प्रधानमंत्री नरेंद्र मोदी ह किहीन हे कि रोजगार मेला युवा मन ल सशक्त बनाय अउ विकसित भारत के निर्माण म ओमन के मदद लेके हमर सरकार के प्रतिबध्दता ल देखाथे। ओमन किहीन कि आज दुनिया मानथे कि भारत के दू ठिन बड़का शक्ति हवय, एक ओखर जनसंख्या अउ दूसर ओखर लोकतंत्र। प्रधानमंत्री ह आज वीडियोकॉन्फ्रेंसिंग के माध्यम ले आने-आने सरकारी विभाग म इंक्यावन हजार ले जादा युवा मन ल सरकारी नौकरी के नियुक्ति पत्र बांटे के बाद रोजगार मेला म बोलत रिहीन।
नव नियुक्त मन ल बधई देवत हुए श्री मोदी ह किहीन कि सरकार के ए रोजगार मेला पहल ले लाखों युवा केंद्र सरकार म पक्का नौकरी पा चुके हे अउ देस के निर्माण म बड़का भूमिका निभावत हे। प्रधानमंत्री ह देस म बिकसित होवत इको सिस्टम के घलो बात करीन, जउन ह देस के युवा मन के क्षमता ल बढ़ावत हे।
निजी क्षेत्र म रोजगार के नवा-नवा मउका जुटाय उपर प्रधानमंत्री ह बतइन कि हाले म रोजगार ले जुड़े प्रोत्साहन योजना ल मंजूरी दे गेहे। ओमन बतइन कि ए पहल बर सरकार ह लगभग एक लाख करोड़ रूपिया आबंटित करे हे अउ एखर ले साढ़े तीन करोड़ रोजगार दे म मदद मिलही।
छत्तीसगढ़ रोजगार मेला
ऐति, छत्तीसगढ़ के राजधानी रईपुर म दक्षिण पूर्व मध्य रेलवे रइपुर मंडल कोति ले राखे गे रोजगार मेला म केंद्रीय जनजातीय कार्य राज्यमंत्री दुर्गादास उइके ह बहत्तर युवा मन ल नियुक्ति पत्र सौंपिन। ए मउका म श्री उइके ह किहीन कि युवा मन ल रोजगार मेला म जेन नौकरी मिले हे ओहा बस एक नौकरी नइ, फेर बड़का जवाबदारी घलो हे। ओमन किहीन कि विकसित भारत के जिम्मेदारी युवा मन के कंधा उपर हे, अउ सरकार ह हर देसवासी के सपना सच करे बर पूरा लगन ले काम करत हे। केंद्रीय राज्य मंत्री ह किहीन कि नवा नियुक्त करमचारी मन ल डिजीटल प्लेटफॉर्म के माध्यम ले परसिक्षण दे जावत हे, जेमा चौदह सौ ले जादा पाठ्यक्रम हवय।
कारीकरम म रईपुर सांसद बृजमोहन अग्रवाल, विधायक राजेश मूणत, पुरंदर मिश्रा, सुनील सोनी, मोतीलाल साहू अउ रेलवे के अपर रेलमंडल प्रबंधक बजरंग अग्रवाल समेत अधिकारी अउ करमचारी मन बइठे रिहीन।
मुख्यमंत्री-सम्मान समारोह
मुख्यमंत्री विष्णुदेव साय ह आज रईपुर म राखे गे पीएसवाय उत्कृष्टता सम्मान समारोह म आने-आने विधा के प्रतिभावन विद्यार्थी मन ल अउ सुघ्घर प्रदर्सन करइया स्कूल मन ल सम्मानित करीन। ए मउका म मुख्यमंत्री ह किहीन कि शिक्षा ह बस डिग्री पाय के माध्यम नइ हे, फेर समाज अउ देस सेवा के रद्दा हे। ओमन किहीन कि शिक्षा ह कोनो भी क्षेत्र म सफलता के मूल आधार होथे।
श्री साय ह किहीन कि राज्य सरकार ह नवा शिक्षा नीति ल परभावी ढंग ले लागू करे बर सरलग परयास करत हे। ओमन किहीन कि देस म लागू करे गे नवा शिक्षा नीति के तहत छत्तीसगढ़ म अब स्थानीय भाखा म घलो शिक्षा उपलब्ध होवत हे। बस्तर जइसन क्षेत्र म उंहा के भाखा मन म पढ़ई-लिखई कराय जावत हे। उहें, प्रदेस म डॉक्टरी के पढ़ई हिंदी म घलो करवाय जावत हे।
कारीकरम ल रईपुर सांसद बृजमोहन अग्रवाल अउ विधायक धरमलाल कौशिक ह घलो संबोधित करीन।
व्यापारी-बिल
राज्य सरकार ह प्रदेस के छोटे व्यापारी मनके दस बछर ले जादा रूके जुन्ना मामला मन म पच्चीस हजार रूपिया तक के वैट देनदारी ल खतम करे के फइसला करे हे। एखर ले चालीस हजार ले जादा व्यापारी मन ल फायदा मिलही। संगेसंग बांसठ हजार ले जादा मुकदमा के मामला घलो कम हो जाही। एखर अलावा ईज-ऑफ डूइंग बिजनेस के तहत जीएसटी नियम म घलो कतकोन सुधार करे जाही। ए बारे म काली राज्य मंत्री मंडल के बइठका म छत्तीसगढ़ माल और सेवा कर संशोधन विधेयक अउ छत्तीसगढ़ बकाया कर ब्याज और शास्ति के निपटान संशोधन विधेयक के अनुमोदन करे गीस। ए दूनों विधेयक ल विधानसभा के मानसून सत्र म प्रस्तुत करे जाही।
माओवादी-आत्मसमर्पण
सुकमा जिला म आज एक करोड़ अट्ठारा लाख रूपिया के तेईस झन इनामी माओवादी मन पुलिस के आगू आत्मसमर्पण करीन। एमा तीन दंपत्ति घलो हे। जिला के पुलिस अधीक्षक किरण चव्हान ह बतइन कि राज्य सरकार के पुनर्वास नीति अउ नियद नेल्लानार योजना ले परभावित होके ए नक्सली मन आत्मसमर्पण करे हे। ए सबो माओवादी मन ल पुनर्वास नीति म पचास-पचास हजार रूपिया के प्रोत्साहन रासि दे जाही। आत्मसमर्पित माओवादी मन म पीएलजीए बटालियन म काम करत आठ हार्डकोर नक्सली घलो सामिल हे। एमन उपर मुठभेड़, आईईडी बिस्फोट, फायरिंग समेत आने-आने माओवादी घटना म सामिल रहय के आरोप हे।
मुख्यमंत्री विष्णुदेव साय ह किहीन हे कि तेईस इनामी माओवादी मनके आत्मसमर्पण ह सरकार के नियद नेल्लानार जइसन योजना के परिणाम हे। बस्तर बदलत हे, बंदूक थमत हे अउ उंहा अब गोली नइ फेर बिकास के बोली सुनाई देवत हे।
ओति, गरियाबंद जिला म माओवादी मनके खिलाफ अभियान सरलग चलत हे। केंद्रीय रिजर्व पुलिस बल-सीआरपीएफ के टीम ह काली तलासी अभियान म जुगाड़ इंदागांव क्षेत्र के जंगल म माओवादी मन कोति ले तीन जघा म लुकाय गे समान ल जब्ती करके नष्ट करीन।
आंगनबाड़ी-ब्लैक लिस्टेड
राज्य सरकार ह कतकोन आंगनबाड़ी केंद्र म लइका अउ माईलोगिन बर भेजे गे समान के खराब होय के मामला म कार्रवाई करत हुए छै ठन सप्लाई एजेंसी ल जेम पोर्टल ले ब्लैक लिस्ट कर देहे। अवइया समय म ए एजेंसी मन कोनो भी प्रकार के समान के सरकारी आपूर्ति नइ कर पाही।
बच्चे-मौत
जांजगीर-चांपा जिला म बलौदा थाना क्षेत्र के भैंसतरा गांव म आज तरिया म नहाय बर गे एक ही परिवार के चार झिन लइका मन के डूबे ले मउत होगे। एमा तीन नोनी अउ एक बाबू सामिल हे। मिले जानकारी के अनुसार घटना के सूचना मिलतेच बलौदा पुलिस मउका म पहुंचिस अउ पंचनामा करके आगू के कार्रवाई करत हे।
राज्यपाल-निरीक्षण
राज्यपाल रमेन डेका ह काली बिलासपुर ले संचालित अटल बिहारी वाजपेयी विश्वविद्यालय अउ डॉक्टर सी.वी. रमन विश्वविद्यालय के औचक निरीक्षण करीन। ए मउका म श्री डेका ह संबंधित विश्वविद्यालय के कुलपति अउ शैक्षणिक स्टाफ के बइठका लेके विश्वविद्यालय के कामकाज के बिस्तार ले समीक्षा करीन। ओमन किहीन कि महान मनखे मन के नांव म चलत विश्वविद्यालय पढ़ई के क्षेत्र म नवा मानक स्थापित करय। एखर बर विश्वविद्यालय प्रशासन अउ सैक्षणिक स्टाफ ल परयास करना चाही। राज्यपाल ह विश्वविद्यालय म प्राध्यापक अउ छात्र मनके बीच सुघ्घर तालमेल उपर जोर दीन।
उहें, राज्यपाल ह आज अपन कोरबा प्रवास म जिला पंचायत परिसर म ‘‘एक पेड़ मां के नाम‘‘ अभियान म बादाम के पउधा लगइन।
अउ अब थोरकुन समाचार सार म –
– छत्तीसगढ़ विधान के मानसून सत्र चौदह जुलाई ले सुरू होही। एखर बारे म कांग्रेस विधायक दल के बइठका काली तेरह जुलाई के रईपुर के राजीव भवन म होही।
– जिला रोजगार केंद्र म पंजीकृत युवा मनके रोजगार पंजीयन ल आधार कार्ड ले लिंक होना अनिवार्य कर दे गेहे। एखर बर रोजगार पंजीयन के वेबसाइट या प्ले स्टोर म ऐप के माध्यम ले अपन पंजीयन करा जाय सकत हे।
– बलौदाबाजार जिला के सिमगा पुलिस ह नशा के दवई बेचइया तीन आरोपी ल गिरफ्तार करे हे।
– जांजगीर-चांपा जिला के ग्राम पकरिया-झूलन म गाज के चपेट म आय ले एक मनखे के मउत होगे।