राष्ट्रपति द्रौपदी मुर्मू ह स्वच्छ सर्वेक्षण के नौवां संस्करण के पुरस्कार आज नई दिल्ली म राखे गे एक ठिन कारीकरम म दीन। ए मउका म राष्ट्रपति ह किहीन कि साफ-सफाई विकसित भारत दू हजार सैंतालीस के मुताबिक एक ठिन बड़का पहूल हरय। ओमन देस के लोगन मन ल स्वच्छ, स्वस्थ अउ विकसित बनाय बर आगू आय के बिनती करीन। समारोह म राष्ट्रपति ह स्वच्छता सर्वेक्षण म बढ़िया प्रदर्सन करइया छत्तीसगढ़ के सात ठिन नगरीय निकाय मन ल इनाम दीन। नगरीय प्रशासन मंत्री अरूण साव ह एखर ले जुड़े निकाय मनके महापौर, अध्यक्ष अउ अधिकारी मन ल ए पुरस्कार देवाइन। बीस हजार ले कम आबादी वाले सहर म बिल्हा नगर पंचायत ल सबले साफ सहर के रूप म राष्ट्रीय पुरस्कार ले सम्मानित करे गीस। त उहें, तीन लाख ले दस लाख जनसंख्या श्रेणी म बिलासपुर नगर निगम ल देस के दूसरा अउ पचीस ले पचास हजार के आबादी वाले सहर म कुम्हारी नगर पालिका ल देस के तीसरा सबले साफ सहर घोषित करे गीस। एखर अलावा स्वच्छता सुपर लीग म अंबिकापुर नगर निगम, पाटन अउ विश्रामपुर नगर पंचायत ह घलो अपन जघा बनाय हे। ए सम्मान अइसन सहर मन ल दे गीस, जउन ह पाछू तीन बछर म कम ले कम एक बार सुरूआत के तीन म कोनो भी एक जघा म अपन स्थान बनाय हे अउ ए बेरा बीस ठिन सहर मन म सामिल हो।
स्वच्छ सर्वेक्षण-02
उहें, रईपुर ल छत्तीसगढ़ के प्रॉमिसिंग स्वच्छ सहर के पुरस्कार मिले हे। मुख्यमंत्री विष्णुदेव साय ह जम्मों विजेता नगरीय निकाय मन ल बधई देवत किहीन कि उपलब्धि राज्य बर गर्व के क्षण हरय। ओमन ए सहर मन म साफ-सफई के प्रति इंहा के लोगन, स्थानीय निकाय अउ प्रशासन के सामूहिक परयास के प्रशंसा करत किहीन कि ए पुरस्कार राज्य के आने सहर मन ल घलो मिले बर प्रेरित करही।
विधानसभा-खाद मुद्दा
छत्तीसगढ़ विधानसभा के मानसून सत्र के चौथा दिन आज प्रश्नकाल म विपक्षी सदस्य मन ह प्रदेस म डीएपी खातू के कमी के मुद्दा उठाइन। कांग्रेस विधायक उमेश पटेल ह जानना चाहिन कि सोसायटी अउ व्यापारी मन ल कतका डीएपी खातू दे जात हे। जवाब म कृषि मंत्री रामविचार नेताम ह बतइन कि बीस जुलाई तक अट्ठारा हजार आठ सौ पचास मीट्रिक टन खातू राज्य ल मिलइया हे, जेमा एनपीके अउ डीएपी खातू घलो सामिल हे। ओमन किहीन कि जिहां डीएपी खातू के कमी रिहीस, उंहा वैकल्पिक खातू दे जात हे। ओमन किहीन कि राज्य सरकार ह सरलग केंद्र सरकार ले गोठबात करत हे अउ प्रदेस म कोनो प्रकार के खातू के कमी झन होवय एखर बर परयास करे जात हे। कृषि मंत्री के जवाब ले असंतुष्ट विपक्षी दल के सदस्य मन ह सदन म हंगामा सुरू कर दीन, जेखर बाद विधानसभा अध्यक्ष डॉक्टर रमन सिंह ह पहिली सदन के कार्रवाई ल पांच मिनट बर स्थगित करीन। फेर दूबारा जब सदन के कार्रवाई सुरू होइस, तब विपक्षी सदस्य मन ह नाराबाजी करत गर्भ गृह म चले गे विपक्षी सदस्य मन के व्यवहार ले नाराज विधानसभा अध्यक्ष ह जम्मों विधायक मन ल आज के सदन के कार्रवाई ले निलंबित कर दीन। ओमन किहीन कि प्रश्नकाल ल बाधित करना बहुते गलत परंपरा हरय।
विधानसभा भारतमाला-परियोजना
सदन म आज भाजपा विधायक धरमलाल कौशिक ह ध्यानाकर्षण के माध्यम ले राज्य के आने-आने जिला मन म भारतमाला परियोजना के तहत भूमि अधिग्रहण म अनियमितता के मुद्दा उठाइन। ओमन किहीन कि भारत माला परियोजना के तहत बिलासपुर-उरगा रद्दा बनाय बर ढेंका गांव म निजी भूमि के अधिग्रहण करे गीस, जेमा अनियमितता होय हे। ओमन ए मामला के जांच सीबीआई ले कराय के मांग करीन। उहें, अजय चंद्राकर, राजेश मूणत अउ आने भाजपा विधायक मन ह घलो भ्रष्टाचार म सामिल लोगन मनके खिलाफ कार्रवाई करे के मांग करीन। ए बात उपर राजस्व मंत्री टंकराम वर्मा ह किहीन कि भारत माला परियोजन के तहत निजी भूमि अधिग्रहण म अनियमितता होय हे। ओमन किहीन कि ए मामला के जांच पांच झिन संभागीय आयुक्त मनके अध्यक्षता वाले समिति डहार ले करे जात हे। एखर अलावा राज्य आर्थिक अपराध साखा- ईओडब्ल्यू ह घलो भारत माला परियोजना के कामकाज म कथित भ्रष्टाचार के जांच करत हे। राजस्व मंत्री ह किहीन कि जउन लोगन मन ह एमा सामिल होही। उंखर मन के खिलाफ कड़ा कार्रवाई करे जाही।
प्रधानमंत्री-धन धान्य कृषि योजना
प्रधानमंत्री नरेंद्र मोदी ह किहीन हे कि सरकार ह किसान मनके जिनगी म बदलाव लाय बर पूरा परयास करत हवय अउ ‘‘प्रधानमंत्री धन-धान्य कृषि योजना‘‘ ए दिसा म एक ठिन बड़का कदम हरय। सोसल मीडिया पोस्ट म श्री मोदी ह किहीन कि एखर ले न सिरिफ पिछड़ा जिला मन म फसल उत्पादन म बढ़ोत्तरी होही, भलूक खाद्य उत्पादन करइया मनके आय म घलो बढ़ोत्तरी होही। ए योजना नीति आयोग के आकांक्षी जिला कारीकरम ले प्रेरित हे अउ अइसन पहिली कारीकरम हरय, जउन ह बिसेस रूप ले कृषि उपर केंद्रित हे।
विस-विधेयक पारित
राज्य विधानसभा म आज मुख्य विपक्षी दल कांग्रेस के गैर हाजिरी म सदन म तीन ठिन विधेयक पारित करे गीस, जेमा छत्तीसगढ़ भू-राजस्व संहिता संसोधन विधेयकर, छत्तीसगढ़ निजी विश्वविद्यालय स्थापना अउ संचालन संसोधन विधेयक के संगेसंग छत्तीसगढ़ नगरी क्षेत्र मनके आवासहीन मनखे मन ल पट्टा देके अधिकार वाले विधेयक सामिल हे। विधेयक पारित होय के बाद सभापति ह सदन के कार्रवाही ल काली ग्यारा बजे तक बर स्थगित कर दीन।
राज्यपाल कुलपति-बैठक
राज्यपाल रमेन डेका ह किहीन हे कि विश्वविद्यालय ह सिरिफ डिग्री बांटे के केंद्र नइ बनय, भलूक गुणवत्तापूर्ण शिक्षा देबर संकलप लेहे। ओमन किहीन कि कोनो भी विश्वविद्यालय गुणवत्ता के मापदंड म खरा नइ उतरय त, ओमन ल बंद करे के कार्रवाई करे जाही। राज्यपाल ह आज राजभवन म प्रदेस के जम्मों निजी विश्वविद्यालय मनके कुलपति मनके समीक्षा बइठका लीन। बइठका म राज्यपाल ह किहीन कि विश्वविद्यालय अनुदान आयोग के मापदंड अउ नियम के सक्ति ले पालन करे जाय। राज्यपाल ह विश्वविद्यालय अनुदान आयोग के मानक के मुताबिक शिक्षक मनके जल्दी नियुक्ति के निरदेस दीन। ओमन किहीन कि राजष्ट्रीय शिक्षानीति के बारे म छात्र मन ल जागरूक करे जाय।
मुख्यमंत्री-स्वास्थ्य अमला वाहन
मुख्यमंत्री विष्णुदेव ह आज रईपुर स्थित अपन निवास कार्यालय ले स्वास्थ्य विभाग बर एक सौ इंक्यावन ठिन गाड़ी मन ल हरी झंडी दिखाके आने-आने जिला बर भेजिन। ए मउका म ओमन किहीन कि ए गाड़ी मनके माध्यम ले बस्तर अउ सरगुजा क्षेत्र के दूर-दराज के लोगन मन ल घलो बेरा म इलाज मिल सकही। मुख्यमंत्री ह किहीन कि जिला अउ विकासखंड स्तर म काम करइया अधिकारी अउ मैदानी स्वास्थ्य कर्मी मन बर दे जाय गाड़ी मनके बेरा-बेरा म जांच के संगेसंग स्वास्थ्य सिविर मनके निगरानी दूर-दराज तक पहुंच अउ आपात कालीन बेरा म इलाज मिल सकही। श्री साय ह बतइन कि पहिली चरण म बस्तर अउ सरगुजा संभाग के बारह जिला मन म ए गाड़ी भेजे जात हे। ओमन किहीन कि जल्दीच प्रदेस म आठ सौ इंक्यावन ठिन नवा एंबुलेंस गाड़ी देवाय जाही,जेमा ल तीन सौ पचहत्तर एंबुलेंस एक सौ आठ आपाता कालीन सेवा बर, तीस ठिन एंबुलेंस ग्रामीण चलित चिकित्सा इकाई मन बर अउ एक सौ तिरसठ ठिन मुक्तांजलि शव वाहन सेवा बर दे जाही।
एआई-प्रशिक्षण
केंद्र सरकार ह दस लाख लोगन मन ल मुफत म आर्टिफिशियल इंटेलिजेंस प्रसिक्षण दीही, जेमा ग्राम स्तर के उद्यमी मन ल पहिली प्राथमिकता दे जाही। इलेक्ट्रानिक्स अउ सूचना प्रौद्योगिकीय मंत्री अश्विनी वैष्णव ह डिजीटल इंडिया के दस बछर पूरा होय के मउका म नई दिल्ली म राखे गे जनसेवा केंद्र दिवस कारीकरम म ए घोसना करीन।
मुक्केबाजी-प्रतियोगिता
सत्रहवां सब जूनियर छत्तीसगढ़ राज्य मुक्केबाजी प्रतियोगिता म भिलाई इस्पात संयंत्र के सब जूनियर टीम ह बढ़िया प्रदर्सन करत उन्नीस प्वाइंट के संग विजेता ट्रॉफी उपर अपन कब्जा जमाइन। ए टीम म नौ मुक्केबाज मन ह चार स्वर्ण, तीन रजत अउ एक ठिन कांस्य पदक जीते हे। ए प्रतियोगिता बिलासपुर के रेलवे स्टेडियम म एमेच्योर मुक्केबाजी एसोसिएसन डहार ले कराय गीस, जेमा प्रदेस के तेरह ठिन जिला ले एक सौ पंद्रह झिन मुक्केबाज मन ह भाग लीन। ए प्रतियोगिता म ग्यारा प्वाइंट के संग रईपुर के टीम उप विजेता रिहीन।
ओति, ताईवान म बारह ले पंद्रह जुलाई तक होय अंतर्राष्ट्रीय एशियन कैडेट चैंपियनशिप म छत्तीसगढ़ के कोण्डागांव जिला के रंजीता कोरेटी ह स्वर्ण पदक पाय हे।