मुख्यमंत्री विष्णुदेव साय ह कहिन हे कि रद्दा म घुमइया मवेसी मनके रोकथाम जरूरी रूप ले करे जाय। श्री साय ह काली मंत्रालय म राखे गे उच्च स्तरीय बइठका म अधिकारी मन ले कहिन कि रद्दा दुर्घटना के सबले मुख्य वजह आवास मवेसी हरय, जउन ल नियंत्रण म राखे बर सबो संबंधित विभाग ल तुरते ठोस अउ समन्वित कार्ययोजना संग काम करे बर पड़ही। ओमन किहीन कि आवारा मवेसी मन ल दुर्घटना होय के समस्या सहर के संग गांव-गंवई के क्षेत्र म घलो हवय अउ एखर निपटारा बर कोनों किसम के ढिलाई बर्दास्त नइ करे जाही।
मुख्यमंत्री-समीक्षा
मुख्यमंत्री विष्णुदेव साय ह आज मंत्रालय म महिला अउ बाल विकास विभाग के योजना के समीक्षा करीन। ओमन अधिकारी मन ले किहीन कि माईलोगिन अउ लोगन मन म केन्द्रित योजना के सचिव स्तर म जिलावार सरलग निगरानी राखे जाय। उहें, ओमन महिला अउ बाल विकास विभाग अउ स्वास्थ्य विभाग ल जुर मिलके काम करे बर किहीन। ओमन किहीन कि अवइया कलेक्टर कॉन्फ्रेंस म माईलोगिन अउ लइका मन बर चलाय जात योजना के समीक्षा करे जाही। बइठका म मुख्यमंत्री ह पीएम जनमन योजना म चलाय जात एक सौ संतानवे आंगनबाड़ी केन्द्र के जानकारी लीन अउ विशेष पिछड़ी जनजाति के लइका मनके विकास बर बने ढंग ले काम करे के निरदेस दीन।
अरूण साव-सम्मान समारोह
उपमुख्यमंत्री अउ नगरीय प्रशासन विकास मंत्री अरूण साव आज रईपुर म राखे गे स्वच्छता दीदी अउ सफाई मित्र मनके सम्मान समारोह म संघरीन। कार्यक्रम म ओमन रईपुर ल देस के चौथा स्वच्छ सहर बनाय म योगदान देवइया पच्चीस झिन स्वच्छता निरीक्षक, एक सौ चवालीस स्वच्छता दीदी अउ बावन झिन सफाई मित्र मनके सम्मान करीन। समारोह म बोलत श्री साव ह किहीन कि रईपुर ल देस के सबले साफ-सुथरा सहर बनाय बर साफ-सफाई के काम म सहभागिता बढ़ाना जरूरी हे।
निर्वाचन आयोग-उपराष्ट्रपति
उपराष्ट्रपति जगदीप धनखड़ के इस्तीफा के बाद निर्वाचन आयोग ह ए पद बर चुनाव के काम सुरू कर देहे। केन्द्रीय गृह मंत्रालय कोति ले काली श्री धनखड़ के इस्तीफा के अधिसूचना के बाद ए प्रक्रिया सुरू होइस। सुरूआती गतिविधि पूरा होय के बाद आयोग ह उपराष्ट्रपति पद बर चुनाव कार्यक्रम के घोसना करही।
प्रमुख सचिव-निर्देश
आदिम जाति विकास विभाग के प्रमुख सचिव सोनमणी बोरा ह वीडियो कॉन्फ्रेंसिंग ले जिला म पदस्थ सहायक आयुक्त मनके बइठका लीन। बइठका म ओमन सोशल मीडिया ले कुछेक जिला के छात्रावास-आश्रम म खरीदी संबंधी गड़बड़ी जइसन भ्रामक समाचार ल लेके संसो जतईन अउ किहीन कि एखर ले विभाग के छबि धूमिल होय हे। ओमन किहीन कि अइसन प्रकरण के जांच कराय जावत हे। जांच म दोषी मनके खिलाफ कार्रवाई करे जाही।
राष्ट्रीय प्रसारण दिवस
आज राष्ट्रीय प्रसारण दिवस हरय। बछर उन्नीस सौ सत्ताईस म इही दिन देस म पहिली रेडियो प्रसारण इंडियन ब्रॉडकास्टिंग कंपनी के बम्बई स्टेसन ले सुरू होय रिहीस। आठ जून उन्नीस सौ छत्तीस के भारतीय राज्य प्रसारण सेवा के नाव बदल के ऑल इंडिया करे गीस। ए दिन भारत के विकास, शैक्षिक प्रसार अउ सांस्कृतिक संरक्षण म प्रसारण के महत्ता के भूमिका बताथे। आकाशवाणी अपन आदर्श वाक्य ‘‘बहुजन हिताय-बहुजन सुखाय‘‘ म खरा उतरत जनता ल सूचना दे, सिक्षित करे अउ उंखर मनोरंजन करे म हमेसा तियार हवय।
ए मउका म प्रसार भारती के अध्यक्ष नवनीत कुमार सहगल ह किहीन कि आकाशवाणी बरसो ले सिक्षा, सूचना अउ मनोरंजन ल बढ़ावा दे म महत्ता के भूमिका निभावत हे।
ृ उहें, प्रसार भारती के सीईओ गौरव द्विवेदी ह किहीन कि नब्बे बछर जुन्ना राष्ट्रीय धरोहर के रूप म आकाशवाणी आज घलो मजबूती ले आगू बढ़त हे।
आकाशवाणी के महानिदेशक डॉक्टर प्रज्ञा पालीवाल गौड़ ह किहीन कि भारतीय प्रसारण के यात्रा परिवर्तनकारी अउ राष्ट्र निर्माणकारी रेहे हे।
स्वास्थ्य विभाग-सर्जिकल ब्लेड
स्वास्थ्य विभाग ह सिकईत के आधार म खराब गुणवत्ता वाले सर्जिकल ब्लेड ल मेडिकल कॉलेज अउ सरकारी अस्पताल ले वापिस मंगवा लेहे। राज्य के आने-आने अस्पताल अउ चिकित्सा संस्थान मन म बांटे गे ए सर्जिकल ब्लेड म जंग लगे के सिकईत विभाग ल मिले रिहीस। एला ऑपरेसन थियेटर मन म बउरे ले मरीज मनके संक्रमित होय के खतरा रिहीस।
हाईकोर्ट-इलेक्ट्रिक बस
बिलासपुर जिला के संगेसंग राज्य के आने जिला मन म नवा इलेक्ट्रिक बस चलाय के काम सुरू नइ होय ले लोगन मन ल होवत मुश्कल म छत्तीसगढ़ उच्च न्यायालय ह स्वतः संज्ञान लेहे। एक जनहित याचिका म सुनवाई के दउरान मुख्य न्यायाधीश रमेश सिन्हा के डिवीजन बेंच म सासन कोति अतिरिक्त महाधिवक्ता यशवंत सिंह ठाकुर ह बतईन कि बिलासपुर के नौ ठिन खराब सिटी बस म ले सुधारे गे पांच ठिन बस चलाय जात हे। बांचे बस ल जल्दीच चलाय जाही।
उहें, परिवहन सचिव ह बतईन जल्दीच प्रदेस म ई-बस चलाय जाही, जेखर बर ई-बस सेवा योजना म बस बिसाय बर टेंडर जारी करे गेहे। एखर पहिली, शासन ह अपन कोति ले सपथ पत्र पेश करके बताय रिहीन कि दुरूग, भिलाई, बिलासपुर अउ कोरबा बर पहिलीच एक सौ चालीस बस मंजूर करे गेहे। उहें, रईपुर सहर बर मध्यम श्रेणी के सौ ठिन अउ बस मंजूर करे गेहे। हाईकोर्ट ह ए मामला के अवइया सुनवाई सितंबर महीना म तय करे गेहे।
हरेली-बस्तर दशहरा
छत्तीसगढ़ के सभ्यता अउ लोक संस्कृति के परब हरेली काली प्रदेसभर म उछाह के संग मनाय जाही। ए दिन किसान मन अपन कुल देवता, गाय-गरूवा अउ खेती म काम अवइया औजार के पूजा करथे।
हरेली परब ले एक दिन पहिली आज महासमुंद जिला के बसना अउ भंवरपुर क्षेत्र म हरेली के तिहार मनाय गीस। ए बेरा किसान मन ह कृषि यंत्र के पूजा-पाठ करके बने फसल के कामना करीन।
मुख्यमंत्री विष्णुदेव साय अउ विधानसभा अध्यक्ष डॉक्टर ह हरेली परब के प्रदेसवासी मन ल बधाई अउ सुभकामना दीन हे।
हरेली अमावस्या के संगेसंग काली ले पचहत्तर दिवसीय विश्व प्रसिद्ध बस्तर दशहरा के परब सुरूआत हो जही। काली पहिली दिन पाठ जात्रा पूजा विधान के रस्म अदा करे जाही। ए दउरान पारंपरिक मांझी-चालकी, मेम्बर-मेम्बरीन, पुजारी, पटेल, नाईक-पाईक, सेवादार रथ निर्माया खातिर औजार बनाय के ठुरलू खोटला रस्म निभाही।
महिलाएं-राखी
भाई-बहिनी के मया के परब राखी ल देखत महासमुंद के आंगनबाड़ी कार्यकर्ता अउ महतारी वंदन योजना के लाभार्थी माईलोगिन मन अपन हाथ ले राखी बनाके देस के सीमा के रक्षा करत वीर सैनिक मन बर भेजे हे। ए राखी संग ओमन पाती घलो लिखे हे, जेमा वीर सैनिक भाई मन बर मया, सम्मान अउ आभार जतईन हे। महिला अउ बाल विकास विभाग के पर्यवेक्षक शीला प्रधान ह किहीन कि घर ले दूरिहा रहि के देस के सेवा करत वीर सैनिक मन ल बहिनी मन अपन मया-परेम भेजत हे।
दुर्घटना
रायपुर के मंदिर हसौद थाना क्षेत्र म पाछु रतिहा होय रद्दा दुर्घटना म बस्तर के पूर्व सांसद दिनेश कश्यप के बेटा अउ वन मंत्री केदार कश्यप के भतीजा निखिल कश्यप के मउत होगे हे। उहें, एक आने मनखे गंभीर रूप ले घायल होगे हे। खबर के मुताबिक निखिल अपन संगी फटफटी म बइठ के नवा रायपुर घूमे बर गे रिहीन। इही दउरान ओखर तेज रफ्तार फटफटी अनते-तनते होके डिवाईडर ले टकरा गे, जेमा निखिल गंभीर रूप ले घायल होगे, ओमन ल तुरते अस्पताल पहुंचाय गीस, जिहां डॉक्टर ह ओला मृत घोषित कर दीस। हादसा म घायल मनखे ल इलाज बर अस्पताल म भर्ती कराय गेहे।
मुख्यमंत्री विष्णुदेव साय ह आज रईपुर म राखे गे सोक सभा म संघरा के निखिल कश्यप ल श्रद्धांजलि दीन।
गांजा-बरामद
महासमुंद जिला म राष्ट्रीय राजमार्ग क्रमांक-तीन सौ तिरपन म हाड़ाबंद तीर होय हादसा के जांच करे बर पहुंचे पुलिस ह कार के डिक्की ले करीबन एक सौ नब्बे किलो गांजा बरामद करे हे, जेखर कीमत करीबन साढे अट्ठाईस लाख रूपिया आंके गेहे। हादसा के बाद कार सवार मनखे पुलिस के पहुंचे के पहिलीच फरार होगे। ए हादसा म फटफटी सवार एक मनखे के मउत होगे। उहें, दू आने मनखे घायल होगे हे, जउन मन ल इलाज बर जिला अस्पताल म भर्ती कराय गेहे।
अउ अब जानन मौसम के हाल..
मौसम विभाग ह अवइया अड़तालीस घंटा के दउरान प्रदेस के कुछेक जघा म भारी बरसा होय के चेतावनी देहे। उहें, कतकोन जघा म हल्का ले मध्यम बरसा होय अउ गरज-चमक के संग छींटा बौछार पड़े के संभावना हे। संगेसंग मध्य अउ दक्षिण छत्तीसगढ़ म एक-दू जघा भारी बरसा के संग गाज गिरे के चेतावनी देहे।
इही बीच, बेमेतरा जिला के चेचानमेटा गांव म गाज गिरे ले नव दंपत्ति के मउत होगे।