छत्तीसगढ़ विधानसभा के मानसून सत्र आज ले सुरू हो गेहे। आज पहिली दिन सदन म छत्तीसगढ़ के पूर्व राज्यपाल शेखर दत्त अउ अविभाजित मध्य प्रदेस के पूर्व मंत्री राजा सुरेंद्र बहादुर सिंह ल श्रध्दांजलि दे गीस। मुख्यमंत्री विष्णुदेव साय, नेता प्रतिपक्ष डॉक्टर चरणदास महंत, संसदीय कार्यमंत्री केदार कश्यप अउ पूर्व मुख्यमंत्री भूपेश बघेल समेत सदन म पूर्व राज्यपाल शेखर दत्त अउ पूर्व मंत्री राजा सुरेंद्र बहादुर सिंह के योगदान ल सुरता करीन अउ दू मिनट के मौन रख के ओमन ल श्रध्दांजलि दीन, जेखर बाद विधानसभा अध्यक्ष डॉक्टर रमन सिंह ह शोक संदेस ल पढ़िन।
श्रध्दांजलि दे के बाद विधानसभा अध्यक्ष ह सदन के कार्यवाही ल दस मिनट बर स्थगित कर दे रिहीन।
विधानसभा समाचार
प्रश्नकाल के सुरूआत म भाजपा विधायक राजेश मूणत ह राजस्व निरीक्षक के विभागीय परीक्षा म गड़बड़ी के मामला ल सदन म उठाइन। जवाब म राजस्व मंत्री टंकराम वर्मा ह बतइन कि राजस्व निरीक्षक के विभागीय परीक्षा के जांच ह ईओडब्ल्यू ले कराय जात हे अउ जांच रिपोर्ट आय के बाद दोषी मन उपर सख्त कार्रवाई करे जाय।
एखर बाद पूर्व मुख्यमंत्री भूपेश बघेल ह राजस्व मंत्री ले ए परीक्षा के जांच ल सीबीआई ले कराय के मांग करीन। कांग्रेस सदस्य राजस्व निरीक्षक के विभागीय परीक्षा म होय गड़बड़ी बर सदन म सरकार के खिलाफ नाराबाजी घलो करे बर लगिन। राजस्व मंत्री टंकराम वर्मा के जवाब ले असंतुष्ट होके कांग्रेस सदस्य मन ह सदन ले बाहिर निकल गीन।
प्रश्नकाल म भाजपा विधायक अजय चंद्राकर ह बस्तर विश्वविद्यालय म सहायक प्राध्यापक भर्ती म होय अनियमितता के मामला ल उठाइन। मुख्यमंत्री विष्णुदेव साय ह अपन जवाब म किहीन कि ए मामला के जांच ह चलत हे अउ रिपोर्ट आय के बाद एखर उपर सख्त कार्यवाही करे जाही।
उहें, सून्यकाल म नेता प्रतिपक्ष डॉक्टर चरणदास महंत अउ कांग्रेस विधायक मन ह राज्य म खाद अउ बीजा के कमी के बिसय ल उठाइन अउ स्थगन प्रस्ताव लाइन। कृषि मंत्री रामविचार नेताम के वक्तव्य के बाद विधानसभा अध्यक्ष डॉक्टर रमन सिंह ह कांग्रेस के स्थगन प्रस्ताव ल अग्राह्य कर दीन। जेखर बाद कांग्रेस विधायक मन ह गर्भगृह म पहुंचके नाराबाजी करीन। एखर बाद विधानसभा अध्यक्ष ह सदन के कार्यवाही ल पांच मिनट बर स्थगित कर दे रिहीन। गर्भगृह म पहुंचे के सेति कांग्रेस के विधायक मन ह खुदे निलंबित होगिन। सदन के कार्यवाही फेर ले सुरू होय के बाद विधानसभा अध्यक्ष ह कांग्रेस विधायक मनके निलंबन ल खतम करीन।
नये विधानसभा परिसर-पौधारोपण
वन अउ जलवायु परिवर्तन विभाग कोति ले जैव विविधता अउ वेटलैंड संरक्षण कार्यसाला के आयोजन नवा रायपुर के अरण्य भवन म करे गीस। जेमा मुख्यमंत्री विष्णुदेव साय, विधानसभा अध्यक्ष डॉक्टर रमन सिंह, नेता प्रतिपक्ष डॉक्टर चरणदास महंत, उपमुख्यमंत्री अरूण साव, विजय शर्मा, वन मंत्री केदार कश्यप अउ सबो विधायक मन सामिल होइन।
ए कार्यसाला के बाद ‘‘एक पेड़ मां के नाम‘‘ कारीकरम के आयोजन करे गीस। जेमा विधानसभा अध्यक्ष डॉक्टर रमन सिंह, मुख्यमंत्री विष्णुदेव साय समेत, मंत्री परिषद के सबो सदस्य अउ सबो विधायक मन ह गुलमोहर के पउधा लगइन।
आईईडी ग्रामीण-घायल
बीजापुर जिला के मद्देड़ थाना क्षेत्र के धनगोल गांव के जंगल म माओवादी मन कोति ले लगाय गे आईईडी ले बिस्फोट होगे, जेखर सेति एक नोनी समेत तीन झिन गांव के रहइया लोगन मन ह घायल हो गेहे। जानबा के अनुसार ए तीनों ग्रामीण मन ह धनगोल गांव के जंगल म मशरूम लेबर गे रिहीन। फेर इही बेरा म ओमन ह आईईडी के चपेट म आके गंभीर रूप ले घायल होगे रिहीन अउ उंखर गोड़ अउ चेहरा म चोट आय हे। जेखर उपचार बर एमन ल बीजापुर के जिला अस्पताल म भर्ती कराय गेहे।
विषाक्त भोजन-बीमार
बालोद जिला के डौंडीलोहारा क्षेत्र के मुड़खुसरा गांव म एके परिवार के तेरह झिन लोगन मन जहरीला खाना खाय ले बीमार होगे। जानबा के अनुसार इंखर घर म जंगली मशरूम के साग बने रिहीस, जेला खाय के बाद सबो ल उल्टी, दस्त अउ पेट पीरा होय बर लगिस, फेर तुरते एमन ल डौंडीलोहारा के सरकारी अस्पताल म इलाज बर भर्ती कराय गेहे।
ओति, कबीरधाम जिला के कवर्धा-बोड़ला म घलो जहरीला मशरूम खाय के सेति एके परिवार के चार झिन लोगन मन ह बीमार हो गेहे। ए सबो के इलाज बोड़ला के सामुदायिक स्वास्थ्य केंद्र म चलत हे।
परीक्षा नकल-एफआईआर
छत्तीसगढ़ व्यावसायिक परीक्षा मंडल-व्यापम कोति ले होय उप अभियंता सिविल अउ विद्युत यांत्रिकी भर्ती परीक्षा म अत्याधुनिक उपकरण ले नकल कराय के मामला आगू आय हे। सरकंडा बिलासपुर के शासकीय उच्चतर माध्यमिक विद्यालय के परीक्षा केंद्र म एक महिला परीक्षार्थी के संदिग्ध गतिविधि के सूचना मिले के बाद तुरते संज्ञान लेवत हुए ओखर तलासी ले गीस। ए बेरा म परीक्षार्थी के कपड़ा म छिपे हुए एक ठिक कैमरा अउ कान ले माइक्रो स्पीकर जइसे इलेक्ट्रानिक उपकरण ल जब्त करे गीस। उहें, परीक्षा केंद्र परिसर के बाहिर नकल म सहायता करे बर एक झिन आने युवती ले वॉकी-टॉकी, टैबलेट, ब्लूटूथ डिवाइस अउ मोबाइल फोन ल घलो जब्त करे गेहे। ए मामला म सरकंडा पुलिस कोति ले एफआईआर दरज करके आरोपी मन उपर जरूरी कार्रवाई करे जात हे।
सावन सोमवार
आज सावन के पहिली सम्मार हरय। ए बेरा म रईपुर समेत प्रदेसभर के भगवान भोलेनाथ के मंदिर म बड़ संख्या म भक्त मन पहुंचत हे, जउन मन ह मंदिर म जाके भगवान महादेव के बिसेस पूजा-पाठ करत हे। रईपुर म कांवड़िया मन ह महादेवघाट के हटकेश्वर महादेव म जल चढ़ाइन त, उहें, बूढे़श्वर महादेव समेत कतकोन शिव मंदिर मन म घलो आज बिहनिया ले ही लोगन मन के भीड़ लगे हे।
ओति, कबीरधाम जिला म आज पंचमुखी बूढ़ा महादेव मंदिर ले भोरमदेव बर पदयात्रा निकाले गीस। अट्ठारा किलोमीटर के ए पद यात्रा म पांच हजार ले जादा श्रध्दालु मन सामिल होइन। हर-हर महादेव अउ बोल बम के जयघोष ले गुंजत कवर्धा सहर ले लेके भोरमदेव मंदिर तक श्रध्दा अउ शिव भक्ति के महौल देखे ले मिलिस। ए यात्रा के सुरूआत उपमुख्यमंत्री विजय शर्मा ह करीन। ए बेरा म कलेक्टर गोपाल वर्मा अउ नगर पालिका अध्यक्ष चंद्रप्रकाश चंद्रवंशी ह घलो मौजूद रिहीन। एसो नर्मदा के पवित्र जल ले भोरमदेव के अभिषेक करे जाही, जेखर बर जिला प्रशासन कोति ले छै सौ पाकिट नर्मदा जल के बिसेस बेवस्था करे गेहे। ए पदयात्रा म भगवान शिव के कतकोन रूप म तियार करे गे झांकी मन ह मुख्य आकर्षण के केंद्र रइही।
अउ अब मौसम के हाल….
मौसम विभाग के अनुसार एक निम्नदाब के क्षेत्र दक्षिण पश्चिम बांग्लादेस अउ ओखर ले लगे गंगेटिक पश्चिम बंगाल के उपर हवय। ए निम्न दाब के क्षेत्र ह पश्चिम उत्तर, पश्चिम दिसा म आगू बाढ़त हे। एखर ले लगे हुए एक ठिन चक्रवाती घेरा ह दक्षिण पूर्व गंगेटिक पश्चिम बंगाल अउ ओखर ले लगे बांग्लादेस के उपर बने हुए हे। जेखर अवइया चौबीस घंटा म अउ प्रबल होय के संभावना हे। एखर असर ले प्रदेस म काली कतकोन जघा म हल्का ले मध्यम बरसा होय या फेर गरज-चमक के संग छींटा पड़े के संभावना हे। उहें, उत्तरी छत्तीसगढ़ के कुछेक जघा म हवा-गरेर, गाज गिरे अउ भारी बरसा घलो हो सकत हे। ऐति, भारी बरसा के क्षेत्र सरगुजा संभाग अउ ओखर ले लगे बिलासपुर संभाग के जिला म हो सकत हे।