कबीरधाम जिला के ग्राम पंचायत जिंदा ल प्रदेस के पहिली टीबी मुक्त ग्राम घोसित करे गेहे। राज्य के उप मुख्यमंत्री विजय शर्मा अउ स्वास्थ्य मंत्री श्याम बिहारी जायसवाल ह आज ग्राम जिंदा पहुंचके ग्राम पंचायत ल टीबी मुक्त होय के प्रमाण पत्र प्रदान करीन।
ए मउका म स्वास्थ्य मंत्री श्री जायसवाल ह िंकहीन कि टीबी मुक्त भारत अभियान ल छत्तीसगढ़ म गंभीरता ले लागू करे गेहे। ओमन किहीन कि टीबी जेला पहिली एक गंभीर बीमारी माने जात रिहीस, अब आधुनिक चिकित्सा, दवाई अउ जन सहभागिता के सेति नियंत्रण अउ समाप्ति के दिसा म हे।
अमित शाह-सहकारिता नीति
केंद्रीय सहकारिता मंत्री अमित शाह ह काली नई दिल्ली म राष्ट्रीय सहकारिता नीति-दू हजार पच्चीस जारी करीन। ए बेरा श्री शाह ह किहीन कि ए नीति विकसित भारत दू हजार सैंतालीस के लक्ष्य ल प्राप्त करे म महत्वपूर्ण भूमिका निभाही।
मुख्यमंत्री-स्वच्छता दीदी सम्मान
मुख्यमंत्री विष्णुदेव साय ह आज जशपुर जिला के ग्राम बगिया म राखे गे कारीकरम म स्वच्छता दीदी मन ल सम्मानित करीन। ए मउका म मुख्यमंत्री ह किहीन कि ए स्वच्छता केवल एक अभियान नइ हे, बल्कि हम सबके सामूहिक जिम्मेदारी हरय। ओमन किहीन कि देस ल स्वच्छ अउ स्वस्थ्य बनाय म स्वच्छता दीदी मनके भूमिका बहुत महत्वपूर्ण रहय हे। अेमन किहीन कि जशपुर जिला ह स्वच्छता के क्षेत्र म राष्ट्रीय स्तर म अपन अलग पहिचान बनाय हे। मुख्यमंत्री ह जम्मों नागरिक मन ले आह्वान करीन कि ओमन अपन घर, मोहल्ला, चौराहा, मंदिर अउ सार्वजनिक स्थल के सफाई ल अपन कर्तव्य मानय अउ स्वच्छता ल अपन आदत म सामिल करय।
बतादन कि स्वच्छता सर्वेक्षण म जशपुर नगर ह बीस ले पचास हजार के जनसंख्या वर्ग म पूरा देस म दसवां स्थान पाय हे।
मुख्यमंत्री-एनसीसी एयर स्क्वाड्रन
जशपुर जिला के पीएमश्री विद्यालय म अब जल्द ही एनसीसी अउ एयर स्क्वाड्रन के सुरूआत करे जाही। एनसीसी के एयर स्क्वाड्रन प्रदेस के तीसरा एयर स्क्वाड्रन होही। मुख्यमंत्री विष्णुदेव साय ह आज विद्यालय म एयर एनसीसी बर चयन होय पच्चीस झन मेधावी विद्यार्थी मन ल एनसीसी कैडेट के बैच लगाके पंजीयन सुरूआत करीन। ए एयर स्क्वाड्रन के जरिया जिला के युवा मन ल अब एनसीसी म अपन कैरियर बनाय बर मदद मिल पाही।
माओवादी-गिरफ्तार
सुकमा जिला के जगरगुंडा थाना क्षेत्र म सक्रिय चार माओवादी मन ल सुरक्षा बल ह आज गिरफ्तार करे हे। पुलिस ह बतइन कि केंद्रीय रिजर्व पुलिस बल-सीआरपीएफ अउ पुलिस बल के संयुक्त टीम ग्राम बोडनगुरा अउ बेदरे कोति रवाना होय रिहीस। इही दउरान घेराबंदी करके ए माओवादी मन ल पकड़े गीस। ए माओवादी पाछू महिना बेदरे कैम्प म तैनात सुरक्षा बल ल नुकसान पहुंचाय के इरादा ले आईईडी लगाय के घटना म सामिल रिहीन। ए माओवादी करा ले एक ठिन टिफिन बम घलो बरामद करे गेहे। एमन के खिलाफ जगरगुंडा थाना म कई ठिन मामला दरज हरय। ए जम्मों झन ल दंतेवाड़ा न्यायालय म पेस करे के बाद न्यायिक रिमांड म जेल भेज दे गेहे।
बारिश
प्रदेस के राजधानी रईपुर समेत मध्य छत्तीसगढ़ के आने-आने जिला म आज बिहनिया ले ही रूक-रूक के सरलग बरसा होवत हे। बरसा के सेति बहुतअकन रद्दा मन म पानी भर गेहे। बारिश के सेति जनजीवन प्रभावित होय हे।
बिलासपुर जिला के सीपत थाना क्षेत्र के झलमला के तुंगन नाला म पाछू रतिहा एक ठिन कार बोहागे। ए कार म पांच झन लइका समेत नौ मनखे सवार रिहीन। एमा ले चार लइका समेत आठ मनखे मन कइसनो भी तउर के बाहिर निकल गीन, फेर तीन साल के एक लइका पानी म कार समेत गवागे, जेखर तालास करे जात हे।
उहें, कोरबा जिला म घलो भारी बरसा ले कई गांव मनके मुख्य मार्ग ले सड़क संपर्क टूट गेहे। जिला के ग्राम सुखरीखुर्द निवासी एक मनखे मनेवार सोन नदी म बोहागे, जेखर तलास करे जात हे। सूचना मिलते ही उरगा पुलिस मउका म पहुंचिस अउ रेस्क्यू ऑपरेसन चलात हे।
ऐति, सक्ति जिला म सरलग बारिस के सेति नदिया नाला उफान म हे। मालखरौदा क्षेत्र के भेड़ीकोना पूल के बोराई नदी ले चार फीट उपर पानी बोहाथे। एखर सेति अवई-जवई बंद हो गेहे। उहें, छपोरा ले हसौद जवइया मुख्य मार्ग घलो बंद हे। पूलिया के दूनों कोति गाड़ी मनके लंबा लाइन लगे हे। पुलिस ह सुरक्षा ल देखत बेरिकेड्स लगाय हे।
इही बीच, धमतरी जिला म चार दिन म होय बारिस ले गंगरेल बांध के जलस्तर तीन प्रतिसत तक बाढ़ गेहे। डेम के चौबीस जुलाई के जल स्तर बाढ़के छप्पन प्रतिसत दरज करे गेहे। एखर अलावा जिला के दूसर बांध मनके के घलो जल स्तर बाढ़े लगे हे।
इही बीच, मौसम विभाग ह काली प्रदेस के एक-दू जघा म भारी ले अतिभारी बरसा होय अउ गाज गिरे के चेतावनी देहे। भारी बरसा के क्षेत्र मुख्यता बिलासपुर संभाग के जिला के संघरा दुरूग अउ रईपुर संभाग के जिला संभावित हे। मौसम विज्ञानी एच.पी.चंद्रा ह बतइन कि प्रदेस म काली अधिकांश जघा म हल्का ले मध्यम बरसा होही।
मुख्यमंत्री-एम्बुलेंस
मुख्यमंत्री विष्णुदेव साय ह आज जशपुर जिला के ग्राम बगिया ले अत्याधुनिक सुविधा ले लैस एम्बुलेंस ल हरा झंडा दिखाके रवाना करीन। ए एम्बुलेंस बैंक ऑफ इंडिया डहार ले कार्पोरेट सामाजिक उत्तरदायी सीएसआर निधि ले प्रदत्त हरय। जेमा बेसिक लाइफ सपोर्ट सिस्टम समेत दूसर उन्नत सुविधा उपलब्ध कराय गेहे। ए एम्बुलेंस मुख्य रूप ले मनोरा क्षेत्र म स्वास्थ्य सुविधा उपलब्ध कराय बर रखे जाही, जेखर सेवा जरूरत अनुसार पूरा जिला म ले जा सकही। एखर ले आपातकालीन परिस्थिति म त्वरित चिकित्सा परिवहन सेवा सुनिश्चित हो सकही। जेखर ले ग्रामीण अउ दूरस्थ क्षेत्र म गंभीर रूप ले बीमार अउ दुर्घटना ग्रस्त मरीज मन ल बेरा म स्वास्थ्य सहायता मिल सकही। ए मउका म मुख्यमंत्री ह किहीन कि राज्य सरकार हर मनखे तक गुणवत्तापूर्ण अउ त्वरित स्वास्थ्य सेवा पहुंचाय बर संकल्पित हरय।
ड्रोन खेती
छत्तीसगढ़ के पारंपरिक तिहार हरेली के मउका म काली बालोद जिला के तीन झन ड्रोन दीदी मन आधुनिक कृषि यंत्र ड्रोन के पूजा करके हरेली तिहार मनाइन। ड्रोन दीदी योजना के तहत तकनीकी रूप ले प्रसिक्षित चित्ररेखा साहू, भावना साहू अउ रूचि साहू के मानना हे कि ड्रोन के माध्यम ले फसल म नैनो उर्वरक छिड़के के काम मिनट म पूरा हो जाथे। एमन बतइन कि ड्रोन तकनीक ले खेती म समय अउ मेहनत के बचत होत हे।
उपराष्ट्रपति-चुनाव प्रक्रिया
निर्वाचन आयोग ह कानून अउ न्यायमंत्री के परामर्स ले राज्य सभा के महा सचिव ल उपराष्ट्रपति के निर्वाचन बर चुनाव अधिकारी नियुक्त करे हे। आयोग ह राज्यसभा सचिवालय के संयुक्त सचिव अउ निर्देशक ल उपराष्ट्रपति चुनई बर सहायक चुनाव अधिकारी बनाय हे। संविधान के धारा तीन सौ चौबीस के तहत निर्वाचन आयोग ल भारत के उपराष्ट्रपति के चुनई कराय के अधिदेस प्राप्त हे।
बातों-बातों में
स्वच्छता सर्वेक्षण म ए बछर छत्तीसगढ़ के सात ठिन नगर निकाय मन ल राष्ट्रीय पुरस्कार मिले हे। समसामयिक बिसय म आधारित हमर कारीकरम ‘‘बातों-बातों में‘‘ म ए बखत स्वच्छता के क्षेत्र म छत्तीसगढ़ के उत्कृष्ट प्रदर्सन उपर केंद्रित रिही। ए कारीकरम के प्रसारण काली छब्बीस जुलाई के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
अउ अब थोरकुन समाचार सार म –
– काली कारगिल विजय दिवस हरय। ए मउका म मुख्यमंत्री विष्णुदेव साय ह कारगिल युध्द म सहीद वीर जवान मन ल श्रध्दांजलि अर्पित करीन हे। ओमन किहीन कि छब्बीस जुलाई के दिन भारतीय सेना के अदम्य साहस, अटल संकल्प अउ मातृभूमि बर सर्वस्व अर्पण करइया सपूत मन अमर बलिदान के प्रतीक हे।
– श्रीरामलला दर्सन योजना के तहत मुंगेली जिला के चौंसठ तीर्थयात्री अयोध्या म श्रीरामलला दर्सन करही। जिला पंचायत अध्यक्ष श्रीकांत पाण्डेय ह तीर्थ यात्री मन ल हरा झंडा दिखाके अयोध्या धाम बर रवाना करीन।
अउ
– जशपुर जिला के पत्थलगांव वन परिक्षेत्र म काली ले मौजूद एक मादा हाथी अउ उंखर लइका के वन विभाग निगरानी करत हे।