संसद के मानसून सत्र काली ले सुरू होही। इक्काइस अगस्त तक चलइया ए सत्र म दूनों सदन के कुल इक्काइस बइठका होही। ए बेरा जन विश्वास संशोधन विधेयक, राष्ट्रीय खेल प्रशासन विधेयक अउ मर्चेंट शिपिंग विधेयक संग कतकोन विधेयक उपर चर्चा हो सकत हे।
एखर ले पहिली दिल्ली म आज सर्वदलीय बइठका होइस, जेमा आने-आने राजनीतिक दल के नेता सामिल होइन। बइठका के बाद संसदीय कार्यमंत्री किरेन रिजिजू ह किहीन कि ‘‘बइठका जोरदार रिहीस, सरकार ह हर मुद्दा उपर गोठबात करे बर तियार हे‘‘।
प्रधानमंत्री राष्ट्रीय बाल पुरस्कार
प्रधानमंत्री राष्ट्रीय बाल पुरस्कार बर इकतीस जुलाई तक ऑनलाइन आवेदन करे जाही। राज्य सरकार ह नागरिक, संस्था, पालक अउ शिक्षक मनले अपन क्षेत्र के पांच ले अट्ठारा बछर उमर के लइका मन ल ए सम्मान बर आवेदन लगाय के अपील करे हे। ए पुरस्कार बर वो लइका मन आवेदन कर सकथें, जउन बहादुरी, सामाजिक सेवा, पर्यावरण संरक्षण, खेल, कला-संस्कृति अउ विज्ञान-प्रौद्योगिकी जइसन क्षेत्र म बढ़िया प्रदर्सन करे हें।
मलेरिया-टीका
हमर देस ह मलेरिया ले बचाव करे बर स्वदेसी टीका एडफाल्सीवैक्स विकतिस करत हे। ए टीका मच्छर के संक्रमण ले सुरक्षा अउ एखर ले आने लोगन म बगरे ले रोकही। ए टीका के विकास भारतीय आयुर्विज्ञान परिषद डहार ले राष्ट्रीय प्रतिरक्षा विज्ञान संस्थान के जैव प्रौद्योगिकीय विभाग के संग मिल करे जावत हे। एला मलेरिया बर जिम्मेदार दू सबले घातक परजीवी-प्लाज्मोडियम अउ फैल्सिपारम के निदान बर खास तौर ले विकसित करे गेहे।
कोतबा सामुदायिक स्वास्थ्य केंद्र
राज्य सरकार ह जशपुर जिला के कोतबा सामुदायिक स्वास्थ्य केंद्र बर छप्पन पद के स्वीकृति देहे। एखर तहत अस्पताल अधीक्षक, सर्जन, मेडिकल बिसेसज्ञ, स्त्रीरोग, शिशुरोग, दंत रोग बिसेसज्ञ अउ चिकित्सा अधिकारी के संग आने-आने पद म झटकुन भर्ती करे जाही। एखरे संग कोतबा स्वास्थ्य केंद्र के निर्माण बर चार करोड़ सैंतीस लाख के स्वीकृति घलो दे गिस हे।
मुख्यमंत्री-युवा कौशल
मुख्यमंत्री विष्णुदेव साय ह किहीन कि राज्य सरकार ‘‘विकसित भारत-विकसित छत्तीसगढ़‘‘ के लक्ष्य पाय बर सरलग कार्य करत हे, एमा समाज के हरेक वर्ग के भागीदारी जरूरी हे। मुख्यमंत्री श्री साय ह आज भिलाई के एक ठन निजी विश्वविद्यालय म आयोजित विश्व युवा कौशल उत्सव के समापन समारोह ल संबोधित करीन। ए बेरा ओमन यहू किहीन कि गोल्डन बुक ऑफ वर्ल्ड रिकॉर्ड के टीम ह आठ हजार प्रतिभागी मन ल एक हफ्ता म देगे परसिक्षण ल परमाणित करीस अउ ए संस्था ल एखर प्रमाण पत्र प्रदान करिस। ओमन किहीन कि राज्य सरकार ह युवा मन ल आत्मनिर्भर बनाय बर संकल्पित हे।
भूपेश बघेल-मुलाकात
पूर्व मुख्यमंत्री भूपेश बघेल ह आज अपन परिवार के संग ईडी कार्यालय पहुंचके अपन बेटा चैतन्य बघेल ले भेंट करीन। बतादन कि ईडी ह बीते अट्ठारा जुलाई के सराब घोटाला ले जुड़े मामला म भिलाई निवास म छापामारी करे रिहीस। एखर बाद उंखर बेटा चैतन्य बघेल ल गिरफ्तार करीस, जउन ए बेरा ईडी के हिरासत म हे।
इही बीच, मुख्यमंत्री विष्णुदेव साय ह किहीन कि ईडी ह केंद्रीय जांच एजेंसी आय जउन सोझ-समझ के कारवाही करथे। कांग्रेस के सरकार ह जनता ल धोखा दीस, अउ कतकोन घोटाला करीस, एखरे सेति जेल जावत हें।
ग्रामीण-घायल
बीजापुर जिला म माओवादी मन के लगाय बम फूटे ले एक झन ग्रामीण ह घायल होगे। मिले जानकारी ले ग्रामीण कृष्णा गोटा ह काली संझा बेरा जंगल तिर गाय चराय बर गे रिहीस। इही बेरा बम के चपेट म आइस, जेखर ले गंभीर रूप ले घायल होगे, जेन ल इलाज बर जिला अस्पताल म भर्ती कराय गेहे।
लेखा नेताम-स्वर्ण पदक
उत्तर प्रदेश के नोएडा म सोलह ले बीस जुलाई तक आयोजित केंद्रीय विद्यालय के राष्ट्रीय जूडो प्रतियोगिता म कोंडागांव जिला के लेखा नेताम ह स्वर्ण पदक जितिस। बंधापारा निवासी लेखा नेताम ल ए प्रसिक्षण कोंडागांव म आईटीबीपी ह दे रिहीस। ए उपलब्धि बर क्षेत्रीय मुख्यालय भुवनेश्वर के उप महानिरीक्षक संजीव रोलबा अउ एकतालीसवीं वाहिनीं के सेनानी नरेंद्र सिंह के अगुवई ल बहुंते संहराय जावत हें।
गजपल्ला वाटरफॉल-प्रशासन अलर्ट
गरियाबंद जिला के गजपल्ला जलप्रपात म बीते दिन होय एक झन पर्यटक के मउत के बाद प्रशासन सतर्क हो गेहे। ओखर सेति अभी हाल म एक हफ्ता तक चिंगरा पगार अउ गजपल्ला जलप्रपात ल पर्यटक मन बर बंद कर दे गेहे। वन विभाग के उप मंडल अधिकारी-एसडीओ मनोज चंद्राकर ह बतइन कि दूनों झरना वन विभाग के क्षेत्र म आथे, जेखर सेति विभाग ह अब्बड़ झन कर्मचारी के ड्यूटी लगाही।
प्रदेस म मानसून एक बार फेर सक्रिय हो गेहे। मौसम विभाग ह काली प्रदेस के एक-दू जघा गरज-चमक के संग भारी बरसा होय के चेतावनी देहे। बिलासपुर संभाग के पूर्वी जिला अउ सरगुजा संभाग के जिला म पानी गिर सकथे। उहें, काली प्रदेस के कतकोन जघा म हल्का ले मध्यम बरसा हो सकत हे।
इही बीच, राजधानी रईपुर म आज बिहनिया जोरदार बरसा होइस। उहें, बालोद जिला के दल्लीराजहरा म घलो बिहनिया ले पानी गिरत हे। एखर सेति सहर के खाल्हे बस्ती म पानी भर गिस। उहें, दल्लीराजहरा ले अंतागढ़ जवइया रेल पटरी घलो पानी म बुढ़गे।
इही बीच, जल संसाधन विभाग डहार ले जारी रिपोर्ट के अनुसार राज्य के प्रमुख सिंचाई जलाशय म अब तक उनचास फीसदी ले जादा जलभराव हो गेहे। बिलासपुर के खारंग डेम अउ दुरूग जिला के खपरी बांध घलो लबालब भर गेहे। एखरे संग राज्य के छियालीस ठन प्रमुख जलाशय म ले झुमका जलाशय म घलो अंठानवे फीसदी, मनियारी जिला म नब्बे फीसदी अउ छरपानी जलाशय म इंक्यानवे फीसदी ले जादा पानी भर गेहे।
अउ अब थोरकुन समाचार सार म –
– जांजगीर-चांपा जिला म सेवानिवृत्त लिपिक ल डिजिटल अरेस्ट करके बत्तीस लाख रूपिया ले जादा के ठगी करे के मामला आगू आय हे। सिटी कोतवाली पुलिस ह केस दर्ज करके जांच सुरू कर देहे।
– दुरूग जिला के भिलाई पुलिस ह पांच लाख अठासी हजार रूपिया गबन के मामला म कृषक सेवा सहकारी समिति कोहका के पूर्व प्रभारी सहायक प्रबंधक डाकवर धुर्वे ल गिरफ्तार करे हे।
– रईपुर पुलिस ह हथियार बेचइया ऑनलाइन कंपनी अउ एक ठन निजी कोरियर के छै झन आरोपी मन ल गिरफ्तार कर लिस।
– बलरामपुर जिला के तुंगवां गांव के तिर आज फटफटी सवार यात्री बस के चपेट म आगे, जेखर ले ओखर मउत होगे।
– सक्ती पुलिस ह गांजा तस्करी करइया दू झन आरोपी ल गिरफ्तार कर लेहे, जिंखर तिर ले ग्यारा किलोग्राम गांजा, दू मोबाइल अउ एक ठन गाड़ी जब्त कर लेहे।
– स्वामी आत्मानंद अंग्रेजी स्कूल मनके संविदा शिक्षक अउ करमचारी मन आने-आने मांग ल लेके आज नवा रायपुर म एक दिवसीय धरना प्रदर्सन करीन अउ ज्ञापन सौंपिन।
– दुरूग के सेंट्रल जेल म एक झन बिचाराधीन कैदी ह आज बिहनिया फांसी लगाके आत्महत्या कर लिस।