार्यकर्ता मन संग मुलाकात घलो करीन।
मुख्यमंत्री-प्रधानमंत्री बधाई
प्रधानमंत्री नरेंद्र मोदी ‘‘ मॉर्निंग कंसल्ट ग्लोबल लीडर एप्रूवल रेटिंग ट्रेकर‘‘ म विश्व के सबले लोकप्रिय नेता के रूप म शीर्ष स्थान म हे। मुख्यमंत्री विष्णुदेव साय ह सोशल मीडिया प्लेटफार्म म प्रधानमंत्री नरेंद्र मोदी ल ए उपलब्धि बर बधाई अउ सुभकामना देहे। मुख्यमंत्री ह किहीन कि ए भारत बर गर्व अउ प्रेरणा के बिसय आय कि प्रधानमंत्री नरेंद्र मोदी वैश्विक मंच म प्रभावसीलता लोकप्रियता अउ नेतृत्व क्षमता के प्रतीक बने हुए हे।
करगिल विजय दिवस
देस आज करगिल विजय दिवस मनावत हे। ए दिवस उन्नीस सौ निनान्वे म पाकिस्तान के खिलाफ होय करगिल युध्द म सहीद होय वीर जवान मनके याद म मनाय जाथे। राष्ट्रपति द्रौपदी मुर्मु अउ प्रधानमंत्री नरेंद्र मोदी ह ए अवसर म सहीद मन ल श्रध्दांजलि अर्पित करे हे। राष्ट्रपति ह किहीन कि राष्ट्र बर उंखर समर्पण अउ सर्वोच्च बलिदान नागरिक मन ल प्रेरित करत रइही।
प्रधानमंत्री ह किहीन कि आज के दिन उन वीर सपूत मनके अदम्य साहस अउ पराक्रम के याद दिलाथे, जेन मन राष्ट्रीय गौरव के रक्षा बर अपन जीवन समर्पित कर दीन।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘‘मन की बात‘‘ कारीकरम म अपन बिचार साझा करही। ए मासिक रेडियो कारीकरम के एक सौ चौबीसवीं कड़ी होही। आकाशवाणी अउ दूरदर्शन के सबो नेटवर्क, आकाशवाणी समाचार के वेबसाइट अउ न्यूज ऑन मोबाइल ऐप म ए कारीकरम सीधा प्रसारित होही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल म घलो एखर सीधा प्रसारण करे जाही।
तोखन साहू-गृहमंत्री मुलाकात
केंद्रीय आवासन और शहरी कार्य राज्यमंत्री तोखन साहू ह केंद्रीय गृह मंत्री अमित शाह ले नई दिल्ली म मुलाकात करीन। ए मउका म श्री साहू ह आने-आने योजना अउ विकास काम मनके जानकारी साझा करीन। मुलाकात के दौरान दूनों नेता मनके बीच राष्ट्रीय सुरक्षा, आंतरिक सांति व्यवस्था, नक्सल प्रभावित क्षेत्र मनके विकास, सहरी विस्तार अउ सहकारी संगठन मनके भूमिका जइसे महत्वपूर्ण बिसय उपर चर्चा होइस। श्री साहू ह किहीन कि केंद्रीय गृह मंत्री के नेतृत्व म देस म नक्सलवाद के खिलाफ निर्णायक अभियान चलाय जात हे। एखर ले छत्तीसगढ़ समेत पूरा देस म स्थायी सांति अउ विकास के दिसा म काम होवत हे।
मोबाइल नेत्र जांच वैन
उप मुख्यमंत्री विजय शर्मा अउ स्वास्थ्य मंत्री श्याम बिहारी जायसवाल ह कबीरधाम जिला म उदयाचल संस्था डहार ले संचालित मोबाइल नेत्र जांच वैन ल हरा झंडी दिखाके रवाना करीन। ए मोबाइल वैन जिला के तरेगांव, रेंगाखर, कुकदूर, बोक्काखार जइसे दुर्गम अउ दूरदराज वाले गांव म जाके मोतियाबिंद अउ नेत्र संबंधी रोग के पहिचान करही। जांच के बाद मरीज मन ल उचित सलाह, इलाज अउ जरूरत पड़े म ऑपरेसन के सुविधा घलो प्रदान करही। ए वैन म प्रसिक्षित नेत्र चिकित्सक मन के टीम के संगेसंग आधुनिक नेत्र जांच उपकरण मौजूद रइही।
खाद्य आयोग-शपथ ग्रहण
छत्तीसगढ़ खाद्य आयोग के नवनियुक्त अध्यक्ष संदीप शर्मा ह अपन पदभार ग्रहण कर लेहे। ए मउका म विधानसभा अध्यक्ष डॉक्टर रमन सिंह अउ खाद्यमंत्री दयालदास बघेल मौजूद रिहीन। रायपुर के दीनदयाल उपाध्याय ऑडिटोरियम म आयोजित सपथ ग्रहण समारोह ल संबोधित करत हुए विधानसभा अध्यक्ष डॉक्टर रमन सिंह ह किहीन कि सार्वजनिक वितरण प्रणाली के तहत गरीब अउ प्राथमिकता वाले राशनकार्डधारी परिवार मन ल गुणवत्तायुक्त राशन हर महिना मिलय, एखर जिम्मेदारी राज्य सरकार ह खाद्य आयोग के अध्यक्ष ल सौंपे हे। उहें, खाद्य आयोग के नवनियुक्त अध्यक्ष संदीप शर्मा ह किहीन कि सरकार ह उनला जने जिम्मेदारी देहे, ओखर निर्वाह ओमन पूरा निष्ठा अउ ईमानदारी के संग करही।
‘‘मिलेट मिक्सी‘‘
दंतेवाड़ा जिला म किसान अउ ग्रामीण परिवार के पोषण ल बेहतर बनाय के दिसा म एक ठन नवा पहल करे गेहे। जिला प्रशासन ह गीदम विकासखंड के बीस झन किसान मन ल पारंपरिक अनाज जइसे कोदो, कोसरा अउ रागी के प्रोसेसिंग बर ‘‘मिलेट मिक्सी‘‘ मसीन बांटे हे। एखर ले किसान अपन घर म ही, ए अनाज मनके सफाई अउ पिसाई कर एला अपन खान-पान म सामिल कर सकही। उहें, किसान अपन उत्पाद ल बाजार म अच्छा दाम म बेच सकही, जेखर ले किसान मनके आमदनी बाढ़ही अउ ग्रामीण मन के पोषण स्तर म सुधार होही। एखर बर जिला के प्रभारी मंत्री केदार कश्यप ह मिलेट्स उत्पादक किसान मन ल बधाई दीन।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ म आकाशवाणी के सबो केंद्र एके संग रिले करही। ए बखत के अंक म ‘‘धमतरी‘‘ जिला के गतिविधि के बारे म जानकारी दे जाही।