छत्तीसगढ़ विधानसभा के मानसून सत्र काली 14 जुलाई ले सुरू होही। 18 जुलाई तक चलइया ए सत्र के दउरान कुल पांच ठिन बइठका होही। सत्र के दउरान सरकारी कामकाज समेत आने विधायी मामला उपर बिचार विमर्स करे जाही। उहें, किसान मनले संबंधित मुद्दा, बिसेस रूप ले खातू के कमी, राज्य म बिगड़त कानून बेवस्था के स्थिति अउ स्कूल मनके युक्ति-युक्तकरण समेत आने-आने मुद्दा उपर चर्चा करे जाही। ए सत्र बर सत्ता पक्ष अउ विपक्ष डहार ले एक हजार ले जादा सवाल लगाय गे हवय।
कांग्रेस विधायक दल-बैठक
कांग्रेस विधायक दल के बइठका आज रायपुर के प्रदेस कार्यालय राजीव भवन म चलत हवय। कांग्रेस विधायक दल के नेता डॉक्टर चरण दास महंत के अध्यक्षता म आयोजित ए बइठका म काली ले सुरू होवत विधानसभा के मानसून सत्र के दउरान आने-आने मुद्दा मन उपर सरकार ल घेरे के रणनीति तियार करे जावत हे। ए बइठका म पूर्व मुख्यमंत्री भूपेश बघेल, प्रदेस कांग्रेस अध्यक्ष दीपक बैच अउ विधायक मन सामिल होवत हवयं।
उहें, अब ले कुछेक देर बाद भारतीय जनता पार्टी के बइठका नवा रायपुर के मुख्यमंत्री निवास म होही। ए बइठका म सत्ताधारी भाजपा काली ले सुरू होवइया मानसून सत्र बर अपन रणनीति बनाही।
परख-राष्ट्रीय सर्वेक्षण
केंद्रीय शिक्षा मंत्रालय अउ राष्ट्रीय शैक्षिक अनुसंधान व प्रसिक्षण परिषद डहार ले आयोजित ‘‘परख‘‘ राष्ट्रीय सर्वेक्षण म रायगढ़ जिला ह देसभर म सुघ्घर प्रदर्सन करे हवय। जिला म तीसरी, छटवीं अउ नवमीं कक्षा के गांव के छात्र-छात्रा मन के परिणाम राष्ट्रीय औसत ले बेहतर आय हवय। पाछू बछर दिसंबर म होय ए सर्वेक्षण म रायगढ़ जिला के 91 ठिन स्कूल के 325 शिक्षक अउ दू हजार सात सौ ले जादा पढ़ईयया लइका मन सामिल होय रिहीन। ए सर्वेक्षण म शासकीय, मान्यता प्राप्त अशासकीय अउ अनुदान प्राप्त स्कूल के पढ़ईयया लइका मन ल बहुविकल्पीय प्रश्न के जरिया ले आंके जाही।
हाईकोर्ट-आरटीई आदेश
छत्तीसगढ़ उच्च न्यायालय ह शिक्षा के अधिकार अधिनियम-आर.टी.ई. के तहत भिलाई के रिसाली स्थित डी.पी.एस., सेक्टर-10 के शंकराचार्य स्कूल अउ डी.ए.वी. हुडका माइलस्टोन सकूल मन ले निष्कासि करे गे 74 लइका मन ल फेर प्रवेस अउ सरलग पढ़ई के अनुमति देवय के आदेस दीन हे। संगेसंग कोर्ट ह दुरूग के जिला शिक्षा अधिकारी के ओ आदेस ल निरस्त कर दीन, जेमा ए लइका मन ल स्कूल ले निकाले के निरदेस दे गे रिहीस।
नगरीय निकाय-पुरस्कार
स्वच्छता के मानक म सुघ्घर प्रदर्सन खातिर छत्तीसगढ़ के 7 ठिन नगरीय निकाय मन ल पुरस्कार दे जाही। अवइया 17 जुलाई के नई दिल्ली म आयोजित होवइया स्वच्छ सर्वेक्षण पुरस्कार समारोह म राष्ट्रपति द्रौपदी मुर्मू ह राज्य के 7 ठिन नगरीय निकाय मन ल राष्ट्रीय पुरस्कार ले सम्मानित करहीं।
समारोह म छत्तीसगढ़ के 3 ठिन नगरी निकाय मन ल प्रेसिडेंट अवार्ड ले सम्मानित करे जाही, जेमा बिलासपुर नगर निगम ल 3 लाख ले 10 लाख आबादी वाले नगरीय निकाय, कुम्हारी नगर पालिका ल 20 ले 50 हजार आबादी वाले अउ बिल्हा नगर पंचायत ल 20 हजार ले कम आबादी वाले शहर के श्रेणी म ए सम्मान दे जाही। एखर अलावा रायपुर नगर निगम ल साफ-सफाई खातिर राज्य स्तर म सुघ्घर कारज करे खातिर केंद्रीय आवास अउ सहरी कार्य मंत्रालय डहार ले मिनिस्ट्रियल अवार्ड दे जाही। उहें, अंबिकापुर नगर निगम ल 50 हजार ले 3 लाख आबादी वाले नगर निगम, पाटन नगर पंचायत अउ बिश्रामपुर नगर पंचायत ल 20 हजार ले कम आबादी वाले सहर के श्रेणी ल एस.एस.एल. बर चुने गे हवय।
मुख्यमंत्री विष्णुदेव साय अउ उपमुख्यमंत्री अरूण साव ह पुरस्कार बर चयनित नगरीय निकाय मन ल अपन बधाई दे हवय।
रेल डिब्बा-सीसीटीवी कैमरा
यात्री सुरक्षा बढ़ाय के उद्देस्य ले रेलवे ह जम्मों डिब्बा म सीसीटीवी कैमरा लगाय के निर्णय लीन हे। आज नई दिल्ली म आयोजित बइठका म केंंद्रीय रेल मंत्री अश्विनी वैष्णव अउ केंद्रीय रेल राज्यमंत्री रवनीत सिंह बिट्टू ह इंजन अउ कोचों म सीसीटीवी कैमरा लगाय के प्रगति के समीक्षा करीन।
कर्मचारी-प्रदर्शन
प्रदेस म राष्ट्रीय स्वास्थ्य मिशन के कर्मचारी मन अवइया 16 अउ 17 जुलाई के प्रदर्सन करे के तियारी म हवय। करमचारी मन 16 जुलाई के जिला मुख्यालय मन म धरना प्रदर्सन कर कलेक्टर ल मुख्यमंत्री के नांव अपन ज्ञापन ल सौंपही। उहें, 17 जुलाई के रायपुर म विधानसभा के घेराव करे जाही। करमचारी मनके ए प्रदर्सन ले प्रदेसभर के सरकारी अस्पताल मन म स्वास्थ्य सेवा प्रभावित होही। प्रदेस के मेडिकल कालेज अस्पताल ले लेकर ग्राम स्तर तक राष्ट्रीय स्वास्थ्य मिशन के 16 हजार संविदा स्वास्थ्य कर्मी मन कामबूता करत हवय। एमा डॉक्टर, नर्स, फार्मासिस्ट, लैब अउ एक्सरे टेक्नीशियन, ए.एन.एम. समेत कार्यालयीन अस्पताल के सफाई कर्मचारी अउ हाउस कीपिंग स्टाफ सामिल हवय। कर्मचारी मन ह मांग करीन हे कि राष्ट्रीय स्वास्थ्य मिशन म कामबूता करत कर्मचारी मन ल बेहतर वेतन, अनुकंपा, जॉब सुरक्षा, पे स्केल, नई पेंशन स्कीम, दुर्घटना बीमा, चिकित्सा परिचर्या जइसन सुविधा प्रदान करे जाही। ए कर्मचारी मन 10 ले 15 जुलाई तक काला पट्टी पहिनकर कामबूता करत हवय।
केंद्रीय राज्यमंत्री-जनजातीय संग्रहालय
केंद्रीय जनजातीय राज्यमंत्री दुर्गादास उईके ह दू दिन के अपन छत्तीसगढ़ प्रवास के दउरान काली नवा रायपुर के आदिमजाति अनुसंधान अउ प्रसिक्षण संस्थान के नवा बने छत्तीसगढ़ जनजाति संग्रहालय के निरीक्षण करीन। ए मउका म श्री उईके ह किहीन कि ए संग्रहालय ह भावी युवा पीढ़ी म गौरवसाली आदिवासी संस्कृति बर आत्म गौरव के भाव पैदा करे म सुघ्घर भूमिका निभाही। ए संग्रहालय के बने ले आमलोगन मन घलो आदिवासी सांस्कृतिक विरासत ल जान सकही। केंद्रीय राज्यमंत्री ह किहीन कि केंद्र सरकार डहार ले जनजातीय वर्ग के हित म कतकोन योजना संचालित करे जावत हे।
केंद्रीय राज्यमंत्री डहार ले टी.आर.टी.आई. परिसर म बनत शहीद वीरनारायण सिंह आदिवासी स्वतंत्रता संग्राम सेनानी स्मारक सह संग्रहालय के समीक्षा करे गीस। ओमन संग्रहालय के डिजीटल प्रेजेंटेशन ल देख के ए संबंध म जरूरी दिसा-निरदेस दीन। ए संग्रहालय के 30 सितंबर तक पूरा करे के लक्ष्य राखे गेहे।
जवान-श्रध्दांजलि
मोहला-मानपुर-अंबागढ़ चौकी जिला के गांव कोरकोट्टी म 12 जुलाई दू हजार नौ म होय माओवादी हमला म पुलिस अधीक्षक विनोद चौबे समेत 29 झिन पुलिस जवान मन ल काली श्रध्दांजलि दे गीस। ए मउका म जिला के रक्षित केंद्र के संगेसंग थाना, चौकी अउ कैंप म श्रध्दांजलि कारीकरम के आयोजन करे गीस। ए मउका म जिला न्यायाधीश सुषमा सावंत, राजनांदगांव रेंज के पुलिस महानिरीक्षक अभिषेक शांडिल्य अउ पुलिस अधीक्षक मोहित गर्ग समेत पुलिस विभाग के आने अधिकारी मन घलो मौजूद रिहीन। श्रध्दांजलि कारीकरम के बाद पउधा रोपण घलो करे गीस।
सॉफ्टबॉल/एथलेटिक्स-प्रतियोगिता
चीन के शियान म काली ले सुरू होवइया एशिया कप सॉफ्टबॉल चैंपियनशिप बर छत्तीसगढ़ के दू झिन महिला खिलाड़ी-चंद्रकला तेलम अउ शालू डहरिया के चयन भारतीय टीम म होय हे। चंद्रकला तेलम बीजापुर जिला के आवापल्ली अउ शालू डहरिया जांजगीर-चांपा जिला के पामगढ़ म रहिथे। उहें, बीजापुर जिला के श्रम निरीक्षक सोपान कर्णेवार भारतीय सॉफ्टबॉल टीम के कोच होही। ए प्रतियोगिता 20 जुलाई तक चलही। ए प्रतियोगिता के विजेता अउ उपविजेता टीम ल वर्ल्डकप सॉफ्टबॉल चैंपियनशिप म भाग लेवय के मउका मिलही।
उहें, बेंगलूरू म आयोजित अंतर्राष्ट्रीय पैरा एथलेटिक्स चैंपियनशिप म महासमुंद के नेत्रहीन सुखदेव ह स्वर्ण पदक जीतिस हवय। सुखदेव ह 15 सौ मीटर दउड़ ल 4 दसमलव तीन-छै मिनट म पूरा कर स्वर्ण पदक हासिल करीन। अभी के बेरा म सुखदेव भारतीय खेल प्राधिकरण बेंगलूरू म अभ्यास करत हवय।