प्रदेस म पाछू कुछेक दिन ले होवत लगातार बरसा ले कतकोन नदी-नाला के जलस्तर बाढ़ गेहे, जेखर ले अवई-जवई प्रभावित होय हे। उहें, सामान्य जनजीवन मन घलो असर पड़त हे।
दुर्ग जिला के महमरा एनीकेट ले नौ फीट उपर पानी बहत हे। जल संसाधन विभाग के कार्यपालन यंत्री देव शुक्ला ह बतइन कि मोंगरा, घुमरिया, सुखा नाला अउ खातु टोला जलाशय ले शिवनाथ नदी म करीब छै हजार क्यूसेक पानी छोड़े जावत हे। एखर अलावा कैचमेंट एरिया म अच्छा बरसा होय के कारण पानी के आवक बने होय हे, जेखर चलत बाढ़ के खतरा टले नइ हे।
उहें, राजनांदगांव जिला के गैंदाटोला ले फाफामारा रद्दा म स्थित पूल ल पार करत समय काली मंझनिया साइकिल सवार दू मनखे पानी के तेज बहाव म बहे गीस। एमा ले एक के शव बरामद कर ले गेहे, फेर दूसर मनखे के तालास एसडीआरएफ के टीम डहार ले करे जात हे। मउका म होमगार्ड सेनानी अरूण कुमार अउ उंखर संग एसडीएम अउ गैंदाटोला के थानेदार मौजूद हे।
इही बीच, प्रदेस के कतकोन जघा म अवइया चौबीस घंटा के दउरान हल्का ले मध्यम बरसा होय अउ गरज-चमक के संग छींटा पड़े के संभावना हे। मौसम विज्ञानी एच.पी. चन्द्रा ह आकाशवाणी समाचार ल बतइन कि काली मध्य छत्तीसगढ़ के कुछेक जिला म भारी बरसा होही। ओमन ह बतइन कि सोलह जुलाई ले बरसा के गतिविधि म कमी होय के संभावना बनत हे।
शराब घोटाला-निलंबन कार्रवाई
प्रदेस म दू हजार करोड़ रूपिया ले जादा के सराब घोटाला मामला म राज्य सरकार ह आबकारी विभाग के बाईस अधिकारी मन ल निलंबित कर दीन। ए सबंध म वाणिज्यकर विभाग डहार ले आदेस जारी कर दे गेहे। पाछू सात जुलाई के उनतीस आबकारी अधिकारी मनके खिलाफ आर्थिक अपराध अन्वेषण ब्यूरो-ईओडब्ल्यू ह बिसेस कोर्ट म तेईस सौ पन्ना के चालान पेस करे रिहीस, जेला कोर्ट ह स्वीकार कर लेहे।
जानबा के मुताबिक सराब घोटाला म ईओडब्ल्यू डहार ले उनतीस आरोपी मन ल समन जारी करे गे रिहीस, फेर गिरफ्तारी के डर ले आरोपी कोर्ट ह पेस नइ होइस। अदालत ह सबो आरोपी मन ल बीस अगस्त पेस होय बर नोटिस जारी करे हे।
रासायनिक उर्वरक-वितरण
प्रदेस म चालू खरीफ सीजन बर किसान मन ल आने-आने प्रकार के रासायनिक उर्वरक बांटे जात हे। अब तक किसान मन ल आठ लाख पैंतीस हजार मीट्रिक टन ले जादा उर्वरक बांटे जा चुके हे, जेन लक्ष्य के संतावन प्रतिसत हे। राज्य म चालू खरीफ सीजन म सहकारिता अउ निजी क्षेत्र के जरिया ले किसान मन ल चौदह लाख बैंसठ हजार मीट्रिक टन खाद के वितरण के लक्ष्य राखे गेहे।
उहें, कृषि विभाग डहार ले राज्य म रासायनिक उर्वरक बीज अउ पौध संरक्षण औषधि के गुणवत्ता उपर घलो बिसेस निगरानी राखे जावत हे। कृषि विभाग के अधिकारी अपन-अपन क्षेत्र के लगातार दउरा करके बीज, खाद अउ कीटनाशक औषधि के नमूना लेवत हे, जेखर जांच गुणवत्ता नियंत्रण प्रयोगशाला म करे जात हे। ए खरीफ सीजन म राज्य म रासायनिक उर्वरक, बीज अउ पौध संरक्षण औषधि के जांच बर अब तक छै हजार ले जादा नमूना ले गेहे।
माओवादी-गिरफ्तार
सुकमा जिला म सुरक्षाबल मन ह संयुक्त अभियान म आने-आने थाना छेत्र ले दू इनामी संग छै माओवादी ल गिरफ्तार करे हे। कोंटा थाना छेत्र ले गिरफ्तार करे गे दू माओवादी मन ले एक झन उपर दू लाख अउ एक आने माओवादी उपर एक लाख रूपिया के इनाम घोसित करे गे रिहीस। ए दूनों माओवादी मन उपर फायरिंग के घटना अउ हत्या जइसे वारदात म सामिल होय के आरोप हे।
उहें, भेज्जी थाना छेत्र ले गिरफ्तार करे गे चार माओवादी मन तीर ले सुरक्षा बल मन ह बिस्फोटक समान बरामद करे हे।
अनिमेष कुजूर-रिकॉर्ड
छत्तीसगढ़ के अनिमेष कुजूर ह ग्रीस म होवइया ड्रोमिया इंटरनेशनल स्प्रिंट मीट म सौ मीटर दौड़ ल दस दसमलव एक-आठ सेकेंड म पूरा करके नवा राष्ट्रीय रिकॉर्ड बनाय हे। अनिमेष के ए उपलब्धि बर मुख्यमंत्री विष्णुदेव साय ह ओमन ल बधाई दीन। श्री साय ह कहे हे कि उंखर ए ऐतिहासिक उपलब्धि युवा मन ल खेल म आगू बाढ़े के प्रेरणा देही।
एखर पहिली, अनिमेष ह दक्षिण कोरिया म होवइया एशियन एथलेटिक्स चैम्यिनशिप म दू सौ मीटर दौड़ ल बीस दसमलव तीन-दू सेकेंड म पूरा करे के राष्ट्रीय रिकॉर्ड बनाय रिहीस।
विधानसभा भवन-निरीक्षण
उपमुख्यमंत्री अरूण साव ह आज नवा रईपुर म नवा बनत छत्तीसगढ़ विधानसभा के नवा भवन के निर्माण काम के निरीक्षण करीन। ए दउरान ओमन लोक निर्माण विभाग के अधिकारी मन ल निर्धारित समय-सीमा म सबो काम ल पूरा करे के निरदेस दीन। श्री साव ह बतइन कि लोक निर्माण विभाग डहार ले सबो काम ल सितंबर महिना तक पूरा करे के लक्ष्य राखे गेहे। एखर बाद अवइया एक नवंबर के राज्योत्सव म नवा विधानसभा भवन के लोकार्पण करे जाही। ओमन ह बतइन कि नवा विधानसभा भवन म छत्तीसगढ़ के संस्कृति सिल्प के झलक देखे ल मिलही।
जानबा के मुताबिक नवा रईपुर म छत्तीसगढ़ विधानसभा के नवा भवन बावन एकड़ क्षेत्र म बनत हे। ए भवन के सदन म दू सौ सदस्य मनके बइठक क्षमता होही। इंहा पांच सौ दर्सक क्षमता के ऑडिटोरियम घलो बनाय जाही।
वायुसेना-ऑलाइन पंजीयन
भारतीय वायुसेना म भर्ती बर काली ले ऑनलाइन पंजीयन के प्रक्रिया सुरू होही, जउन इकतीस जुलाई तक चलही। ऑनलाइन आवेदन भारतीय वायु सेना के वेबसाइट म करे जा सकत हे। जादा जानकारी बर जिला रोजगार अउ स्वरोजगार मार्गदर्सन केंद्र ले घलो संपर्क करे जा सकत हे।
जीपीएम-पौधारोपण
‘‘एक पेड़ मां के नाम‘‘ अभियान के तहत गौरेला-पेण्ड्रा-मरवाही जिला म काली एके दिन म पैंतालीस हजार ले जादा पउधा के रोपण करे गीस। जिला प्रशासन डहार ले होवइया पउधा रोपण कारीकरम म डोंगरिया गांव के रीपा परिसर, एकलव्य आदर्श आवासीय विद्यालय के संग प्राथमिक अउ माध्यमिक शाला परिसर म जनप्रतिनिधि, अधिकारी-कर्मचारी के संग सबो लोगन मन ह पउधा लगइन। उहें, जिला के ग्राम पंचायत म घलो पउधा रोपण कारीकरम के आयोजन करे गीस, जेखर बाद कलेक्टर लीना कमलेश मंडावी ह सबो लोगन मन ल पउधा के देखरेख अउ पर्यावरण संरक्षण के सपथ दिलाइन।
गुरू पूर्णिमा
गुरू पूर्णिमा के बेरा म आज प्रदेस भर म आने-आने कारीकरम के आयोजन करे गीस। मुख्यमंत्री विष्णुदेव साय रायगढ़ जिला के गांव बनोरा स्थित अघोर गुरू पीठ म गुरू दर्सन बर पहुंचिन। ए दउरान ओमन ह गुरूपीठ आश्रम के उपासना के जघा म अघोरेश्वर अवधूत भगवान राम के प्रतिमा के दर्सन करके प्रदेस के सुख-समृध्दि अउ खुशहाली के कामना करीन। ओमन ह आश्रम म प्रियदर्सी भगवान राम के दर्सन घलो करीन। ए बेरा म वित्त मंत्री ओ.पी. चौधरी, लोक सभा सांसद राधेश्याम राठिया के संग आने जनप्रतिनिधि मन मौजूद रिहीन।
ट्रेन परिचालन
दक्षिण पूर्व रेलवे के चक्रधरपुर मंडल म गामहारीया जंक्शन के आदित्यपुर सेक्सन के अप अउ डाउन लाइन म टै्रक आधुनिकीकरण के काम करे जाही। एखर कारण दक्षिण पूर्व मध्य रेलवे ले संबंधित कुछेक ट्रेन के परिचालन पंद्रह जुलाई ले चार अक्टूबर तक प्रभावित रइही। एमा टाटा-बिलासपुर-टाटा एक्सप्रेस दू अगस्त तक अउ टाटा-नेता जी सुभाषचंद्र बोस-टाटा एक्सप्रेस अप अउ डाउन लाइन छब्बीस अगस्त तक रद्द रइही। उहें, कुछ ट्रेन ल परिवर्तित रद्दा ले चलाय जाही। एमा पूरी-योगनगरी ऋषिकेश उत्कल एक्सप्रेस अउ दुर्ग ले चलइया दुर्ग-आरा साउथ बिहार एक्सप्रेस सामिल हे।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म काली ग्यारा जुलाई के मंत्रालय म बिहनिया साढ़े ग्यारा बजे ले राज्य मंत्रिपरिषद के बइठका होही।
– एंटी करप्शन ब्यूरो-एसीबी के टीम ह बलरामपुर के एक पटवारी ल सीमांकन के नाम म पंद्रह हजार रूपिया के रिस्वत लेवत रंगे हाथ गिरफ्तार करे हे।
– मुंगेली जिला के चकरभाठा स्थित शासकीय प्राथमिक शाला म पदस्थ सहायक शिक्षक पंचायत रितेश अग्रवाल ल लगातार अनुपस्थित रेहे के सेति सेवा ले बर्खास्त कर दे गेहे।
अउ
– रईपुर-महासमुंद के राष्ट्रीय राजमार्ग क्रमांक -तिरपन म पाछू रतिहा महानदी तीर अज्ञात गाड़ी के चपेट म आय ले दूपहिया म सवार एक माईलोगिन के मउत होगिस, फेर एक आने माईलोगन के इलाज सामुदायिक स्वास्थ्य केंद्र आरंग म चलत हे।