केन्द्रीय मंत्रिमंडल ह किसानी म उत्पादन बढ़ाय बर प्रधानमंत्री धन धान्य कृषि योजना ल मंजूरी देहे। ए योजना के उद्देश्य फसल विविधिकरण अउ टिकाऊ कृषि पद्धति ल बढ़ावा देना, कटाई के बाद भंडारण क्षमता बढ़ाना, सिंचाई सुभीता म सुधार अउ करजा देवाय के काम ल सरल बनाना हे।
नई दिल्ली म आज मंत्रिमंडल के बइठका के बाद संवाददाता मन ले जानकारी देवत सूचना अउ प्रसारण मंत्री अश्वनी वैष्णव ह किहीन कि ए योजना म देस म सौ जिला के चिन्हारी करे जाही, जउन तीन प्रमुख संकेतक कमती उत्पादन, कमती फसल सघनता अउ कमती ऋण वितरण म आधारित होही। श्री वैष्णव ह बतईन कि ए योजना ग्यारह ठिन विभाग के छत्तीस ठिन चलत योजना अउ आने राज्य के योजना के मेल ले लागू करे जाही। ओमन किहीन कि ए योजना ल देस के एक करोड़ सत्तर लाख किसान मन ल मदद मिलही।
विधानसभा समाचार-01
छत्तीसगढ़ विधानसभा के मानसून सत्र के तीसर दिन आज सदन म शून्यकाल के दउरान विपक्ष ह बिजली के दर म करे गे बढ़वार म स्थगन प्रस्ताव लाके चर्चा कराय के मांग करीन। नेता प्रतिपक्ष ह किहीन कि बिजली दर म बढ़वार ले गरीब मन ल आर्थिक रूप ले परेसानी के सामना करे बर पड़त हे। जुवाब म मुख्यमंत्री विष्णुदेव साय ह छत्तीसगढ़ विद्युत नियामक आयोग कोति ले घोषित बिजली के नवा दर ल पाछु बछर म करे गे बढ़वार के तुलना म कमती बताय हे। ओमन किहीन कि आयोग कोति ले एसो सिरिफ एक दशमलव आठ नौ प्रतिशत के बढ़वार करे गेहे। श्री साय ह किहीन कि घरेलू विघुत दर म सिरिफ दस ले बीस पइसा तक के मामूली बढ़वार करे गेहे। उहें, कृषि पंप उपभोक्ता मन बर पचास पइसा प्रति यूनिट के बढ़वार होय हे, जेखर प्रभाव किसान मन उपर नइ पड़य। ओमन बतईन कि मिनी स्टील, रोलिंग मिल अउ फेरो एलॉय जइसन उद्योग के बिजली दर म कटौती करे गेहे, जेखर ले ए उद्योग मन ल राहत मिलही।
उहें, आज सदन म नेता प्रतिपक्ष डॉक्टर चरणदास महंत ह प्रधानमंत्री आवस योजना-ग्रामीण म गड़बड़ी के मुद्दा उठावत एखर जांच सीबीआई ले कराय के मांग करीन। नेता प्रतिपक्ष ह किहीन कि कोटा अउ मनेन्द्रगढ़ म कतकोन आधा बने आवास ल पूरा बन गेहे ए बताय गेहे। ओमन आरोप लगईन कि आवास बनाय बर मउत होय लोगन के नाव म घलो रकम जारी करे गेहे।
विधानसभा विधेयक
राज्य विधानसभा म आज छत्तीसगढ़ कृषि उपज मंडी संशोधन विधेयक पारित होगे। कृषि मंत्री रामविचार नेताम ह सदन म ए विधेयक पेस करीन। भाजपा विधायक अजय चंद्राकर ह ए विधेयक म गोठबात के सुरूआत करीन। ए गोठबात म धरमलाल कौशिक अउ गजेन्द्र यादव ह घलो भाग लीन अउ विधेयक के समर्थन करीन। विधेयक म नेता प्रतिपक्ष डॉक्टर चरणदास महंत ह किहीन कि कांग्रेस पार्टी कृषि उपज मंडी संशोधन विधेयक के विरोध करत हे। ए विधेयक ले ई-कॉमर्स ल बढ़ावा मिलही। विपक्षी सदस्य मन ह विधेयक म चर्चा म भाग ले से मना करे संग सदन ले बहिर्गमन कर दीन। कांग्रेस सदस्य मनके अनुपस्थित म ए विधेयक ल पारित कर दे गीस।
उहें, आज सदन म छत्तीसगढ़ निजी विश्वविद्यालय स्थापना अउ संचालन विधेयक दू हजार पच्चीस ल घलो पारित करे गीस।
भारतीय विशिष्ट पहचान प्राधिकरण ह अभिभावक मन ले सात बछर के आयु ले जादा के लइका मनके जरूरी रूप ले बायोमेट्रिक अपडेट कराय बर केहे हे। केन्द्रीय इलेक्ट्रॉनिकी अउ सूचना प्रौद्योगिकी मंत्रालय ह केहे हे कि वर्तमान दिसा-निरदेस के मुताबिक पांच बछर ले कमती आयु के लइका मन बर उंगली के छाप अउ आंखी के स्कैन करे के जरूरत नइ हे। मंत्रालय ह केहे हे कि पांच बछर होय म ए लइका मनके बायोमेट्रिक अपडेट होना चाही। पांच ले सात बछर के लइका आयु म बायोमेट्रिक अपडेट के काम मुफत म होही। मौजूद नियम के मुताबिक सात बछर के आयु होय के बादों अपडेट नइ कराय जाय म आधार निष्क्रिय करे जा सकत हे। प्राधिकरण ह ए संबंध म अइसन लइका मनके आधार ले पंजीकृत मोबाइल नंबर म बायोमेट्रिक अपडेट कराय संबंधी संदेस भेजे बर सुरू कर देहे।
स्वच्छ सर्वेक्षण
स्वच्छ सर्वेक्षण दू हजार चौबीस म बने प्रदर्सन करइया छत्तीसगढ़ के सात ठिन नगरीय निकाय ल केन्द्रीय आवास अउ सहरी कार्य मंत्रालय कोति ले इनाम दे जाही। काली नई दिल्ली के विज्ञान भवन म राखे गे स्वच्छ सर्वेक्षण समारोह म राष्ट्रपति द्रौपदी मुर्मू इनाम दीही। छत्तीसगढ़ के नगरीय प्रशासन मंत्री अरूण साव, विभागीय अधिकारी अउ संबंधित निकाय के प्रतिनिधि मन संग इनाम लीहीं।
समारोह म बिलासपुर नगर निगम, कुम्हारी नगर पालिका अउ बिल्हा नगर पंचायत ल प्रेसीडेंट अवॉर्ड अउ रायपुर नगर निगम ल मिनिस्ट्रियल अवॉर्ड दे जाही। एखर संगेसंग अंबिकापुर नगर निगम, पाटन अउ विश्रामपुर नगर पंचायत ल स्वच्छता के क्षेत्र म बने प्रदर्सन करे खातिर इनाम मिलही।
राज्यपाल-कुलपति बैठक
राज्यपाल रमेन डेका ह आज राजभवन म प्रदेस के जम्मों सरकारी विश्वविद्यालय के कुलपति मनके बइठका लेके कामकाज के समीक्षा करीन। बइठका म राज्यपाल ह विश्वविद्यालय अउ कॉलेज म खाली पद म भर्ती के कार्रवाई ल पूरा करे बर किहीन। ओमन सबो कुलपति ले किहीन कि डीन स्टूडेंट वेलफेयर ल सक्रिय करय अउ विद्यार्थी मनके सिकईत के बेरा राहत निराकरण करय। श्री डेका ह किहीन कि विश्वविद्यालय के सिक्षा व्यवस्था म सुधार लाना सबले बड़े प्राथमिकता हरय।
बइठका म राज्यपाल ह किहीन कि नवा सिक्षा नीति ल चलाय बर सबो कुलपति बइठका करके अपन अनुभव अउ सुझाव साझा करय। ओमन विश्वविद्यालय बिसेस रूप ले व्यवसायिक अउ तकनीकी विश्वविद्यालय म नवाचार ल बढ़ावा दे, युवा मन ल स्टार्टअप बर प्रोत्साहित करे म बल दीन।
रामविचार नेताम-निर्देश
आदिम जाति अउ अनुसूचित जाति कल्याण मंत्री रामविचार नेताम के अगुवई म काली विधानसभा के मुख्य समिति कक्ष म प्रधानमंत्री जनजातीय न्याय महाअभियान योजना ल चलाय के समीक्षा बइठका राखे गीस। बइठका म जनजातीय समुदाय तक योजना ल प्रभावी ढंग ले चलाय, जमीनी चुनौती अउ अवइया रणनीति म गोठबात करे गीस। ए मउका म श्री नेताम ह किहीन कि सबके भागीदारी अउ संवेदनशीलता संग बिसेस पिछड़ी जनजाति के विकास बर काम करना चाही। ओमन किहीन कि विशेष पिछड़ी जनजाति बर बनाय गे प्रधानमंत्री आवास ल उंखर संस्कृति, परंपरा अउ रहन-सहन के मुताबिक तियार करे जाय।
मौसम
मौसम विभाग के मुताबिक एक निम्मदाब के क्षेत्र दक्षिण-पश्चिम बिहार अउ ओखर ले लगे पूर्वी उत्तरप्रदेस के ऊपर हवय। एखर पश्चिम उत्तर-पश्चिम दिसा म आगू बढ़त प्रबल होय के संभावना हरय, जेखर परभाव ले उत्तर छत्तीसगढ़ के सरगुजा संभाग के कुछेक जिला म भारी बरसा हो सकत हे। उहें, कतकोन जघा म हल्का ले मध्यम बरसा होय अउ गरज-चमक संग छींटा बौछार पड़े के संभावन हरय।
उहेंं, धमतरी जिला आज संझा गाज गिरे ले एक माईलोगिन के मउत होगे।
अउ अब थोरकुन समाचार सार म –
– मुख्यमंत्री विष्णुदेव साय ह आज विधानसभा परिसर म अपन कक्ष म ‘‘मोर गांव-मोर पानी‘‘ अभियान म आधारित पुस्तिका के विमोचान करीन।
– प्रधानमंत्री राष्ट्रीय बाल पुरस्कार बर इकतीस जुलाई तक ऑनलाइन अरजी दे जा सकत हे।
– केन्द्रीय माध्यमिक शिक्षा बोर्ड-सीबीएसई ह पढ़ईया लइका मन म स्वस्थ जीवनशैली ल बढ़ावा दे बर स्कूल मन म तेल बोर्ड बनाय बर केहे हे। सीबीएसई ह ए संबंध म सबो स्कूल प्रमुख ल चिट्ठी लिखे हे।
– बलौदाबाजार जिला के अर्जुनी के स्वामी आत्मानंद उत्कृष्ट उच्चतर माध्यमिक विद्यालय म पदस्थ प्रभारी प्राचार्य खूबचंद सरसींहा ल अनुशासनहीनता अउ कदाचार के आरोप म निलंबित कर दे गेहे।
अउ
– जांजगीर-चांपा जिला म मुलमुला थाना क्षेत्र के पामगढ़ रद्दा म आज तेजी ले आवत एक गाड़ी ह फटफटी ल टक्कर मार दीस। टक्कर ले फटफटी आगू ले आवत ट्रक के चपेट म आ गे, जेखर ले ओमा बइठे महिला अउ ओखर एक झिन लइका के मउत होगे। उहें, ओखर घर गोसइया अउ एक आने लइका के हालत गंभीर बताय जात हे।