प्रवर्तन निदेशालय-ईडी के टीम ह आज पूर्व मुख्यमंत्री भूपेश बघेल के बेटा चैतन्य बघेल ल गिरफ्तार करे लेहे। ईडी के टीम आज बिहनिया भिलाई स्थित पूर्व मुख्यमंत्री श्री बघेल के निवास पहुंचिस। सराब घोटाला मामला म चैतन्य बघेल ले पूछताछ के बाद ओमन ल गिरफ्तार करके रईपुर कोर्ट म पेस करे गीस। कोर्ट ह मामला के सुनवाई करत चैतन्य बघेल ल बाईस जुलाई तक पांच दिन के रिमांड म ईडी ल सौंप देहे।
पूर्व मुख्यमंत्री भूपेश बघेल नेता प्रतिपक्ष चरणदास महंत समेत कांग्रेसी विधायक अउ नेता रईपुर स्थित जिला न्यायालय पहुंचे रिहीन। इंहा ले जम्मों पचपेढ़ी नाका स्थित ईडी कार्यालय बर निकल गिन। ईडी कार्यालय के बाहिर बड़का संख्या म कांग्रेसी नेता अउ पुलिस के टीम मौजूद रिहीस। कांग्रेसी नेता अउ कार्यकर्ता मन चैतन्य बघेल के गिरफ्तारी ल लेके जमके विरोध प्रदर्सन करीन। इही दौरान पुलिस कर्मी अउ कार्यकर्ता मनके बीच हल्का धक्का-मुक्की घलो होइस।
विधानसभा समाचार-01
छत्तीसगढ़ विधानसभा के मानसून सत्र के आखिरी दिन आज सदन म पूर्व मुख्यमंत्री भूपेश बघेल के घर ईडी के दबिश के मामला गूंजिस। कांग्रेस के सदस्य ह पूर्व मुख्यमंत्री भूपेश बघेल के बेटा चैतन्य बघेल ल ईडी डहार ले हिरासत म दे जाय म नाराबाजी करीन। एखर बाद कांग्रेस के सदस्य ह सदन के दिनभर के कार्यवाही के बहिष्कार कर दीन। नेता प्रतिपक्ष डॉक्टर चरणदास महंत ह किहीन कि ए सब सरकार के दबाव म होवत हे।
विधानसभा के कार्यवाही के बहिष्कार करे के बाद कांग्रेस विधायक मनके संग नेता प्रतिपक्ष डॉक्टर चरणदास महंत ह अपन कक्ष म आपात बइठका लीन। एमा पूर्व मुख्यमंत्री भूपेश बघेल समेत कांग्रेस के जम्मों विधायक मौजूद रिहीन।
विधानसभा समाचार-02
छत्तीसगढ़ म पूर्ववर्ती कांग्रेस सरकार म होय कथित बोरे-बासी घोटाला के जांच विधायक मनके समिति करही। आज विधानसभा म मुद्दा ल भाजपा सदस्य राजेश मूणत, अजय चंद्राकर अउ धर्मजीत सिंह ह उठाइन। भाजपा सदस्य मनके मांग म श्रममंत्री लखनलाल देवांगन ह सदन म विधायक मनके ए टीम बनाके जांच कराय के घोसना करीन। बतादन कि कांग्रेस शासनकाल के दउरान एक मई याने श्रमिक दिवस के मउका म छत्तीसगढ़ी खानपान ल बढ़ावा देबर बोरे बासी खिलाय के प्रावधान करे गे रिहीस, जेखर बर पूर्ववर्ती कांग्रेस सरकार ह आठ करोड़ रूपिया ले जादा खर्चा करे रिहीस।
उहें, आज सून्यकाल म नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल अउ दूसर कांग्रेस सदस्य मन हसदेव जंगल म पेड़ कटाई के मुद्दा उठात स्थगन प्रस्ताव उपर चर्चा कराय के मांग करीन। नेता प्रतिपक्ष डॉक्टर चरणदास महंत ह किहीन कि कोयला खनन के नांव म जंगल उजाड़ना सही नइ हे। ग्रामसभा के स्वीकृति नइ ले गीस, तभो ले खनन सुरू कर दे गीस। ओमन किहीन कि तमनार क्षेत्र म खनन के नांव म जंगल उजाड़े जात हे। उहें, पूर्व मुख्यमंत्री भूपेश बघेल ह किहीन कि तमनार म पेसा कानून के उल्लंघन होथे। तमनार म उद्योगपति के मनमानी चलत हे। स्थानीय निवासी मन ल प्रताड़ित करे जात हे। पूर्व मुख्यमंत्री ह किहीन कि ए बिसय उपर जम्मों काम मन ल रोक के चर्चा होना चाही। कांग्रेस सदस्य उमेश पटेल, विद्यावती सिदार, लालजीत सिंह राठिया अउ दूसर सदस्य मन घलो एखर उपर चर्चा कराय के मांग करीन।
बाद म विधानसभा अध्यक्ष डॉक्टर रमन सिंह ह विपक्ष के स्थगन प्रस्ताव ल अस्वीकार कर दीन। एखर उपर सत्ता पक्ष अउ विपक्षी सदस्य मन के बीच जमके हंगामा होइस। ए दउरान सोर-सराबा के बीच विधानसभा अध्यक्ष ह सदन के कार्यवाही पांच मिनट बर स्थगित कर दीन।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत प्रदेस म किसान मन ल खाद के आपूर्ति सुनिश्चित करे बर राज्य सरकार कोति ले उठाय जात कदम के बारे म कृषि मंत्री रामविचार नेताम ले लेगे भेंटवार्ता के प्रसारण करे जाही। ए कारीकरम के प्रसारण काली उन्नीस जुलाई के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
केंद्र-धान खरीद
केंद्र सरकार ह खरीफ विपणन बछर-दू हजार चौबीस-पच्चीस बर छत्तीसगढ़ ले केंद्रीय पूल बर चांउर उपार्जन के लक्ष्य ल सत्तर लाख मीट्रिक टन ले बढ़ाके अठहत्तर लाख मीट्रिक टन कर दे हे। मुख्यमंत्री विष्णुदेव साय ह ए निर्णय बर प्रधानमंत्री नरेंद्र मोदी अउ केंद्रीय खाद्य अउ सार्वजनिक वितरण मंत्री प्रहलाद जोशी के प्रति आभार प्रकट करीन हे। ओमन सोसल मीडिया पोस्ट म किहीन कि केंद्र सरकार डहार ले आठ लाख मीट्रिक टन अतिरिक्त धान खरीदी के स्वीकृति किसान मनके मेहनत ल मान्यता दे वाला कदम हे। न केवल ओमन के आय म बढ़ोत्तरी करही, बल्कि छत्तीसगढ़ के कृषि अर्थव्यवस्था ल मजबूती प्रदान करही।
मुख्यमंत्री-अंजोर विजन
मुख्यमंत्री विष्णुदेव साय ह नवा रईपुर म आयोजित कारीकरम म ‘‘छत्तीसगढ़ अंजेर विजन दू हजार सैंतालीस‘‘ दस्तावेज ल प्रदेस के जनता ल समर्पित करीन। ए मउका म मुख्यमंत्री ह किहीन कि ए दस्तावेज केवल शब्द मात्र के संकलन नइ हे, बल्कि आत्मनिर्भर, समृध्द अउ विकसित छत्तीसगढ़ के निर्माण के एक ठोस संकल्प अउ स्पष्ट दिसा हे। ओमन किहीन कि ए विजन प्रधानमंत्री नरेंद्र मोदी के विकसित भारत-दू हजार सैंतालीस के संकल्प ले प्रेरित हे अउ छत्तीसगढ़ ल भारत के अग्रणी अउ विकसित राज्य म सामिल करे बर मार्गदर्सन प्रदान करही। मुख्यमंत्री ह ए बात उपर बिसेस बल दीन कि विकसित भारत के भव्य इमारत ल ऊर्जावान बनाय म छत्तीसगढ़ पावर हाउस के भूमिका निभाही। मुख्यमंत्री ह मल्टी-मॉडल कनेक्टिविटी ल संसाधन मनके प्रबंधन के सबले अहम आधार बतइन। अेमन किहीन कि राज्य म रेलमार्ग ल बछर दू हजार तीस तक दुगुना करे जाही।
मुख्यमंत्री ह किहीन कि ए अंजोर विजन के तहत राज्य के तेरह प्रमुख क्षेत्र मन ल दस ठिन मिशन के माध्यम ले आर्थिक, सामाजिक अउ सांस्कृतिक विकास ल संतुलित रूप म आगू बढ़ाय जाही। एमा कृषि, उत्पादन, पर्यटन, संस्कृति, लॉजिस्टिक्स अउ आईटी ले लेके जैविक खेती अउ शिक्षा तक समावेस हे।
व्यापमं-दिशा-निर्देश
व्यावसायिक परीक्षा मंडल के परीक्षा म सामिल होवइया अभ्यर्थी मन बर नवा दिसा-निरदेस जारी करे गेहे। अभ्यर्थी मन ल परीक्षा के दिन निर्धारित परीक्षा केंद्र मन म दू घंटा पहिली अनिवार्य रूप ले उपस्थित होना होही। परीक्षा सुरू होय के पंद्रह मिनट पहिली परीक्षा केंद्र के मुख्यद्वार बंद कर दे जाही। अभ्यर्थी मन ल हल्का रंग के आधा बांही वाला कपड़ा पहिन के परीक्षा दे बर आना होही। फुटवेयर के रूप म चप्पल के उपयोग करना होही। महिला अभ्यर्थी मन ल कान म कोनो भी तरह के आभूषण पहिने के मनाही हे।
व्यापमं के अनुसार निरदेस मनके पालन नइ करे म अभ्यर्थी ल परीक्षा देले वंचित करे जाही। परीक्षा म अनुचित साधन के प्रयोग करे म कड़ा कार्यवाही करे जाही अउ अभ्यर्थिता समाप्त करे जाही। परीक्षा कक्ष म कोनो भी तरह के संचार उपकरण, इलेक्ट्र्रानिक उपकरण, इलेक्ट्रानिक घड़ी, पर्स, पाऊच, स्कार्फ, बेल्ट, टोपी आदि ले जाय बर पूर्णतः वर्जित करे गेहे।
अउ अब थोरकुन समाचार सार म –
– छत्तीसगढ़ व्यावसायिक परीक्षा मंडल डहार ले आबकारी आरक्षक के पद म भर्ती करे बर प्रवेस परीक्षा सत्ताईस जुलाई के आयोजित करे जाही।
– खराब सड़क अउ बिजली के बाढ़े दर उपर मुंगेली के कांग्रेस कार्यकर्ता मन लोरमी ब्लाक म बिजली ऑफिस के घेराव करके ज्ञापन सौंपिन।
अउ
– कोरबा जिला के कुसमुंडा स्थित एसईसीएल के मुख्य महाप्रबंधक कार्यालय म भू-विस्थापित महिला मन ह प्रदर्सन करीन। ए महिला मनके आरोप हे कि एसईसीएल कोति ले ओमन के जमीन अधिग्रहित कर ले गे रिहीस, लेकिन अभी तक ओमन ल रोजगार नइ दे गेहे।